Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Сар сăмсаллă чĕппӳччĕ эп санăн,

Юрататтăм кĕрхи çĕн тĕсе.

Эс шӳтлеттĕн, «Илемлĕ пулсан та

Сарă тĕс – уйрăлу вăл» – тесе.

Çунат сартăм. Кил-çурт тăвăрланчĕ.

Пуçăмра вĕçес шухăш кăна.

Эп юратнă тĕспе кĕр сăрланчĕ.

Ăсатсамччĕ, анне, ывăлна.

Курăнми пуличчен ална султăн

Куçне тутăр вĕçпе шăлнă май.

Тăкăнать вĕлтĕр-вĕлтĕр сар çулçă,

Çавăнпах тиврĕ пуль уйрăлма.

Сар кĕре ан хурла уйрăлушăн,

Уншăн мар çула тухрăм пĕччен.

Эп хам тĕллĕн вĕçесшĕн пĕр хушă,

Пурнăç ятлă çула тухиччен.

Сăнасам, тӳпере ушкăн кайăк

Çул уçать ăшă кăнтăралла.

Вĕсемпе сан чĕппӳ вĕçсе кайрĕ,

Пĕчченех вăл тесе ан кала.

Кăнтăра тинкерсе ирĕн-каçăн

Эс, аннеçĕм, хаш-хаш ан сывла.

Ирсерен сар хĕвел йăл кулсассăн

Пĕлсе тăр, ывăлу сан сывах.

Вăл халь халсăр чĕп мар – ăмăрт кайăк,

Çав-çавах юратать сар тĕсе.

Çур кунне çывхарсан ху та калăн

Сарă тĕс – тĕлпулу вăл тесе.

1967, раштав.

Йăл та йăл çиçес пулсан

Хĕвел çеç-ха терĕм.

Çук иккен. Савни кулсан

Хĕвелтен ирттерĕ.

Çулăм пек кăвар вутли

Урăх пур-ши? терĕм.

Халĕ пĕлтĕм, хĕр тути

Çулăмран ирттерĕ.

Хурçă çирĕп, чуллă ту.

Урăх çук пуль терĕм.

Пур иккен. Чăн юрату

Пуринчен ирттерĕ!

3.12.1967.

Мĕншĕн, мĕншĕн çĕркаç эсĕ култăн,

Ытамра пăшăлтатрăн, «Эс ман».

Ял вăранчĕ. Кĕç шăплăх та тулчĕ,

Эпир авă çаплах уйрăлман.

Пултăр-и! Кӳршĕ-аршă курсан та

Çук, каймастăп санран уйрăлса.

Ятăма варалаççĕ пулсан та

Уйрăлмас. Ма тесессĕн эп – сан!

1967, авăн.

Ун чухне улмуççи шур тумне пăрахсаччĕ,

Чăмăркка улмисем курăнатчĕç пĕр пек.

Эп пăхса савăнаттăм, «Паха атте сачĕ.

Çимĕççи кĕр кунне пулĕ тулăх, кĕрпек».

Кĕр çитсен пахчана эпĕ кĕтĕм, хурлантăм,

Улмисем пит шултра, чуптăвасшăн çĕре.

Анчах хăшĕ-пĕри ăшĕнчен йăлт хуртланнă,

Е тепри çиелтен хăмăрланнă, çĕрет.

Тепĕр ир улмасем çĕре ӳкнĕ нумайăн

(Çĕрлехи çил тасатнă улма йывăçне).

Çав йăх- ях çимĕçе сыснана панă майăн

Эп тав турăм çиле ырласа ун ĕçне.

Çил пулман тăк, çĕре ӳкменни те чирлетчĕ,

Курас çукчĕ çисе тап-таса улмине.

Ан хуртланччăр тесен имлени те кирлехчĕ.

Анчах халĕ тин мар, чечек çурнă чухнех…

Кăвак шуçăм сар тырă вăраннă пусса

Тăрна куç пек тăп-тăрă, таса сывлăм сапрĕ.

Çуллĕ сăрт хыçĕнчен хĕвел тухрĕ кусса,

Тыр-пула шевлипе типĕнтерчĕ, тасатрĕ.

Çил ачи те юлассăн васкарĕ ирех –

Тыр-пулпа пуç тайса сывлăх сунчĕç сăпайлăн.

Тырă пиçрĕ пулсан тухма вăхăт хире.

Тур тихан тулхăрса талпăнать ман комбайн.

Шуçăм çурĕ, хĕвел типĕнтерчĕ пулсан,

Сарă тыр, сан çулу тек пӳлме енне мар-ши?

