Тунтикун, ҫӗртме уйӑхӗн 1-мӗшӗнче, Атӑл тӑрӑх «Валдайсем» ҫӳреме пуҫлӗҫ. Вӗсем Хусана тата Сӗвене ҫитӗҫ.
Шупашкарти юханшыв порчӗ пӗлтернӗ тӑрӑх, паян Ҫӗнӗ Шупашкарти причалта хӗл каҫнӑ тата юсав тунӑ хыҫҫӑн «Валдайсене» шыв ҫине антарнӑ. Тунтикун вара вӗсем ҫула тухӗҫ.
Хусана кунне икӗ рейс тума палӑртнӑ: 8:00 тата 16:00 сехетсенче. Сӗвене вара ирхи 8 сехетре ҫула тухӗ, каялла – 14:30 сехетре.
Билетсене сутма пуҫланӑ ӗнтӗ. Аслӑ ҫынсем валли 800 тенкӗ тӑрать, 5 ҫултан аслӑрах ачасем валли вара – 400 тенкӗ.
Шӑплӑхра пулӑ тытса ларнӑ вӑхӑтра… пӑши ишсе пынӑ. Кун пекки Ҫӗнӗ Шупашкарта пурӑнакан Валериан Григорьевпа пулса иртнӗ.
Вӑл ирхине Атӑлта кимӗ ҫинче пулӑ тытса ларнӑ. Ҫав вӑхӑтра инҫех мар лапкӑн кӑна пӑши ишсе иртнӗ. Пулӑҫ ӑна телефонӗ ҫине ӳкернӗ.
Малтанах чӗрчун ҫыран хӗрринелле ишнӗ. Анчах палаткӑсем курсан Ҫавал пуҫламӑшӗ патнелле пӑрӑннӑ.
Специалистсем палӑртнӑ тӑрӑх, ҫуркунне вӗҫӗнче ҫамрӑк пӑшисем ҫӗнӗ территорисемпе паллашаҫҫӗ. Пӑшисем лайӑх ишеҫҫӗ, чылай чухне апат шараса юханшыв урлӑ та ишсе каҫаҫҫӗ.
Чӑваш Енре 2010 ҫулхи шӑрӑх ҫулла Атӑл леш енче пулнӑ пушарсем пирки фильм ӳкерме палӑртнӑ. Ку ӗҫе «Павел Лунгин мастерсокойӗн» команди пурнӑҫлӗ. Команда Шупашкара килнӗ ӗнтӗ, халхи вӑхӑтра театр артисчӗсен хушшинче кастинг ирттереҫҫӗ. Кинокартина режиссерӗ Дмитрий Волков пулӗ, фильма хальлӗхе «Видео на память» ят панӑ. Малтанлӑха палӑртнӑ тӑрӑх, вӑл юрату пирки пулӗ.
Команда 2010 ҫулта Атӑл леш енче пушар сӳнтерме хутшӑннӑ ҫынсене шырать. Кадрсене ӳкерме «чӗрӗ» свидетельствӑсем кирлӗ: мӗнле сӳнтерни, мӗнле транспортпа усӑ курни, ӑҫтан тумтир тата апат-ҫимӗҫ илни… Йӑлтах кирлӗ, ку пулӑмсене чӗрӗ кӑтартма май парӗ.
Пушара сӳнтернӗ ҫӗр хутшӑннӑ ҫынсем пирки информацие электрон почтӑна йышӑнаҫҫӗ: wolf.d@mail.ru
Чӑваш Енри ҫӑлавҫӑсем кимӗри ӳсӗр арҫынна ҫыран хӗррине илсе тухнӑ. Унта вӑл кӑна мар, холодильник та пулнӑ.
Кун пирки хыпар ӗнер 18:53 сехетре дежурнӑй пульчӗ ҫине килнӗ. Муркаш округӗнчи Шомикри кимӗ станцийӗ ҫывӑхӗнче Атӑлта юсавсӑр вӗрсе хӑпартнӑ кимӗре арҫын пулнине пӗлтернӗ. Ҫӑлавҫӑсем вырӑна тухса ӑна шыраса тупнӑ.
Ҫитменнине, арҫын ӳсӗр пулнӑ иккен. Сӑнӳкерчӗке пӑхсан ҫакӑ паллӑ: кимӗре вӑл кӑна мар, холодильник та пулнӑ. Ҫӑлавҫӑсем кимме ҫыран хӗррине илсе тухнӑ.
Сосновка ҫывӑхӗнче Атӑлта пулӑҫ пӑр айне анса кайнӑ. Юрать, ку пысӑк инкекпе вӗҫленмен. Ҫӑлавҫӑсем вӑхӑтра килсе пулӑшнӑ.
Республикӑри шыравпа ҫӑлав служби пӗлтернӗ тӑрӑх, ку ӗнер, пуш уйахӗн 29-мӗшӗнче, пулнӑ. Ҫӑлав службине шанкӑрав ҫитнӗ: икӗ пулӑҫ ҫыран хӗррине ҫитеймеҫҫӗ, пӗри ирӗлнӗ вырӑнта шыва кайнӑ. Ҫӑлавҫӑсем пӗр тӑхтамасӑр пулӑҫсем патне «Ижора» аэрокимӗпе ҫитнӗ. Иккӗшне те ҫыран хӗррине илсе тухнӑ. Унтан вӗсене тухтӑрсене сывлӑхне тӗрӗслеме панӑ.
