Республикӑри амӑшӗн капиталне 200 пин тенкӗ таран ӳстерме палӑртнӑ. Саккун проектне ЧР Ӗҫлев министерстви хатӗрленӗ.
Халӗ амӑшӗн каиталӗ 150 пин тенкӗпе танлашать. Ҫӗнӗ ҫултан вара ӑна 50 пин тенкӗ хӑпартма палӑртнӑ. Капитала тивӗҫнӗ, анчах хальлӗхе унпа усӑ курман ҫемьесене те 50 пин тенкӗ хушса парӗҫ.
Ҫитес ҫул амӑшӗн капиталне пама республика хыснинчен 197,6 миллион тенкӗ пӑхса хунӑ. Ку укҫа 1317 ҫемье валли ҫитмелле.
Улатӑрта пурӑнакан мӑшӑр «ылтӑн туйне» паллӑ тунӑ. Александр Михайловичпа Татьяна Николаевна Васякинсем 50 ҫул каялла пӗрлешнӗ те паянхи кун та килӗштерсе пурӑнаҫҫӗ.
Вӗсем 1974 ҫулта ҫемье ҫавӑрнӑ. 1977 ҫулта Улатӑра пурӑнма куҫнӑ, хальхи вӑхӑтра та унта кун кунлаҫҫӗ. Мӑшӑр пӗр хӗр ҫуратса ӑна ура ҫине тӑратнӑ. Халӗ икӗ мӑнукӗпе Матвейпа тата Кристинӑпа савӑнса пурӑнаҫҫӗ.
Шупашкарта пурӑнакан нумай ачаллӑ хӗрарӑмсене ирхи апата чӗнеҫҫӗ.
Терӗссипе каласан, ку вӑл апатланас тӗллевпе ирттерекен мероприяти мар-ха. Ун пек ятпа пысӑк шайри тӳре-шара та ӗҫлӗ тӗрлӗ мероприяти те ирттеркелет.
Шупашкар хулинчи халӑха социаллӑ пулӑшу кӳрекен центрти Ҫемье центрӗнче нумай ачаллӑ хӗрарӑмсене пухса пурнӑҫа епле улӑштарма май пурри ҫинчен сӳтсе явма йышӑннӑ. Модераторӗ — Ирина Васильева, вӑл ҫиче ача амӑшӗ!
Унта лекес тесен 8 (8352) 51-02-68 телефонпа шӑнкаравласа ҫыранмалла. Центр 324-мӗш Стрелоксен дивизийӗнчи 21-меш А ҫуртра вырнаҫнӑ.
Шупашкарта кун кунлакан Валентина Николаевнӑпа Иван Дмитриевич 64 ҫул пӗрле пурӑнаҫҫӗ. Вӗсем ҫирӗп ҫемье ҫавӑрнӑ, виҫӗ ача ӳстернӗ, халӗ 11 мӑнукпа, 6 кӗҫӗн мӑнукпа сӑвӑнаҫҫӗ.
Валентина Николаевна бухгалтерта ӗҫленӗ, Иван Дмитриевич тракторист пулнӑ. Мӑшӑр халӗ те ӗҫсӗр лармасть, качакасем тытаҫҫӗ, пахчара кӑштӑртатаҫҫӗ.
Чӑваш Енри нумай ачаллӑ тепӗр ҫемьене РФ Президенчӗ Владимир Путин «Ашшӗ-амӑшӗн мухтавӗ» орден медалӗпе чыслама йышӑннӑ. Ӑна Хӗрлӗ Чутай округӗнчи Макаровсем тивӗҫнӗ.
Владимир Александровичпа Альбина Викторовна тӑватӑ хӗр ӳстереҫҫӗ: Анастасия, Екатерина, Ульяна тата Татьяна. Ҫемье пуҫӗ колхозра водительте ӗҫленӗ, шкул автобусӗпе ачасене илсе ҫӳренӗ, почтальон пулнӑ. Халӗ кил хуҫалӑхне тытса пырать, ватӑ амӑшне пӑхать. Татьяна Викторовна хими, биологи тата географи предмечӗсене вӗрентет.
