Раштав уйӑхӗн 21-мӗшӗнче Чӑваш академи драма театрӗнче чӑваш халӑх артисчӗн Иван Ивановӑн юбилей каҫӗ пулӗ. Ҫав каҫ юбиляра саламлӗҫ, унтан «Карчӑксем качча каяҫҫӗ» спектакле кӑтартӗҫ. Унта юбиляр Юманкка сӑнарне калӑплать.
Иван Иванов 1955 ҫулхи раштав уйӑхӗн 21-мӗшӗнче Сӗнтӗрвӑрри районӗнчи Карапаш ялӗнче ҫуралнӑ. Мускаври М.С. Щепкин ячӗллӗ Аслӑ театр училищинчен 1983 ҫулта вӗренсе тухнӑранпах Чӑваш академи драма театрӗнче ӗҫлет.
Ӗнер, раштав уйӑхӗн 7-мӗшӗнче, Чӑваш Республикин тава тивӗҫлӗ артисткин Надежда Воюцкаян юбилейне халалланӑ каҫ иртнӗ. Унта «Пӗртен-пӗр шанӑҫ» спектакль кӑтартнӑ. Спектакльте Надежда Сильвестровна Елена Владимировна ролӗнче вылянӑ.
Надежда Воюцкая 1960 ҫулхи чӳк уйӑхӗн 25-мӗшӗнче Вӑрнар районӗнчи Шинер ялӗнче ҫуралнӑ. 1983 ҫулта М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑ та ҫавӑнтанпа Чӑваш академи драма театрӗнче ӗҫлет.
Юбиляра театр директорӗ Елена Николаева, Вӑрнар муниципалитет тӑрӑхӗн пуҫлӑхӗ Надежда Никандрова, Вӑрнарсен ентешлӗхӗн ертӳҫи Валерий Кузьмин тата ыттисем саламланӑ.
Ҫеҫпӗл Мишши ячӗллӗ Ҫамрӑксен театрӗ «Салтан патша ҫинчен хунӑ юмах» чӑвашла аудиоспектакль хатӗрленӗ. Ӑна хатӗрлессипе Чӑваш Республикин тава тивӗҫлӗ артистки Наталья Ахмед Раҫҫейри театр ӗҫченӗсен союзӗ пулӑшнипе ӗҫленӗ.
Асӑннӑ аудиоспектакле Александр Пушкинӑн «Сказка о царе Салтане» юмахӗ тӑрӑх лартнӑ. Ӑна хӑй вӑхӑтӗнче Георгий Ефимов чӑвашла куҫарнӑ.
Аудиоспектакле Ҫамрӑксен театрӗн артисчӗсем Владимир Григорьев, Наталья Ахмед тата Альбина Агеева вулаҫҫӗ.
Аудиоспектакле куҫ начар куракан ачасем валли хатӗрленӗ.
Чӑваш академи драма театрӗнче шкул театрӗсен «АСАМ» фестивалӗн ҫӗнтерӳҫисене палӑртма йӗркелӳ комитечӗ пуҫтарӑннӑ. Кун пек фестиваль пирӗн республикӑра кӑҫалхипе виҫҫӗмӗш хут иртет.
Тӳресем асӑрханӑ тӑрӑх, театр ӳнерӗпе кӑсӑкланакансен йышӗ кӑҫал самай ӳснӗ. Фестивале хутшӑнакансем репертуара та тӗплӗнрех суйласа илнӗ, спектакльте вылякансене те.
Кӑҫалхи фестивале 309 вӗрену учрежденийӗ 310 ӗҫпе хутшӑннӑ. Сцена ҫине 4031 ача тухнӑ.
Кӗҫех кам ҫӗнтерни паллӑ пулӗ.
Чӑваш академи драма театрӗн артистки Надежда Воюцкая ӗнер, чӳк уйӑхӗн 25-мӗшӗнче, 65 ҫул тултарнӑ. Ҫавна май театрта раштав уйӑхӗн 7-мӗшӗнче унӑн юбилей каҫӗ иртӗ. Унта «Пӗртен-пӗр шанӑҫ» спектакль кӑтартӗҫ. Спектакльте Надежда Сильвестровна Елена Владимировна ролӗнче вылять.
Надежда Воюцкая 1960 ҫулхи чӳк уйӑхӗн 25-мӗшӗнче Вӑрнар районӗнчи Шинер ялӗнче ҫуралнӑ. 1983 ҫулта М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑ та ҫавӑнтанпа Чӑваш академи драма театрӗнче ӗҫлет.
