Ҫӗнӗ Шупашкарта 27 ҫулти каччӑ ҫухалнӑ. Вӑл Максим Сергеевич Андреев ятлӑ. Каччӑ ӑҫтине юпа уйӑхӗн 6-мӗшӗнченпе пӗлмеҫҫӗ.
Максим Сергеевич 172 сантиметр ҫӳллӗш, вӑтам пӳ-силлӗ, ҫӳҫӗ ҫутӑ ҫырӑ тӗслӗ, куҫӗ сӑрӑ.
Мӗн тӑхӑнса тухса кайнине пӗлмеҫҫӗ. Вӑл миҫере тата ӑҫтан тухса кайнине те ҫырман.
Каччӑна курнисене, вӑл ӑҫта пулма пултарнине пӗлекенсене 8-800-700-54-52 телефон номерӗпе шӑнкӑравласа систерме ыйтаҫҫӗ. Е тата шырав ушкӑнӗн инфоргӗпе, Астрӑпа (Екатеринӑпа), 8-953-016-61-92 телефон номерӗпе ҫыхӑнма пулать.
Каччӑна «Лиза Алерт» шыравпа ҫӑлав отрячӗ шырать. Ҫамрӑк ҫыннӑн ҫывӑх ҫыннисем те, паллах, уншӑн кулянаҫҫӗ. Ҫавӑнпа та вӑл ӑста пулма пултарнине тавҫӑракансем пулӑшасса питех те шаначчӗ.
Ҫӗнӗ Шупашкар хулинче пурӑнакан Марина Александрова «Хочу на ТНТ» шоура ӗҫтешӗсене халалланӑ юрра шӑрантарнӑ.
Вӑл ӗҫ сыхлавӗн специалистӗнче 20 ҫул ытла ӗнтӗ ӗҫлет. Ӗҫтешӗсен ячӗпе вӑл юрӑ ҫырнӑ та проекта хутшӑннӑ. Ӑна шоура юрлама пуҫласан жюри чи малтанах ҫухалса кайнӑ. Анчах кайран Сергей Орлов комик ҫак номер ку таранччен чи лайӑххи пулнине палӑртнӑ. Ольга Бузова та юрӑ килӗшнине пӗлтернӗ. Тепӗр жюри пайташӗ Марина Кравец вара пирӗн ентеше хӑй ертсе пыракан «Конфетка» шоуна хутшӑнма чӗннӗ. «Чӑн-чан анрашу пек янӑрать», — тенӗ Сергей Светлаков, анчах ыттисем «ӑхӑ» тенине хирӗҫ каяйман.
Халӗ Марина проектӑн тепӗр тапхӑрне хатӗрленет.
Ҫӗнӗ Шупашкарти «Группа Оргсинтез» тулли мар явалӑ обществӑн генеральнӑй директорне Сергей Мерзлякова Чӑваш Республикин Хисеп грамотипе чыслама йышӑннӑ. Ӑна республикӑн промышленноҫне аталантарма тӳпе хывнӑшӑн ҫавӑн пек хавхалантарас тенӗ.
Сергей Владимирович 1971 ҫулхи авӑн уйӑхӗн 25-мӗшӗнче Тӗмен хулинче ҫуралнӑ. Унти индустри институтӗнчен «автоматика тата техника тытӑмӗсен управленийӗ» енӗпе вӗренсе тухнӑ, 1997 ҫулта вӑл Самар хулинчи экономика академине вӗренсе пӗтернӗ, унта финанспа кредит енӗпе пӗлӳ илнӗ, 2000 ҫулта вара экономика енӗпе диссертаци хӳтӗленӗ. Ун хыҫҫӑн татах вӗреннӗ. 2006 ҫулта Мускаври Ломоносов ячӗллӗ патшалӑх университетӗнчен вӗренсе тухнӑ.
Тӗрлӗ хулара тӗрлӗ должноҫре тӑрӑшнӑ.
Ҫӗнӗ Шупашкарти 18-мӗш лицейра ӗҫлекен Людмила Турковская «Чӑваш Республикин халӑх вӗрентекенӗ» ята тивӗҫнӗ.
Людмила Николаевна — физика учителӗ. Хӑй вӑл Ҫӗмӗрле хулинче 1960 ҫулта ҫуралнӑ. 1982 ҫулта И.Н. Ульянов ячӗллӗ Чӑваш патшалӑх университетӗнчен «физик, преподаватель» специальноҫа алла илни ҫинчен калакан дипломпа вӗренсе тухнӑ.
