Ҫӗнӗ Шупашкарти 16-мӗш вӑтам шкулта вӗренекен харӑсах темиҫе ача паян чирлесе ӳкнӗ. Республикӑн влаҫ органӗсен официаллӑ порталӗнче 9 сехет те 52 минутра ҫырнӑ тӑрӑх, Чӑваш Енӗн Сывлӑх сыхлав министерстви пӗлтернӗ тӑрӑх, кӑрлач уйӑхӗн 13-мӗшӗнчи 7 сехет тӗлне илсен шкула 167 ача пыман, вӗсенчен 47-шӗ тухтӑрсенчен пулӑшу ыйтнӑ.
Малтанласа палӑртнӑ тӑрӑх, 35 ачан варӗ пӑсӑлнӑ, хырӑм ыратнипе 8-ӑн аптӑранӑ, 3-ӗн — ҫивӗч респиратор чирӗпе. 1 ачана больницӑна вырттарнӑ. 45 ача амбулатори мелӗпе (килте) сипленет.
Чир сӑлтавне палӑртассипе Роспотребнадзор управленийӗ ӗҫченӗсем тата тухтӑрсем ӗнертенпе ҫине тӑраҫҫӗ.
И.Н.Ульянов ячӗллӗ ЧПУ студенчӗ, медицина факультетӗнче реаниматолога вӗренекенскер, пандеми пуҫлансан медбратра ӗҫлеме пуҫланӑ. Дежурствӑран пушӑ вӑхӑтра Висраил Хаманаев Чӑваш Енре пурӑнакансене лезгинка ташлама вӗрентет.
Студент «Дети гор» ансамбль йӗркелесе янӑ, ӑна хӑйех ертсе пырать. Ун патӗнче чӑвашсем те, эрменсем те, аварсем те, чеченсем те, азербайджансем те ташлаҫҫӗ.
Занятисем хыҫҫӑн Висраил пульницӑна 12 сехетлӗхе дежурствӑна васкать. Кӑҫал кӗркунне вӑл экзаменсем тытать, ун хыҫҫӑн ординатурӑна куҫӗ. Ӑна вӑл ӑҫта ирттерессине хальлӗхе палӑртман.
Чӑваш Енре кӑшӑлвируспа чирлекенсен йышӗ чакса пырать пулин те вилекенсен хисепӗ пысӑк-ха. Иртнӗ талӑкра ав 18 ҫын пурнӑҫран уйрӑлнӑ. Ку таранччен кӑшӑлвирус республикӑри 4067 ҫыннӑн пурнӑҫне татнӑ.
Паянхи кун тӗлне 47012 ҫын инфекциленнӗ. Вӗсенчен 40928-шӗ сывалнӑ. Юлашки талӑкра 44 ҫын чирленине палӑртнӑ, 29 ҫын сывалнӑ.
Хальхи вӑхӑтра республикӑра 2017 ҫын стационарта е килте амбулатори мелӗпе кӑшӑлвирусран сипленет.
Чир-чӗр никама та тиркемест те, Чӑваш Ен Элтеперӗ Олег Николаев ҫавна аван пӗлет. Ҫӗнӗ ҫул вӑхӑтӗнчи канмалли кунсемпе усӑ курса вӑл кӑшӑлвирусран ревакцинаци тутарнӑ. Кун пирки Олег Николаев Инстаграмри хӑйӗн страницинче пӗлтернӗ.
Республика ертӳҫи хыпарланӑ тӑрӑх, ревакцинацие вӑл «Спутник Лайт» препаратпа тутарнӑ.
«Хама лайӑх туятӑп. Раҫҫей Сывлӑх сыхлав министерстви кӑшӑлвирусран иммунизацие ҫур ҫулта пӗрре тутарма сӗнет. Ку вӑл питӗ пӗлтерӗшлӗ тесе шухӑшлатӑп, вакцинаци тутарнӑранпа 6 уйӑх иртнисене ревакцинаци витӗр тухса хӑвӑра тата хӑвӑрӑн ҫывӑх ҫыннӑрсене чиртен хӳтӗлеме сӗнетӗп», – тенӗ Элтепер.
