Александр Андреев депутат

Чӑваш Ен Патшалӑх Канашӗн хӑш-пӗр депутачӗ Чӑваш автономи облаҫне йӗркеленӗренпе 100 ҫҫитнине халалласа кӑларнӑ юбилей медальне тивӗҫнӗ. Вӗсене авӑн уйӑхӗн 15-мӗшӗнче чысланӑ.

Ӗнер республикӑн Патшалӑх Канашӗн 43-мӗш сессийӗ ӗҫленӗ. Унта Чӑваш Ен Элтеперӗ тивӗҫӗсене вӑхӑтлӑх пурнӑҫлакан Олег Николаев та хутшӑннӑ. Хӑйӗн сӑмахӗнче вӑл суйлава хутшӑннӑ республика ҫыннисене тав сӑмахӗ каланӑ, ҫитес пилӗк ҫула палӑртнӑ тӗллевсене пурнӑҫламалли пирки асӑнса хӑварнӑ.

Юбилей медальне Раҫҫей Федерацийӗн коммунистсен партийӗн пайташӗ Александр Андреев тата либерал-демократсен партийӗн пайташӗ Константин Степанов тивӗҫнӗ. Вӗсем республика Элтеперӗн суйлавне те хутшӑннӑччӗ.

Ҫу уйӑхӗн 5-мӗшӗнчен эрех-сӑра сутма чаракан ҫӗнӗ саккун вӑя кӗнине Чӑваш халӑх сайчӗ пӗлтернӗччӗ. Аса илтерер: малашне «ҫуттине» нумай хваттерлӗ ҫуртсенче вырнаҫнӑ лавккасенче сутма ирӗк памӗҫ.

Паян Чӑваш Ен Патшалӑх Канашӗн сессийӗ иртнӗ. Унта 50 тӑваткал метртан пӗчӗкрех заведенисенче эрех сутма чарма йышӑннӑ. Ун пеккисем пирӗн республикӑра вуншар. Олег Таланов депутат, сӑмахран, пурӑнмалли ҫуртсенче эрех сутмалла мар тесе шухӑшлать. Петр Краснов депутат ун пек йӗрке икӗ регионта ҫеҫ: Чечняра тата Ингушетире – тесе каланӑ. Шупашкарти эрех савучӗн хуҫи Олег Мешков 49 тӑваткал метртан пӗчӗкрех пулсан заведение хупма тивӗ-и тесе пӑшӑрханнӑ.

Ҫапах та депутатсем саккуна йышӑннӑ.

Паян Чӑваш Енре ҫамрӑксен ҫӗнӗ организацине йӗркеленӗ. Шупашкарти экономикӑпа технологи колледжӗнче Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ҫамрӑксен пӗрлешӗвӗсен ертӳҫисемпе тӗл пулнӑ. Пурӗ 15 организаци ертӳҫи пухӑннӑ унта.

Тӗлпулура енсем «Молодежь Чувашии» (чӑв. Чӑваш Енри ҫамрӑксем) республикӑри ҫамрӑксен юхӑмне йӗркелесси ҫинчен меморандума алӑ пуснӑ.

Ҫамрӑксен ҫӗнӗ организацийӗ яш-кӗрӗмпе хӗр-упраҫа аталанма, вӗсене республикӑн социаллӑ пурнӑҫӗпе экономика аталанӑвне хутшӑнтарма пур енлӗн пулӑшас тӗллевӗллӗ тесе ӗнентереҫҫӗ.

Пурӑнан пурнӑҫра тӗрлӗ ыйтӑва татса пама тивет. Куҫман пурлӑха регистрацилес тесен те вун-вун япала пӗлмелле. Кун пек ыйтусене Росреестрӑн Чӑваш Енри управленийӗнче уҫӑмлатма май пур.

