Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Пăши урийĕ

тип çĕр çинче тăрать тĕреклĕ,

шывран тухсан вилеççĕ

пулăсем.

Çунатлисем

çунат тĕрекĕпе вĕçеççĕ.

Çынсемшĕн çеç йĕрке çак

урăхла,

этемлĕхĕн ура тĕреклĕхне

çĕр варринчен

хĕвел таран виçеççĕ.

Йĕпреç. 1974, çĕртме.

Ма йĕретĕн, Муза?

Ма куçна шăлан?

Чĕнменрен-и, тусăм,

Темĕн тунсăхлан?

«Вăрман тăрри тикĕс», —

Тенĕ чăваш çынĕ.

Ман кун-çулăм тирĕс,

Тикĕс пек пулин те.

Хăшпĕр чухне вăрттăн

Сивĕсем çитеççĕ.

Ун чух хĕлĕхсем те

Пăрпа витĕнеççĕ.

Ак часах çĕнтерĕ

Çут хĕвел хăвачĕ.

Хĕлĕхсем те юрă

Çĕнĕрен шăратĕç.

Кĕркунне сăнĕсем илĕртеç таврара:

Вăрман ылтăн тумпа пĕркенет,

Лăпкă-лăпкă садри шăнкăр-шăнкăр шывра

Кĕленче пек тӳпе чӳхенет.

Астăватăп аван: иртнĕ çул та çапла

Кавир пек ешеретчĕ калча.

Ун чухне эп пĕрремĕш хутчен санпала

Тĕл пулсаттăм—именчĕк ача.

Сан çинчен шăп çулталăк айван пуçăмпа

Шухăшларăм эп сăвăласа.

Юрату ăшшипе хĕрнĕ яш чунăмпа

Эп шанаттăм эс те савасса...

Кĕркунне кунĕсем илĕртмеççĕ текех,

Курсанах вĕсен капăр сăнне,

Эсĕ сулхăн, сив кăмăллă пулнă пекех,

Тем хĕсет манăн яш чĕрене.

Вырăсларан Н. Евстафьев куçарнă.

Ç.Элкере

Хĕвел те килте ăшăрах текен туйăм

анне сĕчĕпех юнăмра юлчĕ-ши?

Кушлавăш текен çав вун ик яллă уйăм

кун-çулăмăн тĕнĕлĕ, чунăм ăшши.

Анне чĕрçине улăштарчĕ хыт çĕр,

кипке чĕркевне çут тӳпе ылмаштарчĕ.

Сăпка юррине илтсенех пурĕ пĕр

асамлă хăват хальхине йăлт мантарчĕ.

Туратшăн хакли вăл – пĕрремĕш папка,

кайран туратран пысăк йывăç çĕкленĕ.

Баха пĕличчен чылай тунă «паппа»,

асамлă сăпка юррине эп итленĕ.

Эй, юрă!

Ачалăхăмран вĕçсе тух,

инçе çулрисем те сана халĕ илтчĕр.

Ӳкес тенĕ чух, парăнас тенĕ чух

кăштах тĕлĕрсе каллех чĕр вăй илччĕр!

Йĕпреç, 1974, çу.

1.

Хĕвел çинче

пĕр çутă илĕртет.

Чечексене тапта-тапта

утатăп

ун енне.

Çитетĕп те…

Ултав!

??!

Пушмак кĕллийĕ айĕнче

вак кантăк

чанкăртатрĕ.

2.

Тислĕк çинче ӳстернĕ çимĕçе

çумасăр эп

çимерĕм.

3.

Ыр выльăха пусма

хăю

çитерейместпĕр.

Ашне вара

тиркеместпĕр.

4.

Çурла хуçийĕн

ырлăхне,

çава хуçийĕн

ылханне

чашларĕ çумăр.

Сăваплă та

ылханлă

çумăр.

5.

Вĕлле хурчĕ

тăшмана

сăннипе тирнĕ чух

вилесси çинчен

шутламарĕ.

1974, кăрлач

1.

Вăрман вăйне тункатара

тупаймăн.

Ăна

хунавсенче шыра,

ун хыçĕнчи

хунавсенче.

2.

Çав хурăнсем

пит хăвăрт çитĕнеççĕ,

тата часрах

çĕреççĕ.

3.

Пĕр хăрăк хурама

хăйĕнчен хунавĕ иртесрен

хăрарĕ.

Ку –

ултав çутă, терĕ те…

хĕвеле

хупларĕ.

1974, пуш.

Кăн-кăвак тӳпере çутă çăлтăр

Паçăрах йăлкăшать йăлтăр-йăлтăр.

Вăйăра та паян тунсăхларăм,

Çавăнпах-ши ăна эп сăнарăм.

Тантăшсем савăнса юрласан та

Ман юрлассăм килмерĕ çав темшĕн,

Ах, чĕремçĕм, кама тунсăхлатăн?

Мĕнле савăк сăмах эс илтесшĕн?

Пилĕк çул ăна кĕтрĕм — сахал-им?

Ун çинчен çеç шутларăм — ахаль-им?

Паян çитрĕ яла кĕтнĕ сар хĕр,

Ун вăййа тухмаллаччĕ-çке кĕçĕр.

Анчах çук, вăл тухман кĕçĕрхи çĕр,

Хавас мар вăйăра чун-савнисĕр.

Савнă тусăм, тухсамччĕ, кĕтетĕп

Чăтас çук, ху патнах халь вĕçетĕп.

Шартах сикрĕ сасартăк чĕреçĕм,

Илтрĕм эпĕ: «Сывах-и, чĕкеçĕм»

Умăмрах ав, çиçет йăлтăр-йăлтăр

Пуçне çыхнă кĕрен пурçăн тутăр.

Тухать эстрада çине тусăм,

Вулать вăл Çеçпĕл сăввине.

Сасси янравлă унăн, уçă, —

Ярсах илет чун-чĕрене.

Ун çутă куçĕсем хĕлхемлĕ,

Ăна итлетĕн те туян:

Тăван çĕршыв çынни илемлĕ,

Юрри-ташши те пит пуян!

1.

Чипер инке каçма çинче

кĕпе çăвать,

ик çара пĕç асамласа

куçа пăвать.

Пуçа ыр шухăш

тин çитет,

ара, анне ман

кин кĕтет…

2.

Вăтанчăк хĕрччĕ,

халĕ - арăм.

Пепкемĕре парсассăн кăкăрне

илемлĕ намăслăх çине пăхма

çапах та

хăяймарăм.

3.

Хăрах алли вĕçертрĕ

тӳммине,

тепри вăтанчăклăн

хупларĕ

кăкăрне.

4.

Хĕрарăмсем пляжра-мĕнре

сĕтеклĕ шанкă пек

хĕртĕнеççĕ.

Килĕсене каяççĕ те

пас тытнă йывăç пек

витĕнеççĕ.

5.

Хĕр кăкăрĕ

куян пуçĕ пек,

каччă куçĕ

хăлат куçĕ пек.

6.

Тăхта!

Ан хывăн хальлĕхе,

эп

куçăма хупам…

1974, нарăс.

Мана çуралсассăн чĕнмешкĕн пĕлмен,

вара «Витали» ят хурать Иртемен.

Атте ăшшине ачаран эп туйман,

çавăнпа хушамат та кукаç ячĕ ман.

Чиркӳ каткинче кăшт йĕпетнĕ пуçа.

Юрать чĕрĕк ĕмĕр пĕччен хам хуçа.

Чĕре тăвăлать, тăкать вут-хĕмне,

кĕмешкĕн ыйтать поэзи тĕнне.

Анне ăнланать, Микул турă, каçар.

Мана çĕн тĕнре халь чĕнеççĕ Сăвар.

Аннеçĕм, пилле, пуçăм тăрăх шыв яр,

поэзи çĕрне талпăнать сан Сăвар.

Сисмерĕ тесе хутаçа ан тултар,

сăмах вут чульне ытларах кăна пар.

Чĕре кăварне тытан сăвăра

пĕлсем ӳлĕмрен Эртиван Сăвара.