«Хута кĕрет шап-шурă хут…»

Мальвина Петрова | Сăвă | 790


Хута кĕрет шап-шурă хут

Анне пекех: ӳпкевсĕр, тимлĕ.

Ӳпне1 ӳкетĕп тепĕр хут

Темле: ни чĕрĕ мар, ни вилĕ...

 

Хĕрхеннĕрен каллех чĕркет:

Аманнă ăсăм, чĕмĕм2 чирлĕ.

Чĕлхем вĕçне тумлать шерпет

Такам. Пĕрех. Мана çак кирлĕ.

 

Куççуль юхмасть — хӳхлет калем3

Тăшман, тăван, çулташ4 юлманшăн.

Кунта юлать манран валем5:

Хамах, хамах суйларăм ашăм6.

 

Ăшра — суран, сăнра — пĕрме7 —

Тахçан йĕрленнĕ хурлăх, савнăç.

Сутмастăпах нихçан пĕрне —

Мана вĕсем парнелĕç канăç.

 

Тĕке'р вырне — шап-шурă хут —

Çунман, çĕрмен яланлăх тынă8.

Путармĕ шыв, витермĕ вут —

Юнпа тарпа Ăстаçă çырнă.

 
1 Ӳпне — лицом вниз
2 Чĕм — дыхание, жизнь
3 Калем — перо
4 Çулташ — попутчик
5 Валем — обьявление, оповещение
6 Ашăм — заснеженная дорога
7 Пĕрме — морщинки
8 Тынă — свидетель, очевидец

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем