Ҫурла уйӑхӗн 14-мӗшӗнче Ҫӗмӗрле районӗнчи Саланчӑк поселокӗнчи Владимир Алексеевич Сорокин вӑрмана кӑмпана кайсан ҫухални пирки хыпарланӑччӗ. Шел те, ӑна халӗ те тупайман. Вӑл 66 ҫулта.

«Лиза Алерт» шыравпа ҫӑлав отрячӗ унччен ун пирки ҫапла пӗлтернӗччӗ: килтен кайнӑ чухне кӑвак футболка, спорт шӑлаварӗ, хура тапочка тӑхӑннӑ, пӗрле витре йӑтнӑ. Унӑн ҫӳҫӗ шуралнӑ, куҫӗ кӑвак.

sifoody.com сайтри сӑн

Муркаш районӗнче пурӑнакан икӗ арҫынна прокуратура ыйтнипе туберкулез пуррипе ҫуккине тӗрӗслемешкӗн ярӗҫ. Вӗсем иккӗшӗ те тӗрмерен тухнӑ. Унашкаллисен вара малтанхи икӗ ҫулта кашни ҫур ҫулта туберкулез пуррипе ҫуккине палӑртмашкӑн медицина тӗрӗслевӗ витӗр тухмалла.

Муркаш районӗнчи ҫак арҫынсем вара тӗрмерен тухнӑ хыҫҫӑн тӗрӗсленме ҫӳремен. Ҫавна май прокуратура суда тавӑҫ тӑратнӑ. Суд вара ҫак икӗ арҫынна флюорографи тутарма йышӑннӑ.

cap.ru сӑнӳкерчӗкӗ

Ӗнер, ҫурла уйӑхӗн 23-мӗшӗнче, Чӑваш Енри ертӳҫӗ пулмалли кадрсен резервӗнчи ҫынсене вӗрентме пухнӑ.

Республикӑн влаҫ органӗсен официаллӑ порталӗнче пӗлтернӗ тӑрӑх, Элтепер Админитсраицйӗн ҫуртне йӗркеленӗ вӗрентӗве «Краудсорсинг: где и какие ресурсы можно найти для решения проектных и личных задач» (чӑв. Краудсорсинг: проектсене тата уйрӑм тӗллевсене прунӑҫа кӗртме ӑҫта тата мӗноле май тупмалла) темӑпа ирттернӗ.

kredit-on.ru сайтри сӑн

2020 ҫулта Чӑааш Енре пурӑнакан 31 ҫулти арҫын «Надежный» ятпа потребительсен кооперативне регистрациленӗ те унта ҫынсене илӗртме тытӑннӑ. Ытларах унӑн «вӑлтине» тивӗҫлӗ канӑва тухнисем ҫакланнӑ. Хайхискер укҫана каялла тавӑрса пама кӑна мар, пысӑк процентпа тупӑш хушма та шантарнӑ.

Ҫапла вӑл 5 регионти 406 ҫынна 210 миллион тенкӗлӗх улталанӑ.

Суд пулнӑ. Ӑна пӗтӗмӗшле режимлӑ колоние 6 ҫул ҫурӑлӑха хупма йышӑннӑ.

семейный-портал13.рф сӑнӳкерчӗкӗ

Колледжсемпе техникумсенчен, институтсемпе университетсенчен вӗренсе тухакансем йышлӑ, анчах предприятисенче ӗҫлекен ҫын ҫапах та ҫитмест.

Чӑваш Ен Элтеперӗ Олег Николаев ҫак ыйтӑва направлени урлӑ татса пама май пур тесе шухӑшлать. Унчченхи пек. Бюджет шучӗпе вӗренсе пӗтерсен, калӑпӑр, пӗр-пӗр предпряитие направленипе ярса виҫӗ ҫултан кая мар ӗҫлеттермелле туса.

Республика Правительстви ҫак сӗнӳпе РФ Ҫутӗҫ министерствине тухасшӑн.

Предприятисене ӗҫе вырнаҫсан ҫамрӑксене ҫурт-йӗр арендӑна памалла, ҫӑмӑллӑхлӑ ипотека пӑхса хӑвармалла, ҫар службинчен отсрочка пулмалла тесе шухӑшлать республика ертӳҫи.

Ҫитес ҫула Чӑваш Енре экологие тата ҫутҫанталӑкпа перкетлӗ усӑ курассине халаллама пултарасси пирки пӗлтернӗччӗ. Паян ЧР Элтеперӗ Олег Николаев ку шухӑша общественноҫӗн 40 ытла проценчӗ ырланине палӑртнӑ. Ҫавна май хушӑва ҫитес кунсенче ала пусӗҫ.

