Елчӗк районӗнче пурӑнакан 47 ҫулти арҫын алимент тӳлесшӗн пулман. Ҫул ҫитмен ачана пулӑшса тӑмалли пирки ун тӗлӗшпе суд йышӑнӑвӗ те пулнӑ-ха, апла пулин те вӑл тӑван тӗпренчӗкне ним вырӑнне те хуман — ӑна укҫа-тенкӗпе пулӑшман.
Суд приставӗсем парӑма шырама хӑтланса пӑхнӑ-ха, анчах арҫын пӗрех тӳлемен. Ҫапла майпа унӑн парӑмӗ 506 пин тенке ҫитсе кайнӑ.
Явапсӑр ашшӗ тӗлӗшпе РФ Пуҫиле кодексӗн 187-мӗш статйин 1-мӗш пайӗпе пуҫиле ӗҫ пуҫарнӑ. Ҫавӑн хыҫҫӑн унран 300 пин тенкӗ шыраса илме май килнӗ.
РФ Пуҫиле кодексӗн 187-мӗш статйин 1-мӗш пайӗпе пуҫиле ӗҫ пӑхса тухнӑ чухне суд арҫын парӑмӑн пӗр пайне тӳлесе татнине шута илсе ӑна 180 сехет ӗҫлеттерме йышӑннӑ.
Канаш округӗнче пурӑнакан Алексеевсем ылтӑн туйне хӑйне евӗр паллӑ тума шухӑшланӑ. Вӗсем ЗАГСа юбилярсен Хисеп кӗнекине алӑ пусма чӑваш тумӗ тӑхӑнса пынӑ.
Вӗсен шухӑшне ҫывӑх ҫыннисемпе тӑванӗсем те ырланӑ – хӑшӗ-пӗри ЗАГСа чӑваш тумӗпе пынӑ.
Владимир Ивановичпа Зоя Степановна виҫӗ ача ҫуратса ӳстернӗ: Сергей, Марина тата Татьяна. Халӗ вӗсем 6 мӑнукпа савӑнса пурӑнаҫҫӗ.
Сергей Иванович ПМК-541 предприятире ӗҫленӗ. Зоя Степановна вара Горький чукун ҫулӗ ҫумӗнчи ОРСра поварта тӑрӑшнӑ. Пӗр-пӗрне ӑнланса пурӑнаҫҫӗ вӗсем.
Улатӑр округӗнчи Восход поселокӗнче пурӑнакан хисеплӗ мӑшӑр пархатарлӑ туя паллӑ тунӑ. Василий Михайловичпа Антонина Павловна сахал мар пӗрле пурӑнаҫҫӗ – вӗсем пӗрлешнӗренпе 70 ҫул ҫитнӗ.
Тюгашкинсен туслӑхӗ совхозра пуҫланнӑ. Василий унта лашасем пӑхнӑ. Антонина вара вӗренӳ хыҫҫӑн направленипе унта ӗҫлеме килнӗ. Ҫапла пӗр-пӗрне курса туслашнӑ вӗсем. Нумай туслӑ ҫӳремен – ҫулталӑкран ҫемье ҫавӑрнӑ.
Кайран вӗсене Алтай крайне ҫерем ҫӗтме янӑ. Тӑван тӑрӑхне таврӑнсан вара Тюгашкинсем ӗмӗр тӑршшӗпех ял хуҫалӑхӗнче ӗҫленӗ, унтанах тивӗҫлӗ канӑва тухнӑ.
Тюгашкинсем 3 ача ҫуратса ӳстернӗ. Паянхи кун вӗсем 5 мӑнукпа, 9 кӗҫӗн мӑнукпа савӑнса пурӑнаҫҫӗ.
Шӑмӑршӑ округӗнчи Федоровсем изумруд туя паллӑ тунӑ. Вӗсем 55 ҫул пӗрле пурӑнаҫҫӗ.
