«Победа» лоукостер ют ҫӗршывсенчен вӗҫекен рейссенче билет хакне 40 процент ӳстерӗ. Е 25 евро. Хак хӗллехи навигаци пуҫлансан, юпа уйӑхӗн 28-мӗшӗ хыҫҫӑн, хӑпарӗ.
«Победа» компани ют ҫӗршывсенчи аэропортсенче клиентсене регистрациленӗшӗн малтан уйрӑм тӳлеттернӗ. Мускаври транспорт прокуратури авиакомпани тӗлӗшпе суда ҫитнӗ. Лоукостера вӑл ют ҫӗршывсенчи стойкӑра регистрациленнишӗн пассажирсене тӳлеттерме чарнӑ. Ҫав вӑхӑтрах ют ҫӗршывсенчи аэропортсем пассажирсем регистрациленнишӗн авиакомпанисене илеҫҫӗ. Вӑтамран 25 евро (паянхи курспа 1800 тенкӗ). Ҫавна май авиакомпани ҫав тӑкака билет хакне кӗртӗ. Пӗлтӗрхи хӗлле авиабилет хакӗ вӑтамран 4500 тенкӗ тӑнӑ. Апла хак 40 процент ӳсӗ.
Халӗ «Победа» 28 направленипе вӗҫет: иккӗ – Ҫывӑх Хӗвелтухӑҫне, пӗрре – Армение (Гюмри), ыттисем – Европӑпа Турцие.
«Победа» билечӗсем йӳннине кура ытти авиакомпани те хака чакарма тӑрӑшать. Авиабилетсене лоукостер хаклатнине кура ытти авиакомпани те хака ӳстерессине тавҫӑрма йывӑр мар.
Чӑваш патшалӑх филармонине юсамалли конкурса пӗтӗмлетнине Чӑваш халӑх сайчӗ иртнӗ уйӑхра пӗлтернӗччӗ. Аса илтерер: унта пурӗ 3 компани хутшӑннӑччӗ. Вӗсенчен ҫӗнтерӳҫӗ тесе «Просперити» тулли мар обществӑна йышӑннӑччӗ. Контракт хакӗ — 213 миллион тенкӗ. «Просперити» тулли мар яваплӑ общество контракт хакне 215 миллион тенкӗрен 2 миллион тенкӗ чакарнӑ.
Ӗҫе конкурс ҫӗнтерӳҫин 2020 ҫулхи авӑн уйӑхӗн 1-мӗшӗччен вӗҫлемеллеччӗ.
Халӗ Федерацин монополипе кӗрешекен службин Чӑваш Енри управленийӗ аукциона пӑрахӑҫланӑ. Аукцион пӗтӗмлетӗвӗпе «Стройиндустрия» тулли мар яваплӑ общество килӗшмен.
Аса илтерер: аукцион саккасҫи — Чӑваш Ен Культура, национальноҫсен ӗҫӗсен тата архив ӗҫӗн министерстви.
Уяв кунӗсенче ӗҫленӗшӗн ҫынсене унчченхинчен икӗ хут ытларах тӳлемелле. Ҫакӑн пирки Раҫҫейӗн Ӗҫ тата ӗҫлӗх федераци служби аса илтернӗ. Укҫашӑн хыпса ҫунманнисем е «кӗмӗл» ытлӑ-ҫитлисем укҫа вырӑнне канмалли кун илме пултараҫҫӗ.
Ӗҫлемелле мар уяв кунӗсенче тар тӑкма тивекенсен прави пирки «Новости» Раҫҫейӗн информаци агентстви пӗлтернӗ.
Канмалли кунсемпе уявсенче ҫынна вӑл хӑй килӗшсе алӑ пуссан ҫеҫ ӗҫлеттерме юрать. Ҫавӑн пирки ятарлӑ хушу е приказ кӑлармалла.
Канмалли е уяв кунӗнче ӗҫленӗшӗн ҫын канас тесен ӑна пӗр кун кантармалла. Кун пек чух ҫын миҫе сехет ӗҫленине шута илмелле мар.
Канмалли кунсенче е уявра ҫынран ирӗк ыйтмасӑр кӑлармалли кунсем те пур. Кунта инкеклӗ лару-тӑрӑва сирес тӗллевпе ӗҫлеттерни кӗрет.
Чӑваш Ен журналистсем чи пӗчӗк ӗҫ укҫи илекен виҫӗ регион шутне кӗнӗ. Кунта МИХра ӗҫлекенсем уйӑхсерен вӑтамран 20 пин тенкӗ илеҫҫӗ.
