Ҫӗршывӑн вице-премьерӗ Татьяна Голикова Раҫҫей ҫыннисене юпа уйӑхӗн 30-мӗшӗнчен тытӑнса чӳк уйӑхӗн 7-мӗшӗччен кантарасшӑн. Ку сӗнӳпе вӑл Владимир Путин Президент патне тухас кӑмӑллине пӗлтернӗ. Ҫакӑн пирки вӑл кӑшӑлвируспа кӗрешес енӗпе ӗҫлекен координаци канашӗн президиумӗн паянхи ларӑвӗнче пӗлтернӗ.

Ҫӗршыв Правительствин Председателӗн заместителӗ каланӑ тӑрӑх, хӑш-пӗр регионта кану кунӗсене юпа уйӑхӗн 23-мӗшӗнченех йышӑнмалла.

РФ Правительствин Председателӗ Михаил Мишустин хӑйӗн заместителӗ сӗннипе килӗшнӗ. Ку ыйтӑва ыранхи канашлура Владимир Путин патне ҫитерӗҫ.

Паян Пӗтӗм Раҫҫейри халӑх ҫыравӗ пуҫланнӑ. Вӑл 1 уйӑх пырӗ, чӳк уйӑхӗн 15-мӗшӗнче вӗҫленӗ.

Чӑваш Енре 370 участок ӗҫлет. Вӗсем шкулсем, культура ҫурчӗсем, вулавӑшсем, нумай функциллӗ центрсем ҫумӗнче уҫӑлнӑ. Кӑҫал ҫырава технологисем пулӑшнипе ирттереҫҫӗ. Унта виҫӗ мелпе хутшӑнма пулать.

Пӗрремӗшӗ: киле пыракан ҫыравҫа кӗтсе илмелле. Иккӗмӗшӗ: хӑвӑр участока пыма пултаратӑр. Виҫҫӗмӗшӗ: Патшалӑх пулӑшӑвӗсен порталӗ урлӑ. Палӑртмалла: порталта хуравсем ҫине чӑвашла та хуравлама май пур (тӗрӗсленӗ хыҫҫӑн хӑш-пӗр ыйтусен хуравӗсем ҫеҫ вырӑсла пулнине калама пулать, пӗтӗмӗшле йӗркеллех куҫарнӑ).

Ҫыравҫӑн хӑй ҫумӗнче паспорт, планшет пулмалла. Ҫырава хутшӑнакансен 33 ыйтӑва хуравламалла. 23-шӗ – пӗтӗмӗшле ыйтусем: ӳсӗм, ҫемьери статус, чӗлхе тата ытти те. 10 ыйту ҫурт-йӗре пырса тивет. Ыйтусене хуравлама вӑтамран 23 минут кирлӗ. Пӗр ҫын пӗтӗм ҫемьешӗн хуравлама пултарать.

Чӳк уйӑхӗнчи пӗрремӗш эрнере 4 кун кантараҫҫӗ: 4,5,6 тата 7-мӗшӗсенче. Ку эрнере 5 кун ӗҫлекенсене пырса тивет.

Чӳк уйӑхӗн 4-мӗшӗ – Халӑхсен пӗрлӗхӗн кунӗ. Вӑрӑм кану кунӗсем ҫакӑнпа ҫыхӑннӑ та. Юнкун, чӳкӗн 3-мӗшӗнче, ӗҫ кунӗ 1 сехет кӗскерех пулӗ.

Чӳкӗн 5-мӗшӗнче кӑрлач уйӑхӗшӗн канатпӑр. РФ Ӗҫ кодексӗпе килӗшӳллӗн, кӑрлачӑн 1-6-мӗшӗсенче тата 8-мӗшӗнче Ҫӗнӗ ҫулхи каникул. Вӗсем шӑматкунпа вырсарникуна лексен кану кунне урӑх куна куҫараҫҫӗ.

Кун хыҫҫӑн вӑрӑм каникул пире Ҫӗнӗ ҫул хыҫҫӑн ҫеҫ кӗтет. Кӑҫал раштав уйӑхӗн 31-мӗшӗнче ӗҫлеместпӗр.

Алтайра 83 ҫулти хӗрарӑм ҫухалнӑ. Вӑл Чӑваш Ене килме пултарнӑ. Ҫапла пӗлтерне Чӑваш митрополийӗн сайтӗнче.

