Раҫҫей паспортне илмелли вӑхӑта тӑсма йышӑннӑ. Документа РФ Правительствин Председателӗ Михаил Мишустин алӑ пуснӑ.

Ҫын 20 тата 45 ҫул тултарсан паспорта 1 уйӑх хушшинче ылмаштармалла. Ҫӗнӗ паспорт илме заявлени парсан ҫынна вӑхӑтлӑх удостоверени параҫҫӗ.

Малашне вара паспорт ылмаштармалли вӑхӑт 90 кунпа танлашӗ.

Ҫӗршыв шайӗнче йӗркене ылмаштарнине вӑхӑтлӑх документпа ҫын банкра кредит илеймест, патшалӑх пулӑшӑвӑвӗсен порталӗнче регистрациленеймест.

14 ҫул тултарнисен те паспорта хальхи пек 30 кунта илсе ӗлкӗрессишӗн талпӑнма тивмӗ. Вӗсен те ҫак ӗҫе 90 кунта пурнӑҫламалла.

2022 ҫулхи утӑ уйӑхӗн 1-мӗшччен тата тепӗр ҫӗнӗлӗх вӑя кӗрӗ. Раҫҫей паспортне 5 кунта хатӗрлесе пама тытӑнӗҫ. Ҫын ӑна хӑй пурӑнакан вырӑнта илет-и е вӑхӑтлӑх чарӑннӑ ҫӗрте-и... — пӗрех. Йӗрке пур тӗслӗхре те пӗр пек пулӗ.

vk.com/dzen_chuvashia сӑнӳкерчӗксемпе тата Етӗрне ял тӑрӑхӗн сайтӗнчи скриншотпа усӑ курса хатӗрленӗ коллаж

Ҫӗршыври паллӑ рэпер тата видеоблогер, Моргенштерн, хӑйӗн хӗрӗпе Диаларӑпа Чӑваш Ен урлӑ иртнӗ чухне Етӗрне районӗнчи ял ятне асӑрханӑ. «Сучково» текен чарӑнура унӑн хӗрӗ тӗрлӗ майлӑ тӑрса сӑн ӳкерӗннӗ.

Моргенштерн — Алишер Валеевӑн хушма ячӗ. Вӑл «Ютубра» «Morgenshtern» каналти «Изирэп» проектпа палӑрнӑ. Алишер 1998 ҫулта Ӗпхӳре ҫуралнӑ.

Сучково — Етӗрне ҫывӑхӗнчи поселок. Чӑваш Енӗн влаҫ органӗсен официаллӑ порталӗнче Етӗрне ял тӑрӑхӗн администрацийӗ хӑйӗн ялӗсемпе паллаштаракан хыпара ӗненсен, Сучково поселокӗнче пӗтӗмпе те 9 кил ҫеҫ.

Инкеклӗ лару-тӑру министерстви тунӑ сӑн

Паян ҫӗрле Тӑвай районӗнчи Чутей ялӗнче агроферма ҫуннӑ. Кун пирки Инкеклӗ лару-тӑру министерстви пӗлтерет.

Ведомство хыпарланӑ тӑрӑх, агрофермӑра ҫулӑм ахальтен тухман, ӑна чӗртсе янӑ. Пушарта унӑн тӑрри сиенленнӗ, пилорама тата хӗле валли хатӗрленӗ утӑ ҫунса кайнӑ. Ҫулӑма сӳнтерме 5 пушар машини ҫитнӗ.

Сӑмах май, ҫулталӑк пуҫланнӑранпа Чӑваш Енре 918 пушар тухнӑ. Вӗсенче 57 ҫын вилнӗ, 40-ӗн суранланнӑ. Вут-ҫулӑмран 75 ҫынна ҫӑлнӑ. Пӗтӗмӗшле тӑкак 17 ытла миллион тенкӗпе танлашнӑ.

Челябинскран Минска ҫуран кайма тухнӑ ҫамрӑксем Чӑваш Ене утса ҫитнӗ. Вӗсемпе ӑнсӑртран тӗл пулни ҫинчен Елен Нарпи чӑваш ҫыравҫи тата чӗлхеҫи Фейсбукра пӗлтернӗ.

