Хальхи вӑхӑтра муниципалитет округӗсен (вӗсене йӗркеленӗ хыҫҫӑн ял тӑрӑхӗсен пуҫлӑхӗсем пулмӗҫ, вырӑнсенче специалистсем ҫеҫ тӑрса юлӗҫ) пуҫлӑхӗсене суйлас ӗҫ малалла пырать.
Чӳк уйӑхӗн 17-мӗшӗнче, ав, Патӑрьел муниципалитет округне ертсе пыма Рудольф Селиванова суйланӑ.
Вырӑнтисем хыпарланӑ тӑрӑх, депутатсем Рудольф Васильевичшӑн пӗр шухӑшлӑн пулса сасӑланӑ.
Патӑрьел районне Рудольф Селиванов 2016 ҫулхи чӳк уйӑхӗнченпе ертсе пырать. Ҫак йӗркесен авторне унпа темиҫе интервью та хатӗрлеме тивнӗччӗ. Вӑл яланах чӑн чӑвашла калаҫать, интервью та унпа хатӗрлеме ҫӑмӑл. «Кирек епле ӗҫре те хам тавра ӑслӑ-тӑнлӑ, вӑйлӑ ҫынсене пухма тӑрӑшнӑ. Унсӑрӑн аталану пулмасть», — тенӗччӗ вӑл 2016 ҫулхи чӳк уйӑхӗнчи калаҫура.
ЧР Патшалӑх Канашӗн председательне Леонид Черкесова Махмаджон Бахтиёрович Холиков пулӑшса пырӗ. Махмаджон - ЧР ҫар комиссарӗн Бахтёр Холиковӑн ывӑлӗ. Вӑл 24 ҫулта.
Махмаджон унччен регионти Культура министерствин этноконфессиллӗ хутшӑнусен пайӗнче тӗп специалист-экспертра ӗҫленӗ. 2016 ҫулта Шупашкарти 10-мӗш шкултан вӗренсе тухсан Мускава Гуманитари ӑслӑлӑхӗсен патшалӑх академи университечӗн политологи факультетне ӑс пухма кӗнӗ.
Паян Тӑвай муниципалитет округне ертсе пыма Владимир Михайлова шаннӑ. Ку хыпара Владимир Борисович «Контактра» тӗнче тетелӗнче пӗлтернӗ.
Асӑннӑ должноҫре Владимир Михайлов 2022 ҫулхи раштав уйӑхӗн 20-мӗшӗнчен ӗҫлеме тытӑнӗ.
Владимир Михайлов 1987 ҫулхи утӑ уйӑхӗн 20-мӗшӗнче асӑннӑ районти Вӑрманхӗрри ялӗнче ҫуралнӑ. 2009 ҫулта И. Я. Яковлев ячӗллӗ Чӑваш патшалӑх педагогика университетӗнчен вӗренсе тухнӑ.
Хальхи вӑхӑтра Тӑвай районне ертсе пырать. Унччен вӑл «ПКФ Электросбыт» предприятире директорӑн коммерци енӗпе ӗҫлекен заместителӗ пулса тӑрӑшнӑ. «Родина» парти членӗ пулнӑ, 2016 ҫулта ӑна партин регионти уйрӑмӗн канашне ертсе пыма шаннӑ.
Етӗрне районӗн пуҫлӑхӗн пуканне урӑх ҫын йышӑннӑ. Вӑл - Станислав Трофимов. Унччен Станислав Шупашкар хула администрацийӗн ҫамрӑксен тата общество аталанӑвӗн пайӗн пуҫлӑхӗ те пулнӑ. Юлашки вӑхӑтра ЧР Патшалӑх Канашӗн Общество канашӗн председателӗнче вӑй хунӑ.
29 ҫулти ҫамрӑка депутатсем пӗр саслӑн пулса суйланӑ. Станислав Трофимов Красноармейски ялӗнче 1992 ҫулта ҫуралнӑ. Тӑван тӑрӑхӗнче пурӑннӑ чухнех общество ӗҫне хастар хутшӑннӑ. Вӑл - "Пӗрлӗхлӗ Раҫҫей" парти пайташӗ, регионти политканашӗн президиумне кӗрет.
Шупашкар хула администрацийӗн пуҫлӑхӗ Денис Спирин ку должноҫе йышӑннӑранпа тӳрӗ линие пушӑн 24-мӗшӗнче тухнӑччӗ. Унтанпа вӑл тӳрӗ лини ирттермен. Ҫитес эрнере вӑл ҫак утӑма тума шутланӑ: чӳк уйӑхӗн 17-мӗшӗнче тӳрӗ лини ирттерӗ.
Вӑл 10 сехет ҫурӑра пуҫланса 13 сехетре вӗҫленӗ. Унта 23-50-06 номерпе шӑнкӑравласа ҫитме пулать. Е сити-менеджерӑн халӑх тетелӗсенчи посчӗсен айне комментари хӑварма юрать.
Тӳрӗ линие «Контактра» халӑх тетелӗнче «Уҫӑ хула» («Открытый город») ушкӑнра курма пулать.
Паян Раҫҫей Федерацийӗн вӗрентӳ ӗҫӗ отличникӗ Александр Иванов 65 ҫул тултарнӑ.
