Ҫӗмӗрлере пурӑнакан Елизавета Ивина Мускаври сцена ҫине тухса унтан пӗрремӗш степеньлӗ лауреат пулса таврӑннӑ. Тава тивӗҫлӗ канури хӗрарӑм «На Олимпе» пӗтӗм тӗнчери конкурса хутшӑннӑ.
Елизавета Ивина тӑнлав пасарни ватлӑх ҫитнине пӗлтерет тесе пуҫ усса лармасть. Вӑл пӗрмай сцена ҫине тухать, хӑйӗн уҫӑ сассипе куракансене тыткӑнлать.
Елизавета Ивина килте тунсӑхласа лармасть, Ҫӗмӗрлери халӑхӑн социаллӑ ыйтӑвӗсене тивӗҫтерекен комплекслӑ центрти «Манӑн социаллӑ центр» клуба пырса ҫӳрет, унта чун киленӗҫӗпе аппаланать.
«На Олимпе» пӗтӗм тӗнчери конкурсра хӗрарӑм «Вокальное искусство. Народная песня. Золотой возраст. Хобби» (чӑв. Вокал ӳнерӗ. Халӑх юрри. Ылтӑн вӑхӑт. Чун киленӗҫӗ) номинацире палӑрнӑ. Тава тивӗҫлӗ канури хӗрарӑм «На соседней улице» юрӑпа пӗрремӗш степеньлӗ лауреат ятне тивӗҫнӗ.
Республикӑра театр ӳнерӗн «Чӗнтӗрлӗ чаршав» конкурсӗ старт илнӗ. Кӑҫалхипе вӑл 26-мӗш хут иртет, ӑна хальхинче Раҫҫейри театр ӗҫченӗссен пӗрлӗхӗ йӗркеленнӗренпе 150 ҫул ҫитнине халалланӑ.
Жюри пайташӗсем конкурса тӑратнӑ спектакльсене хаклама тытӑннӑ ӗнтӗ. Ӗнер, тӗслӗхрен, Ева Лисинӑн автобиографи калавӗ тӑрӑх лартнӑ «Ҫӑкӑр чӗлли» постановкӑна пӑхнӑ. Экспертсем ушкӑн пысӑк шайра ӗҫленине, актерсем оригиналлӑ вылянине палӑртнӑ. Тема пӗлтерӗшлӗ пулнине та каланӑ: спектакль вӑрҫӑ вӑхӑтӗнчи ачасен шӑпи пирки.
Ыран жюри пайташӗсем Ҫеҫпӗл Мишши ячӗллӗ Ҫамрӑксен театрӗнче «Волшебный орех. История Щелкунчика» спектакль курӗҫ.
Республика конкурсне пуш уйӑхӗн 27-мӗшӗнче, Пӗтӗм тӗнчери театр кунӗнче, пӗтӗмлетӗҫ.
«Хыпар» издательство ҫурчӗн ача-пӑча кӑларӑмӗсен редакцийӗ Ҫӗнӗ ҫул умӗн «Капӑр чӑрӑш» конкурс йӗркеленӗ. Ача-пӑча кӑларӑмӗсен редакторӗ Елена Атаманова «Контактра» халӑх тетелӗнчи хӑйӗн страницинче пӗлтернӗ тӑрӑх, республикӑн тӗрлӗ кӗтесӗнчен чылай вӗренекен хутшӑннӑ, ҫакӑ йӗркелӳҫӗсене питӗ савӑнтарнӑ.
«Ал ӑстисем пирӗн пӳлӗме ытарма ҫук хитре чӑрӑшсемпе тултарчӗҫ. Уйрӑмах Елчӗк, Патӑрьел, Йӗпреҫ, Комсомольски тата Шупашкар тӑрӑхӗсенчи шкул ачисем хастар пулчӗҫ», — тесе ҫырнӑ Елена Атаманова.
Ҫак кунсенче ҫӗнтерӳҫӗсене вырӑна ҫитсех чыслама тӗв тунӑ. Патӑрьелти 1-мӗш шкулти тата Елчӗк шкулӗнчи хастарсем дипломлӑ пулса тӑнӑ. Кӗҫех ытти тӑрӑха та ҫитсе килесшӗн, ҫӗнтерӳҫӗсене хавхалантарасшӑн.
