ЧР Сывлӑх сыхлавӗн министерстви кӑшӑлвируспа йывӑр чирлӗ пациентсене сиплеме кислород ҫителӗксӗр пулни пирки пӗлтернӗ. Паянхи куна республикӑра 3443 ковид-койка пур. Стационарсене 3355 ҫын сипленет. Вӗсенчен 2160-шӗн сывлӑхӗ вӑтам йывӑр, 1025-шӗн йывӑр, 100-шӗн питӗ йывӑр. 106 ҫын ИВЛ аппаратпа сывлать.
Владимир Степанов министр пӗлтернӗ тӑрӑх, РФ промышленноҫпа суту-илӳ министерствине медицина кислорочӗпе тата ытти хӑш-пӗр препаратпа тивӗҫтерме ыйтса ҫырнӑ. Халӗ стационарсенче куллен 50-51 тонна кислород кирлӗ, кашни кун вара 36-38 тонна илсе килеҫҫӗ.
«Лару-тӑру тата япӑхлансан укҫа пур пулсан та кислород пулмӗ», - тенӗ ЧР Элтеперӗ Олег Николаев.
Ӗнер, юпа уйӑхӗн 15-мӗшӗнче, Ҫӗмӗрле районӗнчи «Вперед» (чӑв. Малалла) хаҫатӑн тӗп редакторӗ пулнӑ Валентина Хохлова пурнӑҫран уйрӑлса кайнӑ.
Хаҫат редакцийӗ Инстаграмри хӑйӗн страницинче вилӗм сӑлтавне пӗлтермен. Анчах «Правда ПФО» тӗнче тетелӗнчи хаҫат хӗрарӑмӑн ҫывӑх ҫыннисемпе ҫыхӑнса вилӗм сӑлтавне уҫӑмлатнӑ. 61 ҫулти экс-редактор пурнӑҫӗ кӑшӑлвируса пула татӑлнӑ-мӗн.
Валентина Хохлова ҫамрӑк чухне хаҫат ӗҫне суйланӑ та Ҫӗмӗрле районӗнчи хаҫат редакторӗнче ӗҫлесех ӗмӗрленӗ. Ҫӗмӗрлере ҫуралса ӳснӗ, Хусанти патшалӑх университетӗнчи журналистика факультетӗнчен вӗренсе тухнӑ хыҫҫӑн малтанах корреспондент-радиоорганизаторта тӑрӑшнӑ, 1996 ҫултанпа – хаҫат редакторӗнче, 1999 ҫулта издательство ҫурчӗ тусан ӑна 2017 ҫулччен ертсе пынӑ.
Ҫӗрпӳ районӗнчи Виҫикасси ялӗнче пурӑнакан 38 ҫулти арҫынна ҫынна вӗлернӗшӗн явап тыттарӗҫ. Ун тӗлӗшпе пуҫиле ӗҫ пуҫарнӑ.
Пӑтӑрмах юпа уйӑхӗн 10-мӗшӗнче пулса иртнӗ. Ҫав каҫхине арҫын хӑйӗн килӗнче пулнӑ. Ун патӗнче эрех ӗҫме «туссем» пуҫтарӑннӑ. Ҫав шутра кил хуҫин хӗрӗ тата 54 ҫулти арҫын пулнӑ.
Хӗре кӗвӗҫнипе кил хуҫи арҫыннипе 54 ҫулти арҫын хирӗҫсе кайнӑ. Кӑштахран хӑна ҫывӑрса кайнӑ. Вӑл хуп турттарнӑ самантра кил хуҫи картишне тухса пуртӑ илсе кӗнӗ. Ҫывӑракан ҫынна пуҫӗнчен унпа 4 хутран кая мар ҫапнӑ. Хӑна ҫавӑнтах вилсе кайнӑ.
Ӗнер, юпа уйӑхӗн 1-мӗшӗнче, ватӑ хӗрарӑм машина айне пулса вилнӗ.
Инкек 18 сехет те 30 минут тӗлӗнче Хӗрлӗ Чутай районӗнчи «Сӑр» автоҫул ҫинче пулса иртнӗ. Ҫав вӑхӑтра ҫулпа 82 ҫулти хӗрарӑм утса пынӑ. Унӑн ҫипуҫӗ те тӗттӗмре аякранах курӑнакан йышшискер пулман. Инкек ҫири кӗперен ҫывӑх ҫав. Кинемей ҫине «Лада-Калина» автомбиль пырса кӗнӗ. Руль умӗнче 46 ҫулти арҫын пулнӑ. Автомобиль ҫапса хӑварсан хӗрарӑм инкек вырӑнӗнчех вилсе кайнӑ.
