pg21.ru сӑнӳкерчӗкӗ

Чӑваш Енри вӗренӳ учрежденийӗсене ӗнерхипе виҫҫӗмӗш кун ӗнтӗ мина хунӑ тесе хӑратаҫҫӗ. Пуш уйӑхӗн 2-мӗшӗнче хулари 80 ача пахчине тата 8 шкула ҫавӑн пек хыпарланӑ. Ун пирки спам-ҫырупа пӗлтернӗ.

Республикӑн Вӗренӳ тата ҫамрӑксен политикин министерствинче пӗлтернӗ тӑрӑх, ҫырусене учрежденисен электрон почтипе ярса панӑ. Вӗренӳ учрежденийӗсен администрацийӗсем ятарлӑ службӑсене пӗлтернӗ. Ачасене тата вӗренӳ учрежденийӗсенче ӗҫлекенсене ҫийӗнчех эвакуациленӗ.

Ҫуркунне питӗ хитре ҫанталӑкран пуҫланчӗ: ӑшӑ, хӗвел пӑхать. Нарӑс уйӑхӗ те нормӑран 6 градус ӑшӑрах пулчӗ. Нивушлӗ ҫуркунне ҫавӑн пек ир пулӗ?

Синоптиксем савӑнтарма васкамаҫҫӗ. Вӗсем пӗлтернӗ тӑрӑх, хальлӗхе хӗл парӑнман-ха. Вӑл кӗҫех ҫуркуннене ура хурӗ. Ҫитес кунсенче кӑнтӑрла 5-10 градус сивӗ тӑрӗ, ҫӗрле – 15-20 градус.

Иккӗмӗш декадӑра каллех ӑшӑтать, уйӑх варринче термометр «+» кӑтартма пуҫлать.

Пӗтӗмӗшле илсен, пуш уйӑхӗнче юр ытлах ҫумасть. Антициклона пула уйӑх тӑршшӗпех хӗвеллӗ ҫанталӑк тӑрӗ. Пушӑн 7-8-мӗшӗсенче юр ҫӑвӗ. Ҫапах ҫанталӑк сивӗ тӑнине пула юр часах ирӗлмӗ. Унӑн хулӑнӑшӗ 40-50 сантиметр тӑрӗ.

РИА Новости сайтӗнчи сӑн

Раҫҫейре, ҫав шутра Чӑваш Енре те, хӑш-пӗр самолета вӗҫме чарни пирки пӗлтернӗччӗ. Чару пушӑн 2-мӗшӗччен пулмаллаччӗ.

Шупашкартан Краснодара вӗҫме чарнӑ. Хальлӗхе – пуш уйӑхӗн 8-мӗшӗччен. Аса илтерер: эрнекунсерен Шупашкартан Краснодара «ИрАэро» самолет вӗҫетчӗ. Рейс ҫине илнӗ билет укҫине каялла тавӑрса парӗҫ е самолет вӗҫме тытӑнсанах унпа усӑ курма пулать.

Сӑмах май, Анапӑна, Белгорода, Брянска, Воронежа, Геленджика, Краснодара, Курска, Липецка, Дон ҫинчи Ростова, Симферополе, Элистӑна самолетсем вӑхӑтлӑх вӗҫмеҫҫӗ.

rv-ryazan.ru сайтри сӑн

Шупашкарта пурӑнакан 48 ҫулти арҫын ултавҫӑсене 8 миллион тенкӗ куҫарса панӑ. Укҫи йӑлтах хӑйӗн пулман: пӗр пайне кредит илнӗ, тепӗр пайне кивҫен ыйтнӑ.

ШӖМ пӗлтернӗ тӑрӑх, 2021 ҫулта авӑн уйӑхӗнче ун патне палламан хӗр шӑнкӑравланӑ та хӑйӗнпе финанс компанийӗн ӗҫченӗ тесе паллаштарнӑ. Хайхи майра арҫынна укҫана инвестицие хывма ӳкӗте кӗртнӗ. Кунта ним хӑрушши те ҫук-мӗн: компани Раҫҫей саккунӗсемпе килӗшӳллӗн ӗҫлет имӗш.

