Красноармейски муниципаллӑ округа кӗрекен Еншик Чуллӑ ялӗнчи коллектив конкурсра палӑрнӑ. Вӗсем малти вырӑнах тухайман та, анчах унта тивӗҫлипех хутшӑннӑ. Регионсем хушшинчи конкурс ячӗ – «Ҫухалнӑ ҫӑлкуҫ». Еншик Чуллӑ ялӗнчи «Эншей» ушкӑн конкурсра 5-мӗш вырӑн йышӑннӑ.
Ушкӑна ҫухалнӑ ҫӑлкуҫа хӑтланӑшӑн конкурса йӗркелекенӗсем диплом парса тата 30 000 тенкӗлӗх парнепе савӑнтарнӑ.
Вырӑнти хастарсене каярах Красноармейскинчи вулавӑшра чысланӑ, нумай ӑшӑ сӑмах каласа хавхалантарнӑ, ырласа та мухтаса ҫунатлантарнӑ. Кун пирки Вырӑнти хастар Виталий Михайлов халӑх тетелӗнчи хӑйӗн страницинче хыпарланӑ, коллектива конкурса тивӗҫлипе хутшӑннӑшӑн ӑшшӑн саламланӑ, малашне те маттур пулма суннӑ.
Ҫӗнӗ Шупашкарти шкул ачи Пӗрремӗш каналпа пыракан «Голос» кӑларӑма хутшӑннӑ.
Ирина Степанова – 17 ҫулта. Вӑл кӑларӑмра итлев витӗр тухнӑ. Пирӗн ентеш телепроект историйӗнче чи ҫамрӑкки пулнӑ. Кӑларӑм ку эрнекун, нарӑсӑн 27-мӗшӗнче, 21:45 сехетре Пӗрремӗш каналпа курма май пулӗ. Ыран ҫак вӑхӑтра телевизор ҫутма ан манӑр.
Ирина 14 ҫултанпа Шупашкарти 1-мӗш ача-пӑча музыка шкулӗ ҫумӗнчи «5 октав» студире вокал енӗпе ӑсталӑхне туптать. Хальччен вӑл ҫитӗнӳсем тума та ӗлкӗрнӗ: пӗлтӗр Леонид Агутинӑн AGUTEENS FORUM ҫемье форумӗнче Гран-при ҫӗнсе илнӗ, Леонид Агутинпа тата Ани Лоракпа пӗр сцена ҫинче юрланӑ.
Палӑртса хӑварар: кӑҫал «Голос» телешоура Владимир Пресняков, Пелагея, Анна Асти тата Ильдар Абдразаков наставниксем пулнӑ.
«Чӑваш Ен мисӗ – 2023», «Раҫҫей мисӗ – 2024», 2024 ҫулта Тӗнче мисӗсен топ-12 списокне кӗнӗ Валентина Алексеева Раҫҫей чысне Пӗтӗм тӗнчери Miss BRICS 2026 конкурсра хӳтӗлӗ.
Конкурс Хусанта пуш уйӑхӗн 1-8-мӗшӗсенче иртӗ. Ӑнӑҫу сунатпӑр ентешӗмӗре!
Палӑртса хӑварар, Валентина Алексеева – Шупашкартан, Мускавра тухтӑра вӗренет.
Пирӗн республикӑра чӑваш тӗррин конкурсӗ иртӗ. Ӗҫсене Чӑваш тӗррин музейӗ чӳк уйӑхӗн 1-мӗшӗччен йышӑнӗ.
«Пурӑн, чӑваш тӗрри» ҫӗршыв шайӗнчи конкурса хутшӑнакансен пиҫиххи тӗрлемелле. Пултарулӑх ӑмӑртӑвне Раҫҫейри халӑхсен пӗрлӗхӗн ҫулталӑкӗпе ҫыхӑнтарас тенӗ.
«Туслӑх пиҫиххийӗ» номинацие хутшӑнакансем ытти халӑх пиҫиххине те тӗрлеме пултараҫҫӗ.
Шупашкарти педагог Пӗтӗм Раҫҫейри «Раҫҫейри ҫулталӑк методисчӗ» конкурсра ҫӗнтернӗ. Лариса Анатольевна Н.В.Никольский ячӗллӗ Чӑваш педагогика колледжӗнче вӑй хурать, педагогика практикин уйрӑмне ертсе пырать, вӑл — педагогика наукисен кандидачӗ.
Конкурса 82 регионти 1800 ҫын хутшӑннӑ. Лариса Анатольевна вӗсен йышӗнче пӗрремӗш вырӑн йышӑнма пултарнӑ. Вӑл «СПО преподавателӗ» номинацире мала тухса 100 пин тенке тивӗҫнӗ.