Авӑн уйӑхӗн 17-мӗшӗнче Росреестрӑн Чӑваш Енри управленийӗ РФ Президенчӗн Шупашкарти Ленинград урамӗнчи 36-мӗш ҫуртри йышӑну пӳлӗмӗнче, 2-мӗш хутра, граждансене йышӑнӗ. Асӑннӑ ҫуртра нумай пулӑшу кӳрекен центр (вырӑсла унӑн аббревиатури МФЦ) вырнаҫнипе те тупма ҫӑмӑл.

Хваттерпе пӳрте, ҫӗрпе гаража регистрацилес тата ытти ҫавӑн йышши самантсене Росреестрӑн Чӑваш Енри управленийӗн ертӳҫин ҫумӗӗ Татьяна Васильева уҫӑмлатӗ. Ҫынсене вӑл 15 сехетрен пуҫласа 17 сехетчен пулӑшӗ. Йышӑнӑва кайиччен 8 (8352) 62-22-33 тата 39-36-83 телефон номерӗсемпе

ҫырӑнмалла.

"На связи" форумри сӑн

Сӗнтӗрвӑрри районӗнче хӗвел ҫаврӑнӑш вӑррин хуппин купине тупнӑ. Ку Нерятӑв ялӗ ҫывӑхӗнче.

Ку купа ӑҫтан тупӑннӑ? Вырӑнти халӑх акӑ мӗнле шухӑшлать: Сӗнтӗрвӑрринчи спирт савучӗ пулнӑ ҫурт ҫумӗнче тип ҫу туса кӑлараҫҫӗ.

Нерятӑв ялӗ ҫывӑхӗнчи ҫак купана «Ҫыхӑнура» форума пӑхса тӑракан пӗр ҫын асӑрханӑ. Вӑлах сӑн ӳкерсе форума ярса панӑ.

Ҫынсем ҫакна тӗрлӗрен хакланӑ. Пӗрисем кунта ним япӑххине те курмаҫҫӗ: вӑл ҫӗрет, тӑпрашӑн лайӑх им-ҫам шутланать. Теприсем вара сивленӗ: хать мӗнле пулсан та ун пек хӑтланма юрамасть.

Чӑваш Республикин Конкурентлӑ политика тата тариф службин ертӳҫин ҫумне ҫирӗплетнӗ. Ҫакӑн ҫинчен калакан йышӑнӑва Чӑваш Ен Министрсен Кабинечӗн Ертӳҫи паян алӑ пуснӑ.

Чӑваш Республикин конкурентлӑ политика тата тариф службин ертӳҫин ҫумӗ пулма Надежда Евлампиевӑна шаннӑ.

Асӑннӑ службӑн ертӳҫи пулма кӑҫалхи пуш уйӑхӗнче Надежда Колебановӑна ҫирӗплетнӗ. Маларах Шупашкар хула администрацийӗн пуҫлӑхӗн ҫумӗ пулса ӗҫленӗ. Халӗ унӑн икӗ ҫум: Алина Елисеева тата Надежда Евлампиева.

fkr45.ru сайтри сӑн

Чӑваш Енре ӗҫе тӳрӗ кӑмӑлпа пурнӑҫламан подрядчиксен реестрне тӑвӗҫ. Ҫакна ЧР Элтеперӗн тивӗҫӗсене вӑхӑтлӑх пурнӑҫлакан Олег Николаев сӗннӗ.

Кӑҫал «Хулана хӑтлӑх кӗртесси» регионти проектпа килӗшӳллӗн, ҫуртсен картишӗсене, общество вырӑнӗсене хӑтлӑлатма 362,3 миллион тенкӗ уйӑрнӑ. Анчах 47,6 миллион тенкипе ҫеҫ усӑ курнӑ. 340 объектран 103-шӗнче ҫеҫ ӗҫсем вӗҫленнӗ. Кая юлакансен йышӗнче – Ҫӗрпӳ, Елчӗк, Хӗрлӗ Чутай районӗсем. Ку подрядчиксем хӑйсен ӗҫне тивӗҫлипе пурнӑҫламаннипе ҫыхӑннӑ.