Арҫын ӗненнӗ. Вӑл 5 уйӑхра ултавҫӑсен счечӗсем ҫине укҫа куҫарса тӑнӑ. Пӗтӗмпе – 8 миллион тенкӗ ытла. 4 миллион тенкине вӑл пӗлӗшӗсенчен кивҫен илнӗ, 2 миллион яхӑн тенкине 5 ҫуллӑха кредит илнӗ. Ытти – хӑйӗн укҫи.

Кун тӗлӗшпе пуҫиле ӗҫ пуҫарнӑ.

mychu.ru сайтри сӑн

Республикӑра тата тепӗр ҫын ҫурт тӑрринчен ӳкнӗ пӑртан шар курнӑ. Хальхинче пӑтӑрмах Канаш хулинче пулнӑ. Кун пирки Следстви комитечӗ пӗлтерет.

Канашра урамра утса пынӑ чухне 1990 ҫулта ҫуралнӑ арҫын ҫине ҫурт тӑрринчен пӑр катӑкӗ йӑтӑнса аннӑ. Халӗ ӗҫ-пуҫа уҫӑмлатаҫҫӗ, ҫав ҫурта хӑш компани пахса тӑнине, юртан, пӑртан мӗншӗн тасатманнине уҫӑмлатаҫҫӗ.

Аса илтерер: нумаях пулмасть Шупашкарти Анисимов урамӗнче 1955 ҫулта ҫуралнӑ хӗрарӑм ҫине пӑр катӑкӗ йӑтӑнса анни пирки хыпарланӑччӗ. Вал пульницӑна кайса пулӑшу ыйтнӑ. Юрать, темех пулман, ҫав кунах киле янӑ.

Пирӗн ҫӗршывра «Объясняем.рф» ҫӗнӗ портал ӗҫлеттерсе янӑ. Ӑна йӗркелеме пурнӑҫ хӑех хистенӗ. Тӗнчере пулса иртекен лару-тӑру Раҫҫее те пырса тивет. Ун пирки темле ҫыракан, хыпарлакан та пур. Пурне те ӗненсе ларсан пуҫ ҫаврӑнса кайӗ. Ҫынсене официаллӑ тата тӗрӗсленӗ информаципе паллаштарас тесе ҫӗнӗ портал ӗҫлеттерсе янӑ. Кун пирки Раҫҫейӗн вице-премьерӗ Дмитрий Чернышенко пӗлтернӗ.

«Халӑх тетелӗсенче тата массӑллӑ информаци хатӗрӗсенче суя хыпарпа тӗрлӗ сас-хурана та вырнаҫтараҫҫӗ. Ҫавӑнпа «Объясняем.рф» портал ӗҫлеттерсе ятӑмӑр», — ӑнлантарса панӑ вӑл.

Ҫынсене хумхантаракан ыйтусемпе хуравсене тӗрлӗ ярӑмра вырнаҫтарнӑ.

Севастопольти чӑвашсен пӗрлӗхӗн хастарӗн Андрей Яковлевӑн Фейсбукри страницинчен илнӗ сӑнӳкерчӗк

Нумаях пулмасть (нарӑс уйӑхӗн 26-мӗшӗнче) Крым Республикинчи Евпатори хулинче пурӑнакан чӑваш арӗ Василий Иванов 90 ҫул тултарнӑ.

Василий Иванович Чӑваш Енри Канаш районӗнчи Ҫатӑрка ялӗнче ҫуралнӑ. Саппасри полковник. 1980-1988 ҫулсенче вӑл Евпаторинчи инҫет космос ҫыхӑнӑвӗн ҫар чаҫӗн командирӗ пулнӑ. Тӗрлӗ ҫулта Чӑваш Республикин Крымри элчи пулнӑ.

Севастопольти чӑвашсен пӗрлӗхӗн хастарӗ Андрей Яковлев юбиляра ӑшшӑн саламласа «нумай нумай ҫул пурӑнма ҫирӗп сывлӑх, иксӗлми телей, малалла та пысӑк пӗлтерӗшлӗ ӗҫсем тума вӑй-хал» суннӑ, «ырӑ ӗҫсемшӗн пархатар курмалла пултӑр сирӗн, Василий Иванович!», — тенӗ вӑл.

