РИА Новости архивӗнчи сӑн

Паян Раҫҫей тӗп банкӗн директорӗсен ларӑвӗ иртнӗ. Тӗп ставкӑна каллех ӳстернӗ – 19 процента ҫитернӗ.

Аса илтерер: пӗлтӗр раштав уйӑхӗнче Тӗп банк тӗп ставкӑна 16 процент таран хӑпартнӑ. Кӑҫал утӑ уйӑхӗнче каллех ӳстернӗ: 18 процент тесе палӑртнӑ. Халӗ ав тепӗр 1 процент хӑвартнӑ.

Раҫҫей тӗп банкӗн директорсен канашӗн тепӗр ларӑвӗ юпа уйӑхӗн 25-мӗшӗнче иртӗ.

news.rambler.ru сайтран илнӗ сӑнӳкерчӗк

Google компани Раҫҫей ҫыннисене Раҫҫей номерӗсемпе Google-аккаунт йӗркелеме чарнӑ. Ҫакна «Эксплойт» Телеграм-канал асӑрханӑ.

Асӑннӑ канал авторӗсем пилӗк номерпе те аккаунт йӗркелеме хӑтланса пӑхнӑ. Кашнинчех «Этот номер нельзя использовать для подтверждения» (чӑв. Ҫирӗплетме ку номерпе усӑ курма май ҫук), — тесе асӑрхаттаракан ҫыру килнӗ. Ҫакӑ , тен, техника пӑтӑрмахӗпе ҫыхӑнма пултарнӑ тесе шухӑшлаҫҫӗ. Тӗнче тетелӗнче ҫавӑн пирки пӗлтерекенсем нумай-мӗн

Кӑҫалхи ҫӗртме уйӑхӗн пуҫламӑшӗнче АПШра Раҫҫейре программӑсемпе тата IT-пулӑшупа усӑ курма чарма йышӑннӑ. Чару уйрӑм ҫынсене те пырса тивет.Чару авӑн уйӑхӗн 12-мӗшенче вӑя кӗмелле. Google BigQuery сервиса авӑн уйӑхӗн 9-мӗшӗнчен чарса лартассине пӗлтернӗ, Miro платформа та авӑн уйӑхӗн 12-мӗшенчен ӗҫлеме пӑрахӗ.

bronk.club сӑнӳкерчӗкӗ

Пирӗн ҫӗршывра пурӑнакан ҫамрӑк хӗрарӑмсем ҫемье ҫавӑриччен карьера тӑвасшӑн. Ҫакӑн пек шухӑшлине патшалӑхӑн влаҫ органӗсенче ӗҫлекенсем те палӑртаҫҫӗ-мӗн. Кун пирки ВЦИОМ фончӗн гендиректорӗ Константин Абрамов Тухӑҫ экономика форумӗн сессийӗнче палӑртса хӑварнӑ.

«Эпир ҫамрӑксемпе ӗҫлекен агентствӑн (кунта Росмолодежь пирки сӑмах пырать. — Т.Т. асӑрхаттарӑвӗ) форумне кайсан та унта ҫамрӑк, хитре хӗрсемпе хӗрарӑмсем ӗҫленине асӑрхатпӑр. Вӗсен ҫемйи, ачи-пӑчи ҫук, вӗсем ӗҫе йытӑпа пыраҫҫӗ. Маларах ӗҫе ача илсе пыратчӗҫ, вӑл йӗркеллӗ пулӑмччӗ. <...> Эсир, тӳре-шарасемпе бюрократсем, Раҫҫейри улшӑнӑва туса ирттерекенсем, сирӗн хӑвӑрӑн тӗслӗх кӑтартмалла», — тенӗ Абрамов.

"Контактри" сӑн

Сарӑту хулинче 150 метр тӑршшӗ граффити стена пуласси пирки пӗлтернӗччӗ. Халӗ унта Шупашкарти ӗлӗкхи храмсен, Анне палӑкӗн тата ытти паллӑ вырӑнӑн мӗлкисене курма пулать.

Аса илтерер: граффити стена ҫине Атӑлҫи тӑрӑхӗнчи 14 регионти тата Китайри ултӑ провинцири паллӑ вырӑнсене сӑнланӑ. Ку ӗҫе пирӗн ентеш те Лилия Яковлева хутшӑннӑ.

Елена Осипова страницинчен илнӗ сӑнӳкерчӗк

Шупашкарта пурӑнакан 7 ҫулти купӑсҫӑ Артем Осипов «Лучше всех!» телекӑларӑма хутшӑнассине Чӑваш халӑх сайчӗ унччен пӗлтернӗччӗ-ха. Аса илтерер: ачана пуш уйӑхӗнче ӳкернӗ. Кӑларӑм эфира ҫурла уйӑхен 24-мӗшӗнче тухнӑ.

Арҫын ачана виҫҫӗре чухнех музыка инструменчӗпе кӑсӑклантарса яма пултарнӑ аслисем. Ачан талпӑнӑвне кура амӑшӗ, Елена Осипова, ҫав енӗпе вӗрентес тенӗ.

t.me/PRoddigital сӑнӳкерчӗкӗ

RuStore хӑш ҫулти ҫынсем мобильлӗ приложенисем валли ытларах тӑкакланнине тишкернӗ.