Александр Степанович Муркаш районӗнчи Ҫатракасси ялӗнче ҫуралнӑ. И.Я. Яковлев ячӗллӗ Чӑваш патшалӑх педагогика институтӗнчен (халӗ — университетӗнчен) вӗренсе тухнӑскер ӗҫ биографине 1979 ҫулта шкулти математика учителӗнчен пуҫланӑ. Унтан вӑл шкул директорӗ пулнӑ, Шупашкар райкомӗн пӗрремӗш секретарӗнче тӑрӑшнӑ, Чӑваш обкомӗнчи йӗркелӳ пайӗн заведующине ҫитнӗ.
2001-2010 ҫулсенче Александр Иванов Чӑваш Енӗн Патшалӑх Канашӗн Аппарачӗн ертӳҫи пулнӑ. 2010 ҫулхи авӑн уйӑхӗнче ӑна республика Президенчӗн Администрацийӗн ертӳҫи пулма шаннӑ. 2014-2018 ҫулсенче вӑл информаци политикипе массӑллӑ коммуникацисен министрӗ пулнӑ, 2018 ҫулхи ҫу-юпа уйӑхӗсенче — вӗрентӳ тата ҫамрӑксен политикин министрӗ.
Александр Степановича «Чӑваш Республики умӗнчи тава тивӗҫлӗ ӗҫсемшӗн» медаль орденӗпе тата орденпа чысланӑ.
Шупашкар муниципалитет округӗн пуҫлӑхӗ пулма 53 ҫулти Николай Хорасева суйланӑ.
Николай Евгеньевич 1969 ҫулхи нарӑс уйӑхӗн 2-мӗшӗнче Шупашкар районӗнчи Салапайкасси ялӗнче ҫуралнӑ. Ҫартан таврӑнсан «Химпром» предприятире, 1993-2008 ҫулсенче Шалти ӗҫсен министерствин тытӑмӗнче ӗҫленӗ. 2010-2015 ҫулсенче вӑл Шупашкар районӗнчи Вӑрман-Ҫӗктер ял тӑрӑхӗн администрацине ертсе пынӑ, унтан Депутатсен районти пухӑвне суйланнӑ. 2018 ҫулхи нарӑс уйӑхӗнче ӑна Депутатсен пухӑвӗн председателӗ пулма суйланӑ, 2020 ҫулхи пуш уйӑхӗнче район администрацине ертсе пыма тытӑннӑ. Икӗ ҫуллӑха пынӑ контракт вӑхӑчӗ вӗҫленсен 2022 ҫулхи пуш уйӑхӗнче ӑна каллех районӑн сити-менеджерӗ пулма шаннӑ. Халӗ вӑл муниципалитет округне ертсе пырӗ.
Аса илтерер: ҫулталӑк вӗҫлениччен 19 районта муниципалитет округӗсем йӗркелӗҫ.
Шупашкарти "Садовый" микрорайонти шкула ку ҫулталӑк вӗҫӗччен туса пӗтерме шантарнӑччӗ. Ӗҫсем мӗнле пыраҫҫӗ-ха унта?
Шупашкар хула администрацийӗн пуҫлӑхӗ Денис Спирин телеграм-каналӗнче пӗлтернӗ хыпара вуласан ӗҫсем вӑйлах пыманнине ӑнланма пулать. Вӑл стройка вырӑнне кайса курнӑ. Сити-менеджер нумай асӑрхаттару тунӑ, ӗҫлекенсен йышне ӳстермелине каланӑ. "Унсӑрӑн штраф санкцийӗсемпе усӑ курма тивӗ", - ҫапла ҫырнӑ Денис Спирин телеграм-каналӗнче.
Тӳре-шара юпа уйӑхӗн 18-25-мӗшӗсенче Шупашкарта апат-ҫимӗҫ хакӗ мӗнле улшӑннине тишкернӗ. 11 лавккари хаксене шута илнӗ.
Юлашки эрнере ҫак ҫимӗҫсем йӳнелнине палӑртнӑ: сгущенка, консерв, макарон, ҫӑмарта, купӑста, панулми, кишӗр, рис, шӑнтнӑ пулӑ, услам ҫу, шурӑ ҫӑкӑр, сысна ашӗ, тӑвар, пулӑ консервӗ, 5 литрлӑ таса шыв.
Сгущенка 42 тенкӗ таранах йӳнелнӗ, какай консервӗ - 37 тенкӗ, услам ҫу - 34 тенкӗ.
Ҫӗнӗ Шупашкар хулин пуҫлӑхӗн тивӗҫӗсене вӑхӑтлӑха урӑх ҫын пурнӑҫлать. Алексей Ермолаев вырӑнне Ҫӗнӗ Шупашкарти ачасемпе ҫамрӑксен 2-мӗш спорт шкулӗн директорӗ Олег Матвеев йышӑннӑ. Вӑлах – спутник хулан депутатсен пухӑвӗн депутачӗ.
Алексей Ермолаев тӗлӗшпе пуҫиле ӗҫ пуҫарни пирки сайтра унччен пӗлтернӗччӗ. Ку коррупципе ҫыхӑннӑ. Пуҫиле ӗҫ пуҫарсан Алексей Ермолаев ӗҫрен хӑйӗн ирӗкӗпе каясси пирки заявлени ҫырнӑ.
+12.3 °C