Ҫӗмӗрлери Зайцевсен ҫемйи Раҫҫейри «Ҫулталӑкри ҫемье» конкурсра палӑрнӑ. Вӗсем «Нумай ачаллӑ ҫемье» номинацире малти вырӑна йышӑннӑ.
Зайцевсем тӑватӑ ывӑл ӳстереҫҫӗ. Мӑшӑр килӗштерсе пурӑнать.
Палӑртмалла: конкурс кӑҫалхипе тӑххӑрмӗш хут иртнӗ. Унта 388 ҫемье хутшӑннӑ. Вӗсенчен 88-шӗ тӗрлӗ номинацире ҫӗнтернӗ.
Ачасӑррисене налук тӳлеттересшӗн. Ҫак шухӑша РФ Патшалӑх Думин депутачӗ Андрей Гурулев каланӑ. Вӑл шухӑшланӑ тӑрӑх, ҫав укҫапа тӑлӑхсемпе ача ҫурчӗсене пулӑшма май пулать.
Евгений Федоров депутат ача ҫуккисене алимент тӳлекенсемпе пӗр шайра хакламалла, вӗсен тупӑшне кура тытса юлакан налука ӳстерме сӗннӗ.
Раҫҫей Правительствин социаллӑ пурнӑҫ тата экономика тӗпчев институчӗн директорӗ Алексей Зубец вара ашшӗ-амӑшӗ пулайманнисене 30-40 пин таран тӳлеттерме сӗннӗ.
Чӑваш Енри гимнаст Владислав Поляшов ҫемье ҫавӑрнӑ. Вӑл Надежда ятлӑ хӗре мӑшӑр тунӑ.
Владислав - 29 ҫулта. Гимнастикӑпа вӑл мӗн ачаран кӑсӑкланнӑ. 2014 ҫулта Раҫҫей спорт мастерӗ пулса тӑнӑ. 2016 ҫулта вара тӗнче класлӑ спорт мастерӗн ятне тивӗҫнӗ.
Владислав тӗнче шайӗнчи ӑмӑртусене те хутшӑннӑ. Ҫав шутра - Олимп вӑййисене те.
Канаш округӗнчи Пайкилт ялӗнче пурӑнакан Виталий тата Александра Ивановсем ҫур ӗмӗр пӗрле пурӑнаҫҫӗ. Вӗсем ылтӑн туя паллӑ тунӑ.
Ивановсем виҫӗ ывӑл та пӗр хӗр ӳстернӗ. Халӗ сакӑр мӑнукпа савӑнса пурӑнаҫҫӗ.
Виталий Иванович «Цивиль» колхозра механизаторта ӗҫленӗ, «Коммунизм ӗҫӗн ударникӗ» ята илнӗ. Александра Михайловна Канашри ВЗРта тата «Цивиль» колхозра ӗҫленӗ.
Чӑваш Енри ҫемьене Пӗрремӗш каналпа пыракан «Доброе утро» кӑларӑмра кӑтартнӑ. Эфир ӗнер, авӑн уйӑхӗн 26-мӗшӗнче, пулнӑ.
Сюжета Красноармейски округӗнчи Марковсем пирки ӳкернӗ. Виҫҫӗмӗш ача ҫуралсан вӗсем тӳлевсӗр ҫӗр илнӗ. Тӑваттӑмӗш ача ҫуратсан вара вӗсем амӑшӗн капиталӗпе ҫурт тума илнӗ ипотекӑн пӗр пайне татнӑ.
Халӗ Марковсем пӳртре ӑшӑ урай хума, хӗлле электроэнерги кӗртме хатӗрленеҫҫӗ. Газне те кӗртнӗ. Сад ӗрчӗтме пуҫланӑ ӗнтӗ: панулми, груша, хӑмла ҫырли…
+6.3 °C