Шупашкарти яхта клубӗ патӗнче шывра ишсе ҫӳрекен хӑна ҫурчӗсене илсе пырса вырнаҫтарнӑ. Атӑл юханшывӗ ҫине вырнаҫтарнӑ ҫав ҫуртсене хаклама республика Элтеперӗ Олег Николаев та пырса ҫитнӗ.
«Шыв ҫинчи хӑна ҫурчӗсем республикӑра кирлӗ пулас пирки иккӗленместӗп. Ку ен аталанма пуҫлать ҫеҫ-ха. Хаусботсем пурри туристсене илӗртӗ, Чӑваш Енри ҫӗнӗ шыв маршручӗсене тӗпчеме пулӑшӗ», — тенӗ Олег Николаев.
Шыври хӑна ҫурчӗсене кирек кам та кайса курма пултарать.
Хаусбот-ҫуртсене Ҫӗмӗрлери ятарлӑ завочӗ туса кӑларнине Чӑваш халӑх сайчӗ унччен пӗлтернӗччӗ-ха. Ҫӗнӗ йышши продукцие туянас кӑмӑллисем халех пур иккен. Вӗсемпе пуричнен ытла Тутарстанпа Пушкӑртстанра кӑсӑкланаҫҫӗ.
Ҫӗртме уйӑхӗн 6-мӗшӗнче, вырӑс халӑхӗн аслӑ поэчӗ Александр Пушкин ҫуралнӑранпа 225 ҫул ҫитнӗ кун, Чӑваш патшалӑх академи драма театрне экскурсине килнӗ хӑнасене Александр Сергеевич кӗтсе илнӗ.
Вӑл 1833 ҫулта Шупашкара килсе курни ҫинчен каласа кӑтартнӑ, чӑвашӑн мухтавлӑ ывӑлӗпе Никита Бичуринпа туслӑ пулнине пӗлтернӗ. «Сӑмахран, ҫак самант «Эп сӳннӗ чух – эс ҫун!» спектакльте те пур», – хыпарлать театрӑн пресс-служби.
«Сирӗн те театрпа ҫӗнӗ, ахаль чухне курман енчен паллашас килет пулсан, кашни тунтикун 18:30 сехетре театрта экскурсисем иртеҫҫӗ», — пӗлтереҫҫӗ театрта.
Патӑрьел тӑрӑхӗнче «Тургай» кану вырӑнӗ йӗркелесшӗн.
«Чӑваш Ен» патшалӑх телерадиокомпанийӗ пӗлтернӗ, Шӑнкӑртам тӑрӑхӗнчи Пазюковсем туристсем валли хӑтлӑ, илемлӗ кану вырӑнӗ тӑваҫҫӗ. Ҫӗр каҫма юлас текенсем валли виҫӗ кӗтеслӗ хӑна ҫурчӗсем хатӗр-мӗн.
Унта пӗве чавнӑ, ҫавӑнта тӗрлӗ пулӑ ӗрчетеҫҫӗ. Тавралӑза илемлетме панулми йывӑҫҫи, чӑрӑш лартса хӑварнӑ. Чӗрчунсен кӗтесне те йӗркелӗҫ. Унта фазансемпе турткӑшсем, кроликсем усрӗҫ.
Пазюковсен лаша та пур. Вӗсемпе ҫынсем сӑн ӳкеренессе шанаҫҫӗ.
Пирӗн республикӑра ырантан, ҫӗртме уйӑхӗн 1-мӗшӗнчен, шыва кӗмелли тапхӑр пуҫланӗ.
Шыва кӗме юратакансем валли официаллӑ 9 пляж хатӗрленӗ. Унта ҫӑлавҫӑсемпе тухтӑрсем пулӗҫ.
Ҫӑлавҫӑсемпе тухтӑрсене шансан та хамӑрӑн та асӑрхануллӑ пулмалла.
Ырантан, ҫӗртме уйӑхӗн 1-мӗшӗнчен,«Валдайсем» ҫӳреме пуҫлӗҫ.
Шыв ҫийӗн хӑвӑрт ҫӳрекен ҫав карапсем кӑҫал та, пӗлтӗрхи пекех, Шупашкартан Хусана тата Свияжска хутлӗҫ. Вӗсем кашни кунах ирхи 8 сехетре ҫула тухӗҫ. Каялла килме Хусантан 16 сехетре хускалӗҫ, Свияжскран – 16 сехет те 30 минутра.