Ҫамрӑксем каҫхи шкулта паллашнӑ: Алевтина Петровна унта математика предметне вӗрентнӗ. Аграри университетне пӗтернӗ хыҫҫӑн «Правда» колхозра трактористра тата комбайнерта ӗҫлекен Федор Михайлович вара унта вӗренме пынӑ. Вӑл районти общество ӗҫне хастар хутшӑннӑ: комсомол организацийӗн секретарӗ, райкомра инструктор пулнӑ.
Алевтина Петровна Палтиелте ҫуралнӑ. Педагогика институтӗнчен вӗренсе тухсан шкулта математика предметне вӗрентнӗ.
Федоровсем 2 хӗр ҫуратса ӳстернӗ: Мария тата Вероника. Халӗ вӗсем 3 мӑнук, 1 кӗҫӗн мӑнукпа савӑнса пурӑнаҫҫӗ.
Ҫак кунсенче Улатӑрта ЗАГСра пӗрле 55 ҫул пурӑнакан Шоболовсене чысланӑ.
Борис Константиновичпа Татьяна Ивановна 1969 ҫулта паллашнӑ. Ӑнсӑртран паллашни шӑпа пӳрни пулса тӑнӑ. Майӗпен вӗсен туслӑхӗ юратӑва куҫнӑ. Ҫапла вӗсем 1971 ҫулхи нарӑс уйӑхӗнче пӗрлешнӗ. Вӗсем ывӑлпа хӗр ҫуратса ӳстернӗ. Халӗ вӗсем виҫӗ мӑнукӗпе савӑнса пурӑнаҫҫӗ.
Татьяна Ивановнӑпа Борис Константинович 20 ҫул ытла пӗр ҫӗрте ӗҫленӗ – ҫар савутӗнче тӑрӑшнӑ. Иккӗшӗ те – ӗҫ ветеранӗ.
ЗАГСра чысланӑ чухне мӑшӑр ҫӑмрӑклӑхне аса илсе Мендельсон кӗввипе киленнӗ, пӗр-пӗрне ҫӗрӗ тӑхӑнтартнӑ.
Ӗнер, пуш уйӑхӗн 16-мӗшӗнче, «Поле чудес» (чӑв. Тӗлӗнтермӗш уйӗ) телекӑларӑма чӑваш хӗрарӑмӗ мӑнукӗпе хутшӑннӑ.
Аса илтерер: телекӑларӑма Пӗрремӗш каналпа эрнекунсерен кӑтартаҫҫӗ.
Алина Артемьева капитал-шоун уяв умӗнхи кӑларӑмӗн хутшӑнаканӗ пулнӑ. Вӑййа Пӗтӗм тӗнчери хӗрарӑмсен кунне халалланӑ. Пирӗн ентешӗн «ерохвостка» сӑмаха пӗлмелле пулнӑ. Раҫҫей ҫурҫӗрӗнче пурӑнакансем ытла талпӑнуллӑ хӗрарӑма ӗлӗк ҫапла каланӑ.
Алина мӑнукӗ Ева чӑвашла юрӑ юрланӑ тата сӑвӑ вуласа панӑ. Леонид Якубович ӑна пукане парнеленӗ, анчах вӑл тӳрех хӑйӗн шӑллӗсемпе йӑмӑкне аса илнӗ — вӗсем валли те парне ыйтнӑ. Ҫапла вара ӑна тата тепӗр пукане, шӑллӗсем валли те парне панӑ.
Ева чӑвашла хитре калаҫать, амӑшӗн амӑшне вӑл куками тесе чӗнет.
НТВ телеканал кӑтартакан «За гранью» кӑларӑмра паян Шупашкарти ача ашшӗне кӑтартнӑ.
«Курайман кӗрӳ» ят панӑ кӑларӑма Шупашкарта пурӑнакан арҫын пӗрле пурӑннӑ хӗрӗ иккӗшӗ уйрӑлса кайнӑ хыҫҫӑн тӑхӑр уйӑхри ывӑлне пӑрахнине пӗлтернӗ. Ачан кукамӑшӗ ҫирӗплетнӗ тӑрӑх: унчченхи кӗрӳ ачапа хӑй кӑсӑкланмасть, укҫа-тенкӗпе те пулӑшма шутламасть.
