Раштавӑн 24-мӗшӗнче 23 сехет те 29 минутра Шупашкарти Лумубма урамӗнче «Тойота» водителӗ урӑх водитель унӑн килӗ умӗнче (лешӗ унта пурӑнмасть) машина лартнӑшӑн кӑмӑлсӑрланнӑ.
Хайхискер тарӑхса кайнипе ӑна тӗксе янӑ, унтан кӗреҫепе кӗрслеттернӗ. Лешӗн кӗлетки ҫинче кӑвак вырӑнсем юлнӑ. Вӑл полицие кайса заявлени ҫырнӑ. Анчах участковӑй пуҫиле ӗҫ пуҫарман, ҫапакан ҫынна палӑртайман, унран ыйтса пӗлмен имӗш.
Хур тӳснӗ арҫын прокуратурӑран пулӑшу ыйтнӑ. Ведомство ку ыйтӑва полицин 2-мӗш уйрӑмне ярса панӑ. Паян полици ку материал тӗлӗшпе тӗрӗслев ирттерессине пӗлтернӗ.
Шупашкарпа Ҫӗнӗ Шупашкар хушшинче 100-мӗш маршрутпа троллейбус ҫӳрени пирки сайтра хыпарласах тӑтӑмӑр. Халӗ лару-тӑру мӗнлерех-ха?
Ку ыйтӑва Шупашкар хула администрацийӗнче иртнӗ планеркӑра ҫӗкленӗ. Аса илтерер: троллейбус пӗр уйӑх каялла ҫӳреме тытӑннӑ. Ҫак тапхӑрта вӑл 18,8 пин пассажира илсе ҫӳренӗ. Вӑтамран пӗр рейсра 56 пассажир ларнӑ. Пӗтӗмпе 427 пин тенкӗ тупӑш кӗнӗ. Анчах тӑкакӗ нумайрах – 790 пин тенкӗ.
Тӑкак ан пултӑр, пассажирсем ытларах ҫӳреччӗр тесе ҫак маршрут ҫинче ятарлӑ проездной тӑвасшӑн. Вӑл 900 тенкӗ тӑрӗ, унпа 60 хутчен кайма май пулӗ. Ку билетпа 100-мӗш маршрутпа ҫеҫ ҫӳреме май пулӗ.
Олимп резервӗсен 2-мӗш спорт шкулӗнче фристайл уйрӑмӗнче ӑсталӑхне туптакан Лана Прусакова тата Дмитрий Мулендеев каллех ҫитӗнӳпе савӑнтарнӑ. Вӗсем Польшӑра иртекен Европа Кубокӗнче ылтӑн медаль ҫӗнсе илнӗ.
Нарӑс уйӑхӗн 15-мӗшӗнче биг-эйр дисциплинӑпа ӑмӑрту иртнӗ. Дмитрий Мулендеев Швейцарири Эмиль Грабпа тата Финляндири Миик Виккипе тупӑшнӑ. Пирӗн ентеш вӗсене ҫӗнтерсе мала тухнӑ.
Лана Прусакова вара чи лайӑх кӑтартупа палӑрнӑ: 168.34. Раҫҫей спортсменки Ксения Орлова тата Украинӑри Диана Дьякова призерсем пулса тӑнӑ.
Кӑҫал пуш уйӑхӗнче Шупашкарти троллейбус управленийӗ каллех улшӑнусем тума палӑртнӑ. Паян администрацире иртнӗ планеркӑра пӗлтернӗ тӑрӑх, 20-мӗш маршрутпа ҫӳрекен троллейбуса «Ҫӗнӗ хула» микрорайона ҫити тӑсасшӑн.
Кун валли Марпосад ҫулӗ ҫинче кӑштах ӗҫсем туса ирттермелле. Ҫавна май 1 миллион тенкӗ кирлӗ.
