yur-gazeta.ru сайтри сӑн

Пермь крайӗнче ҫуралса ӳснӗ хӗрарӑм Чӑваш Енре тахҫантанпах пурӑнать. Унӑн 18 ҫул тултарман 3 ача пур. Анчах вӑл вӗсене пӑхмасть, хӑй те этем ретле пурӑнмасть. Ӗс вырӑнӗ те ҫук унӑн. Ҫавна май унран ачисене туртса илнӗ.

40 ҫулти хӗрарӑмӑн вӗсемшӗн алимент тӳлемелле. Анчах вӑл ку тивӗҫе пурнӑҫламасть.

Суд ҫав хӗрарӑма 60 сехет ӗҫлеттерме йышаннӑ. Кунсӑр пуҫне унӑн ачисене уйӑхсерен 9900 тенке яхӑн тӳлесе тӑма тивӗ.

"Ачасемшӗн пӑшӑрхама кирлӗ мар. Вӗсене опекунсем хӑйсен ҫемйине илнӗ", - ҫапла каланӑ 3 ача амӑшӗ.

fotokto.ru сайтри сӑн

Сӗнтӗрвӑрринче пурӑнакансене сарӑ нӑрӑ тарӑхтарса ҫитернӗ. Кун пирки «Про Город» хаҫат редакцине Ольга Серебрякова пӗлтернӗ. Вӑл каланӑ тӑрӑх, хула ҫыннисене нӑрӑсем 5 ҫул канлӗ пурӑнма памаҫҫӗ.

«Нӑрӑсем йӑлтах ҫисе яраҫҫӗ: улмуҫҫисене, чие, слива йывӑҫҫисене. Вӗсенчен тухӑҫ илесси ҫук ӗнтӗ. Унччен 10 минутра пӗр нӑрӑ ҫеҫ вӗҫсе иртнӗ тӗк халӗ каҫсерен урама тухма ҫук. Ҫынсем тахҫанах кӑмӑлсӑрланаҫҫӗ, анчах усси ҫук», — пӗлтернӗ хӗрарӑм.

Ольга каланӑ тӑрӑх, нӑрӑсене наркӑмӑш сапса вӗлернин те усси ҫук. Хӑшӗ-пӗри ҫеҫ вилет, теприсем вара пурпӗрех вӗҫеҫҫӗ.

odnaminyta.com сайтри сӑн

Арҫын ҫынна вӗлерессипе хӑратнӑшӑн ҫирӗп режимлӑ колонире 10 уйӑх ирттерӗ.

Суд палӑртнӑ тӑрӑх, ку пӗлтӗр раштав уйӑхӗн 31-мӗшӗнче Пӑрачкав районӗнчи Антипинка ялӗнче пулнӑ. Сехет 12 хут шакиччен 10 минут маларах хайхи арҫын тарӑхнӑ, кӑшкӑрашнӑ. Вӑл ҫӗҫӗ ярса тытса хӗрарӑма вӗлерессипе хӑратнӑ. Лешӗ хӑраса кайнӑ.

Судра арҫын айӑпне йышӑннӑ, преступлени тунӑшӑн ӳкӗннӗ.

"Росгварди" архивӗнчи сӑн

Росгвардин Чӑваш Енри управленийӗн ӗҫченӗсем каҫхине Канаш хулинче хӑйсен ӗҫне пурнӑҫланӑ чухне хӗре йӑнӑш утӑм тӑвасран хӑтарнӑ.

Полици прапорщикӗ Виталий Степанова тата полицин кӗҫӗн сержанчӗ Максим Иванов ҫав кун Канашри Чукунҫул урамӗнче патруле тухнӑ. Хайхискерсем кӗпер ҫинче макӑракан хӗре асӑрханӑ. Вӑл перилӑсен хӗрринчех тӑнӑ

Пакунлисем хӗре кӗпер хӗрринчен туртса илнӗ. Патрульнӑйсем ҫийӗнчех васкавлӑ медпулӑшу чӗннӗ. Тухтӑрсем киличчен вӗсем хӗре лӑплантарнӑ. Кайран хӗре тухтӑрсем пулӑшу панӑ.

Кӑҫал Республика кунӗнче фейерверксен фестивальне ирттерӗҫ. Кӑшӑлвирус пандемине пула "Асамат" фестиваль икӗ ҫул иртменччӗ.

Фестиваль яланхи пекех ҫӗртме уйӑхӗн 24-мӗшӗнче 23 сехетре пулӗ. Кӑҫал унта икӗ организаци кӑна хутшӑнма кӑмӑл тунӑ: Шупашкарти "Пирснаб-Поволжье" тата Алма-Атари "Номанд Арт Казахстан".

Палӑртса хӑварар: кӑҫал фестиваль 13-мӗш хут иртӗ.

cheb-centr.soc.cap.ru сӑнӳкерчӗкӗ

Чӑваш Енӗн тӗп хулинче «Эткер» ятлӑ ача-пӑча уйлӑхӗ уҫӑлнӑ. Вӑл Шупашкарти халӑха социаллӑ пулӑшу паракан комплекслӑ центрта ӗҫлет. Уйлӑхӑн пӗрремӗш сменинче йывӑр лару-тӑрури ҫемьесенчи 30 ача хӑйӗн сывлӑхне ҫирӗплетӗ.