Евдокия Захарова Алтай Республикинчи Турочак районӗнчи Лебедское ялӗнче пурӑнать. Авӑн уйӑхӗн 27-мӗшӗнче вӑл килтен кайнӑ та таврӑнман. Ывӑлӗ пулӑшу ыйтать.

Ватӑ хӗрарӑм нерв тытӑмӗн чирӗпе аптӑрать, ҫавӑнпа вӑл тӑван тӑрӑхне, Чӑваш Ене, килме пултарнӑ. Евдокия Захарова имшер кӗлеткеллӗ, 150 сантиметр ҫӳллӗш. Тухса кайнӑ чухне хӗрлӗ куртка, хура атӑ тӑхӑннӑ, симӗс тутӑр ҫыхнӑ. Ӑна куракансене ҫак номерпе шӑнкӑравлама ыйтаҫҫӗ: 8 (800) 700-54-52.

2022 ҫул вӗҫӗнче Раҫҫейре ҫӗнӗ 100 тенкӗлӗх укҫа ҫаврӑнӑша тухӗ. Ун ҫинче пысӑк хисепсем, куҫ курманнисем валли рельефсем /миҫе тенкӗллӗхине алӑпа хыпашласа пӗлме май пур/ пулӗҫ.

Кредит организацийӗсене шутламалли-сортировка тумалли машинӑсене ҫак купюрӑна йышӑнмашкӑн куҫарма вӑхӑт панӑ. Ҫавна май хальлӗхе ҫӗнӗ 100 тенкӗлӗх укҫа ҫаврӑнӑша тухман.

Ҫӗнӗ укҫа тӗсӗпе, калӑпӑшӗпе хальхи пекрех пулӗ. Тепӗр енче Тӗп федераци округӗнчи паллӑ вырӑнсем пулӗҫ.

Раҫҫейре те, Чӑваш Енри пекех, Ашшӗн кунне паллӑ тӑвӗҫ. Ку хушӑва РФ Президенчӗ Владимир Путин алӑ пуснӑ. Унта палӑртнӑ тӑрӑх, уява юпа уйӑхӗнчи виҫҫӗмӗш вырсарникун паллӑ тӑвӗҫ.

Кӑҫал Ашшӗн кунӗ юпа уйӑхӗн 17-мӗшӗ ҫине лекӗ. Сӑмах май, Чӑваш Енре уява пӗлтӗр паллӑ тума тытӑннӑ. Анчах пирӗн патра ӑна юпа уйӑхӗн юлашки вырсарникунӗнче паллӑ тӑваҫҫӗ. Пӗлтӗр пӗрремӗш хутчен паллӑ тунӑ. Кӑшӑлвирус сарӑлнине пула ачасем унта хутшӑнман.

Галина Фёдорова

Паян Шупашкарти хӗрарӑм Пӗрремӗш каналпа кӑтартакан «Модный приговор» кӑларӑма хутшӑнчӗ.

Галина Фёдорова – 44 ҫулта, тахҫанах Мускав облаҫне тухса кайнӑ. Унта вӑл суту-илӳ енӗпе тӑрӑшать. Ача чухне вӑл чирленӗ, утайман та. Анчах, хӑй калашле, хӑйне хӑй ура ҫине тӑратнӑ.

Хӗрарӑм 4 хутчен качча кайнӑ, анчах пурнӑҫӗ ӑнман. Арҫынӗсем ырӑ ҫынсемех лекмен, вӗсен хушшинче тӗрмере ларни те пулнӑ. Турра шӗкӗр, хӗрарамӑн икӗ ача пур, икӗ ывӑл. Юлашки 8 ҫулта хӗрарӑм авланнӑ арҫыннӑн савнийӗ пулса пурӑнать.

Телекӑларӑма хӗрарӑм тусӗ, Татьяна Ли, илсе пынӑ.

Галина спорт тумӗпе ҫӳреме юратать. Тусӗ унӑн стильне улӑштарасшӑн, кайран хӗрарӑмӑн пурнӑҫӗ те ылмашасса шанать.

«Питӗ хитре, питӗ кӑмӑллӑ. Мана килӗшет», – терӗ Галина кӑларӑм вӗҫӗнче чӑвашла Александр Васильев телеертӳҫӗ ӑна тӑван чӗлхепе калама ыйтсан.

Пирӗн ҫӗршывра килес ҫул епле канасси паллӑ. Уяв кунӗсем канмалли кунсене лекнӗ чухне кану кунӗсене урӑхларах палӑртаҫҫӗ. Ҫавна ҫӗршыв Правительствин шайӗнчех йышӑнаҫҫӗ.

