Вӑрмар округӗнчи Кивӗ Вӑрмар ялӗ ҫывӑхӗнчи пӗвере пулӑсем вилнӗ. Кун пирки вырӑнти ҫынсем Ҫутҫанталӑк министерствине пӗлтернӗ.
Пулӑсем мӗншӗн вилнӗ? Шывра сиенлӗ япаласен виҫи пысӑк мар-и? Ҫаксене палӑртма пӗвери шыва тӗрӗслеме илнӗ. Тӗрӗслеве Ҫутҫанталӑк министерствин ӗҫченӗсем те хутшӑннӑ. Пӗтӗмлетӳ ҫывӑх вӑхӑтра паллӑ пулӗ.
Улатӑр тӑрӑхӗнчи прокуратура Чӑвашупрдор предприяти Улатӑртан Патӑрьеле каякан ҫул хӗррине йӗркеллӗ тытса тӑманнине тупса палӑртнӑ.
Аслӑ ҫул хӗррипе йывӑҫсемпе тӗмсем тӳнсе кайса ҫӗрсе выртнӑ, халь-халь персе анас пек усӑнса ларакансем те пулнӑ. Пластик савӑт-сапа, целлофан хутаҫ йӑваланса выртнӑ.
Кӑлтӑка пӗтерме ыйтса надзор органӗ Чӑвашупрдор ячӗпе асӑрхаттару хучӗ шӑрҫаланӑ.
Улатӑр хулинче ҫӳп-ҫапа вӑхӑтра турттарман. Ӗҫе пурнӑҫлассишӗн «Экополис» организаци яваплӑ пулнӑ.
Вырӑнти прокуратура пӗлтернӗ тӑрӑх, нумай хваттерлӗ ҫуртсен умӗнчи ҫӳп-ҫап контейнерӗсем тулса кайсан та вӗсене вӑхӑтра илсе кайса пушатман.
Улатӑрти йӑлари хытӑ каяша турттарма «Ситиматик Чувашия» организаци «Экополис» обществӑпа килӗшӳ тунӑ. Прокуратура ҫӗртме уйӑхӗн 8 тата 10-мӗшӗсенче тӗрӗслев ирттернӗ те хулари Киров урамӗнчи контейнерсене вӑхӑтра пушатманнине асӑрханӑ.
Яваплӑ организаци пуҫлӑхӗн тӗлӗшпе административлӑ ӗҫ пуҫарнӑ.
Шупашкар муниципаллӑ округӗнчи управляющи компанисем ҫынсене укҫа ытларах шутласа панӑ.
Вырӑнти прокуратура ҫурт-йӗр калӑпӑшне Роскадастрпа тата управляющи организацисен сведенийӗпе танлаштарса пӑхнӑ. Управляющи компанисем ҫурт-йӗре тытса тӑнине асӑннӑ калӑпӑш тӑрӑх шутласа параҫҫӗ-ҫке.
Тӗрӗслев управляющи компанисем хӑш-пӗр хваттерсен калӑпӑшне 0,1 тӑваткал метртан пуҫласа 2,4 тӑваткал метр таран ӳстерсе кӑтартнӑ иккен.
Тӗрӗслев тӑрӑх надзор органӗ 5 управляющи компани пуҫлӑхӗн ячӗпе асрхаттару хучӗсем шӑрҫаланӑ. Кӑлтӑка пӗтернине прокуратура тӗрӗслесе тӑрӗ.
Шупашкар муниципаллӑ округӗнче хирсене ҫулсеренех пӑхса ҫаврӑнаҫҫӗ.
Тыр-пул ӗҫта епле шӑтса тухнине хаклас ҫак ырӑ йӑлана тахҫанах пуҫарса янӑ. Хуҫалӑхсен ертӳҫисем, тӗп агрономсем пӗр-пӗрин хирӗсемпе паллашаҫҫӗ.
«Россельхозцентр» учрежденин филиалӗн специалисчӗсем районти 10 ял хуҫалӑх предприятийӗнче пулнӑ.
Комисси пайташӗсем тырар мӗн тарӑнӑшне акнине, ҫум курӑк пуррипе ҫуккине, агротехника ыйтнине пӑхӑннине тата ыттине тишкернӗ.
Шупашкар муниципаллӑ округӗнчи Салапайкасси ялӗнче социаллӑ-культура центрӗ уҫӑлмалла. Ӗҫ-пуҫ епле пынипе республикӑн культурӑн министрӗн ҫумӗ Татьяна Казакова паллашнӑ. Министерство ҫыннипе муниципалитет округӗн пуҫлӑхӗ Владимир Михайлов та ҫула тухнӑ.