«HeadHunter» компани тата Раҫҫей журналистсен союзӗ Раҫҫейри регионсенчи журналистсен шалӑвне тишкернӗ. Чӑваш Енре, Сарту тата Вологда облаҫӗсенче ӗҫлесе пурӑнакан калем ӑстисен 20 пине яхӑн шалупа ҫырлахма тивет. Раҫҫейри вӑтам ҫак цифра вара 38,5 пин тенкӗпе танлашать.
Мускавра, Мускав облаҫӗнче, Приморье тӑрӑхӗнче 50 пине яхӑн илеҫҫӗ. Ку цифрӑна «Vtomske» портал пӗлтернӗ.
Сӑмах май, юпа уйӑхӗн 1-мӗшӗнчен пирӗн республикӑри хыснаҫӑсен шалӑвӗ ӳсессине Чӑваш халӑх сайчӗ пӗлтернӗччӗ. Аса илтерер: патшалӑх учрежденийӗсенче ӗҫлекенсен оклачӗсен, ставкисен виҫи 4,3 процент ӳстермелле.
Шупашкарти 1-мӗш колонин пуҫлӑхӗн ҫумӗ хӑйне пӑхӑнакансене килӗнче ӗҫлеттерсе пурӑннӑ. РФ Следстви комитечӗн Чӑваш Енри управленийӗн тӗпчевҫисем ҫавӑншӑн РФ Пуҫиле кодексӗн 285-мӗш статйин 1-мӗш пайӗпе пуҫиле ӗҫ пуҫарнӑ. Тепӗр майлӑ каласан, ӗҫ вырӑнӗпе усӑ курнӑшӑн.
2017 ҫулхи нарӑс уйӑхӗнчен пуҫласа 2018 ҫулхи раштав уйӑхӗччен ун патӗнче хӑйне пӑхӑнакан 16 ҫын ӗҫ вӑхӑтӗнче ӗҫленӗ. Вӗсем хуҫалӑх ӗҫӗпе тӑрмашнӑ, строительство енӗпе пулӑшнӑ. Ҫавсем колони пуҫлӑхӗн ҫумӗн Ҫӗнӗ Шупашкарти тата Сӗнтӗрвӑрри хулисенчи хваттерӗсенче, ҫавӑн пекех унӑн паллаканӗсен Шупашкарта тата Муркаш районӗнче вырнаҫнӑ ҫурчӗсенче тимленӗ.
Айӑпа тӗрме пуҫлӑхӗн ҫумӗ йышӑннӑ, кӳнтеленсем те, ытти материал та ҫирӗплетнӗ.
Пуҫлӑх ҫумӗ унччен судпа айӑпланманнине, шута илме тивӗҫ тата ытти сӑлтава шута илсе пуҫиле ӗҫе чарса лартнӑ. Ӑна 45 пин тенкӗлӗх штраф хурса панӑ.
Хаклӑ тимӗрсене туянни усӑллӑ. Укҫана хывма пулать сахалтан та виҫӗ мелпе. Кашнин лайӑх енӗ тата тӳнтерлӗхӗ пур.
Укҫана ылтӑна е кӗмӗле хывни усӑллӑ-и? Ҫакна тишкернӗ Aif.ru.
Ылтӑн, кӗмӗл, паллади тата платина катӑкне туянни парать тупӑш. Халӗ уншӑн хушма хакран илекен налук тӳлемелле. Металӑн номинал хакӗн 20 процентне. 2020-мӗш ҫулхи кӑрлачӑн 1-мӗшӗнчен пӗтерӗҫ вӑл налука. Хаклӑ тимӗре харпӑрлӑхра 3 ҫултан сахалрах тытсан тӳлӗн налук. Сутса тупӑш илнин 13 проценчӗ чухлӗ. 3 ҫултан ытла тытсан налук тӳлеттермӗҫ.
Хаклӑ тимӗртен тунӑ укҫана сутнӑ чух та 3 ҫул харпӑрлӑхра пулмалла. Ахальлӗн тӳлӗн налук.
Тепӗр мел пур. Ятне палӑртман счет туянма пулать. Ӑна танлаштараҫҫӗ валюта депозичӗпе. Вкладсемпе танлаштарсан вӗсене страхламаҫҫӗ.
25 ҫамрӑка стипенди парӗҫ. Вӗренӳре лайӑх тата пиллӗкпе ӗлкӗрсе пынӑран, халӑхсем хушшинчи, пӗтӗм ҫӗршыври, республикӑри предмет олимпиадисенче, турнирсенче, смотрсенче, пултарулӑх конкурсӗсенче палӑрнӑшӑн.
Стипендие Чӑваш Республикин Пуҫлӑхӗ Михаил Игнатьев парать. 135 ҫамрӑк 2019 ҫулта укҫана илме талпӑннӑ. 18 районтан тата 4 хуларан.
