Улатӑр хулинче пурӑнакан Алексей Старчков хӑйӗн рекордне кӑна мар, Орел хулинчи арҫыннӑн тата Гиннес рекорчӗсене те ҫӗнетнӗ. Мӗн тунӑ-ха вӑл?
Алексей 12,5 килограмм таякан кувалдӑпа автомобиль покрышкине 1 сехет те 36 минутра 2750 хутчен ҫапнӑ. Вӑл кашни 2 ҫеккунтра ҫапнӑ. Ку кӑтартӑва Гиннес рекорчӗсен кӗнекине кӗртме те пулать.
Орел хулинчи Виктор Стебаков вара 13 килограмм таякан кувалдӑпа машина покрышкине 2017 хут ҫапнӑ.
Улатӑр хулинчи биолог Виктория Штратрикова НТВ телеканалпа пыракан «Своя игра» кӑларӑма хутшӑннӑ. Кӑларӑм ӗнер, нарӑсӑн 3-мӗшӗнче, эфира тухнӑ.
Пирӗн ентеш ӑс-тӑн вӑййисен ертӳҫипе Евгений Быстровпа (Балаково хули) тата Питӗрти менеджерпа Сергей Смирновпа тупӑшнӑ. Виктория Штратникова 19 пин балл пухса вӗсене ҫӗнтернӗ.
Пирӗн ентеш Мускав патшалӑх унивеситетӗнче вӗреннӗ, халӗ унта биологра ӗҫлет.
Улатӑр хулинче пурӑнакан хӗрарӑм каллех улталаннӑ. Малтанхинче вӑл газ уҫлакан предприятие инвестици хывас тесе ултавҫӑсен капкӑнне ҫакланнӑ, хальхинче хӑйӗн патне банк ӗҫченӗ тесе шӑнкӑравланӑ этеме ӗненнӗ.
53-ри хӗрарӑм пакунлисене каласа кӑтартнӑ тӑрӑх, ун патне палламан ҫын шӑнкӑравланӑ, хӑйӗнпе банк ӗҫченӗ тесе паллаштарнӑ. Вӑл ӑна такамсем ун ячӗпе 199 пин тенкӗ кредит илесшӗн тесе тыттарнӑ. Укҫана «хӑрушсӑр» счет ҫине куҫарма ыйтнӑ. Каланине итленӗ хӗрарӑм. Тепӗр кунне вӑл тата тепӗр 78 пин тенкӗ куҫарса панӑ. Ҫапла майпа вӑл икӗ кунта 277 пин тенкӗсӗр тӑрса та юлнӑ.
Гигиена тата эпидемиологи центрӗ пӗлтернӗ тӑрӑх, Чӑваш Енре пӗлтӗрхи 10 уйӑхра 46 ҫын коклюшпа чирленӗ, 11 уйӑхра ку кӑтарту 93-е ҫитнӗ.
Патӑрьел, Муркаш, Комсомольски, Шӑмӑршӑ, Етӗрне муниципаллӑ округӗсенче - 1-ер ҫын, Тӑвай округӗнче, Улатӑрта тата Ҫӗмӗрлере - 2-шер ҫын, Куславкка округӗнче, Канашра - 3-шер ҫын, Шупашкар округӗнче - 6 ҫын, Ҫӗнӗ Шупашкарта - 24 ҫын, Шупашкарта 46 ҫын коклюшпа чирленӗ. Пурте -17 ҫул тултарман ачасем.
Чирленисенчен 75-шӗ - коклюшран прививка туманнисем.
Кӑрлач уйӑхӗн 3-мӗшӗнче Улатӑрти ҫул-йӗрпе патруль службин ӗҫченӗсем юр ҫинче выртакан арҫынна асӑрханӑ. Вӗсем ӑна машинӑна лартнӑ та васкавлӑ медпулӑшу чӗннӗ.
Арҫын 20 градус сивӗре юр ҫинче самай вӑхӑт выртнӑ, пӳрнисене, питне тӑм илме ӗлкӗрнӗ. Васкавлӑ медпулӑшу килсен инспекторсем арҫынна машинӑна вырнаҫтарма пулӑшнӑ, кайран пульницӑна ҫити ӑсатнӑ.
Ҫак арҫын, 39 ҫултискер, Хусантан мӑшӑрӗпе тӑванӗсем патне хӑнана килнӗ иккен.