Объекта «Культурӑна аталантарасси» патшалӑх программипе килӗшӳллӗн хӑпартаҫҫӗ. Центра кӑҫал туса пӗтермелле.
Культура учрежденийӗнче 100 вырӑнлӑх зал, кружок ӗҫлемелли пӳлӗм, вулавӑш, артистсен пӳлӗмӗ, гардероб, вестибюль тата санузел пулӗ.
Шупашкарта кӑна мар, Чӑваш Енре аттракционсене йӗркене кӗртеҫҫӗ. «Ҫакӑ чи малтанах хӑрушсӑрлӑхпа ҫыхӑннӑ, мӗншӗн тесен ярӑнмалли хатӗрсем ҫинче ачасем аманни пулнӑ. Хальлӗхе 86 аттракциона тӗрӗсленӗ», – пӗлтернӗ Телеграмри «Чӑваш Ен калаҫать» каналта.
Хӑш-пӗр чуччу кивелме ӗлкӗрнӗ. Юрӑхсӑра тухнӑ ҫав хатӗрсемпе усӑ курма юрамасть. Ун пекки, сӑмахран, Канаш хулинче те пур. Ӑна утӑ уйӑхӗн 1-мӗшӗччен сӳтмелле.
Чӑваш Енре пурӑнакансем ҫак кунсенче тонометрсене тӳлевсӗр тӗрӗслеттерееҫҫӗ. Акци Шупашкарпа Ҫӗнӗ Шупашкарта ака уйӑхӗн 7-мӗшӗнче пуҫланӑ, ака уйӑхӗн 9-мӗшӗччен пырать. Ӑна ӗнер иртнӗ Пӗтӗм тӗнчери сывлӑх кунне халалланӑ.
Акци тӗллевӗ – йӑлари тонометрсене вӑхӑтра тӗрӗслени юн тымарӗсемпе чӗре чирӗсемпе кӗрешесси ҫинчен аса илтересси.
Росстандартӑн Чӑваш Енри специалисчӗсем 2023 ҫулта виҫӗ кунта 1057 тонометр тӗрӗсленӗ, вӗсенчен 91-шӗ (е 9 проценчӗ) усӑ курма юрӑхсӑррине палӑртнӑ.
Тонометрсене паян тата ыран ҫак адреспа йышӑнаҫҫӗ: Шупашкар хули, Энтузиастсен урамӗ, 42-мӗш ҫурт, ирхи 8-тан пуҫласа 14 сехетчен. Ыран — Ҫӗнӗ Шупашкарти медицина центрӗнче (Винокуров урамӗ, 68-мӗш ҫурт) 9 сехет те 30 минутран пуҫласа 14 сехет те 30 минутчен.
Ҫулталӑк пуҫланнӑранпа республикӑра 7 тонна ытла аш-какая утилизаци тунӑ. Ку йӑлтах – сывлӑхшӑн сиенлисем. Ҫапла пӗлтерет ЧР Патшалӑх ветеринари служби.
Аш-какай сентре ҫине лекиччен тӗрӗслев витӗр тухать. Ведомство ӗсченӗсем аш пахалахӗпе хӑрушсӑрлӑхне кашни кун тӗрӗслесе тӑраҫҫӗ. Кӑҫалхи икӗ уйӑхра специалистсем 14 пин ытла тонна какая тӗрӗсленӗ, утилизацие ямаллисене те тупнӑ. Сӑлтавӗ тӗрлӗрен пулнӑ: срокӗ тухнӑ, упаковки сиенленнӗ, тӗрӗслев пӗтӗмлетӗвӗ лайӑхах пулман… Ҫапла 562 килограмм какай, 517 килограмм аш-какай продукцийӗ, 6240 килограмм выльӑх-чӗрлӗх ӑш-чикне утилизацие янӑ.
Шупашкарти экономикӑпа технологи колледжӗн преподавателӗ студента тапнӑ. Ку видео тӗнче тетелӗнче сарӑлнӑ.
Студент занятире кансӗрленӗ-мӗн. Ҫавӑнпа хӗрарӑм вӗрентекен ӑна аудиторирен малтан тӗксе кӑларса яма хӑтланать, унтан тапать. Анчах студент ҫавах каялла таврӑнса пӗрремӗш парта хушшине ларать.
ЧР Вӗренӳ министерствин пресс-служби пӗлтернӗ тӑрӑх, ку тӗслӗх тӗлӗшпе ведомство тӗрӗслев ирттерӗ.
+17.3 °C