Хăвпа ху киленсе юлашки хут хумхан,

Юлашки хут хумхан, кĕвĕле пурнăç маршĕ.

1967, утă-çурла.

Р.М - на

Ирхи хĕвелпе уй-хире тăрса тухрăм

Ĕçлейĕп-ши, терĕм эп, шăрăх чухне.

Чăнах та, хĕвел аниччен утă пухрăм

Чăмма та юрать халь Пăтавăш шывне.

Пăтавăш шывпе пĕвĕме эпĕ çурăм,

Тасатĕ-ши, терĕм, ĕçри тусана.

Чăнах та, тасалчĕ тарланă çан- çурăм,

Халь акĕ курма та юрать тусăма.

Хут купăсăм ман каçпа йĕрчĕ, хурланчĕ,

Илтейĕ-ши, терĕм, савниçĕм ăна.

Чăнах та, вăл илтрĕ, çума тухса ларчĕ.

Халь ак чĕрере вутлă туйăм кăна.

17.05.1967.

Çут атă илтĕн те унпа

Пылчăк çинче, шывра çӳрерĕн.

Атту варалансассăн та

Урусене вăл йĕпетмерĕ.

Шыв-шурпала атту шăтсан

Тухса çеç петĕн, сапламарăн.

Юлташупа инкек пулсан

Нивушлĕ хăраса эс тарăн?..

Ялан, ларатăп та çырма,

Сăр кашкăртан хăранă сурăх евĕр

Таçтах тарса пĕтетĕр, шухăшсемĕр.

Асра – Вăрнар, Хураçырма.

Нивушлĕ эпĕ шутласа

Свердловск çинчен çыраймăп лайăх сăвă?

Талант тени сан çук пулсан мĕн тăвăн.

Пĕр çăлăнăу. Çыр вăрласа.

Çук, çук. Ун пек этем чунне

Яланлăхах эп хамăнтан çухатăп.

Сахал пулсассăн та, хамах пухатăп

Поэзин ылтăн пĕрчине.

Ухмах, пĕлместĕн пурăнма.

Вăрла сисмен чухне, чапа тухатăн…

– Шăплан! Тасал часрах кунтан, тухатмăш.

Текех мана ан курăн! Марш!

Асра – Вăрнар, Хураçырма,

Куç умĕнче – Эльмаш, Свердловск илемĕ.

Эй! Ырă шухăшсем, вĕçсе килсемĕр,

Пуçлатăп сăвăсем çырма.

30. 09. 1967.

Пĕрремĕш юратăва –

Римма Ластухинăна.

Кашни этем вăл хăйне майăн

Тахçан пĕрремĕш хут савать.

Тен, çав çынсем ăнланĕç манăн

Чĕлхе чутланă çĕн сăвва.

Вун саккăра çитсен куçларăм

Пĕр кӳршĕ ялăн сар хĕрне.

Каç-каç утса эп такăрларăм

Ик ялăн ансăр сукмакне.

Ман пек тӳпе каччийĕ Марс та

Савман пуль шуçăм çăлтăрне.

Ăна юратнă, пытармастăп.

Юратнă унăн сăн-питне.

Çын чунĕ кĕрĕк çанни мар çав,

Ăна пăхаймăн тавăрса.

Ултавлă чунĕ ун пулман, ав,

Хăй пек илемлĕ те таса.

Пĕр каччă тупрĕ те йăлт манчĕ

(Пулман та тейĕн савнă тус!)

Çапла яланлăхах аманчĕ

Пĕрремĕш туйăм – юрату.

Ак халĕ икĕ ял сукмакĕ

Уçать сипленнĕ сурана.

Чĕрем, ан кассăл та ан макăр,

Пĕрремĕш туйăм пурăнать!

10-11.03. 1967.

Эй, Çĕр чăмăрĕ! Çитĕ сана алхасса –

Антăхсах этем юнĕ, куççулĕ ĕçетĕн.

Çакă намăссăр, ирсĕр ĕç хыççăн хăйса

Çут хĕвел тавралла çывăхран эс вĕçетĕн.

Сан ĕçна тӳсеймесĕр хĕвел пĕр-пĕр кун

Çулăмпа çунтарса ярасран хăрамасни?

Эсĕ кӳпнĕ куççуль, эсĕ кӳпнĕ чĕр юн

Кĕвелсен хырăму хăмпă пек çурăлмасть-ши?

Ма çынсем пĕр тан мар чĕрĕ чух та, вилсен те?

Ма тĕллеççĕ çаплах пăшалпа пĕр-пĕрне?

Ма пĕрин аллинчи çăкăра та илетĕн,

Ылтăн-кĕмĕл хутаçĕ паран теприне?