Арҫын ача строительство хатӗрӗсемпе выляса чутах шар курман. Ӑна Чӑваш Енри ҫӑлавпа шырав службин ӗҫченӗсем пулӑшнӑ.
Ачана пулӑшу кирли пирки авӑн уйӑхӗн 6-мӗшӗнче шӑнкӑравласа пӗлтернӗ. Вӑл капрон лента-хӑмӑта алли ҫине тӑхӑнтарнӑ. Кӑштахран вӑл хӗснипе алли шыҫӑнма пуҫланӑ.
Ҫӑлавҫӑсем вырӑна ҫитсен лентӑна ятарлӑ хатӗрпе татнӑ. Вӗсем ачан аллине амантас мар, ӑна ыраттарас мар тесе питӗ асӑрханса ӗҫленӗ.
Шыва кӗмелли сезон вӗҫленнӗ. Инкеклӗ лару-тӑру патшалӑх комитечӗ кӑҫалхи ҫулла мӗнле иртнине пӗтӗмлетнӗ.
Ҫулла ҫӑлавҫӑсем шыв объекчӗсене 43 хутчен ҫитнӗ. Вӗсем шывра шар курнӑ 46 ҫынран 24-шне ҫӑлнӑ. Шел те, 27-шӗн пурнӑҫӗ татӑлнӑ. Тӑваттӑшӗ ача пулнӑ.
Ҫӑлавҫӑсем ҫынсене кӑна мар, чӗрчунсене те ҫӑлнӑ. Тӗслӗхрен, коллектора кӗрсе ӳкнӗ кӑвакал чӗпписене, джакузи ваннӑйӗнче хӗсӗнсе ларнӑ кушак аҫине пулӑшнӑ.
Шупашкарти пӗрисем сапборд ҫинче Атӑла чутах кайман.
Республикӑн шыравпа ҫӑлав службинче пӗлтернӗ тӑрӑх, инкеке икӗ ҫын лекнӗ. SUP-борд ҫине хӑпарса тӑнӑскерсене юханшыв юххи карапсем ҫӳрекен ҫул ҫине илсе кайма тытӑннӑ.
Инкеке лекме пултарнӑ ҫынсене ҫӑлавҫӑсем пулӑшнӑ — ҫыран хӗррине илсе тухнӑ. Тата, паллах, профилактика тӗллевӗпе калаҫу ирттернӗ май сапборд ҫинче мӗнле ярӑнмаллине, мӗн тусан мӗн пулса тухассине ӑнлантарса панӑ.
Чӑваш Енри ҫӑлавҫӑсем ӗнер, ҫурла уйӑхӗн 18-мӗшӗнче, кӳршӗ Чулхула облаҫне вӑрманти пысӑк пушара сӳнтерме кайнӑ. Пӗтӗмпе 45 ҫын, 8 техника ҫула тухнӑ.
Воротынец районӗнчи пушар ҫурла уйӑхӗн 15-мӗшӗнче пуҫланнӑ. Ҫуннӑ лаптӑк 3300 гектара ҫитнӗ. Хальхи вӑхӑтра 800 гектар ҫунать. Ҫулӑм кӳршӗ Мари Элти вӑрман ҫине те куҫнӑ. Унта 300 гектар вӑрман ҫунма пуҫланӑ.
Ҫӑлавҫӑсем пӗлтернӗ тӑрӑх, хальхи вӑхӑтра ҫулӑм ялсене ҫитес хӑрушлӑх ҫук.
Чӑваш Енри полицейскисем пулӑсене сыхлакан инспекторсемпе пӗрле путма пуҫланӑ ҫынна ҫӑлнӑ.
Утӑ уйӑхӗн пуҫламӑшӗнчех пулнӑ ку. Паттӑрлӑхӗ пирки вара паян тин тӗнче тетелӗнче хыпар сарӑлнӑ. Сергей Ежовпа Сергей Кондратьев Куйбышев шыв управӗнче катерпа патрульте пулнӑ. Унччен те пулмасть – вӗсем ҫыранран 10 метр аяккарах ҫын темле хӑлаҫланса ишнине асӑрханӑ. Хушӑран шыв айне те кайнӑ, аллине ҫӳлелле ҫӗкленӗ.
Инспекторсем часрах ун патне вӗҫтернӗ. Хайхискерсем путма пуҫланӑ ҫынна ҫыран хӗррине илсе тухнӑ, васкавлӑ медпулӑшу чӗннӗ.
