Чӑваш Енӗн влаҫ органӗсен официаллӑ порталӗнче тӳре-шаран иртнӗ ҫулхи декларацине вырнаҫтарнӑ. Эпир вӗсенчен хӑшне-пӗрне ҫеҫ илсе кӑтартӑпӑр.

Республикӑн ял хуҫалӑх министрӗн Сергей Артамоновӑн пӗлтӗрхи тупӑшӗ 3 миллион та 773 пин тенкӗпе танлашнӑ; Чӑваш Ен Тӗп суйлав комиссийӗн ертӳҫин Александр Цветковӑн – 2 миллион та 448 пин тенкӗпе; экономика аталанӑвӗн министрӗн тивӗҫне пурнӑҫлакан Дмитрий Краснов – 4 миллион та 843 тенкӗпе. Чӑваш Енӗн РФ Президенчӗ ҫумӗнчи полпречӗ Петр Чекмарев тӗп ӗҫре 2 миллион та 565 пин тенкӗ тата 1 миллион та 200 пин тенкӗ хушма тупӑш илнӗ; строительство министрӗ Александр Героев – 3 миллион та 675 пин тенкӗ; информаци политикин министрӗ Михаил Анисимов тӗп ӗҫре 3 миллион та 224 пин тенкӗ ӗҫлесе илнӗ, унӑн хушма тупӑшӗн виҫи – 8 948 тенкӗ.

Don24.ru сайтри сӑн

Ҫитес ҫултан Чӑваш Енри 5 ачарана е ытларах воспитани паракан ҫемьесен пособине ӳстерӗҫ. Кун пирки паян Правительство ҫуртӗнче ирттернӗ ларура ЧР ӗҫлевпе социаллӑ хӳтлӗх министрӗ Алена Елизарова пӗлтернӗ.

Министр каланӑ тӑрӑх, 2021 ҫултан кунашкал ҫемьесене социаллӑ пулӑшу парасси 22 процент ӳсӗ. Ку пособие 5,2 пин ача тивӗҫӗ.

Хальхипе танлаштарсан, 18 ҫул тултарман 5 е унран ытларах ачана воспитани паракан ҫемьесем ҫулталӑкра 15360 тенкӗ ытларах илӗҫ. Вӑтамран пӗр уйӑхра ку 1300 тенкӗпе танлашать. Ку тӗллевпе республика хыснинчен 3,3 миллион тенкӗ уйӑрӗҫ.

Ҫак кунсенче Чӑваш Енре «Асӑрханӑр – ачасем!» акци иртет. Вӑл ҫурла уйӑхӗн 24-мӗшӗнче пуҫланнӑ, авӑн уйӑхӗн 11-мӗшӗнче вӗҫленӗ.

Профилактика мероприятине ҫак вӑхӑтра ҫулсеренех ирттереҫҫӗ. Ҫул-йӗр хӑрушсӑрлӑхӗн инспекторӗсем машинӑсем шкулсем ҫывӑхӗнче правилӑна пӑхӑннине тӗрӗслеҫҫӗ. Ачасене турттарнӑ чух йӗркене пӑхӑнмаллине те аса илтерӗҫ.

Акцие йӗркелекенсем ашшӗ-амӑшне те ачасемпе тимлӗрех пулма, ывӑл-хӗрне ҫул-йӗр правилисемпе паллаштарма ыйтаҫҫӗ. Ачасене ҫул ҫинче асӑрханса ҫӳреме вӗрентмелле. Ҫи-пуҫ ҫинче аякранах курӑнакан хӑю пулмалла.

Karavantver.ru сайтри сӑн

Владимир облаҫӗнче пурӑнакансем Муркаш районӗнчи чиркӳрен турӑшсем, ҫветтуйсен сӑнӗсене вӑрланӑ. Вӗсен тӗлӗшпе пуҫиле ӗҫ пуҫарнӑ.

Следстви версийӗ тӑрӑх, ҫурла уйӑхӗн 14-мӗшӗнче 49-ти тата 53 ҫулти арҫынсем ҫӗрле Муркаш районӗнчи чиркӗве кӗрсе темиҫе турӑш йӑтса тухнӑ.

Вӑрӑсене тытса чарнӑ, следстви вӑхӑтӗнче ирӗксӗр хӑварнӑ. Палӑртмалла: вӗсем иккӗшӗ те унччен судпа айӑпланнӑ, ун чухне те вӑрланипе ҫакланнӑ.

Виҫӗ турӑша вӗсен машининче тупнӑ. Кусене 2 пин европа сутма шутланӑ. Ытти турӑшсене те тупнӑ.

Шупашкар тата Чӑваш Ен митрополине Улан-Удэри тата Бурят Республикинчи Савватий митрополит ертсе пыма тытӑнӗ.

Аса илтерер: 89 ҫулти Варнава митрополит кӑҫалхи утӑ уйӑхӗн 1-мӗшӗнче вилнӗччӗ.

Савватий (Сергей Геннадьевич Антонов) Шупашкарта ҫуралнӑ. Вӑл Кӑнтӑр поселокӗнчи 3-мӗш вӑтам шкулта вӗреннӗ. Хӗсметре пулнӑ. 1989 ҫулта вӑл манах пулса тӑнӑ. Ҫав ҫулах Шупашкарти Введени чиркӗвӗнче ӗҫлеме пуҫланӑ. Унӑн ашшӗ Геннадий Антонов та чиркӳре ӗҫленӗ. 1993 ҫулта Савватий Антонов арҫынсен Шупашкарти мӑнастирне ертсе пыма тытӑннӑ. Юлашки ҫулсенче Бурят Республикинче ӗҫлесе пурӑннӑ.

ptzgovorit.ru сайтри сӑн

Вӑрнар районӗнче пурӑнакан 29 ҫулти арҫын тӑван мар пӗчӗк ывӑлне тӑтӑшах хӗненӗ. Ун тӗлӗшпе РФ Следстви комитечӗ пуҫиле ӗҫ пуҫарнӑ.