Шупашкарти Кӑнтӑр поселокӗнче пурӑнакансем, пуҫаруллӑ ҫынсем, Опикасси ращинче чиркӳ тума сӗннӗ. Хула мэрӗ Олег Кортунов ку шухӑша ырланӑ.

Мэр шухӑшӗпе, Кӑнтӑр поселокӗнче ҫӗнӗ чиркӳ кирлех, унта халӑх йышлӑ ҫӳрӗ. Вӑл кӑмӑл-сипет тӗлӗшӗнчен воспитани паракан вырӑн пулӗ.

Ӗнер Олег Кортунов ку ыйтӑва пуҫару ушкӑнӗпе, Чӑваш митрополийӗн элчисемпе, Шупашкар хулин депутатсен пухӑвӗн депутачӗпе Федор Степановпа сӳтсе явнӑ. Мэр чиркӳ валли ҫӗр уйӑрас ыйтупа хула администрацийӗн пуҫлӑхӗпе Денис Спиринпа калаҫма шантарнӑ.

Сӑмах май, каҫал Опикасси ращине хӑтлалатас ӗҫ пуҫӑнать. Анчах проекта чиркӗве кӗртсе хӑварман.

Пуш уйӑхӗн 1-мӗшӗнче, ирхи 4 сехетре, пӗр ҫамрӑк хупӑ павильона кӗме пӑхнӑ. Унта вӑл ӑшӑнас тенӗ-мӗн.

Шупашкар хулинчи йӗрке хуралҫисем патне пӗри Мускав проспектӗнчи общество транспорчӗн чарӑнӑвӗ тӗлнче такам тем ватать тесе хыпарланӑ. Ҫав вӑхӑтра унтан ҫул-йӗр инспекторӗсен уйрӑм батальонӗн нарячӗ иртсе пынӑ. Вӗсем чарӑнӑва пырса тӗрӗслеме шут тытнӑ. Унта пӗр каччӑ пулнӑ. Пакунлисене курсан вӑл вырӑнтан тапса сикме пӑхнӑ. Анчах тарса инҫе каяйман. Вӑл Канашра пурӑнакан 23 ҫулти ҫамрӑк пулнӑ. Ӳсӗрскер йӗрке хуралҫисене ӑнлантарнӑ тӑрӑх, вӑл шӑнса хытнӑ та чарӑнури пӗчӗк лавккана кӗрсе ӑшӑнас тенӗ.

Йӗрке хуралҫисем ӑна хӑйсемпе пӗрле илсе кайнӑ. Урӑлса илсен каччӑ каҫхине хӑй мӗн хӑтланнине та аса илеймен. Пуҫтахланиччен вӑл юлташӗн ҫуралнӑ кунне уявланӑ иккен.

Антонина Андрееван Фейсбукри страницинчен илнӗ сӑнӳкерчӗк

Ӗнер, пуш уйӑхӗн 1-мӗшӗнче, Шупашкарти Ҫеҫпӗл Мишши музейӗнче Пӗтӗм тӗнчери писательсен кунне халалласа «Чӑваш чӗлхи ӑсти» поэзи каҫӗ иртнӗ.

Поэзие юратакансем Петӗр Хусанкайӑн сӑввисене вуланӑ. Музей ертӳҫи Антонина Андреева Фейсбукра хыпарланӑ тӑрӑх, Шупашкарти сусӑррисен интернат-шкулӗнче 9-мӗш класра вӗренекен Зинаида Кадерова «Атӑла алтӑрпа айлатаймӑн» сӑввине питӗ илемлӗ вуланӑ. Унӑн вӗрентекенӗ те Наталия Арсентьева Хусанкай сӑввинчи кашни сӑмахне витӗмлӗ каланӑ.

Лидия Саринепе Марина Карягина хӑйсем ҫырнӑ тата урӑх чӗлхерен куҫарнӑ сӑввисемпе савӑнтарнӑ.

«Телей» халӑх фольклор ансамблӗ (ертӳҫи — Наталия Арсентьева) Юрий Сементерӗн сӑмахӗсемпе Анатолий Никитин кӗвӗленӗ юрӑсене ятарласа поэзи каҫӗ валли хатӗрленӗ.