Ку пӑтӑрмаха халӗ специалистсем тишкереҫҫӗ, вӗсемех татӑклӑ йышӑну тӑвӗҫ.
Паян Шупашкар хулинчи Фучик урамӗнче, пассажирсене турттаракан транспортра, пӑтӑрмах сиксе тухнӑ. Ҫавӑн пирки йӗрке хуралҫисен дежурнӑй пульчӗ ҫине ирхи 7 сехет те 40 минутра хыпарланӑ. Инкек вырӑнне полицин темиҫе нарячӗ пырса ҫитнӗ.
Маршрутка водительне ҫамрӑк хӗрарӑм ҫӗҫӗпе мӑйӗнчен чикнӗ. 23 ҫулти аманнӑ арҫын-водитель микроавтобуса Сӑкӑт кӗперӗ патӗнчи автозаправка патӗнчи лапама пӑрса илсе чарса лартма пултарнӑ.
Полицейскисен машининче ҫамрӑк хӗрарӑм лӑпкӑ ларнӑ. Пӑтӑрмах сӑлтавне йӗрке хуралҫисем палӑртӗҫ.
ХУШСА КАЛАНИ
РФ Следстви комитечӗн Чӑваш Енри управленийӗнче паян 16 сехет хыҫҫӑн пӗлтернӗ тӑрӑх, ҫӗҫӗпе чикекен ҫамрӑк хӗрарӑм водительпе юнашар ларкӑч ҫинче ларса пынӑ. Вӑл ӳсӗр пулнӑ. Арҫынна вӑл ҫӗҫӗпе чикнӗ. Ҫынна вӗлерме тӑнӑшӑн хӗрарӑм тӗлӗшпе пуҫиле ӗҫ пуҫарнӑ.
Тӗпчевҫӗсем пӗлтернӗ тӑрӑх, водитель хӗрарӑмран хӳтӗленес тӗллевпе машинӑна чарса лартнӑ та ҫӗҫӗллӗ хӗрарӑма хирӗҫ тӑнӑ. Аманнӑ арҫынна пульницӑна ӑсатнӑ.
Чӑваш Енӗн штатра тӑман тӗп специалисчӗ, Татьяна Дерипаско акушер-гинеколог, ҫие юлнӑранпа 22 эрне иртсен кӑшӑлвирусран прививка тума юранине ӗнерхи брифингра пӗлтернӗ.
Унччен ачасем чирлемеҫҫӗ тесе шухӑшланӑ. Кӑҫал вара пирӗн республикӑра кӑшӑлвирус ернӗ икӗ пепке пурнӑҫӗ татӑлнӑ. Вӗсенчен пӗри 1,5 уйӑхра, тепри 3 уйӑхра пулнӑ. COVID-19 ернӗрен йывӑр диагнозпа ҫуралакан ачасем пур-мӗн. Нумай пулмасть, акӑ, алӑри артери тромбозӗллӗ пепке ҫут тӗнчене килнӗ. Республикӑн тӗп акушер-гинекологӗ журналистсене пӗлтернӗ тӑрӑх, тин ҫеҫ ҫуралнӑскерӗн аллине татас хӑрушлӑх пур. Паянхи куна илсен, чире пула ачисене вӑхӑт ҫитиччен ҫураттарнӑ 4 хӗрарӑм сывлӑхӗ хӑрушлӑхра. Ҫавсенчен пӗрне чылай вӑхӑт сипленӗ хыҫҫӑн искусствӑлла майпа сывлаттараҫҫӗ, мӗншӗн тесен 9 ҫулти тата 16 кунти икӗ ача амӑшӗн ӳпки 100 проценчӗпех шыҫнӑ.
«Йывӑр чирлӗ ҫав пациентсем пирӗн куҫ умӗнче, ҫав вӑхӑтрах лару-тӑрӑва пӗлмен ҫынсем прививкӑна хирӗҫ калаҫни питех те йывӑр», – тенӗ Татьяна Дерипаско.