Ку енчен Z ӑрурисем — 18 ҫултан пуҫласа 27 ҫулчченхи ҫамрӑксем — уйӑхне вӑтамран 1026 тенкӗ тӑкаклаҫҫӗ иккен. Ку вӑл миллениалсенчен (28-43 ҫултисем) 18 процент нумайрах.

Мобильлӗ контент валли X ӑрурисем (44-60 ҫултисем) вӑтамран 976 тенкӗ пӗтереҫҫӗ.

Ҫынсенчен ытларахӑшӗ пуҫватмӑшсене кӑмӑллать. Вӗсене X ӑрурисем ытларах юратаҫҫӗ. X ӑрурисемпе миллениалсем сӗтелҫи вӑййа тата карта вӑййине суйлаҫҫӗ, зумерсем — шутерсем тата симуляторсем.

runews24.ru сайтри сӑн

Питӗрти Пулково аэропортӗнче Шупашкара вӗҫекен самолет пирки виҫӗ чӗлхепе пӗлтерме тытӑннӑ: вырӑсла, акӑлчанла тата чӑвашла.

Вырӑсла ҫапла янӑраттараҫҫӗ: малтан пассажирсене самолета ларма паспорт тата талон хатӗрлеме ыйтаҫҫӗ, кайран вара чӑвашла Питӗре килнӗшӗн тав туса калаҫҫӗ.

Сӑмах май, Шупашкартан Питӗре «Победа» авиакомпанин самолечӗсем вӗҫеҫҫӗ. Рейссем – тунтикун, юнкун, кӗҫнерникун, эрнекун тата вырсарникун. Шупашкартан самолет 15 сехет те 5 минутра вӗҫет, Питӗртен – 12 сехет те 45 минутра. Икӗ сехетрен пассажирсем вырӑнта пулаҫҫӗ.

"Контактри" сӑн

Кӗҫех «Россия 1» телеканалпа «Классная тема!» шоу виҫҫӗмӗш сезонне уҫӗ. Унта хутшӑнакансене суйланӑ ӗнтӗ. Вӗсен йышӗнче пирӗн ентеш те Петр Михеев пур, вӑл Шупашкарти 2-мӗш лицейре истори предметне вӗрентет.

Телешоуна педагогсен сумне ӳстерес, чи лайӑххисене кӑтартас тӗллевпе ирттереҫҫӗ. Ку сезонра 6500 заявка килнӗ. Чи кеҫӗнни - 21 ҫулта, чи асли 77-ре пулнӑ. Комисси ҫурма финал валли 35 педагога суйланӑ. Шӑпах ҫавӑнта лекнӗ Петр Павлович.

Проектра хӑйӗн предмечӗн материалне ӑнланмалла тата интереслӗ каласа кӑтартакан вӗрентекен ҫӗнтерӗ. Унӑн парне пулӗ: федераци каналӗнче автор вӗренӳ шоуне кӑтартӗ.

Паян пирӗн ҫӗршыври экономикӑна ИТ-специалистсем питех те кирлӗ. Ҫавна шута илсе патшалӑх вӗсене ҫӑмӑллӑхлӑ ипотекӑпа пулӑшма йышӑннине Чӑваш халӑх сайчӗ унччен пӗлтернӗччӗ-ха. ИТ-специалистсене паракан ҫӑмӑллӑхлӑ ипотека вӑхӑтне 2023 ҫулччен тӑснӑ. Ӑна ҫӗнӗ условипе ҫитес ҫулхи ҫуола уйӑхӗнчен пама тытӑнӗҫ.

Ҫӑмӑллӑхлӑ ипотекӑн чи пысӑк ставки ҫулталӑкра 6 процент таран пулӗ. Кредитӑн чи пысӑк виҫи – 9 миллион тенкӗ таран. Регионсенчи тата банксенчи программӑсемпе килӗшӳллӗн ҫав ставкӑна татах пӗчӗклетме пултарӗҫ.

Программа 18 ҫултан пуҫласа 50 ҫулчченхисене пырса тивӗ.

«Раҫҫейри ҫулталӑк йывӑҫӗ» сасӑлав вӗҫленнӗ. Шел те, хальхинче чӑваш юманӗ малти вырӑна йышӑнайман.

Сасӑлава Ҫӗмӗрлери культурӑпа кану паркӗнче ӳсекен Аслӑ Петӗр юманӗ хутшӑннӑ. Вӑл 2975 сасӑ пухса тӑваттӑмӗш вырӑна йышӑннӑ. Юман 350 ҫул ӳсет, вӑл 32 метр ҫӳллӗш.

Кӑҫал сасӑлавра пӗрремӗш вырӑна Ростов облаҫӗнчи юман йышӑннӑ. Иккӗмӗшпе виҫҫӗмӗш вырӑнсене Белгород облаҫӗнчи тата Ӗпхӳри юмансем пайланӑ.