Билетсене Шупашкарти юханшыв порчӗн сайтӗнче туянма пулать. Аслисен билет хакӗ — 680 тенкӗ, 5-10 ҫулсенчи ачасен — 340 тенкӗ.
Ҫу уйӑхӗнчи уявсен тӗлӗнче Шупашкара Раҫҫей чемпионки Аделия Петросян килнӗ.
Хӗр Этери Тутберидзе командин турне хутшӑннӑ май пирӗн республикӑна килсе ҫитнӗ. Шоуна хутшӑнма килнӗскер хулапа паллашнӑ, кунти паллӑ вырӑнсемпе киленннӗ.
Хӑйӗн кӑмӑл-туйӑмӗпе фигуристка халӑх тетелӗнчи хӑйӗн страницинче паллаштарнӑ: «Шупашкар – хӑтлӑ та стильлӗ хула. Кунта урамсене тӗрлӗ вак-тӗвек илемлетет».
Чӑваш Енре туристсем йышлӑ килсе ҫӳренине кура номе фондне пысӑклатса пыраҫҫӗ. Кӑҫалхи карлач-нарӑс уйӑхӗсенче хӑна ҫурчӗсенче чарӑннӑ туристсен шучӗ пӗтӗрхи ҫулталӑк пуҫламӑшӗнчи икӗ уйӑхринчен 28 процент ӳснӗ.
Чӑваш Енӗн Экономика аталанӑвӗн министерстви пӗлтернӗ тӑрӑх, экотруизм валли ҫӗнӗ вырӑнсене кӑҫал Шупашкар, Улатӑр, Куславкка, Красноармейски тата Канаш муниципаллӑ округӗсенче уҫма палӑртнӑ. Асӑннӑ тӑрӑхсенче 235 номерӗ 165 ҫурт туса лартмалла.
Куславкка округӗнчи шкул патӗнчи хоккей курупки ванса пӗтни, ӑна юсамалли пирки ҫынсем халӑх тетелӗнче хыпарланӑ.
Хӗллехи вӑхӑтра ӑна пӑр хупланӑ та конькипе ярӑнма май килнӗ. Ванса та ҫуркаланса пӗтнӗ асфальт ҫулла куҫа питех те лайӑх тӑрӑнать.
Хоккей курупкине Кунер ялӗнчи шкул 100 ҫул тултарнӑ тӗле уҫнӑ. Унта ачасем те, аслисем те хаваслансах ҫӳреҫҫӗ.
Чӑваш Республикин Регион управленийӗн центрӗн специалисчӗсем кӑлтӑк пирки вырӑнти тӳре-шарана пӗлтернӗ. Яваплисем халӗ асфальта ҫӗнетнӗ.
Шупашкарта кӑна мар, Чӑваш Енре аттракционсене йӗркене кӗртеҫҫӗ. «Ҫакӑ чи малтанах хӑрушсӑрлӑхпа ҫыхӑннӑ, мӗншӗн тесен ярӑнмалли хатӗрсем ҫинче ачасем аманни пулнӑ. Хальлӗхе 86 аттракциона тӗрӗсленӗ», – пӗлтернӗ Телеграмри «Чӑваш Ен калаҫать» каналта.
Хӑш-пӗр чуччу кивелме ӗлкӗрнӗ. Юрӑхсӑра тухнӑ ҫав хатӗрсемпе усӑ курма юрамасть. Ун пекки, сӑмахран, Канаш хулинче те пур. Ӑна утӑ уйӑхӗн 1-мӗшӗччен сӳтмелле.
Каҫал тӑрӑхӗнче пурӑнакансем вырӑнтисем канма пыма юратакан «Тимоша» ҫӑл патӗнчи территори ҫӳп-ҫап айне пулни пирки халӑх тетелӗнче пӗлтернӗ.
«Канма килекенсен культура ҫук, ҫӑлкуҫ территорийӗнче йӑлари каяш йӑваланса выртать», — кӑмӑлсӑрланса пӗлтернӗ илемсӗр сӑнӳкерчӗке асӑрханисем. «Ун пирки калама та аван мар та», — хушса хунӑ вӗсем.
Чӑваш Енӗн регион управленийӗн центрӗ ҫавӑн пирки вырӑнти тӳре-шарана пӗлтернӗ. Унтисем экологи шӑматкунлӑхне йӗркелесе «Тимошӑна» тасатнӑ.
-2.7 °C