Республикӑра чи лайӑх класс ертӳҫисене палӑртнӑ. Пилӗк лауреат пулнӑ.
Ҫӗнтерӳҫӗсен йышне ҫаксем кӗнӗ: Максим Донин (Улатӑрти 6-мӗш гимнази), Татьяна Иванова (Йӗпреҫ округӗнчи Чӑваш Тимеш шкулӗ), Наталия Качалина (Шупашкарти 45-мӗш шкул), Александра Митрофанова (Ҫӗнӗ Шупашкарти 12-мӗш шкул), Ирина Рындина (Пӑрачкав округӗнчи Кудеиха шкулӗ).
Палӑртса хӑварар: финалта пӗтӗмпе18 педагог кӗрешнӗ.
Улатӑрти 2-мӗш юсанмалли колонире ларакан хӗрарӑм конкурсра ҫӗнтернӗ. Вӑл Раҫҫей ФСИНӗ ирттернӗ «А ну-ка, хӗрсем!» пултарулӑх конкурсне картина тӑратнӑ, унта Мускаври Хӗрлӗ тӳремре вырнаҫнӑ Василий Блаженный храмне ӳкернӗ.
Йӗркелӳ комитетне ведомствӑн 53 территори органӗнчен килнӗ. «Чи лайӑх пултарулӑх номерӗ» номинацире Улатӑрти колонире ларакан хӗрарӑм ҫӗнтернӗ. Жюри пайташӗсем картинӑна хӑйне евӗр ӳкернине, унӑн техникине пысӑк хак панӑ.
Комсомольски округӗнче «Суперасанне» конкурс иртнӗ. Унта «Надежда» клуба ҫӳрекенсем тӗрлӗ конкурсра тупӑшнӑ. Ҫак клуба Тӗп вулавӑш ҫумӗнче йӗркеленӗ.
Конкурса хутшӑннӑ хӗрарӑмсем визит карточкине хатӗрленӗ, пултарулӑх номерне кӑтартнӑ, мӑнукӗсене тутӑр ҫыхса янӑ тата юмах каласа кӑтартнӑ. Ҫавӑн пекех асаннесем кулинари ӑсталӑхӗпе паллаштарнӑ, живопиҫе, литературӑна тата сцена ӑсталӑхне мӗнле пӗлнине кӑтартнӑ.
Суперасанне ятне Нина Яковлевна Зайцева тивӗҫнӗ. Вӑл кӑҫал 80 ҫул тултарать.
Ҫак кунсенче Чӑвашьел шкулӗнче илемпе пултарулӑх уявӗ — «Чӑваш пики – 2026» конкурс иртнӗ. Ӑна Анна Николаева педагог-организатор хатӗрлесе ирттернӗ. Ӑмӑртӑва 7-мӗш класран пуҫласа 11-мӗш класс таран вӗренекен хӗрачасем хутшӑннӑ.
Малтан хӗрсем хӑйсемпе паллаштарнӑ, юрланӑ, ташланӑ, сӑвӑ каланӑ тата тӗрлӗ ыйтӑва хуравланӑ. Килти ӗҫ уйрӑмах кӑсӑклӑ пулнӑ — хутшӑнакансен хуплу пӗҫерсе килмелле пулнӑ. Хӗрачасем ӑна тӗрлӗрен илемлетнӗ: пӗрин ҫинче ҫӑлтӑрсем вырнаҫнӑ, теприн ҫинче чечексем ҫурӑлнӑ, виҫҫӗмӗшӗн ҫинче вара чӑвашсен паллӑ Нарспийӗ ташланӑ.
Конкурса пӗтӗмлетсе жюри кашни хӗрачана тивӗҫлӗ хакланӑ:
• «Чӑваш пики – 2026» тӗп ята тата «Хастар пике» номинацине 9-мӗш класра вӗренекен ӑслӑ та маттур Аксиния Максимова ҫӗнсе илнӗ.
• 7-мӗш класри Татьяна Тимкина «Кӗмӗл саслӑ пике» пулса тӑнӑ.
• 8-мӗш класри Лиана Илендеева «Хӳхӗм пике» ята тивӗҫнӗ.
• 11-мӗш класри Диана Якличевӑна вара «Илӗртӳллӗ пике» тесе палӑртнӑ.