Шупашкарта «Тӑван чӗлхепе тӑван литературӑна чи лайӑх вӗрентекен» конкурсӑн хула тапхӑрӗ вӗҫленнӗ.
Чӑваш Республикин Вӗренӳ институчӗн ӗҫченӗ Анна Егорова халӑх тетелӗнчи хӑйӗн страницинче пӗлтернӗ тӑрӑх, «конкурса хутшӑнакансем пурте питӗ пултаруллӑ, тавҫӑруллӑ, ӑслӑ, хастар» пулнӑ.
Вӗрентекенсем «Меслетлӗх лаҫҫи», «Ӑсталӑх лаҫҫи», «Чӑвашлӑха упрар!» пултарулӑх лаҫҫи» ӑмӑртусенче хӑйсен пултарулӑхӗпе паллаштарнӑ.
Пӗррӗмӗш вырӑна Шупашкарти 62-мӗш шкулта ӗҫлекен Роза Морозова йышӑннӑ, иккӗмӗшне — 40-мӗш шкулти Татьяна Николаева, виҫҫӗмӗшне — 33-мӗш шкулти Ирина Диарова.
Мускав хулинче кӑрлачӑн 26-27-мӗшӗсенче тӑван чӗлхе, ҫав шутра вырӑс чӗлхи вӗрентекенсен пӗтӗм Раҫҫей шайӗнче ӑсталӑх лаҫҫи иртнӗ.
Унта ҫӗршывӑмӑрӑн тӗрлӗ кӗтесӗнчи 35 вӗрентекен хутшӑннӑ. Ҫав йышра Элӗк тӑрӑхӗнчи Чӑваш Сурӑм вӑтам шкулӗнчи чӑваш чӗлхипе литературин вӗрентекенӗ Алина Петрова та пулнӑ. Мускавран вӑл ҫӗнтерӳҫӗ пулса таврӑннӑ.
Хӗрарӑм халӑх тетелӗнчи хӑйӗн страницинче хыпарланӑ тӑрӑх, хӑйӗн урокӗнче Элӗк тӑрӑхӗнчи туй арӑмӗн тумӗ ҫинчен каласа кӑтартнӑ, чӑваш халӑхӗн культурипе паллаштаракан курав йӗркеленӗ.
Вӑрнарта пурӑнакан Ольга Косарева Пӗтӗм Раҫҫейри «Паллашӑр, ку— Раҫҫей» конкурса хутшӑнса палӑрнӑ.
Вӑл ҫак конкурса сӑнӳкерчӗкпе хутшӑннӑ. Ҫапла пирӗн ентеш «Пирӗн кил картишӗн сӑнарӗсем» номинацире призерсен йышне кӗнӗ.
Палӑртса хӑварар: Ольга Николаевна Вӑрнарти 2-мӗш шкулта директорӑн канашҫинче ӗҫлет.
Пирӗн ентеш, Йӗпреҫ пики, Евгения Петрова (сӑнӳкерчӗкре — сулахайра) «Хусан мисӗ» илем конкурсӗнче ҫӗнтернӗ.
Евгения Петрова 20 ҫулта кӑна-ха. Вӑл Йӗпреҫри 1-мӗш шкулта вӗреннӗ хыҫҫӑн Раҫҫей ШӖМӗн Хусанти юридици институчӗн студентки пулса тӑнӑ.
Евгения — пулас офицер, вӑл спортпа туслӑ, волейбол командин ертӳҫи. Ҫавӑн пекех пике халӑх, бал ташшисемпе кӑсӑкланать.
Ҫитес вӑхӑтра Евгения Петровӑн Тутарстан чысне «Раҫҫей мисӗ» конкурсра хӳтӗлеме тивӗ.
И.Я. Яковлев ячӗллӗ Чӑваш патшалӑх педагогика университечӗн 2-мӗш курс студенчӗ Егор Иванов ют чӗлхепе эссе ҫырса Раҫҫей конкурсӗнче палӑрнӑ.
Вӑл «Эпӗ – хамӑн ҫӗршыв гражданинӗ» конкурса хутшӑннӑ. Иван французла эссе ҫырнӑ. Унӑн шухӑшӗпе, гражданин пулни – йӑла-йӗркене упрани, историе пӗлни тата пурнӑҫа лайӑхрах тума тӑрӑшни. Шӑпах ҫаксене палӑртнӑ вӑл хӑй ҫырнӑ эссере.
+26.3 °C