Красноармейски округӗнчи Ҫӗнӗ Выҫӑлккӑра пурӑнакан ҫыравҫӑ Ордем Гали тата Татьянӑпа Александр Буинцевсем Трак ҫӗрӗн легендарлӑ сӑнарӗсене калӑпланӑ: Упи-Паттӑра, Бибараса тата Пайтул Искеева.
Ордем Галин коллекцинче – 700 ытла пукане, кашнине вӑл чунне парса ӑсталанӑ. Ҫыравҫӑ ача чухнех модельер пулма ӗмӗтленнӗ. Вӑл ӑсталанӑ пуканесен йышӗнче ятарлӑ ҫар операцине хутшӑнакан салтаксем евӗррисем те пур.
Шупашкар районӗчи Кӳкеҫре фольклор уявӗ иртнӗ. Вӑл ӗнер, ҫурла уйӑхӗн 30-мӗшӗнче, пулнӑ.
Фольклор уявне Кӳкеҫ поселокӗн кунне палӑртнӑ май йӗркеленӗ. Унта Шупашкар тӑрӑхӗнчи фольклор коллективӗсем пуҫтарӑнса пынӑ.
Иккассинчи халӑх пултарулӑх ҫуртӗнчи «Шупуҫ» фольклор коллективӗ те хутшӑннӑ. Коллектив ертӳҫи — Иван Васильев.
«Правда ПФО» тӗнче тетелӗнчи хаҫатра Чӑваш патшалӑх оперӑпа балет театрӗн коллективӗ тесе алӑ пуснӑ ҫырӑва кӗскетсе пичетленӗ.
Ҫав ҫырӑва ӗненсен театр директорӗ тата илемлӗх ертӳҫи пулма Андрей Попова лартнӑранпа театрта влаҫ сывлӑшӗ кӑна сисӗнет, театр пурнӑҫӗ сӳннӗ имӗш.
Ҫырура ҫырнӑ тӑрӑх, театртан пӗрне кӑларса яраҫҫӗ, теприне илеҫҫӗ, паха премьерӑсем те лартмаҫҫӗ.
Пирӗн ентеш Дмитрий Еремеев «Голос. Дети» проекта хутшӑнать. Ку – вокал конкурсӗ. Ӑна халӗ Мускавра хӗрсех ӳкереҫҫӗ.
Проект кӑҫалхипе вун иккӗмӗш сезонта иртет. Хальхинче наставниксен тивӗҫӗсене Аида Гарифуллина, Наталья Подольская, Дима Билан тата Владимир Пресняков пурнӑҫлаҫҫӗ.
Чӑваш Енӗн Наци вулавӑшӗнче авӑн уйӑхӗн 3-мӗшӗнче Креативлӑ индустри шкулӗ уҫӑлӗ. Унта республика Элтеперӗ, креативлӑ индустри енпе ӗҫлекен специалистсем, ашшӗ-амӑшӗпе ачисем хутшӑнӗҫ.
Шкулпа вулавӑш директорӗ Роза Лизакова паллаштарӗ. Хӑнасем виҫӗ студире пулса курӗҫ: дизайн, анимаци тата 3D-графика, фото-, видеопроизводство студийӗсенче.
Креативлӑ индустри шкулне «Придумано в России» (чӑв. Раҫҫейре шухӑшласа кӑларнӑ) федераци программипе килӗшӳллӗн уҫаҫҫӗ иккен. Укҫана Раҫҫейӗн тата республикӑн Культура министерствисем тата республика хыснинчен уйӑрса панӑ.
Ҫулла вӗҫлениччен К.В. Иванов ячӗллӗ Чӑваш патшалӑх академи драма театрӗнче «Последняя попытка» (чӑв. «Юлашки шанчӑк») камит кӑтартӗҫ. Ӑна ҫурла уйӑхӗн 29-мӗшӗнче курма пулать.
Спектакле Михаил Задорновӑн пьеси тӑрӑх хатӗрленӗ. Сцена ҫинче – «юрату виҫкӗтеслӗхӗ». Мӑшӑр пӗрлешнӗренпе 20 ҫул ҫитнине паллӑ тума хатӗрленет. Кӗтмен ҫӗртен ҫамрӑк хитре хӗрарӑм шока кӗртсе ӳкерекен хыпарпа кӗрсе тӑрать.
Мӗн пӗлтерет вӑл? Спектакле кайса курсан пӗлетӗр.
ЮТВ телеканал йӑлана кӗнӗ премие курма йыхравлать. Вӑл хӑйӗн кураканӗсене К.В. Иванов ячӗллӗ Чӑваш патшалӑх академи драма театрӗҫче кӗтет. Мероприяти кӑҫал унта ҫурла уйӑхӗн 28-мӗшӗнче иртӗ.
Уяв каҫне Алина Выйгетовӑпа Данила Ленский, Александра Голубевӑпа Александр Белов ертсе пырӗҫ. Палӑртмалла: ҫак мероприяти ҫулталӑкра пӗрре иртет. Унта чӑваш эстрада артисчӗсем хӗрлӗ кавир тӑрӑх утӗҫ, хӑйсен пултарулӑхӗпе савӑнтарӗҫ. Ҫавӑн пекех ҫулталӑк юрӑҫисене, шоуменне, шоувуменне палӑртӗҫ. Кунсӑр пуҫне кӑҫалхи чи чаплӑ юрра, чи пултаруллӑ дуета суйлӗҫ.
К.В. Иванов ячӗллӗ Чӑваш патшалӑх академи драма театрӗ черетлӗ сезона ҫитес уйӑхра, авӑнӑн 11-мӗшӗнче, уҫӗ. Ун чухне Ф. Павлов пьеси тӑрӑх лартнӑ «Ялта» спектакле кӑтартӗҫ.
Театрти ҫӗнӗ хыпарсемпе учреждени директорӗ Елена Николаева «Время СВОих» программӑна хутшӑнакан Андрей Удиковпа тӗл пулсан паллаштарнӑ.
Ҫурла уйӑхӗн 23-мӗшӗнче Драмӑн сӑнавлӑ театрӗ черетлӗ, 31-мӗш, сезона уҫнӑ.
Куракансене ҫав кун театр хӑйӗн ҫӗнӗ спектакльне, «Праздник непослушания» юмаха, кӑтартнӑ. Чӑваш Енӗн Культура министерствинче пӗлтернӗ тӑрӑх, юмаха ачасем те, аслисем те килӗштереҫҫӗ. Аслӑ куракансене Антон Чеховӑн «Врач без пациентов, или Чехов без пауз» ӗҫне кӑтартнӑ.
Ҫитес уйӑхра театр Свердлов облаҫӗнчи Первоуральск хулине гастрольпе тухса кайӗ, унтисем кунта спектакльсемпе килӗҫ.
Йӗпреҫре ҫуралса ӳснӗ Андрей Михайловӑн (Малай) фильмӗнче Ксения Бородинӑпа Алексей Чадов ӳкерӗнеҫҫӗ. Фильм «За любовь» ятлӑ. Вӑл 2026 ҫулта экран ҫине тухӗ.
Андрей режиссурӑпа Чӑваш Енре пурӑннӑ чухне кӑсӑкланма тытӑннӑ. Вӑл ку таранччен кӗске метражлӑ фильм, сериал ӳкернӗ. Унӑн ӗҫӗсем кинофестивальсенче те ҫӗнтернӗ.
Палӑртса хӑварар: хальхи вӑхӑтра режиссёр ҫемйипе Мускавра пурӑнать. Ҫапах Чӑваш Ен пирки манмасть, ӑна ырӑпа кӑна аса илет.
-12.7 °C