«Паян, утӑн 7-мӗшӗ, ҫав тери тулли те тӗлӗнмелле кун пулчӗ. Каламалла, кунта куллен темле япала та пулса иртет, анчах паян Сӑрта шыва кӗрсе хӗвелпе хӗртӗннӗ, Виктор Чугаровпа, Владислав Московцевпа, Элтияр Сантӑрпа тӗл пулнӑ хыҫҫӑн тата Челябинскран Минска кайма тухнӑ ҫамрӑксемпе — Сашӑпа тата Никитӑпа тӗл пултӑмӑр. Тӗлпулӑвӗ ӑнсӑртран темелле. Вӗсем 47 кун каялла Челябинскран тухнӑ-мӗн те, шӑпах паян «Сурские зори» таран утса ҫитнӗ, апатланма кунти кафене кӗнӗ. Пач шутламан ҫӗртен прӗннисемпе тӗл пулнӑ. Маттур вырӑс каччисем пӗри 18, тепри 17 ҫулта иккен», — тесе пӗлтернӗ вӑл Фейсбукра.

«Байконур» космодрома Чӑваш Ен делегацийӗ пулнӑ. Аса илтерер: ҫӗртме уйӑхӗн 30-мӗшӗнче унтан чӑваш элемӗллӗ тата Андриян Николаева ӳкерсе хунӑ ракета космоса вӗҫсе хӑпарнӑ. Ҫав кун

космодромра Чӑваш Ен делегацийӗ пулнӑ. Йыша тӳре-шарапа пӗрлех ача-пӑча та кӗнӗ.

Груз турттаракан карапа тӗнче уҫлӑхне хӑпартнине курма республикӑн пӗрремӗш вице-премьерӗ – финанс министрӗ Михаил Ноздряков, вице-премьер – экономика аталанӑвӗн тата пурлӑх хутшӑнӑвӗсен министрӗ Дмитрий Краснов, промышленность тата энергетика министрӗ Евгений Герасимов, Чӑваш Ен Элтеперӗн Администрацийӗн ертӳҫи Вячеслав Борисов, Чӑваш Енри Хӗрарӑмсен канашӗн ертӳҫи Наталья Николаева, Шупашкарти «Ҫеҫпӗл» предприятин директорӗ Владимир Бакшаев тата Сӗнтӗрвӑрри районӗнчи А.Г. Николаев ячӗллӗ мемориал комплексӗн директорӗ Александр Тукмаков тухса кайнӑ.

Физикӑпа, астрономипе, космоспа кӑсӑкланакан, тӗрлӗ конкурсра ӑмӑртура палӑрнӑ ачасене те инҫе ҫула илсе кайнӑ.

«Раҫҫейри пахалӑх системи» ҫӗршыври лавккасенче сутӑнакан квасӑн 7 маркине тишкернӗ. Палӑртма кӑмӑллӑ: «Букет Чувашии» кӑларакан «Килти квас» тӗрӗслев витӗр тухнӑ.

Тӗрӗслеве хутшӑннӑ 3 кваса технологие пӑсса хатӗрленнине палӑртнӑ. Хӑшӗ-пӗрине ГОСТпа килӗшӳллӗн вӗретмен.

Тӑватӑ квас ҫеҫ – «Очаковский», «Букет Чувашии», «Желтая бочка», «Силич» - тӗрӗслев витӗр тухнӑ, вӗсем пахалӑхлӑ пулнине палӑртнӑ.

Сӑмах май, 2017 ҫулта «Букет Чувашии» квасӗ тӗрӗслевре палӑрайман, ӑна йӳҫӗтес тӗлӗшпе технологие пӑснине пӗлтернӗччӗ. Халӗ ку квас пахалӑхӗ лайӑхланнине палӑртнӑ.

Паян, ҫӗртме уйӑхӗн 30-мӗшӗнче, ирхи 02 сехет те 27 минут та 20 ҫеккунтра «Байконур» космодромран чӑваш элемӗллӗ ракета тӗнче уҫлӑхне ҫӗкленнӗ. «Союз-2» ракета-носитель тиев турттаракан «Прогресс МС-17» транспорт космос карапӗпе тӗнче уҫлӑхне хӑпарнӑ. Ракета ҫине Чӑваш Ен элемне тата Совет Союзӗн икӗ хут Геройне Андриян Николаева ӳкерсе хунӑ.

Аса илтерер: ракетӑна ҫавӑн пек илемлетесси пирки маларах Чӑваш Ен «Роскосмос» патшалӑх корпорацийӗн гендиректорӗпе Дмитрий Рогозинпа алӑ пуснӑччӗ.