Ҫавӑн пекех 2024 ҫула Халӑх пӗрлӗхӗн ҫулӗ тума сӗнекенсем пулнӑ. Ҫар ӗҫне хутшӑннисен ҫулталӑкӗшӗн тата Тӑван ҫӗршыв хӳтӗлевҫисен ҫулӗшӗн 5-шер процент сасӑланӑ.

prim-crb.ru сайтри сӑн

Йӗпреҫ районӗнчи 63 ҫулти арҫын биржӑра инвестор пек ӗҫлесе тупӑш тӑвас тенӗ те… 1 миллион ытла тенкӗсӗр тӑрса юлнӑ.

Ун патне мессенджера инвестици платформи ҫинче укҫа ӗҫлесе илме пулать тесе хыпар килнӗ. Ку утӑ уйӑхӗн вӗҫӗнчех пулнӑ. Кӗҫех ун патне палламан ҫын шӑнкӑравланӑ та укҫа-тенке пысӑк процентпа проекта хывма ӳкӗте кӗртнӗ. Ҫапла арҫын уйӑх тӑршшӗпе ултавҫӑсене 1 миллион ытла тенкӗ куҫарса панӑ. 800 пин тенки – кредит илнӗскер. Укҫа-тенке каялла кӑларма тӑрсан «инвесторсем» каллех укҫа хывма ыйтма пуҫласан тин арҫын хӑй ултавҫӑсене аллине лекнине ӑнланнӑ.

Кун тӗлӗшпе пуҫиле ӗҫ пуҫарнӑ.

blog.bkfgroup.ru сайтри сӑн

Чӑваш Енре ҫитес ҫул пӗр ҫынна пӗр уйӑхра пурӑнма мӗн чухлӗ укҫа кирлине палӑртаҫҫӗ. Вӑл, кӑҫалхипе танлаштарсан, 7,3 процент пысӑкрах пулӗ, 13271 тенкӗпе танлашӗ. Кӑҫал вӑл 12363 тенкӗ пулнӑ.

Уйрӑм категорири ҫынсем валли те ку виҫе ӳсӗ. Ӗҫлекен ҫынсем валли – 14465 тенкӗ, тивӗҫлӗ канурисем валли – 11413 тенкӗ, ачасем валли 12873 тенкӗ пулӗ.

Палӑртмалла: тӗрлӗ пособи, тӳлев илме документсем тӑратнӑ чухне ҫак виҫесене шута илеҫҫӗ.

"Про Город" сайтӗнчи сӑн

Паян ҫӗрле, 23 сехетсенче, Шупашкар районӗнчи Вӑрманкас ялӗ ҫывӑхӗнче М-7 ҫул ҫинче йывӑр тиевлӗ икӗ машина ҫапӑннӑ. Пӗри ҫаврӑнса ӳкнӗ, тепри кювета чӑмнӑ.

«Про Город» хаҫата халӑх корреспонденчӗ пӗлтернӗ тӑрӑх, ҫул ҫинче купӑста сапаланса выртнӑ. Авари вӑхӑтӗнче ҫула полицейскисем пӳлсе хунӑ. Ҫур ҫӗр иртни 1 сехетчен пӗр машина та унтан иртсе каяйман.

Халӑх корреспонденчӗ хыпарланӑ тӑрӑх, аварире пӗр ҫын самаях суранланнӑ. Вырӑнта ҫӑлавҫӑсем те ӗҫленӗ.

vk.com/cheb121 сӑнӳкерчӗкӗ

Чӑваш Енри колонисенчен пӗринче айӑплав вӑхӑтне ирттерекенсем пушмак ҫӗлеҫҫӗ. Берцы ятлӑ ура тӑхӑнмали япалана 9-мӗш колонире ҫӗлеҫҫӗ.

Пушмака арҫынсем икӗ цехра хатӗрлеҫҫӗ. Пӗринче ӗҫлекен бригада кирлӗ пайсене касса кӑларса ҫӗлесе хатӗрлет, тепринче пушмака кирлӗ формӑпа хатӗрлесе ҫитереҫҫӗ.

Чӑваш Енри тӗрмесенче ларакансем, сӑмах май каласан, сӗтел-пукан та туса кӑлараҫҫӗ, ял хуҫалӑх продукцине туса илсе тирпейлеҫҫӗ, ттимӗр-тӑмӑр, йывӑҫ-чус, ҫӗвӗ производствинче ӗҫлеҫҫӗ.

вашской колонии шьют берцы