Халӑх ҫакнашкал пӗлтерӗшлӗ ӗҫсем мӗншӗн вӑхӑтра пурнӑҫланманнинне пӗлтӗр тесе тӳрӗ кӑмӑлпа ӗҫлемен подрядчиксен реестрне тӑвӗҫ. Ҫитес вӑхӑтра ӑна пурте кӗрсе пӑхма пултарӗҫ.

Паян, авӑн уйӑхӗн 10-мӗшӗнче, Чӑваш Ен сывлӑх сыхлав министрӗ Владимир Степанов Республикӑн психиатри пульницин коллективне ҫӗнӗ ертӳҫӗпе паллаштарнӑ. Тилхепене Владимир Дубова шаннӑ. Вӑл маларах сывлӑх сыхлав министрӗн ҫумӗ пулса тӑрӑшнӑччӗ.

Владимир Дубов 1999 ҫулта Чӑваш патшалӑх университечӗн медицина факультетӗнчен вӗренсе тухнӑ. Унтан асӑннӑ аслӑ шкулӑн ординатуринче ӑс пухнӑ. РФ Халӑх хуҫалӑхӗн академийӗнче сывлӑх сыхлас ӗҫри менеджмент енӗпе вӗреннӗ. 2017 ҫулта Шупашкарти коопераци институтӗнче экономика магистрӗн степеньне илнӗ.

2008-2014 ҫулсенче Владимир Дубов Шупашкарти 1-мӗш клиника пульницин тӗп врачӗн ҫумӗ, 2014-2017 ҫулсенче Шупашкар районӗн тӗп врачӗнче, кайран Ҫӗнӗ Шупашкарти хула пульницинче тӗп врачра ӗҫленӗ. Кайран республикӑн Сывлӑх сыхлав министерствинче пай пуҫлӑхӗнче тӑрӑшнӑ, 2018 ҫулти утӑ уйӑхӗнче ӑна министр ҫумӗ пулма шаннӑ.

Алексей Краснов тунӑ видео скринӗ

Авӑн уйӑхӗн 8-мӗшӗнче пӗр арҫын Етӗрне районӗнче Сӑр юханшывӗнче ир-ирех пулӑ тытнӑ. Сехет йӗппи 5 сехет ҫеҫ кӑтартнӑ. Унччен те пулман – пулӑҫ шывра темӗн ишнине асӑрханӑ. Упа иккен!

Арҫын упа ишнине видео ӳкернӗ те ӑна «Контактра» халӑх тетелне лартнӑ. Пулӑҫ каланӑ тӑрӑх, упа ватӑ курӑнман.

Сӑмах май, нумаях пулмасть Чӑваш Енре питӗ пысӑк кӑмпа тупнӑ. Вӑл 23 килограмм тайнӑ. Кӑмпа ҫимеллиех пулнӑ.

Чӑваш Енри тата тепӗр яла газ ҫитернӗ. Хальхинче ҫак ырлӑхпа Сӗнтӗрвӑрри районӗнчи Пущӑн Сали ялӗсем киленӗҫ.

Хӗрлӗ хӑйӑва касма республикӑн строительство, архитектура тата ҫурт-йӗрпе коммуналлӑ хуҫалӑх министрӗ Александр Героев тата ыттисем пырса ҫитнӗ. «Хальхи вӑхӑтра пирӗн регионта газификаци кӑтартӑвӗ 93,6 процентпа танлашать», — тенӗ министр.

Ял газ ҫитерме 3 километр тӑршшӗ пӑрӑх хунӑ. Халӗ 52 хуҫалӑхра ҫут ҫанталӑк ырлӑхӗпе усӑ курма пуҫлӗҫ.

Маларах Куславккара, Канаш районӗнчи Шӑхасанта, Йӗпреҫ районӗнчи Шӑрттанта, Пӑрачкав районӗнчи Кудеиха ялӗнче ӗҫсене вӗҫленӗ. Газпа тивӗҫтерекенсем 20 миллиона яхӑн тенкӗ уйӑрнӑ.