Шупашкарта пурӑнакансем Республикӑн шыравпа ҫӑлав службинчен сӑпсасемпе вӗлле хурчӗсенчен хӑраса кӑҫал пӗрре кӑна мар шӑнкӑравланӑ. Нумаях пулмасть хулари Гастелло урамӗнчи тата Эгер бульварӗнчи ҫуртсене асӑннӑ хурт-хӑмӑр иленнӗ. Вӗсем хваттерсен чӳречи патне йӑва ҫавӑрнӑ.
Ҫӑлавҫӑсем вырӑна ҫитсе йӑвасене пуҫтарса кайнӑ та вӑрмана илсе кайса янӑ.
Сӑпсасемпе вӗлле хурчӗсем ӑшӑ вырӑнсене юратаҫҫӗ, ҫавӑнпа вӗсем ҫурт-йӗр патӗнче йӑва ҫавӑраҫҫӗ тесе пӗлтереҫҫӗ специалистсем.
Чӑваш Республикин Шыравпа ҫӑлав службин специалисчӗсен темле лару-тӑрӑва лекнӗ ҫынсене те пулӑшма тивет. Тепӗр чухне килти чӗрчунсене те ҫӑлавҫӑсем пулӑшни кирлӗ пулса тухать.
Утӑ уйӑхӗн 29-мӗшӗнче Шупашкарти Трактор тӑвакансен проспектӗнчи пӗр ҫуртра пурӑнакансем ванна пӳлӗмӗнче кушак джакузи айне кӗрсе кайнине пӑлханса пӗлтернӗ. Мӗнтарӑн чӗрчунӗ каялла тухасшӑн иккен, анчах пултараймасть.
Ҫӑлавҫӑсем кушака пулӑшма тухса кайнӑ. Джакузи айӗнчен туртса кӑларнӑ кушак хӑй ҫӑлӑннишӗн питех те савӑннӑ тесе ӗнентереҫҫӗ ҫӑлавҫӑсем.
Утӑ уйӑхӗн 31-мӗшӗнче «Ҫӗмӗрле» ҫӑлав службине васкавлӑ хыпар ҫитнӗ: вӑрманта хӗрарӑмпа ача ҫухалса кайнӑ. Кун пирки район администрацийӗн ӗҫченӗсем шӑнкӑравласа пӗлтернӗ.
Ҫӑлавҫӑсем вырӑна часах тухнӑ. Хӗрарӑмпа ача Пинер поселокӗ ҫывӑхӗнче ҫухалса кайнӑ. Юрать-ха, ҫӑлавҫӑсем вӗсене хӑвӑртах тупнӑ.
Аса илтерер: нумаях пулмасть Улатӑр районӗнчи Кивӗ Эйпеҫре 72 ҫулти хӗрарӑм ҫырлана кайсан ҫухалнӑччӗ. Телее, ӑна тепӗр кунхине тупнӑ: вӑл чӗрӗ-сывах.
Паян, утӑ уйӑхӗн 27-мӗшӗнче, ҫӗрле, ҫурҫӗр тӗлӗнче, Чӑваш Республикин Шыравпа ҫӑлав службине Шуашкарти ҫуртсенчен пӗрин ҫивиттийӗ ҫинче ҫара арҫын ҫӳрени пирки пӗлтерекен тупӑннӑ.
Ҫара арҫын Шупашкарти Миттов бульварӗнчи ҫурт ҫивиттийӗ ҫинче пулнӑ. Вӑл хӑйне йӗркеллӗ тытман.
Арҫынна куракансем вӑл персе анасран хӑранӑ, ҫавӑнпа ҫӑлавҫӑсем патне шӑнкӑравланӑ. Специалистсем ун патне пусма тӑрӑх хӑпарса кайнӑ, альпинист снаряженийӗпе ҫыхса арҫынна ҫивитти ҫинчен антарнӑ. Унтан ӑна полици ӗҫченӗсен аллине панӑ.
Ҫӗнӗ Шупашкарта пляжа хирӗҫ, Атӑлта, матрассем ҫинче пыракан хӗрарӑмпа виҫе ачана шыв юххи илсе кайнине ҫынсем асӑрханӑ. Вӗсемех ҫӑлавҫӑсене чӗннӗ.
Ку ӗнер, утӑ уйӑхӗн 25-мӗшӗнче, пулнӑ. Ҫӑлавҫӑсем моторлӑ кимӗпе вырӑна хӑвӑртах ҫитнӗ. Икӗ матрас ҫинче хӗрарӑм тата 18 ҫул тултарман 3 ҫамрӑк пулнӑ.
Ҫӑлавҫӑсем вӗсене кимӗ ҫине лартса ҫыран хӗррине илсе тухнӑ. Юрать-ха, никам та шар курман.
-7.7 °C