Ҫӗрпӳ округӗнчи Елаш ялӗнче пурӑнакан Валентина Архипова ҫак кунсенче 95 ҫулхи юбилейне паллӑ тунӑ.
Валентина Егоровна ҫак ялтах ҫуралса ӳснӗ. Вӑрҫӑ вӑхӑтӗнче вӑл ҫап-ҫамрӑк хӗр пулнӑ, ҫапах йывӑр ӗҫрен пӑрӑнман: Йӗпреҫ районӗнче вӑрман хатӗрленӗ, Атӑл леш енче торф кӑларнӑ, «Правда» колхозра тӑрӑшнӑ.
Кайран Валентина Егоровна Елашри фельдшер пунктӗнче чылай ҫул ӗҫленӗ: куҫ чирӗсенчен сипленӗ, уколсем тунӑ, пӗрремӗш медпулӑшу панӑ. Хӑш чухне хӗрарӑмсене ача ҫураттарма та тивнӗ. Тивӗҫлӗ канӑва тухсан та ӗҫне пӑрахман – вырӑнти фермӑра тепӗр 13 ҫул вӑй хунӑ.
Мӑшӑрӗпе Петр Никитичпа 5 ача ҫуратса ӳстернӗ. Вӑл – вӑрҫӑ ветеранӗ. Паянхи кун Валентина Егоровна 10 мӑнукӗпе, 16 кӗҫӗн мӑнукӗпе хӗпӗртесе пурӑнать.
Кӑшарнире Шупашкарта 5 вырӑнта шыва кӗмелли 6 купель пулӗ. Вӗсен ҫывӑхӗнче ҫутӑсем вырнаҫтарӗҫ, ӑшӑнмалли палатка та пулӗ. Ҫавӑн пекех хӑрушсӑрлӑхпа тивӗҫтерес тесе полици, ГИМС, васкавлӑ медпулӑшу ӗҫченӗсем дежурствӑра тӑрӗҫ.
Шыва кӗмелли вырӑнсем ҫакӑнта пулӗҫ: Арҫынсен Ҫветтуй Троица мӑнастирӗ ҫывӑхӗнче Атӑлта (2 купель), Раҫҫей Ҫветтуй Новомоученникӗсен тата Исповедникӗсен чиркӗвӗ патӗнче, Хусан ҫыранӗнче, «Дубки» коттедж поселокӗ ҫывӑхӗнче, Коммуналлӑ Слобода урамӗнчи 50-мӗш ҫурт патӗнче.
Паян Атӑл леш енче, Первомайски поселокӗ ҫывӑхӗнче, 75-ри пулӑҫ путса вилнӗ.
Инкек пулни пирки ҫӑлавҫӑсене паян кӑнтӑрла пӗлтернӗ. Пулӑҫ ҫыран хӗрринчен 300 метр аяккарах пӑр айне кайнӑ. Ҫӑлавҫӑсем унӑн виллине шыраса тупса ҫыран хӗррине илсе тухнӑ.
Палӑртмалла: хӗлле пуҫланнӑранпа Чӑваш Енре шыв-шур ҫинче пулнӑ пӗрремӗш инкек ку.
Ӗнер каҫхине, раштав уйӑхӗн 1-мӗшӗнче, Хӗрлӗ Чутай округӗнчи Хватукасси ялӗ патӗнчи пӗвере арҫын виллине тупнӑ. Кун пирки вырӑнти ҫынсем экстреннӑй службӑна шӑнкӑравласа пӗлтернӗ. Арҫын 55 ҫулта пулнӑ. Вӑл мӗнле майпа путса вилнине халӗ уҫӑмлатаҫҫӗ.
Аса илтерер: чӳк уйӑхӗн варринче ҫӑлавҫӑсем Атӑлтан 53 ҫулти арҫын виллине туртса кӑларнӑ.
Чӳк уйӑхӗн 14-мӗшӗнче 23 сехет ҫурӑра ҫӑлавҫӑсем Атӑлтан 53 ҫулти арҫын виллине туртса кӑларнӑ. Ӑна Мускав ҫыранхӗрринчи носос станцийӗ ҫывӑхӗнче тупнӑ. Халӗ ӗҫ-пуҫа уҫӑмлатаҫҫӗ.
Ҫавӑн пекех иртнӗ талӑкра республикӑра икӗ пушар пулнӑ. Чантӑрта пӗр кил хуҫалӑхӗнче вутӑ ҫуннӑ. Ҫулӑма пушарнӑйсем киличчен сӳнтернӗ. Тӑвай округӗнчи Вӑтаяль ялӗнче 75 ҫулти хӗрарӑмӑн кил хуҫалӑхӗнче мунча ҫунма тытӑннӑ. Ҫулӑм шалти отделкӑна сиенлетнӗ.
+17.6 °C