2020 ҫул валли палӑртнӑ ҫӗнӗ календарьте ҫитес Ҫӗнӗ ҫул тӗлӗнче кӑҫалхи раштав уйӑхӗн 31-мӗшӗнчен пуҫласа кӑрлач уйӑхӗн 9-мӗшччен канма йышӑннӑ. Ҫу уйӑхӗнчи уявсем икӗ пайран тӑрӗҫ. Пӗрре ака уйӑхӗн 30-мӗшӗ-ҫу уйӑхӗн 3-мӗшӗсенче канӑпӑр, унтан тепре — ҫу уйӑхӗн 7-10-мӗшӗсенче.

Нарӑс уйӑхӗн 23-мӗшӗнче те канмалли кун пулӗ. Пуш уйӑхӑнӗче харӑсах виҫӗ кун: 6-8-мӗшӗсенче — кантарӗҫ.

Ҫурса тӑкнӑ машина. Подслушано в Ростове-на-Дону ушкӑнра вырнаҫтарнӑ сӑн

Килсӗр-ҫуртсӑр йытӑсен ушкӑнӗ кушака тытма хӑтланса иномаркӑна ҫӗмӗрсе тӑкнӑ. Хулара пулса иртнӗ пӑтӑрмах пирки «Контактри» «Подслушано в Ростове-на-Дону» (чӑв. Дон ҫинчи Ростовра курни-илтни) ушкӑнра пӗлтернӗ.

«Звездный» (чӑв. Ҫӑлтӑрлӑ) ҫурт комплексӗнче вырнаҫнӑ Пултарулӑх урамӗнчи 7-мӗш ҫуртра хаяр килсӗр йытӑсем кушака туртса ҫурас тенӗ. Мӗскӗн чӗрчун тӑратса хӑварнӑ «Ситроенӑн» мотор уйрӑмне пытанса ларма май тупнӑ, анчах та йытӑсем ун патне ҫитес тесе машинӑна ҫӗмӗрмех пуҫланӑ.

Йытӑсем бамперпа капота кӑшланӑ, пралуксене тӑпӑлтарнӑ, тусанран хӳтӗлекен пайсене ҫурса тӑкнӑ. Хӑраса ӳкнӗ кушак ирчченех машина айӗнче ларнӑ, капот уҫӑлсан тин, тӗрӗс-тӗкелскер, унтан сиксе тухнӑ, ҫав вӑхӑтрах, ирхине хӑйӗн «Ситроенне» йӑлт ҫӗмӗрсе тӑкнине асӑрханӑ Ростов хӗрарӑмӑн машинӑна хаклӑ юсав тума тивӗ.

Варвара Горбатина

Шупашкарта ҫуралса ӳснӗ Варвара Горбатина бетон (ҫапла-ҫапла. Бетон, батон мар) ҫиет. 18 ҫулти хӗр халӗ Мускаври аслӑ шкулсенчен пӗринче вӗренет.

Варвара бетон ҫиме 10 ҫулта тытӑннӑ. Цемент хутӑшне ас тивсе пӑхнӑ та килӗшсе кайнӑ. Ӑна вӑл ваннӑйӗнчи плитка айӗнчен чакаласа кӑларнӑ. Бетона малтанхи вӑхӑтра ҫӑварта тытнӑ ҫеҫ, унтан сурса пӑрахнӑ. Каярах вара ҫимех тытӑннӑ. Мӑнукӗ цемент ҫинине асӑрхасан асламӑшӗ (тен, кукамӑшӗ-тӗр. Вырӑсла хыпарта «бабушка» тенӗ) эсӗ йывӑр ҫын мар-и тесе кӑсӑкланнӑ.

Бетон ҫинӗрен Варварӑн шӑл пломбисем тухса ӳкме тытӑннӑ. Халӗ хӗр вӑл йӑлана пӑрахӑҫланӑ, мӗншӗн тесен тимӗр пур препаратсем ӗҫет.

Нумаях пулмасть хӗр «Ю» телеканал кӑтартакан «Моя маленькая странность» (чӑв. Манӑн пӗчӗк тӗлӗнтермӗш) кӑларӑма хутшӑннӑ.

Сӑмах май, цемент тавраш ҫини организмра кальци, ферритин тата тимӗр ҫитменнине пӗлтерет. Цемент ҫисен ҫын наркӑмӑшланма тата унӑн пӳринче вӑл чулланса ларма пултарать.