Пурне те хаклӑ парнесемпе тата районти Чӑваш наци культура центрӗн Хисеп хучӗсемпе чысланӑ. Кун пек уявсем ачасене тӑван йӑла-йӗркепе чӗлхене юратма вӗрентеҫҫӗ.
Пирӗн ентеш, Шупашкарта ҫуралса ӳснӗ Валентина Алексеева, ӗнер Хусан хулинче иртнӗ Пӗтӗм тӗнчери MISS BRICS илем конкурсӗнче ҫӗнтернӗ.
19 ҫулти Валентина 2023 ҫулта «Чӑваш Ен мисӗ» пулнӑччӗ, 2024 ҫулта «Раҫҫей мисӗ» хисеплӗ ята тивӗҫнӗ. Халӗ вара «БРИКС мисӗ» те пулса тӑнӑ. Конкурса Раҫҫей, Бразили, Инди, Китай, ЮАР, ОАЭ, Индонези, Куба, Боливи, Беларуҫ, Узбекистан, Малайзи, Казахстан, Уганда, Таиланд, Нигери, Вьетнам пикисем хутшӑннӑ.
Палӑртса хӑварар: Валентина 2006 ҫулхи ҫурлан 11-мӗшӗнче Шупашкарта ҫуралнӑ. 2024 ҫулта 5-мӗш гимназирен лайӑх паллӑсемпе вӗренсе тухсан Мускаври Н.И.Пирогов ячӗллӗ Раҫҫей наци тӗпчев медицина институтне вӗренме кӗнӗ.
Шупашкарти «Салют» культура керменӗнче пӗчӗк чиперккесен конкурсӗ иртнӗ. Сцена ҫине «Чӑваш Енӗн пӗчӗк мисӗ – 2026» конкурсӑн финалне хутшӑнма тивӗҫ пулнисем тухнӑ.
Вӗсем хӑйсен пултарулӑхӗпе паллаштарнӑ. Пӗчӗкскерсем пӗри тепринчен чипер пулнӑ. Ҫулне кура мар чӗрӗскерсем сцена ҫинче хӑйсене тытма пӗлеҫҫӗ.
Тӗп титула — конкурсӑн Гран-прине — Злата Егорова ҫӗнтерсе илнӗ. «Ҫамрӑк» категорире кӑшӑла Диана Тимофеева, Алина Корнилова тата Ксения Петрова илме тивӗҫ пулнӑ.
«Мини» категорире Ксения Михайлова, Анна Тяжелова тата Таисия Краснова ҫӗнтернӗ. «Little» категорири кӑшӑлсене Валерия Слепова, Ксения Кудряшова тата Полина Апанаева тӑхӑннӑ. Пурте маттур, пурте ӑшшӑн саламланине илтме тивӗҫ.
Шупашкарта «Йӑла-йӗрке» (Традиции) Пӗтӗм Раҫҫейри фестиваль-конкурсӑн регионти тапхӑрӗ вӗҫленнӗ. Унта 60-а яхӑн хутшӑнаканран 16-шӗ финала тухнӑ.
Жюри йышне Чӑваш Енӗн Культура министерствин ӗҫченӗ Татьяна Дмитриева ертсе пынӑ. Вӑл культура еткерне упраса хӑварасси мӗнле пӗлтерӗшлӗ пулнине палӑртнӑ тата финалистсене Пӗтӗм Раҫҫейри тапхӑрта республика ятне тивӗҫлӗ кӑтартма суннӑ.
Гран-прие тата 200 пин тенкӗлӗх сертификата ҫак коллективсем илме тивӗҫнӗ: «Туслӑх» халӑх хор коллективӗ (Елчӗк муниципаллӑ округӗ), «Фантази» ташӑ коллективӗ (Етӗрне муниципаллӑ округӗ), «Парне» чӑваш халӑх фольклор ансамблӗ (Республикӑри халӑх пултарулӑх центрӗ), «Тивлет» халӑх юрӑпа ташӑ ансамблӗ (Вӑрнар муниципаллӑ округӗ).
Ҫак укҫа-тенкӗпе артистсен тумтирӗсемпе пушмакӗсене ҫӗнетӗҫ.
Регион тапхӑрӗн ҫӗнтерӳҫисем федераци шайӗнче Чӑваш Енӗн пуян культурине кӑтартса 2 миллион тенкӗлӗх грантшӑн ӑмӑртӗҫ.
+23.3 °C