Раҫҫейӗн хӑш-пӗр регионӗнче туристсене налук тӳлеттереҫҫӗ. Чӑваш Енре те ку темӑна хускатнӑ. Анчах республикӑн экономкиа аталанӑвӗн министрӗ Дмитрий Краснов ҫав шухӑша ырласах кайманни сисӗнет. Кун пирки вӑл Телеграмри хӑйӗн страницинче пӗлтернӗ.
«Хушма налук тени илемлӗ янӑрать. Ҫитменнине тата федераци шайӗнчи ӗҫтешсем ҫав налука регионсенче хӑварса ӑна муниципалитетсенче туризм инфраструктурине аталантарма яма ирӗк парасшӑн. Ҫав вӑхӑтрах хӑш-пӗр тӳнтерлӗх те пур», — тесе шухӑшлать министр.
Ҫав налук отельерсемпе кану бази тытакан усалмҫӑсене епле витӗм кӳнипе пӗрлех туристсем епле йышӑнасси пирки те шухӑшласа пӑхмалла тесшӗн Дмитрий Краснов. Тепӗр ҫыншӑн талӑкра тепӗр ҫӗр тенӗ тӳлеме тивни тем мар пек те тепри вара вӑл укҫана хӗрхенӗ те кӳршӗллӗ Мари Элта ҫӗр каҫас тейӗ. «Туризм налукне пирӗн тӗплӗ шухӑшласа йышӑнмалла», — тенӗ министр.
Италири Вальдоббьядене хулин мэрӗ, 47 ҫулти Лучано Фрегонезе, кашни эрнерех ытлашши килограмсене ҫунтарас тӗллевпе хула ҫыннисемпе пӗрле уҫӑлса ҫӳрет. Кун пирки The Guardian пӗлтерет.
Ҫӗртме уйӑхӗнче Фрегнонезене виҫҫӗмӗш хут хула мэрӗ пулма суйланӑ, вӑл хӑйӗн сывлӑхне лайӑхлатма тӑрӑшӑп тесе шантарнӑ. Хула пуҫлӑхӗ каланӑ тӑрӑх, ҫак вырӑна йышӑннӑ вӑхӑтра вӑл 50 килограмм мӑнтӑрланнӑ, халӗ 140 таять.
Чиновник мӑнтӑрланса кайнине «халӑхпа пӗрле пулма юратнипе» тата вӑрах вӑхӑт хушши ӗҫлеме тивнипе ӑнлантарать. Мэр вырӑнне йышӑннӑ хыҫҫӑн унӑн спортпа аппаланма тата хусканусем тума вӑхӑт юлман имӗш. «Тепӗр йывӑрлӑх — эпӗ тутлӑ ӗҫсе ҫиме юрататӑп, кунта вара лайӑх ҫитереҫҫӗ, ӗҫтереҫҫӗ, ҫавӑнпа та диетӑна пӑхӑнма ҫав тери йывӑр», — йышӑнать мӑнтӑрлана кайнине Фрегонезе.
Мӑнтӑрланнине пула уншӑн утма та, сывлама та йывӑр пулса кайнӑ, ҫурӑмпа чӗркуҫҫи те ыратма пуҫланӑ. Хула стени ҫинчи граффити ӳкерни юлашки тумлам пулса тӑнӑ — тахӑшӗ хула пуҫлӑхне «мӑн хырӑм» тесе йӗкӗлтесе илнӗ, сӑнӳкерчӗкӗ вара халӑх тетелӗ тӑрӑх саланнӑ.
Ҫакӑн хыҫҫӑн вӑл 90 килограмм таран начарланма шантарнӑ — мэр вырӑнне пӗрремӗш хут йышӑннӑ чухне шӑпах ҫавӑн чухлӗ вӑл тайнӑ.
Паян Ҫӗрпӳ муниципаллӑ округӗн пуҫлӑхн ҫумӗ пулса 53 ҫулти Ольга Чепрасова ӗҫлеме тытӑннӑ. Вӑл вӗрентӳпе тата социаллӑ ӗҫпе ҫыхӑнну ыйтусемшӗн явапли пулӗ.
Вӑл хӗрарӑм 2020 ҫулхи чӳк уйӑхӗнченпе Шупашкар мэрӗн социаллӑ ыйтӑвӗсемпе ӗҫлекен ҫумӗ пулнӑ, 2017-2020 ҫулсенче — Ҫӗнӗ Шупашкар администрацийӗн пуҫлӑхӗ.
Чӑваш Енре вырӑнти брендсен порталне ӗҫлеттерсе ярасшӑн. Кун пирки респулика вице-премьерӗ - экономика министрӗ Дмитрий Краснов каласа кӑтартнӑ.
«Чувашия БлагоДарит» ятлӑ пулӗ вӑл. Чӑваш бренчӗсене пӗр платформӑна пухӗҫ. Вӗсем пирки кӗскен калани, ячӗ, каталогӗ пулӗ.
Дмитрий Краснов каланӑ тӑрӑх, платформа маркетплейс пулмӗ, ҫавна май лавкка адресне е ссылкине кӑтартма сӗнеҫҫӗ. Министр бренд пирки каланине чӑвашла куҫарма сӗнет. Портала аталантарма вара ӑна акӑлчанла е китайла куҫарасшӑн.
Шупашкар районӗнчи прокуратура вырӑнти муниципалитет округӗнче ҫынсен ыйтӑвне вӑхӑтра хуравламаннине тупса палӑртнӑ. Кун пирки вырӑнти хастар надзор органне хӑй пӗлтернӗ-ха.
Прокуратура тӗрӗсленӗ те Ишлей ялӗнче пурӑнакан пӗр ҫын ака уйӑхӗн 2-мӗшӗнче вырӑнти тӳре-шара патне ыйтса ҫырнине палӑртнӑ. Муниципалитетӑн Ишлей территорийӗнчи пайӗн пуҫлӑхӗ ыйтӑва хуравлама васкаман. Ыйтӑвӗ урамри юра турттарманран ҫурхи шыв юхса выртнипе ҫыхӑннӑ.
Тӳре-шара тӗлӗшпе прокуратура административлӑ майпа ӗҫ пуҫарнӑ.
Чӑваш Енӗн Ипотека корпорацийӗн гендиректорӗ Алексей Антонов тӗлӗшпе пуҫиле тата тепӗр ӗҫ пуҫарнӑ. Вӑл ӗҫ вырӑнӗпе хӑйшӗн усӑ курнӑ тесе шухӑшлаҫҫӗ.
Тӗпчевҫӗсем шухӑшланӑ тӑрӑх, 2022 ҫулхи авӑн уйӑхӗнче Чӑваш Енӗн Ипотека корпорацийӗ застройщик-организаципе Вӑрмарта нумай хваттерлӗ ҫурт хӑпартма килӗшӳ тунӑ. Хваттерсенчен хӑшӗсем социаллӑ тӗллевлӗ пулнӑ: ҫынсене ишӗлекен ҫуртран куҫарма тата тӑлӑх ачасем валли.
Чӑваш Енӗн Минстройӗ тӗрӗслев ирттернӗ чухне тӗрлӗ кӑлтӑк тупса палӑртнӑ, апла пулин те Антонов строительство ӗҫне ҫитменлӗхе пӗтермесӗрех тӑсма хушнӑ-мӗн.
Ӳлӗмрен ҫав ҫурта хута ярайман. Пурӑнма май килмен ҫурта сӳтме тивнӗ. Ҫавна пула Антонов 40 миллион тенке яхӑн тӑкак кӳнӗ тесе шухӑшлаҫҫӗ. Ҫурт хӑпартнӑ чух укҫа хывнӑ ҫынсем тата тӑлӑхсем хваттерлӗ пулайман.
Гендиректор тӗлӗшпе пакунлисем унччен те пуҫиле ӗҫ пуҫарнӑ.
Ашшӗ-амӑшӗн хӳтлӗхсӗр юлнисене патшалӑх хваттерпе тивӗҫтерет. Ку ӗҫ пур чухне те ҫӑмӑллӑн пулса пымасть-ха, ача ҫуртӗнчен тухнӑ яш-кӗрӗмпе хӗру-праҫӑн чылай чухне хваттере самай вӑхӑт кӗтме тивет.
Нумаях пулмасть Елчӗкри тӑлӑх пӗр хӗре хваттер панӑ. Хваттер уҫҫи панӑ ҫӗре Чӑваш Енри ачасен прависене хӳтӗлессипе ӗҫлекен уполномоченнӑй Алевтина Федорова та пырса ҫитнӗ, хӗре ырӑ сунса саламланӑ.
Хваттер уҫҫине Елчӗк муниципалитет округӗн пуҫлахӗ Леонард Левый тыттарнӑ. Хваттере кӗрсе пурӑнмалла хатӗрлесе ҫитернӗ. Унта газ кӑмакипе плити, счетчиксем, кирлӗ сантехника, алӑк вырнаҫтарнӑ, стенаскене обой ҫыпӑҫтарнӑ.
Красноармейски муниципаллӑ округӗнчи пӗр шкул директорӗ хӑйне пӑхӑнакансене пӗр алӑпа преми панӑ та тепринпе туртса илнӗ.
2021 ҫулхи ака уйӑхӗнчен пуҫласа 2023 ҫулхи ҫу уйӑхеччен хӗрарӑм ӗҫченсенчен пӗрне преми (хавхалантармалли тӳлев) панӑ та унӑн пӗр пайне хӑйне куҫарса пама ыйтнӑ. Ҫав вӑхӑтра пурӗ 130-а яхӑн пин тенке ҫапла майпа хӑйне илнӗ. Укҫапа директор хӑй усӑ курнӑ.
Шкул директорне РФ Пуҫиле кодексӗн 159 статйин 3-мӗш пайӗпе килӗшӳллӗн явап тыттарнӑ. Хӗрарӑм укҫана саплаштарнӑ. Суд ӑна 80 пин тенкӗ штраф тӳлеттерме йышӑннӑ.
«Хыпар» издательство ҫуртне ҫӗнӗ редактор ертсе пыма пуҫланине Чӑваш халӑх сайчӗ пӗлтернӗччӗ. Аса илтерер: яваплӑ ҫак должноҫа Шупашкар районӗнчи «Тӑван Ен» хаҫат редакторне Виктория Вышинскаяна шанса панӑ.
Ӗнер коллектива ҫӗнӗ пуҫлӑхпа паллаштарма республикӑн цифра аталанӑвӗн министрӗн ҫумӗ Алексей Гурьянов пынӑ.
Виктория Вышинская журналистикӑри кун-ҫулне «Ҫамрӑксен хаҫачӗн» корреспондентӗнчен пуҫланӑ. 2017 ҫултанпа вӑл «Тӑван Ен» хаҫат редакторӗнче тӑрӑшнӑ.
Виктория Вышинская нумаях пулмасть Чӑваш Ен Элтеперӗпе Олег Николаевпа тӗл пулсан республика ертӳҫи «Хыпар» издательство ҫуртне пулӑшма шантарнӑ-мӗн. Ҫав шутра — Пичет ҫуртне юсама та. Олег Николаев пулӑшма шантарнине министрӑн ҫумӗ Алексей Гурьянов та ҫирӗплетнӗ. Республикӑра медиацентр йӗркелеме йышӑнни ҫав тӗллевпе тунӑ утӑмран пӗри иккен. Унӑн центрӗ «Хыпар» пулса тӑрӗ. Медицентрпа чи малтанах Шупашкар районӗнчи «Тӑван Ен» хаҫата пӗрлештерӗҫ.
Чӑваш Енӗн Транспорт тата ҫул-йӗр хуҫалӑхӗн министерствин «Чӑваш транспорт управленийӗ» патшалӑх унитарлӑ предприятийӗндиректорӗ пулма Евгений Мореполавцева ҫирӗплетнӗ.
Йышӑнӑва республика ертӳҫи утӑ уйӑхӗн 12-мӗшӗнче алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ.
+0.3 °C