Электронлă вулавăш

Михаил Сениэль (Егоров Михаил Павлович) 1940 çулхи раштав уйăхĕн 30-мĕшĕнче Тутарстанри Аксу районне кĕрекен Саврăшпуç ялĕнче колхозник çемйинче çуралнă, 1954 çулта Саврăшпуçĕнче тулли мар вăтам шкул, 1957 çулта Аксура вăтам шкул, 1959 çулта Чистайра медицина училищи пĕтернĕ, ун хыççăн икĕ çул хушши хăйсен районĕнчи ялсенче фельдшерта ĕçленĕ.

1962-1967 çулсенче Михаил Сениэль Хусан университетĕнче историпе филологи факультетĕнче вĕреннĕ. Университет пĕтерсен ăна ĕçлеме Чăваш кĕнеке издательствине яраççĕ. Унта вăл вуникĕ çул хушши малтан ахаль редакторта, унтан аслă редакторта вăй хурать. 1974 çултанпа вăл — СССР писателĕсен союзĕн членĕ. 1987-1989 çулсенче Мускавра литература институчĕ çумĕнчи аслă курсра вĕренет.

Михаил Сениэль кĕнекисем Шупашкарта та, Мускавра та тухнă. Сениэль хайлавĕсене украин, белорус, поляк, еврей, тутар, азербайджан, пушкăрт, туркмен, осетин, сербохорват, итали, француз, акăлчан, яппун чĕлхисене куçарнă.