Алексей Ладыков маршрута ака уйӑхӗн 1-мӗшӗччен тӑсма ыйтнӑ. Ҫапла майпа 20-мӗш троллейбус кӑнтӑр-хӗвеланӑҫ, ҫӗнӗ кӑнтӑр районӗсене, «Ҫӗнӗ хулана» ҫыхӑнтарӗ.
Палӑртмалла: микрорайонта пурӑнакансем ҫӗнӗ кӑнтӑр районӗ урлӑ тахҫанах троллейбус яма ыйтнӑ.
2018 ҫулхи ҫурла уйӑхӗнче Шупашкарта пурӑнакан хӗрарӑм ывӑлне ача ҫуртӗнче хӑварнӑ. Ҫак ҫӑмӑлах мар утӑма тума унӑн сӑлтавӗ пулнӑ: хӑй чирленӗ. Ҫавна пула вӑл ывӑлне пӑхайман. Ҫитменнине, ачан та сывлӑх енчен кӑлтӑксем пулнӑ.
Анчах амӑшӗ ывӑлӗ пирки манман, ун патне килсех тӑнӑ, сывлӑхӗпе интересленнӗ. Хӗрарӑм кӗҫех сывлӑхне ҫирӗплетнӗ, сипленнӗ.
Унтанпа ҫулалӑк иртнӗ. Халӗ амӑшӗпе ывӑлӗ пӗрле ӗнтӗ. Хӗрарӑм ӑна ача ҫуртӗнчен пӗр ҫултан илсе кайнӑ.
Нарӑс уйӑхӗн 15-мӗшӗнче каҫхине Шупашкарти Трактор тӑвакансен проспектӗнче, «Больница комплексӗ» чарӑнуран инҫех мар, васкавлӑ медпулӑшу водителӗ чутах ҫынна ҫапса хӑварман.
Чӑннипе, водитель ҫул урлӑ каҫакан ҫынна юлашкинчен ҫеҫ асӑрханӑ, руле пӑрса ӗлкӗрнӗ. Ара, ҫав ҫын ҫул урлӑ утса мар, тӑватӑ уран упаленсе каҫнӑ. Ҫав вӑхӑтра светофор хӗрлӗ ҫутатнӑ.
Телее, тӑватӑ уран упаленекен ҫын машина айне пулман. Кун хыҫҫӑн васкавлӑ медпулӑшу водителӗ чарӑннӑ.
Видеона такси пассажирки ӳкернӗ, ӑна тӗнче тетелне кӑларса хунӑ
Шупашкарта пурӑнакан 89 ҫулти Пимен Петров 81-мӗш ҫул йӗлтӗрпе ярӑнать. Унӑн йӗлтӗрӗ ахальли мар – совет-финн вӑрҫинче пулса курнӑскер.
Унӑн тӑванӗ ҫав вӑрҫӑра пулнӑ. Амансен яла таврӑннӑ. Вӑрҫӑ хирӗнчен амансан ӑна йӗлтӗрпе илсе тухнӑ. Шӑпах ҫав йӗлтӗре вӑл Пимена парнеленӗ. Тӑванӗ унпа ярӑнма пӗлмен, Пимена мӗн пӗчӗкрен вӗренме хушнӑ.
Шел те, Пименӑн тӑванӗ вӑрҫӑра вилнӗ, арҫын ача вара унӑн парнине куҫ пек упранӑ. Ӑна ҫӗннипе улӑштарма шухӑшламан та.
Пимен Петров «Йӗлтӗр йӗрне» виҫӗ ҫул хутшӑннӑ, ҫӑпата сырса йӗлтӗр тӑхӑннӑ. Кӑҫал вӑл ҫак йӗлтӗрпе сывпуллашӗ. Социаллӑ центр ҫӑпатапа йӗлтӗре музее пама ыйтнӑ. Ку ытти ватӑ ҫынна спортпа туслашма хавхалантарӗ. Ҫитес ҫул Пимен Петров ҫӗннине туянӗ.