Чӑваш Республикин 1999 ҫулхи чӳкӗн 17-мӗшӗнчи йышӑнӑвӗпе параҫҫӗ стипендие. 20 стипендие вӑтам шкулсенчи тата хушма пӗлӳ паракан организацисенчи ачасене тӳлеҫҫӗ. 5 стипендие — культурӑпа ӳнер пӗлӗвӗ илекен учрежденисенче вӗренекенсене тенӗ ЧР Вӗренӳ тата ҫамрӑксен политикин министерстви.
Шкул ачисене 400-шер тенкӗ параҫҫӗ уйӑхсерен. Виҫӗ ҫулта 360 шкул ачине панӑ ӑна.
Шупашкарти икӗ ҫула тӑвакан организацисене палӑртнӑ. «Университетски-2» микрорайонти ҫула «ТУС», «Хӗвеллӗ» микрорайонтине «Дорэкс» строительство организацийӗсем тӑвӗҫ. Контрактсен хакӗсем — 243 тата 52 миллион тенкӗшер.
Патшалӑх закупкисен сайтӗнче пӗлтернӗ тӑрӑх, «Университетски-2» микрорайонти ҫула саракана палӑртмалли аукциона «ТУС» акционерсен обществи кӑна хутшӑннӑ. Контракт хакӗ унччен палӑртнинчен чакман, вӑл — 243 миллион тенкӗ.
«Хӗвеллӗ» микрорайонти ҫула тума «Дорэкс» акционерсен обществине суйланӑ. Унти ҫула «Старатель» строительство компанийӗ те сарас тенӗ. Вӑл аукционта ҫӗнтереймен. «Дорэкс»-па 52 миллион тенкӗлӗх килӗшӳ тунӑ.
Аукционсем тӗлӗшпе Барнаулти «КС-Строй» организаци кӑмӑлсӑрланнӑ. Вӑл Федерацин монополипе кӗрешекен службин республикӑри управленине ҫӑхавланӑ. Монополипе кӗрешекенсем кӑлтӑк асӑрхаман.
Шупашкарта пурӑнакан 32 ҫулти хӗрарӑм ҫемйи арканасран хӑраса укҫа-тенкӗсӗр тӑрса юлнӑ. ШӖМ пӗлтернӗ тӑрӑх, вӑл халӑх тетелӗнче ӑрӑмҫӑран пулӑшу ыйтнӑ. Хӗрарӑмӑн тахҫантанпах ҫие юлмасть-мӗн, ҫавӑнпа вӑл упӑшкине ҫухатма хӑрать.
Экстрасенс ӑна пулӑшма шантарнӑ. Анчах куншӑн вӑл укҫа ыйтнӑ. Малтанах экстрасенс пысӑках мар укҫа ыйтнӑ, унтан – тата нумайрах. Хӗрарӑмӑн укҫа нумай пулман, вӑл микрофинанс организацийӗсенче кивҫен илнӗ. Ҫапла майпа вӑл экстрасенса 384 пин тенкӗ куҫарса панӑ.
Хӑйне улталанине хӗрарӑм кайран тин ӑнланнӑ, кун пирки полицие пӗлтернӗ. Полицейскисем ултавҫа Ӗренпур облаҫӗнче тытса чарнӑ. Вӑл – унччен судпа айӑпланнӑ 22 ҫулти хӗрарӑм, Коми Республикинче пурӑнаканскер. Хайхискер айӑпне йышӑннӑ, тӑкакӑн пӗр пайне – 150 пин тенке – саплаштарнӑ.
Шупашкарти Чайкин тата Лермонтов урамӗсенче пурӑнакансем Мускав район администрацине пӗлтӗрех пӗлтернӗ: ҫула юсамалла. Халӗ Октябрь ҫулӗнчен пуҫласа Кошевой урамӗ таран хытӑ сийлӗ ҫул сараҫҫӗ. Ӑна пуҫаруллӑ бюджетировани мелӗпе пурнӑҫлаҫҫӗ.
Укҫа-тенкӗн пӗр пайне ҫынсем хӑйсем пухнӑ. Ӗҫ хакӗн смети 2 миллион ытла тенкӗпе танлашнӑ. Ҫак урамсенчи харпӑр ҫуртсене пурӑнакансем вара пӗр пайне – 213 пин тенке – хӑйсем пухнӑ.
Ку программӑпа усӑ курма йывӑр мар. Халӑх малтан пуху ирттерсе мӗнле ӗҫсем пурнӑҫламаллине сӳтсе явать. Ҫынсем ӗҫ хакӗн 10-15 процентне хӑйсем пухаҫҫӗ.
-2.7 °C