Социаллӑ учрежденире пӗлтернӗ тӑрӑх, ҫӗртме уйӑхӗн 1-мӗшӗнче уҫӑлнӑ уйлӑхра ачасем кӑнтӑрла канаҫҫӗ. Тепӗр майлӑ каласан, ирпе килеҫҫӗ те куна вӗсем центрта ирттереҫҫӗ.

Ачасем валли аслисем кӑсӑклӑ тӗрлӗ программа хатӗрленӗ. Мероприятисен тӗп теми — чӑваш халӑхӗн мухтавлӑ историйӗпе тата ҫыннисемпе паллаштарасси. Ҫавна тӗрлӗ вӑйӑ, конкурс, тупмалли юмахсем урлӑ ачасем патне ҫитерӗҫ.

"Лиза Алерт" сайтри сӑн

Ҫӗнӗ Шупашкарта 21 ҫулти хӗр ҫухалнӑ. Выркина Дарья Андреевна килтен ӗнер, ҫӗртмен 1-мӗшӗнче, тухса кайнӑ та таврӑнман. Кун пирки "Лиза Алерт" шырав отрячӗ пӗлтерет.

Килтен кайнӑ чухне вӑл ҫутӑ тӗслӗ сӑран куртка, хура джинс шӑлавар, хура футболка, кӗрен кроссовка тӑхӑннӑ пулнӑ. Хӑй 165 сантиметр ҫӳллӗш, вӑтам кӗлеткеллӗ, ҫӳҫӗ тӗттӗм, куҫӗ хӑмӑр тӗслӗ.

Дарьйӑна куракансене 8 800 700 54 52 е 112 номерпе шӑнкӑравлама ыйтаҫҫӗ.

it-tehnik.ru сайтри сӑн

Аслӑ шкулта вӗренекен студентка практика тухмалли вырӑн шыраса ултавҫӑсен тӗлне лекнӗ. Ҫав ҫынна тупнӑ. Ӑна Чӗмпӗрте тытса чарнӑ.

5-мӗш курсра ӑс пухакан хӗр пӗлтӗр раштав уйӑхӗнче полицие пырса заявлени ҫырнӑ. Вӑл тӗнче тетелӗнче практика вырӑнӗ шырани пирки пӗлтерӳ вырнаҫтарнӑ.

Пӗр ҫын шӑнкӑравласа вырӑн сӗннӗ. Анчах куншӑн 3200 тенкӗ ыйтнӑ. Студентка укҫа куҫарса парсан тин ултавҫӑ серепине лекнине ӑнланнӑ.

Чӗмпӗрте пурӑнакан 21 ҫулти каччӑна тытса чарнӑ. Вӑл укҫана пӗлӗшӗн карточки ҫине куҫарттарнӑ. Хӑйӗн валли тӗнче тетелӗнче нумай страница уҫнӑ-мӗн.

htinfosmi.net сайтри сӑн

Эрех ан ӗҫ, сӗт ӗҫ. Паян ҪҪХПИ ӗҫченӗсем водительсене чарсан калаҫӑва ҫапла пуҫланӑ. Унтан тин документсене ыйтнӑ.

Ку профилактика акцийӗ иртнӗ ытларикун пуҫланнӑ. Инспекторсем эрнере пӗрре машина нумай ҫӳрекен вырӑна тухаҫҫӗ. Руль умне ӳсӗрле ларни мӗн патне илсе ҫитерет? Куншӑн мӗнле явап тыттараҫҫӗ? Инспекторсем ҫак ыйтусене параҫҫӗ те водителе пӗр кӗленче сӗт тыттараҫҫӗ.

Ку акцие ҫул ҫинче ӳсӗрле ҫӳрекен водительсен йышне чакарас тӗллевпе ирттереҫҫӗ.

Сӑмах май, кӑҫал инспекторсем 400 яхӑн ӳсӗр водителе чарнӑ.

smartik.ru сайтри сӑн

Ҫӗртме уйӑхӗн 1-мӗшӗнчен Раҫҫейре пӗр уйӑхра пурӑнма кирлӗ укҫан виҫи ӳсет. Чӑваш Енре мӗн чухлӗ пулӗ вӑл?

Виҫе 10 процент хӑпарӗ. Пурӑнма кирлӗ виҫе ӳссен ытти социаллӑ тӳлев те хӑпарӗ: пӗрремӗш ачашӑн паракан тӳлев, 3-7 тата 8-17 ҫулсенчи ачасемшӗн паракан пособи, соцконтрактпа килӗшӳллӗн паракан патшалӑх пулӑшӑвӗ.

Ку улшӑнусем республикӑри 90 пин ҫемьене пырса тивӗҫ, ҫав шутра - 114 пине яхӑн ача. Ҫавӑн пекех ҫитес уйӑхран чи пӗчӗк шалу, пенси виҫи ӳсӗ.