Ҫӗнӗ йӗлтӗр туянсан Пимен Петров «Йӗлтӗр йӗрне» сахалтан та тепӗр 5 ҫул хутшӑнасшӑн.
Кӑрлач уйӑхӗн 17-мӗшӗнче Шупашкарта пурӑнакан хӗрарӑм ҫывӑрнӑ чухне асӑрхамасӑр пӗчӗк ачине вӗлернӗ. Амӑшӗ пӗчӗкскер ҫине хӑпарса выртнӑ, хӗрача сывлӑш ҫитменнине пула вилсе кайнӑ.
«Про Город» хаҫата халӑх корреспонденчӗ каласа кӑтартнӑ тӑрӑх, ача 3-4 уйӑхра ҫеҫ пулнӑ. Шел те, пӗчӗкскере ҫӑлса хӑварма май килмен.
РФ Следстви комитечӗ ку пӑтӑрмах чӑнах та пулнине ҫирӗплетнӗ. Кун тӗлӗшпе тӗрӗслев халӗ те пырать.
Спорт гимнастики енӗпе иртекен кӑҫалхи Тӗнче кубокӗн пӗрремӗш тапхӑрне Чӑваш Ен спортсменӗ те хутшӑнӗ. Ӑмӑртӑва кайма Шупашкарти олимп резервӗллӗ 6-мӗш спорт шкулӗнчи Владислав Поляшов тивӗҫнӗ. Вӑл — Раҫҫейӗн тӗнче класлӑ спорт мастерӗ.
Спорт гимнастики енӗпе тӗнче шайӗнче ӑмӑртма спортсменсем Австралири Мельбурн хулине пуҫтарӑнӗҫ. Тӗнче кубокӗн пӗрремӗш тапхӑрӗ нарӑс уйӑхӗн 15-мӗшӗнче пуҫланса 27-мӗшӗччен пырӗ.
Владислав Поляшов Раҫҫей командин йышӗнче ҫӗршыв чысне хӳтӗлӗ. Ӑмӑртӑва Ҫӗр чӑмӑрӗ ҫинчи чи вӑйлӑ атлетсем пухӑнӗҫ. Ентешӗмӗр пӗлтӗр те ҫитӗнӳпе пӗрре кӑна мар палӑрнӑччӗ. Владислав Поляшова спортри ҫитӗнӳшӗн Раҫҫей Президенчӗ Владимир Путин саламлӑ телеграммӑпах хавхалантарнӑччӗ.
Шупашкарти Иван Яковлев проспектне хупӗҫ. Кун пирки Шупашкар хула администрацийӗнче пӗлтернӗ. Асӑннӑ проспекта юсаса ҫӗнетекен подряд организацийӗ асӑннӑ ҫул ҫинчи участокпа машинӑсене ҫӳреме вӑхӑтлӑха чарасшӑн.
Аса илтерер: ҫула «Хӑрушсӑр тата паха автомобиль ҫулӗсем» наци проекчӗпе килӗшӳллӗн юсаҫҫӗ.
Подрядчик ҫула Ашмарин урамӗнчен пуҫласа «Хӗвел» пасар таран хупӗ. Анчах нумайлӑха мар. Нарӑс уйӑхӗн 15-мӗшӗнчен пуҫласа нарӑс уйӑхӗн 20-мӗшӗ таран. Ҫав вӑхӑтра машинӑсен Алькеш урлӑ ҫӳреме тивӗ. Тепӗр майлӑ каласан, Кӳкеҫ енчен килсе вӗсем Алькеша кӗрӗҫ, Кӑнтӑр поселокӗнчи пасар патӗнчен Иван Яковлев проспектне тухӗҫ. Шупашкарти Иван Яковлев проспекчӗпе Кӳкеҫ еннелле пыракан машинӑсем Кӑнтӑр поселокне кӗрсе кайса Алькешпа ҫаврӑнса тухӗҫ.
+8.3 °C