Телекӑларӑма Тимур Еремеев ертсе пырать. Передачӑна 16 сехет те 45 минутра эфира кӑлараҫҫӗ. Унта тӗрлӗ эксперт хутшӑнать, вӗсем вӑл е ку ыйтупа хӑйсен шухӑш-кӑмӑлне палӑртса хӑварнипе пӗрлех сӗнӳ-канашпа е кирлӗ пулсан ӗҫпе те пулӑшаҫҫӗ.
Кӑларӑма пӑхнисем НТВ сайтӗнче арҫына майлӑ пулса ҫырнӑ, вӗсем ача амӑшне хурлама пӑхни, унӑн тыткаларӑшне ӑнланманни сисӗнет.
Нарӑс уйӑхӗн 26-мӗшӗнче Иркутскри Мӑшӑрлану керменӗнче 80 мӑшӑр ҫемье ҫавӑрнӑ. Вӗсенчен пӗрисем – Жигаловӑри София Бузикова тата Денис Шевченко. Каччӑпа хӗр Мӑшӑрлану керменне чӑваш наци тумӗпе килнӗ.
Иркутскри Мӑшӑрлану керменӗнче чӑваш туйӗ мӗнле иртнине кӑтартнӑ. Каччӑпа хӗрӗн ашшӗ-амӑшӗ ятарласа Жигаловӑран килнӗ. Хӗрӗн амӑшӗ Лилия Бабокина каланӑ тӑрӑх, ҫамрӑксем пӗрлешме шутласан туя мӗнле тӑвасси пирки иккӗленӳ пулман – чӑваш наци тумӗпе кӑна. Мӑшӑрлану керменне тӑванӗсем те чӑваш тумӗпе килнӗ.
Официаллӑ пай хыҫҫӑн чӑваш туйӗнчи йӑла-йӗркене кӑтартнӑ. «Чӑвашсен туй йӑли-йӗрки 2 уйӑх тӑсӑлать. Эпир паян ҫак илемлӗ йӑлан пӗр пайне кӑна туса кӑтартӑмӑр», — тенӗ ун чухне Иркутскри «Юлташ» чӑваш наци культура центрӗн председателӗ Вероника Тимофеева.
Йӗпреҫ округӗнчи Чӑваш Ҫармӑс ялӗнче пурӑнакан Авдеевсем пӗрлешнӗренпе 65 ҫул ҫитнине паллӑ тунӑ. Вӗсем 1961 ҫулта пӗрлешнӗ.
Вӗсен пурнӑҫӗнчи чылай ҫул колхозпа ҫыхӑннӑ. Митрофан Александрович нумай вӑхӑт механизаторта ӗҫленӗ, Вера Спиридоновна колхоз уй-хирӗнче тӑрӑшнӑ. Иккӗшӗ те ӗҫ ветеранӗсем ята тивӗҫнӗ.
Авдеевсем 4 ывӑлпа 4 хӗр ҫуратса ӳстернӗ. Халӗ 20 мӑнукӗпе тата 24 кӗҫӗн мӑнукӗпе савӑнса пурӑнаҫҫӗ.
Хисеплӗ мӑшӑра саламлама Йӗпреҫ округӗн администрацийӗнчен те, вырӑнти администрацирен те килнӗ.
Канаш тӑрӑхӗнчи Сителте пурӑнакан Пигальцевсем изумруд туйне паллӑ тунӑ. Анатолий Егоровичпа Маргарита Павловна шӑп та лӑп 55 ҫул каялла ҫемье ҫавӑрнӑ: Тӑван ҫӗршыв хӳтӗлевҫин кунӗнче пӗрлешнӗ.
Анатолий Егорович пурнӑҫне педагогикӑна халалланӑ, Маргарита Павловна вара медицина тытӑмӗнче ӗҫленӗ.
Пигальцевсем икӗ хӗр ҫуратса вӗсене ура ҫине тӑратнӑ. Халӗ вӗсем 3 мӑнукпа, пӗр кӗҫӗн мӑнукпа савӑнса пурӑнаҫҫӗ.
+18.6 °C