Ҫӗнӗ Шупашкарти 18-мӗш лицейра физика учителӗ пулса 1991 ҫултанпа ӗҫлет. Аслӑ квалификаци категориллӗ учитель. 1995 ҫултах ӑна «Халӑх вӗрентӗвӗн отличникӗ» паллӑпа чысланӑ. 2003 ҫулта хӗрарӑм Чӑваш Республикин Президенчӗн премине «чи лайӑх учитель» пулнӑ май тивӗҫнӗ. Тепӗр ҫулхине ӑна «Чӑваш Республикин тава тивӗҫлӗ учителӗ» ят панӑ.
Педагог тӗрлӗ шайри конкурсра та пӗрре ҫеҫ мар палӑрнӑ.
Ҫӗнӗ Шупашкар хулинче юпа уйӑхӗн 1-мӗшӗнчен ӑшӑ пама палӑртнӑ. Кун пирки хула пуҫлӑхӗ Александр Андреев пӗлтернӗ.
Вӑл каланӑ тӑрӑх, малтан ача пахчисене, шкулсене, пульницӑсене ӑшӑ парӗҫ. Унтан вара ҫуртсене тата предприятисене ӑшӑ ҫитӗ.
Аса илтерер: нумай хваттерлӗ ҫуртсене пилӗк кунра вӑтам сывлӑш температури 8 градус ӑшӑран сахалрах пулсан ӑшӑ параҫҫӗ. Ытти ҫурта харпӑрҫӑсен ирӗкӗпе е хула администрацийӗ палӑртнӑ срокра ӑшӑ ҫитӗ.
Сӑмах май, пӗлтӗр Ҫӗнӗ Шупашкар хулинче хутса ӑшӑтмалли сезон авӑн уйӑхӗн 26-мӗшӗнче пуҫланнӑ. Ҫакна та каласа хӑварар: ҫитес кунсенче республикӑра ҫанталӑк сивӗтессине пӗлтернӗччӗ.
Шупашкар хулинче Ленин Комсомолӗн урамӗнче «зебра» ҫинче хӗрарӑмпа хӗрачана таптаса кайнӑ автокран водителӗ тӗлӗшпе пуҫиле ӗҫ пуҫарнӑ. Руль умӗнче Ҫӗнӗ Шупашкар хулинче пурӑнакан 63 ҫулти арҫын ларнӑ. Йӗрке хуралҫисем палӑртнӑ тӑрӑх, кӑҫал ҫул-йӗр ҫинчи йӗркене пӑснӑшӑн административлӑ майпа 36 хутчен явап тыттарнӑ. Ытларахӑшӗ – пысӑк хӑвӑртлӑхпа ҫӳренӗшӗн.
Аса илтерер: инкек ӗнер, авӑн уйӑхӗн 24-мӗшӗнче, 10:15 сехетре Ленин Комсомолӗн урамӗнче пулнӑ. 41 ҫулти хӗрарӑм хӗрачапа пӗрле «зебра» урлӑ каҫнӑ, унта светофор ҫук. Ҫав вӑхӑтра вӗсем ҫине автокран пырса кӗнӗ. Водитель таптаса кайсан кӑна чарӑннӑ.
Хӗрача тӗлӗнмелле майпа чӗрӗ юлнӑ, ӑна тухтӑрсем вырӑнта пулӑшу панӑ, пульницӑна илсе кайман. Хӗрарӑм вара вӑйлӑ суранланнӑ, вӑл васкавлӑ медпулӑшу киличченех вилнӗ.
Ҫӗнӗ Шупашкарта пурӑнакан яш гаражра вилнӗ.
Ача унта мопед юсама кайнӑ. Ҫавӑн чухне вӑл тӗтӗм-сӗрӗмпе наркӑмӑшланнӑ тесе шухӑшлаҫҫӗ.
Ҫав ача пӗр каҫхине «Ольдеевский» гараж кооперативӗнче техникӑпа аппаланнӑ чухне хӑйне япӑх туйма пуҫланӑ. Инкек вырӑнне васкавлӑ пулӑшу паракан тухтӑрсем ҫийӗнчех пырса ҫитнӗ иккен, анчах вӗсем яша ҫӑлса хӑварайман.
Гаражра ытти ҫамрӑк та пулнӑ. Тухтӑрсене вӗсем чӗнсе илнӗ курӑнать.
Вырӑна пырса ҫитнӗ тухтӑрсем ачан пурнӑҫне ҫӑлса хӑварайман.
Халӗ инкек сӑлтавне специалистсем палӑртӗҫ. Вӗсем малтанласа шухӑшланӑ тӑрӑх, гаражра мопед юсанӑ чухне яш бензин пӑсӗпе е мопед кӑларакан сӗрӗмпе наркӑмӑшланма пултарнӑ. Пакунлисем ку ӗҫе халӗ малалла тӗпчеҫҫӗ.
