forumdaily.com сайтри сӑн

Чаваш Ене федераци хыснинчен укҫа килесси пирки пӗлтернӗччӗ. Ку укҫапа кӑшӑлвирусран килте амбулатори мелӗпе сипленекен пациентсене тӳлевсӗр эмелсемпе тивӗҫтерме парӗҫ.

Укҫа-тенкӗ Чӑваш Ене ҫитнӗ. Кун пирки кӑшӑлвирус сарӑлас енӗпе кӗрешекен оперативлӑ штабӑн ларӑвӗнче ЧР сывлӑх сыхлавӗн министрӗ Владимир Степанов пӗлтернӗ.

Поставщиксем тӳлевсӗррисен йышне кӗрекен эмелсене икӗ эрнере илсе килессине каланӑ. Тӳлевсӗр эмелсем валли 45,8 миллион тенкӗ уйӑрнӑ. 101,7 миллион тенкипе харпӑр хӳтӗлев хатӗрӗсем туянӗҫ, тест тӑвӗҫ. Тепӗр 15 миллион тенкипе лаборатори хута ярӗҫ.

Ҫӗнӗ Шупашкарти «Химпром» предприятире ӗҫлекен рабочи икӗ куҫне те пӗҫертсе янӑ. Предприятире ӗҫ сыхлавӗн правилине пӑснӑшӑн халӗ пуҫиле ӗҫ пуҫарнӑ.

Инкек кӑҫалхи нарӑс уйӑхӗн 8-мӗшӗнче ирхине пулса иртнӗ. 55 ҫулти арҫын йӳҫек кӑларакан цехра насус ылмаштарнӑ. Ҫавӑн чухне вӑл йӳҫекпе икӗ куҫне те пӗҫертсе янӑ. Тем чухлӗ сипленсен те пӗр куҫӗ халӗ те курмасть. Ҫакӑ ҫын сывлӑхне йывӑр сиен кӳни шутланать.

Тӗпчевҫӗсем шухӑшланӑ тӑрӑх, инкек ӗҫ сыхлавӗн правилисене пӑхӑннине тӗрӗслесе тӑманран тата рабочие хӳтлӗх хатӗрӗпе тивӗҫтерменрен пулнӑ.

Юлашки ултӑ кунта кӑшӑлвирусран пӗрмаях виҫшер ҫын вилет. Ковид алхасма тытӑннӑранпа пирӗн тӑрӑхра 167 ҫын пурнӑҫӗ татӑлнӑ. Ку цифрӑсене федерацин информаци центрӗ пӗлтернӗ.

Иртсе кайнӑ талӑкра кӑшӑлвируспа 65 ҫын чирленине шута илнӗ. Эпидемиологи сезонӗ пуҫланнӑранпа – 10 327. Пӗтӗмпе 8 856 пациент сывалнӑ, ҫав шутран юлашки тапхӑрта – 66.

Кӑшӑлвирусран килте сипленекенсем валли пирӗн республикӑна ҫитес икӗ эрнере эмел кӳрсе килмелле. Аса илтерер: укҫана федераци бюджетӗнчен, пурӗ 48,5 миллион тенкӗ, уйӑрнӑ.

Чӑваш Енри пульницӑсенче COVID-19 чирӗллисем валли койкӑсем малалла хатӗрлеҫҫӗ.

«Лару-тӑру кӑткӑс. Ҫӗнӗрен чирленисен шучӗ пульницӑран кӑлараканнисен шутӗнчен кунсерен йышланса пырать», – тенӗ республикӑн сывлӑх сыхлав министрӗ Владимир Степанов кӑшӑлвирус сарӑлнипе кӗрешекен оперштабӑн паянхи ларӑвӗнче.

Хальхи вӑхӑтра пульницӑсенче ковидпа чирлисем валли 2210 койка хатӗрленӗ, ку вӑл – республикӑри мӗнпур койкӑн чӗрӗк пайне яхӑн, тата тӗрӗсрех каласан, 24 процент. Пульницӑсенче халӗ 2160 ҫын сипленет.

Ҫитес 1,5-2 эрнере Шупашкар районӗнчи пульницӑра та ковид-госпиталь туса хурасшӑн.

Вӑрнар районӗнчи Нурӑсри психоневрологи диспансерӗнче кӑшӑлвируспа чирлекенсем паян та йышлӑ. Унти 170 ҫынна пульницӑна вырттарнӑ, вӗсенчен 6-шӗ – интернат ӗҫченӗсем. Тата тепӗр 16 ҫынна амбулатори мелӗпе (тепӗр майлӑ каласан, килте) сиплеҫҫӗ. Ҫак цифрӑсене республикӑн сывлӑх сыхлав министрӗ Владимир Степанов кӑшӑлвирус сарӑлассине хирӗҫ ӗҫлекен оперштаб ларӑвӗнче паян пӗлтернӗ.

Психоневрологи диспансерӗнче COVID-19 диагнозне кӑҫалхи юпа уйӑхӗн пуҫламӑшӗнче тупса палӑртнӑ. Чӑваш Енӗн Ӗҫ тата социаллӑ хӳтлӗх министерствинче шухӑшланӑ тӑрӑх, чире учрежденире ӗҫлекенсенчен пӗри ертме пултарнӑ. Роспотребнадзорта вара интернат ӗҫченӗсем 14 кун киле каймасӑр ӗҫлемелли йӗркене пӑснӑ тесе шухӑшлаҫҫӗ.