"Столото" сӑнӳкерчӗкӗ

Мускава вахта мелӗпе ӗҫлеме ҫӳрекен арҫын лотерейӑра укҫа выляса илнӗ. Кун пирки «Столото» пӗлтерет.

Шупашкарта пурӑнакан Дмитрий Шевнин виҫӗ ҫул ӗнтӗ лотерея вылять. Билет туяннӑ чухне яланах ӑна ӑнасса шанать. Хальхинче ӑнӑҫу чӑнах та ун енче пулнӑ. Вӑл лотерейӑра 706 пин те 577 тенкӗ выляса илнӗ.

Дмитрий укҫа выляса илнине пӗлсен питӗ тӗлӗнне, ҫав вӑхӑтрах савӑннӑ. Ара, вӑл ҫакна тахҫантанпах кӗтнӗ вӗт.

Дмитрий ку укҫа-тенке хваттер тяннӑ ҫӗре ярасшӑн.

«Ергаки» наци паркӗнче упа туристсен ушкӑнӗ ҫине тапӑннӑ хыҫҫӑн пӗр ҫамрӑк ача вилнӗ, тепри аманнӑ. Кун пирки журналистсене вырӑнти ИӖМ-ӗн тӗп комитетӗнче пӗлтернӗ.

«13 ҫынтан тӑракан туристсен ушкӑнне упа тапӑннӑ хыҫҫӑн икӗ ҫын шар курнӑ, вӗсенчен пӗри, 16 ҫулти ҫамрӑк ача, вилнӗ», — каласа панӑ ведомствӑра.

ИӖМ хыпарланӑ тӑрӑх, хальхи вӑхӑтра туристсене маршрутран кӑлараҫҫӗ. Красноярск крайӗпе Хакассин Тӗпчев комитечӗн управленийӗ чӗрчун ҫынсем ҫине мӗн сӑлтавпа тапӑннине тӗпчеме пуҫланӑ. Вырӑна следствипе операци ушкӑнӗ тухса кайнӑ.

Каярахпа «Ергаки» ҫутҫанталӑк паркӗн ӗҫченӗсем чӗрчуна персе вӗлерни пирки пӗлтернӗ.

«Чӗрчун чӑн та асӑрханусӑр ҫӳренӗ, хаярскер пулнӑ — госинспекторсене хӑвалама тытӑннӑ, вӗсенчен пӗри ҫине тапӑнма хӑтланнӑ. Нумай сехет хушши йӗрленӗ хыҫҫӑн ҫынҫиен упана паркри ӗҫченсем персе пӑрахнӑ», — ҫапларах пӗлтернӗ.

Парк директорӗн Игорь Грязинӑн шучӗпе, кунашкал упа килсе тухни сивӗ ҫанталӑкпа тата тарӑн юрпа ҫыхӑннӑ — вӗсене пула чӗрчунсем ҫителӗклӗ тӑранаймаҫҫӗ. Унсӑр пуҫне коммерциллӗ палатка лагерӗн ҫыннисем официаллӑ туризм маршрутӗнчен пӑрӑнса аякри ҫулпа кайма шут тытнӑ.

Малалла...

mybryansk.ru сайтри сӑн

Чылай регионта кӑшӑлвирус тӗлӗшпе лару-тӑру йывӑрланса пырать. Ҫавна май каллех чарусем йышӑнма тытӑннӑ.

Тӗслӗхрен, Мускавра ҫӗртме уйӑхӗн 15-19-мӗшӗсенче ҫӗнӗ чарусем вӑйра пулӗҫ. Хула мэрӗ организаци-предприяти ӗҫченӗсене май килнӗ таран дистанци мелӗпе ӗҫлеттерме ыйтнӑ. Ваттисене вара килте е дачӑра юлма сӗннӗ.

Мари Элте те ӗҫлекен ҫынсен 30 процентне дистанци мелӗпе ӗҫлеттерме йышӑннӑ. Ӗнертен пуҫласа утӑн 5-мӗшӗччен ачасене суту-илӳ центрне ашшӗ-амӑшӗсӗр кайма чарнӑ. Ача-пӑча вылямалли центрсене вӑхӑтлӑха хупнӑ.

Бурятире, Ханты-Манси автономи округӗнче, Мурманск облаҫӗнче, Хабаровск крайӗнче, Вологда облаҫӗнче те чарусем йышӑннӑ. Чӑваш Енре хальлӗхе улшӑнусем ҫук. Пирӗн патра кӑшӑлвирусран талӑкне 4 ҫын таран вилет.