Республикӑри 18 шкулпа ача пахчи 500-шер пин тенкӗлӗх грант илнӗ
Правительство председателӗ Сергей Артамонов авӑн уйӑхӗн 23-мӗшӗнче хушӑва алӑ пуснӑ.
ЧР Министрсен Кабинечӗн пресс-служби пӗлтернӗ тӑрӑх, грантсен пӗтӗмӗшле виҫи — 9 млн тенкӗ. Вӗсене ҫӗнӗ методикӑсем, проектсем кӗртнӗ тата вӗренӳ ӗҫӗнче пысӑк кӑтартусемпе палӑрнӑ 18 учреждение параҫҫӗ.
4,5 млн тенке Шупашкар хули тивӗҫнӗ. Укҫана Ачасемпе ҫамрӑксен пултарулӑх керменӗ, 3-мӗш лицей, 4-мӗш гимнази, 6-мӗш, 49-мӗш, 78-мӗш, 125-мӗш, 204-мӗш, 208-мӗш ача пахчисен хушшинче валеҫӗҫ.
1 млн тенкӗ Ҫӗнӗ Шупашкара яраҫҫӗ: 5-мӗш ача пахчине тата 11-мӗш шкула.
Улатӑрти 6-мӗш гимназие, Элӗкри И.Я.Яковлев ячӗллӗ вӑтам шкула, Патӑрьел округӗнчи Шӑнкӑртамри 1-мӗш вӑтам шкула, Канашри 17-мӗш ача пахчине, Хӗрлӗ Чутай округӗнчи Атнар вӑтам шкулне, Ҫӗрпӳ округӗнчи 6-мӗш ача пахчине тата Ҫӗмӗрлери 1-мӗш ача пахчине 500 пиншер тенкӗ параҫҫӗ.
Куртка вырӑнне 2 пачка спагетти илнӗ. Кун пекки те пулать пурнӑҫра – ултавҫӑсем Ҫӗнӗ Шупашкар хулинче вӗренекен 20 ҫулти студента шӑнман пӑр ҫине лартса янӑ.
Вӑл тӗнче тетелӗнче, тӳлевсӗр пӗлтерӳсен сайтӗнче, 6,5 пин тенкӗпе сутӑнакан куртка тупнӑ та ӑна илес тесе сутуҫӑпа ҫыхӑннӑ. Лешӗ ӑна тавара сервис тулашӗнчи мелпе ярса пама шантарнӑ. Студент ӑна куншӑн укҫа куҫраса панӑ. Анчах тавар килсен уҫса пӑхнӑ та – унта 2 пачка спагетти выртнӑ.
Полицейскисем ултавҫа тупса палӑртнӑ: вӑл – Краснодар крайӗнчи 17 ҫулти каччӑ. Ҫакӑ паллӑ: вӑл унччен те кун пек преступленисем тунӑ. Хальхинче те ун тӗлӗшпе пуҫиле ӗҫ пуҫарнӑ.
Ҫӗнӗ Шупашкарта пурӑнакан пӗр хӗрарӑм питех те качча каяс тенӗ. Унӑн пӗр арҫын пулнӑ-ха, анчах вӑл ӑна пӑрахса кайнӑ. Ҫавӑн хыҫҫӑн хайхи хӗрарӑмӑн ӑна ҫухатас килмен, вӑл ӑна каялла тавӑрасшӑн ҫуннӑ.
Хӗрарӑм хӑйне качча каймалла мар тунӑ тесе минренӗ, ҫавна тасатмалла тесе шухӑшланӑ.
Ҫавӑн пек шухӑшпа минресе юмӑҫа ӗненнӗ, ӑна тӑватӑ уйӑх хушши укҫа тӳлесе пурӑннӑ. Ара, лешӗ хӗрарӑм ҫӑмӑл мар лару-тӑрӑва лекнӗ, ӑна тасатма самай вӑхӑт кирлӗ тесе каланӑ та хӗрарӑм ӗненнӗ. Ӑна вӑл пӗтӗмпе 100 пин тенкӗ укҫа куҫарса панӑ.
Кайран юмӑҫ хайхипе ҫыхӑнӑва татнӑ.
Ун хыҫҫӑн хӗрарӑм йӗрке хуралҫисенчен пулӑшу ыйтнӑ. Пакунлисем юмӑҫа Чӗмпӗрте тытса чарнӑ. Халӗ вӗсем ҫак хӗрарӑм-юмӑҫ тата миҫе айвана улталанине тӗрӗслеҫҫӗ.
+1.3 °C