Следстви версийӗ тӑрӑх, кӑҫал ҫӗртме-утӑ уйӑхӗсенче ҫак арҫын, Хирпуҫ ялӗнче пурӑнаканскер, пӗрле пурӑнакан хӗрарӑмӑн пӗчӗк ывӑлне хӗненӗ. Ҫав самантсене вӑл ӳсӗр пулнӑ.

Арҫын 5 ҫулти арҫын ачана аллипе ҫапнӑ, урипе тапнӑ. Халӗ судпа медицина экспертизи ирттереҫҫӗ. Следователь вара арҫынна следстви вӑхӑтӗнче ирӗксӗр хӑварас ыйтӑва татса парать.

ШӖМ тунӑ сӑн

19 ҫулти каччӑна унччен правасӑр хӑварнӑ. Вӑл вара руль умне ларнӑ. Ҫитменнине, ӳсӗр пулнӑ.

Ҫурла уйӑхӗн 21-мӗшӗнче Улатӑрти полици уйрӑмне 25 ҫулти хӗрарӑм пынӑ. Унӑн «Лада Калина» машинине вӑрланӑ-мӗн. Ҫак ӗҫе кам тума пултарнине те чухланӑ вӑл: тусӗн 19 ҫулти пӗлӗшӗ. Лешӗ уҫҫине ыйтмасӑрах илнӗ.

Руль умне правасӑр, ӳсӗр ларнӑ каччӑна ҫийӗнчех тупнӑ. Куншӑн ӑна уголовлӑ майпа явап тыттарма пултараҫҫӗ. Вӑл руль умне унччен те ӳсер ларни пулнӑ.

Каччӑ тӗлӗшпе пуҫиле ӗҫ пуҫарнӑ. «Лада Калина» машинӑна вара ятарлӑ стоянкӑна ӑсатнӑ.

Кӑшӑлвируспа ҫыхӑннӑ чару мерисене пирӗн республикӑра тата ҫемӗҫтерме йышӑннӑ. Республика Элтеперӗн тивӗҫӗсене вӑхӑтлӑх пурнӑҫлакан Олег Николаев суту-илӳ центрӗсене тата урамри аттракционсене уҫма ирӗк панӑ.

Халӗ 800 тӑваткал метртан пысӑкрах суту-илӳ точкисене уҫма юрать. Апла пулин те вӗсен эпидемие хирӗҫ мерӑсене пӑхӑнмалла тата дезинфекци пирки манмалла мар.

Суту-илӳ залӗнче пӗр тӑваткал метр пуҫне 1 ҫынтан ытла пулмалла мар. Лавккасене маскӑпа ҫӳремелле. Суту-илӳ точкисене кӗнӗ ҫӗрте алла микробсемпе вируссенчен сиенсӗрлетме антисептик пулмалла.

Ҫӗрпӳ районӗнче 17 ҫулти хӗрсем вӑрманта ҫухалса кайнӑ. Юрать-ха, вӗсене тупнӑ. Халӗ вӗсем ашшӗ-амӑшӗ ҫумӗнче.

Ҫурла уйӑхӗн 19-мӗшӗнче велосипедпа ярӑнакан икӗ хӗр кану бази ҫывӑхӗнче пулнӑ. Вӗсем ку тӑрӑха лайӑхах пӗлмен. Телефонӗсем те тытман. Каҫхине 9 сехет ҫурӑра хӗрсем пӗрлехи диспетчер службине шӑнкӑравласа ҫитнӗ.

ШӖМӗн Ҫӗрпӳ районӗнчи уйрӑмӗн полицескийӗсене тревогӑпа тӑратнӑ. Вырӑнти халӑх та шырава хутшӑннӑ. Тепӗр икӗ сехетрен пӗр ҫын хӗре вӑрманта шыраса тупнӑ. Ҫамрӑксемпе йӑлтах йӗркеллӗ пулнӑ. Ашшӗ-амӑшӗ шырава хутшӑннӑ ҫынсене тав тунӑ.

«Хыпар» издательство ҫуртӗнче ӗнер Мускаври специалист семинар ирттернӗ. Ӑсталӑх сехетне «IMHO» компанин (вӑл Рунетра реклама сутассипе рынокра хӑйӗн шанчӑклӑ вырӑнне тупнӑ) суту-илӳ пайӗн пуҫлӑхӗ Ольга Антонова килсе ҫитнӗ.

Мускаври специалист хаҫатсене, сайта тата тӗнче тетелӗнчи халӑх ушкӑнӗсене реклама илӗртмелли вӑрттӑнлӑхсене уҫӑмлатнӑ. Журналистсемпе реклама менеджерӗсем ҫӗннине, кӑсӑклине нумай пӗлме пултарнӑ. Вӗсем хӑйсене кӑсӑклантаракан ыйтусене те уҫӑмлатнӑ.

Ольга Антонова – чӑваш хӗрӗ. Патӑрьел районӗнче ҫуралнӑскер темиҫе ҫул каяллах Мускавра тӗпленнӗ. Хӑй вӑхӑтӗнче вӑл Чӑваш патшалӑх университетӗнче журналистика факультетӗнче вӗреннӗ.