UIHere сӑнӳкерчӗкӗ

Турцинчен таврӑннӑ Шупашкар хӗрарӑмне анализшӑн штрафланӑ. Тӗрӗсрех каласан, тӗрӗс мар анализшӑн явап тыттарнӑ.

Ют ҫӗршывран килекенсен кӑшӑлвирусран виҫӗ кун хушшинче тӗрӗсленсе ӗлкӗрмелле, ҫавӑн пирки патшалӑх пулӑшӑвӗн порталӗнче пӗлтермелле.

Турцинчен килнӗ Шупашкар хӗрарӑмӗ ҫӳлтисем хушнине итленӗ-ха, пульницӑна кайнӑ. Анчах вӑл ИФА меслечӗпе тӗрӗсленнӗ. Ку мел организмра кӑшӑлвируса хирӗҫ ятарлӑ белок (вырӑсла ӑна антитела теҫҫӗ) пуррине палӑртма май парать. Хӗрарӑмӑн ПЦР мелӗпе тӗрӗсленмелле пулнӑ. Вӑл анализ ҫын чирленипе чирлеменнине кӑтартать.

Йӗркене административлӑ майпа пӑснӑ тесе хӗрарӑма суд 15 пин тенкӗ штраф хурса панӑ.

Чӑваш Енре пурӑнакансен пурнӑҫӗ кӑшӑлвируса пула пӗрмай татӑлать. Иртсе кайнӑ талӑкра тата тепӗр виҫӗ ҫын вилнӗ.

Ҫапла вара ку амак 164 ҫынна ьеш тӗнчене ӑсатнӑ. Ку вӑл – официаллӑ статистика ӗнентернӗ тӑрӑх.

Чӑваш Республики чирлекенсен йышӗпе лайӑх регионсен йышӗнче шутланать. Апла пулин те вирус пирӗн тӑрӑхра та хӑйне аван туять. Иртсе кайнӑ талӑкра кӑна ку чире тепӗр 64 тӗслӗх тупса палӑртнӑ.

Эпидеми пуҫланнӑранпа пирӗн тӑрӑхра 10262 ҫын чирленине шута илнӗ. Халӗ кӑшӑлвирусран 1308 сипленет.

gastritinform.ru сайтри сӑн

Юпа уйӑхӗн 20-мӗшӗнченпе Чӑваш Енре кашни кунах кӑшӑлвирусран вилнӗ ҫынсем пулнӑ. Ҫав тапхӑртан пуҫласа 48 ҫыннӑн пурнӑҫӗ татӑлнӑ. Пӗтӗмпе 161 ҫын кӑшӑлвирса пула вилнӗ.

Ку таранччен 10198 ҫын инфекциленнӗ. Вӗсенчен 8701-шӗ сывалнӑ. Юлашки талӑкра 63 ҫын чирленӗ, 39 ҫын сывалнӑ, 3 ҫын вилнӗ.

Паянхи кун тӗлне республикӑра 1336 ҫын килте амбулатори мелӗпе е пульницӑра сипленет.

РБК тунӑ сӑн

Раҫҫейре килте кӑшӑлвирусран амбулатори мелӗпе сипленекенсем валли резерв фондӗнчен 5 миллиард ытла тенкӗ уйӑраҫҫӗ. Ку укҫана килте сипленекен пациентсем валли тӳлевсӗр эмел пама уйӑраҫҫӗ.

Пульницӑра выртман ҫынсен чирӗ шала ан кайтӑр тесе сипленмелли схема палӑртаҫҫӗ. Тухтӑр ҫырса панӑ эмелсене тӳлевсӗрех илме май пур. Ҫапла Раҫҫейре 640500 пациент тӳлевсӗр эмелсене тивӗҫмелле.

Михаил Мишустин премьер-министр резерв фондӗнчи укҫа-тенке регионсене кӗске вӑхӑтра ҫитерме хушнӑ. Чӑваш Ене 45 миллион та 829 пин те 500 тенкӗ килмелле.

poisknews.ru сайтри сӑн

Чӑваш Енре кӑшӑлвирусран кашни кунах вилеҫҫӗ. 15 кунра 42 ҫыннӑн пурнӑҫӗ татӑлнӑ. Ӗнер ав каллех вилнӗ – 3 ҫын пурнӑҫран уйрӑлнӑ. Ҫапла ку таранччен 155 ҫын вируса парӑнтарайман.

Ҫулталӑк пуҫланнӑранпа 10074 ҫын инфекциленнӗ, вӗсенчен 8554-шӗ сывалнӑ. Чӳк уйӑхӗн 3-мӗшӗ тӗлне республикӑра 1365 пациент пульницӑра е килте амбулатори мелӗпе сипленнине шута илнӗ.

Республикӑра кӑшӑлвирус сарӑлнин индексӗ 1-пе танлашать. Сӑмах май, малашне пульницӑран кӑшӑлвирус анализӗ «минус» паллӑпа килмесӗрех киле ярӗҫ.