Ӗнер, чӳк уйӑхӗн 21-мӗшӗнче, Чӑваш патшалӑх ҫамрӑксен театрӗн артистки, Чӑваш Республикин культурӑн тава тивӗҫлӗ ӗҫченӗ Елизавета Шайдукова 90 ҫул тултарнӑ.
Асӑннӑ театрта Елизавета Федоровна 1959 ҫулта ӗҫлеме пуҫланӑ. Вӑл ҫулсене театрта йывӑр вӑхӑт тесе палӑртаҫҫӗ. Ун чухне учрежденири вырӑс труппине пӗтернӗ. Елизавета Шайдукова театрти 16 артистран пӗри пулнӑ.
Чӑваш академи драма театрӗнче иртекен «Чӗкеҫ» фестивале хутшӑнакансем СССР халӑх артисчӗ Вера Кузьмина ҫуралса ӳснӗ тӑрӑхра, Тӑвай районӗнчи Енӗш Нӑрваш ялӗнче, пулнӑ. Марина Карягина журналист ӗнер халӑх тетелӗнчи хӑйӗн страницинче пӗлтернӗ тӑрӑх, унта тараватлӑ ентешӗсем хӑнасене мухтавлӑ артист ҫинчен каласа панӑ, театр тӗпелӗнчи экспонатсемпе паллаштарнӑ.
Каҫхине Тӑвайри культура ҫуртӗнче Алтай Республикинчен килнӗ этноансамбль концерт кӑтартнӑ. «Алтай халӑх музыка инструменчӗсен сассинче пирӗн тахҫанхи несӗлсен ахрӑмӗ илтӗнет. Карланкӑран тухакан саспа юрласа пурин кӑмӑлне те ҫавӑрнӑ артистсене чылайччен хыттӑн алӑ ҫупса тав турӗҫ куракансем», — пӗлтернӗ маларах асӑннӑ ҫӑлкуҫ.
Ун хыҫҫӑн Чӑваш патшалӑх академи драма театрӗн артисчӗсем «Карчӑксем качча каяҫҫӗ» камит кӑтартнӑ.
Чӑваш патшалӑх академи драма театрӗн ӳнер пайӗн ертӳҫи Марина Николаева «Завпосты театра Будущего» программӑпа вӗренме пуҫлӗ.
Культура учрежденийӗнче хыпарланӑ тӑрӑх, Марина Порфирьевна чӳк уйӑхӗн 17-мӗшӗнчен пуҫласа ҫурла уйӑхӗн 20-мӗшӗччен ҫӗршывӑн чи сумлӑ специалисчӗсемпе пӗрле театра малалла аталантарас мелсене тӗпчеме пултарӗ.
Проекта пурнӑҫа кӗртекенни – пултарулӑх индустрийӗсен «Меганом» академийӗ. Вӗрентӗве «Таврида.АРТ» фестиваль ирттернӗ май йӗркелӗҫ.
Вӗренӳ тӑватӑ пайран тӑрӗ, ун вӑхӑтӗнче ӑсталӑх сехечӗсем, практикумсем пулӗҫ.
2000-мӗш ҫулта Чӑваш патшалӑх культурӑпа ӳнер институчӗ Ҫеҫпӗл Мишши ячӗллӗ Ҫамрӑксен театрӗ валли артистсем хатӗрлекен пӗрремӗш курс уҫнӑ. Курса Вячеслав Оринов ертсе пынӑ.
Унтан 12-ӗн вӗренсе тухнӑ, Кун пирки Чӑваш Енӗн ПТРК корреспонденчӗ Екатерина Фомина пӗлтернӗ.
Ҫавӑн чухне вӗренсе тухнӑ 12 ҫамрӑкран улттӑшӗ пурнӑҫне театрпа ҫыхӑнтарнӑ.
Сцена ҫине тухнӑранпа 25 ҫул ҫитнӗ ятпа артистсем хӑйне евӗр уяв каҫӗ ирттернӗ. Вӗсем: Наталья Ахмед, Алевтина Семёнова, Леонид Яргейкин, Дмитрий Михайлов, Дмитрий Петров тата Николай Тарасов.
Паян Чӑваш ҫамрӑксен театрӗнче «Ҫӗн Кун ачи» спектакль кӑтартнӑ. Аса илтерер: ҫав ӗҫ Ҫеҫпӗл Мишши поэт ҫинчен. Унӑн авторӗ – Марина Карягина.
Спектакль хыҫҫӑн унӑн режиссёрӗпе, Борис Манджиевпа, тӗлпулу иртнӗ. Борис Манджиев – Раҫҫей искусствӑсен тава тивӗҫлӗ ӗҫченӗ, Калмӑк тата Тыва республикисен искусствӑсен тава тивӗҫлӗ ӗҫченӗ.
-14.7 °C