«Пурнаттăм эпĕ тăнсăррăн, хусаххăн...»

Михаил Сениэль | Сăвă | 670


Пурнаттăм эпĕ тăнсăррăн, хусаххăн.

Халь çитрĕ вăхăт çиçĕм çиçтерме.

Хурланăп, йĕрĕп ĕнтĕ урăхла халь,

пăрахăп вĕçсĕр хывăх вĕçтерме.

 

Ахаль çынла пурнаймăп эпĕ урăх.

Çул уçă. Куç та уçăлчĕ йăлтах.

Тетте самант! Мана шăпа чуп турĕ!

Чутах кая юлаттăмччĕ, чутах.

 

Çурта çутса малтанхи хут кĕлтунăн

тăратăп çĕкленсе эп чĕрепе.

Çын-Турăллă тĕнчен çук вĕçĕ унăн.

Ман чун пĕрлешнĕ çавă тĕнчепе.

 

Тур амăш пек аннем хĕрес хурать те

эп çыврас чух пырса ман пуç вĕçне,

ун пĕтĕм асапне, чунне куратăп,

туятăп ăшшипе юратăвне.

 

Тур амăш пек аннемĕрĕн çич ывăл.

Çул уçă. Тĕттĕме çурта хăвать.

Эп те, пурте — пуласлăхлă та сывă.

Вĕрет чун-чĕремре темле хăват...

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: