Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Кивелнĕ пӳрт, имшер хапха,

Çĕрсе арканнă кил карти.

Юнашарах, ав, ват йăмра,

Пиçенпе тулнă анкарти.

Тахçантанпах кунта пулман,

Этемĕн çук ура йĕрри.

Анчах хапха çинче аран

Курнать пĕр çăлтăрăн палли.

Çумăрпала та çилпеле

Çухалнă тĕсĕ тахçанах,

Çул выртнă çак килтен инçе

Мĕн аслă вăрçă тухсанах.

Тен, ывăлне е ашшĕне

Ăсатнă амăшĕ вăрçа.

Чун-чĕререн куляннипе

Юлашки хут хĕрес хурса.

Тен, çамрăк кин йĕре-йĕре,

Хăй мăшăрне ыталаса

Тыттарнă пĕчĕк пепкине

Сывах килме тархасласа.

Çук, таврăнман кунта никам.

Тахçантанпах вăрçă пĕтни.

Хапха çинче кăна аран

Палăркалать çăлтăр палли…

Тус-тăванпа — уяв тулли,

Савăнăçпа юрлать чĕрĕм.

Тăван чĕлхе — чăваш чĕлхи

Юрăпалла тĕрленнĕрен.

Уйра-хирте ĕç шав тулли —

Чăваш хастарлăхĕ малта.

Тăван чĕлхе — чăваш чĕлхи

Ĕçре туптаннă авалтан.

Çут çăлтарсем карти-карти

Мĕн ĕмĕртен тăраç çунса.

Тăван чĕлхе — чăваш чĕлхи

Янрать мухтавлă космосра.

Таçта кайсан та çул çути

Ертсе пырать пире малта.

Тăван чĕлхе — чăваш чĕлхи

Вĕçет вăл халь малтан-мала.

Пире вăрçă кирлĕ мар, тăнăç пурнăçа упрар.

Пулсан вăрçă çĕр çинче арканать пирĕн тĕнче:

Çут çанталăкăн илемĕ куç умĕнчех çухалать,

Уçă саслă кайăк-кĕшĕк хитре юрă юрламасть,

Хирти сарă чечек те пирĕн куçа илĕртмест,

Çĕкленекен ял-хула вутра çунса кĕлленет,

Ачисемшĕн кулянса ват çынсен куçĕ типмест,

Хаяр вăрçă хирĕнче нумай çын вилсе пĕтет.

Пире вăрçă кирлĕ мар, тăнăç пурнăçа упрар.

Пулмасассăн, тусăмсем, усал вăрçă çĕр çинче:

Çӳл тӳпери пĕлĕт те питĕ хитрен курăнать,

Сар хĕвел те çĕр питне ачашшăнрах çутатать,

Кĕмĕл саслă кайăк та хăй юррине шăратать,

Сад-пахчари чечексен ырă шăрши сарăлать,

Асанне те хăй куçне тутăр вĕçĕпе шăлмасть,

Шăкăл-шăкăл калаçса халăх туслă пурăнать.

Пире вăрçă кирлĕ мар, тăнăç пурнăçа упрар.

Куççульпе макăрар мар — кулă çиçтĕр пит çинче.

Çемьене уйăрар мар — пурăнччăр килĕштерсе.

Ялсене аркатар мар — аталанччăр вăй илсе.

Тăшман кирлĕ мар пире, пĕр-пĕрне тăван курар,

Малалла

Эпĕ куртăм пĕр кунне

Хĕвел питне çунине,

Сивĕ шывпа чӳхенсе

Хăйĕн питне шăлнине.

Питне çума ӳркенмест.

Ир те, каç та, кунсерен.

Çавăнпа хитрен курнать

Кăвак пĕлĕт хушшинчен.

I

Вăрманти полустанокра поезд çинчен виçĕ-тăватă чăваш тата пĕр вун-вуник çулхи ача тухса юлчĕç.

Ача шурă кĕпепе, кĕске хăмăр йĕмпеле. Мăйне хĕрлĕ галстук çыхнă. Пуçĕнче хĕрлĕ çăлтăрлă шурă шлепке. Уринче хура чăлхапа пушмак. Чăлхи, вăрăмскер, ача урисене яштак кăтартать. Ачан пĕтĕм пӳ-сийĕ, уткалани, пăхкаласа тăни илемлĕ.

Чăвашсем, полустанокран тухсан, вăрман хĕррине чĕлĕм туртма ларчĕç. Ача çурăм хыçĕнчи пĕчĕк кутамккине çӳлерех хăпартса çыхрĕ те вăрман сукмакĕпе çăмăллăн утрĕ.

Çуллахи кун каç еннелле сулăннă. Хĕвел чалăшшăн пăхать, йывăç çулçисем витĕр сукмак çине унăн çути тĕл-тĕл ӳккелет. Ванюк, вăрмана кĕрсенех, унталла-кунталла пăхкаларĕ. Тăван вăрман, тăван çĕршыв! Ванюк ку вăрманти кашни йывăçа, кашни шĕшкĕ тĕмине тенĕ пекех астăвать. Акă сукмак хĕрринче кукăр-макăр ват улмуççи ларать. Çак улмуççи çинчен Ванюк выçлăх çул пĕр витре улма пухнăччĕ. Улмисем вĕтĕ, сип-симĕс, çăвара чикмелле мар йӳçĕччĕ. Ванюк амăшĕ çав улмасене, кăмакана хывса пĕçерсе, ачисене çитеретчĕ. Выçлăх çул мĕн-мĕн çимен-ши? Выçлăх çул Ванюкăн ашшĕ, икĕ йăмăкĕ вилчĕç. Ванюк та, выçлăх çул килте пурăннă пулсан, вилетчĕ пулĕ. Юрать Ванюка амăшĕ çине тăрсах ву-лăсри ытти ачасемпе пĕрле Мускава ячĕ. Мускава кайман пулсан, Ванюк паян кун çак сукмакпа: «Халех киле çитетĕп, аннене куратăп», — тесе хавассăн утса пынă пулĕччĕ-ши? Выçлăх çул, асран кайман йывăр çул... Сарă çӳçлĕ, йăлтăркка куçлă пĕчĕк Санюк халĕ те Ванюкăн куçĕ умĕнче. Ыраш çăкри, паранкă çинĕ чух Санюк чупса çӳресе вылятчĕ, кулатчĕ. Кĕркунне, çимелли пĕтсен, Санюк улшăнчĕ. Çимелли йĕкел пашалăвĕ çеç. Санюкăн илемлĕ пичĕ кăн-кăвак пулса кайрĕ. Тути хуралчĕ. Икке кайнă пĕчĕк Санюк утайми те пулчĕ. Кунĕ-кунĕпе пукан çинче ларса: «Мемме-е», — тесе аллисене кăнтаратчĕ. Вилес умĕн малтанхи кун Санюк пукан çинче сулкаланса ларать. Йĕкел пашалăвне çăварĕнче мăкăлтаттарса нăчăк-нăчăк! ĕмет. Амăшĕ ачана ачашласа сăпкана вырттарчĕ. Санюк çĕрле сăпкарах вилсе выртнă...

Малалла

Пирĕн килте кушак пур.

Пит чее те, пит маттур.

Вăр-вар анчах вăл чупать,

Хăна килессе туять,

Шăшие вăл хăвалать,

Питне çуса кăтартать.

«Мăр-мăр», — тесе йăпшăнать,

Ура тавра çаврăнать…

Эп кушака пит юрататăп,

Юратнипе ăшă сĕт паратăп.

Эп утатăп урампа

Юрĕ кăчăрт ман айра.

Юр пĕрчи ӳкет çаплах,

Нумаях та мар çапах.

Туртса пырап çунашка

Ярăнмашкăн хаваспа.

Манпа пырать Хураçка

Выляса çунашкапа.

Эпĕ ярăнтăм каçчен

Мана тунсăхлă пĕччен.

Çапах Хураçкапала

Эх, аван-çке ярăнма!

Хĕвел таçта пытаннă,

Шăпланнă кайăксем.

Шур упа пек мăраннăн

Куçаççĕ пĕлĕтсем.

Кĕçех тапратрĕ çумăр

Янăравлă кĕввине,

Ӳкет вăл шăпăр-шăпăр

Кăтра хумсем çине.

Шыв хĕрринче пĕр пулăç

Тармарĕ çумăртан.

Пит чăтăмлă, хăюллă

Вăл ларчĕ çыранта.

Çав пулăç ĕнтĕ «ватă»

Куллен вăл пулăра.

Нумай та мар, сахал та

Вăл кайнă саккăра.

Ишет çăп-çăмăл путăш

Ача тимлет, кĕтет.

Хăй пуçĕнче пĕр шухăш

Хитрен вĕлтĕртетет:

«Çăрттан пулсан тем пекчĕ,

Уланкă е сасан…

Телейĕçĕм, килсемччĕ,

Ан пăрăн эс манран.

Вакки лексессăн — кайтăр,

Васкатăр хăй килне.

Ман вăлтана хыптартăр

Чи пысăк пиччĕшне»

Кĕçех пĕтет ăманĕ,

Пулмарĕ ăнăçу.

Хăçан çупах çакланĕ?

Çупахĕ çук та çук!

Ак курăр! Ак ăмсанăр!

Ай-яй! Епле хавас!

Пит самăр, питĕ самăр,

Çакланчĕ халь карас!

Малалла

Эп пурăнатăп Штанашра

Хастар та харсăр тăрăхра.

Кулленех шкула çӳретĕп,

Тĕрлĕ предмет вĕренетĕп.

Манра чăваш юнĕ чупать,

Çакăнпа эп мухтанатăп.

Хам юратнă чĕлхепе

Ĕмĕтленме юрататăп.

Çил-тăман вĕçтерет урамра,

Ĕмĕтсем çуралаç пуçăмра.

Эх, пуласчĕ ман хулара-

Атăл çинчи Шупашкарта!

Залив хĕррипелле утасчĕ,

Акăшсемпе йăпанасчĕ.

Палăк-аннене ыталасчĕ,

Телейлĕ пулма пил илесчĕ.

Пулас килет ман Мускавра —

Чи пысăк-пысăк хулара.

Кремле çитсе курасчĕ,

Мавзолей курса тĕлĕнесчĕ.

Каяс килет ман кăнтăра,

Тĕлĕнмелле ăшă вырăна.

Кайăксемпе пĕрле вĕçме,

Тутлă-улма — çырла çиме.

Курас килет ман Слакпуçа —

Ухсай çуралнă вырăна,

Ухсай чавтарнă çăлкуçа,

Вăл çитĕнтернĕ хурăна.

Тĕрлĕ чĕлхесем чылай,

Чаплă чĕлхесем нумай.

Чăваш чĕлхи пекки çуках!

Чăнахах, тĕрĕс сăмах.

Маттур, ĕçчен чăвашсем,

Сăнарлăхпа палăрнисем.

Кашни тивĕç мухтава,

Кашни тивĕç чыслава.

Чыса тивĕç чăваш нумай!

Малалла

Борки ялĕнче пурĕ те вунултă кил кăна. Вăл варман хӳттине пытанса ларнă. Анкарти хыçне тухатăн-вăрман пуçланать, укăлчаран иртетĕн — каллех вăрмана лекетĕн. Кăнтăр енче вара пысăках мар уйсем, çарансем, уçланкăсем пур. Вăл уйсене колхозниксем тырă-пулă акса тума вăрмап хăртса тунă. Çуллахи вăхăтра Боркине пĕртен-пĕр çул пырса кĕрет. Вăл ялтах вĕçленет. Малалла каймасть. Вăрман леш енче шурлăх пуçланать. Вуншар километра тăсăлать вăл хăшпĕр тĕлте. Шурлăха çулла лашапа мар, çуран çын та ура ярса пусма хăрать. Чĕррĕнех ĕмсе çăтать иккен вăл шурлăх чĕрчуна.

Ялти хăюллă сунарçăсем çак çăткăн шурлăх урлă та çул хывнă-мĕн. Вăл вăрттăн сукмака ялти ватă çынсемпе партизансен разведчикĕсемсĕр пуçне урăх никамах та пĕлмест.

Утпа çӳремелли пĕртен-пĕр çула партизансем юриех юрăхсăра кăларчĕç. Шурлăх урлă хăма сарса тунă икĕ километр тăршшĕ çула сӳтсе тăкрĕç. Çуна çулĕ лариччен пĕлмен çын, темле тăрăшсан та, яла лекеймест.

Çакна шута илсе-и, партизансен командованийĕ Боркире госпиталь уçма шутларĕ. Ялта аманнă е чирленĕ партизансем сывалаççĕ. Тепĕр чухне кунта пĕтĕм отряд кăштах канса илме е мунча кĕрсе тасалма чарăнса тăрать.

Малалла