Ӗнер каҫхи 11 сехетре Пӑрачкав ҫывӑхӗнче, Улатӑр енчен килнӗ ҫӗрте, астобус ҫаврӑнса ӳкнӗ.
Автобус Чулхуларан Тольятти хулине кайма тухнӑ. ШӖМ малтанлӑха пӗлтернӗ тӑрӑх, водитель ҫул пӑрӑнчӑкӗнче руле итлеттереймен, ҫул ҫинчен тухса кайса кювета чӑмнӑ. Автобус хӑяккӑн ҫаврӑнса ӳкнӗ. Аварире 2 ҫын вилнӗ. 10 ҫын тухтӑрсенчен пулӑшу ыйтнӑ.
Халӗ ӗҫ-пуҫа уҫӑмлатаҫҫӗ. ЧР прокуратури ӑна тӗрӗслесе тӑрать. Автобусра вахтовиксем пулма пултарнӑ.
Чӑваш Енре халӗ Вырӑс провинцийӗн музейӗ те пур. Вӑл Улатӑрта хула училищин революци умӗнхи ҫуртӗнче вырнаҫнӑ.
Икӗ хутлӑ ҫурта 1911 ҫулта хута янӑ. Вӑл истори тата культура историйӗсен списокне кӗрет. Унта вырӑс провинцийӗн музейӗ пуласси пирки 2021 ҫултах пӗлтернӗ. Ҫурта юсаса ҫӗнетнӗ, халӗ ав вӑл хӑйӗн алӑкне уҫнӑ.
Экспозицире - Улатӑр хулин тата Улатӑр уесӗн историйӗ: 1952 ҫултан пуҫласа 20-мӗш ӗмӗрӗн 30-мӗш ҫулӗсемччен.
Ҫӗнӗ ҫулта ачасем кӑна мар, ваттисем те асамлӑх кӗтеҫҫӗ. ЧР Ӗҫлев министерствин пресс-служби пӗлтернӗ тӑрӑх, вӗсене уяв хаваслӑхӗ парнелес тесе акци пуҫарнӑ.
Улатӑрти социаллӑ пулӑшу паракан комплекслӑ центра ҫӳрекенсем Хӗл мучипе Юр пикерен парнесене тивӗҫеҫҫӗ. Ӗнер асамҫӑсем Улатӑрти Агния Васильевна патне ҫитнӗ. Кинемей Хӗл мучипе Юр пике килнӗшӗн питӗ савӑннӑ.
«Кун пек парне кӗтменччӗ. Хама ача пекех туятӑп. Саламланӑшӑн тата канфетсемшӗн пысӑк тав!» - тенӗ Агния Васильевна.
Чӑваш Ен Элтеперӗ Олег Николаев республикӑри 8 шкула грант парасси пирки хушӑва алӑ пуснӑ. Хахалантарӑва чи лайӑххисен йышне кӗнӗ, ӑнӑҫусем ҫӗнсе илнӗ шкулсем тивӗҫеҫҫӗ.
Шупашкарти 3-мӗш лицея тата 59-мӗш шкула, Улатӑрти 6-мӗш гимназие, Трак шкулне, Елчӗкри шкула 500 пин тенкӗ грант панӑ.
Ҫавӑн пекех чӑваш чӗлхине вӗрентессипе чи лайӑх практикӑна пурнӑҫлакан шкулсене 500 пин тенкӗ панӑ. Вӗсен йышӗнче - Шупашкарти 40-мӗш шкул, Елчӗк округӗнчи Аслӑ Елчӗк шкулӗ, Тӑвай округӗнчи Тӑрмӑш шкулӗ.
Паян Улатӑр хулинче Ленин тата Комсомол урамӗсем хӗресленнӗ вырӑнта авари пулнӑ: пушарнӑй машини маршруткӑна пырса ҫапӑннӑ.
Малтанлӑха пӗлтернӗ тӑрӑх, маршрутка светофор симӗс ҫутнӑ вӑхӑтра пынӑ. Пушарнӑй машини вара хӗрлӗ ҫутнӑ чухне кайнӑ. Вӑл мигалкӑсене, сиренӑна ҫутнӑ пулнӑ.
Юрать-ха, маршруткӑра пассажирсем пулман. Водителе пульницӑра тухтӑрсем тӗрӗсленӗ те киле янӑ. Вӑл аманман.
+18.3 °C