Ача кӗтекен хӗрарӑмсене «Спутник V» препаратпа прививка тума юрать-мӗн, мӗншӗн тесен ӑна чи хӑрушсӑрри тесе йышӑннӑ.
Юпа уйӑхӗнче 11 кун кӑна иртрӗ. Чӑваш Енре кӑшӑлвируспа чирлесе вилекенсен шучӗ вара ку уйӑхра 139 ҫынна ҫитнӗ. Юлашки талӑкра 11 ҫыннӑн пурнӑҫӗ татӑлнӑ. Ку таранччен 2452 ҫын вилнӗ. Статистика кӑтартнӑ тӑрӑх, чирленӗ кашни 14-мӗш ҫын сывалайман.
Паянхи кун тӗлне 35009 ҫын инфекциленнӗ. Вӗсенчен 31612-шӗ сывалнӑ. Юлашки талӑкра 84 ҫын чире парӑнтарнӑ. 99 ҫын кӑшӑлвируспа чирлени палӑрнӑ.
Хальхи вӑхӑтра стационарсенче тата килте амбулатори мелӗпе «кӑшӑлвирус» диагноз лартнӑ 945 пациент сипленет.
Чӑваш Енре инфекци корпусне хута яма палӑртнӑ. Ӑҫта пулӗ вӑл? Сывлӑх сыхлавӗн министерстви пӗлтернӗ тӑрӑх, Шупашкарти Васкавлӑ медпулӑшу пульници хыҫӗнче. Унта юмансем ӳсеҫҫӗ.
Хальлӗхе проекта РФ Сывлӑх сыхлавӗн министерствипе ҫирӗплетеҫҫӗ. Инфекци корпусӗ Республикари клиника пульницин йышӗнче пулӗ. Ҫавӑн пекех унта сиплевпе диагностика, амбулатори, патологоанатоми корпусӗсене уҫмалла.
Олег Николаев Элтепер пульницӑна 2023-2024 ҫулсенче тума тытӑнассине пӗлтернӗ. Пӗлтӗр ӑна хута яма вӑл РФ Президентӗнчен Владимир Путинран 24 млрд тенкӗ ыйтнӑ.
Роспотребнадзорӑн Чӑваш Енри управленийӗ ҫӗнӗ йышӑну хатӗрленӗ. Юпа уйӑхӗн 11-мӗшӗнчен тытӑнса патшалӑх тата муницпалитет слущащийӗсен, вӗренӳ, сывлӑх сыхлав, соцаллӑ хӳтлӗх кӳрекен тата халӑха тивӗҫтерекен сферӑра ӗҫлекенсен кӑшӑлвирусран прививка тутармалла.
Такси водителӗсен, общество апатланӑвӗн предприятийӗсенче, илем салонӗсенче, мунчасемпе саунӑсенче, физкультурӑпа сывлӑх комплексӗсенче, фитнес-клубсенче, бассейнсенче, музейсенче, вулавӑшсенче, кинотеатрсенче тата ытти ҫавӑн пек вырӑнта ӗҫлекенсен вакцинациленмелле.
Вакцинаци тутарманнисене чӳк уйӑхӗн 1-мӗшӗнчен тытӑнса е ӗҫрен хӑтарӗҫ, е инҫет ҫыхӑну мелӗпе ӗҫлеттермелле тӑвӗҫ. Профилактика прививкине тума тухтӑрсем хушманнисене ҫеҫ «тӗкӗнмӗҫ».
Кӑшӑлвирусран вилекенсем нумайлансах пыраҫҫӗ. Статистика кӑтартнӑ тӑрӑх, халӗ чирленӗ кашни 14-мӗш ҫын вилет.
Юлашки талӑкра 13 ҫын пурнӑҫран уйрӑлнӑ. Ку таранччен 2402 ҫын кӑшӑлвируса парӑнтарайман. Пӗтӗмпе 34610 ҫын инфекциленнӗ. Вӗсенчен 31272-шӗ сывалнӑ. 6,9 проценчӗ чире парӑнтарайман.
Юлашки талӑкра 98 ҫын кӑшӑлвируспа чирленине палӑртнӑ. 89 ҫын сывалнӑ. Хальхи вӑхӑтра стационарта тата килте амбулатори мелӗпе 936 пациент сипленет.
+33.3 °C