Тепӗр ҫул хыҫа юлчӗ. Пирӗн ҫӗршыв кӑшӑлвируспа кӗрешме пуҫланӑранпа кӗҫех 2 ҫул ҫитет. Иртнӗ уйӑхра, раштавра, Чӑваш Енре 567 ҫын кӑшӑлвируса пула вилнӗ. Чӳк уйӑхӗпе танлаштарсан, 23 ҫын ытларах. Кӑрлач уйӑхӗнче вара 19 пациентӑн пурнӑҫӗ татӑлнӑ.
Иртнӗ талӑкра 58 ҫын инфекциленнине палӑртнӑ. Сывалакансен йышӗ 56 ҫын пулнӑ.
Ку таранччен 46577 ҫын кӑшӑлвируспа чирленӗ. Вӗсенчен 40605 ҫын сывалнӑ. Юлашки талӑкра 19 ҫын чире парӑнтарайман. Паянхи куна республикӑри 3892 пациент кӑшӑлвируса пула вилнӗ.
Ҫӗнӗ ҫулхи канмалли кунсенче те кӑшӑлвирусран прививка тумалли пунктсем ӗҫлӗҫ. Ҫав кунсенче ЧР Элтеперӗ Олег Николаев та ревакцинаци тума палӑртнӑ.
ЧР Сывлӑх сыхлавӗн министерстви пӗлтернӗ тӑрӑх, кӑрлач уйӑхӗн 1-мӗшӗнче вакцинаци пункчӗсем ирхи 8 сехетрен ӗҫлӗҫ. Пациентсене 13 сехетчен йышӑнӗҫ. Раштав уйӑхӗн 31-мӗшӗнче, кӑрлачӑн 1, 2, 7 тата 9-мӗшӗсенче те ҫак графикпех ӗҫлӗҫ. Кӑрлачӑн 3, 4, 5, 6 тата 8-мӗшӗсенче вакцинаци пункчӗсем 8-19 сехетсенче ӗҫлӗҫ.
Канмалли кунсенче вакцинациленмелли пунктсем суту-илӳ центрӗсенче те ӗҫлӗҫ.
Паянхи куна илес тӗк, республикӑра кӑшӑлвируспа чирленӗ кашни 12-мӗш ҫын вилет. Раштав уйӑхӗнче 4 эрнере 521 пациент пурнӑҫран уйрӑлнӑ.
Юлашки талӑкра 16 ҫын вилнӗ. Пандеми пуҫланнӑранпа 3827 ҫын кӑшӑлвируса парӑнтарайман. Пневмоние тата чир хыҫҫӑнхи йывӑрлӑхсене пула вилнисем ку статистикӑна кӗмеҫҫӗ.
Паянхи куна республикӑра 46322 ҫын чирленӗ. Вӗсенчен 40415-шӗ сывалнӑ. Юлашки талӑкра 72 ҫын инфекциленнӗ, 51 ҫын сывалнӑ. Хальхи вӑхӑтра 2080 ҫын кӑшӑлвирусран сипленет.
Кӑшӑлвирусран прививка тутарасран хӑшӗсем пӑрӑнса ҫӳренӗ, теприсене хистесерех тума ыйтнӑ вӑхӑтра виҫҫӗмӗшӗсем хӑйсен кӑмӑлӗпех тухтӑр патне каяҫҫӗ. Чӑваш Ен Элтеперӗ Олег Николаев та вакцинаци тутарнӑ ҫеҫ мар, вӑл ревакцинаци витӗр тухма хатӗрленет.
«Вакцинаци тунӑранпа ҫур ҫул иртнисене ҫак мелпе пурне те усӑ курма сӗнетӗп. Вӑрӑм канмалли кунсенче кун валли питех те меллӗ тесе шухӑшлатӑп», — тенӗ республика ертӳҫи.
Вакцинӑн пӗрремӗш компоненчӗпе вӑл кӑҫалхи ака уйӑхӗнче прививка тутарнӑ, иккӗмӗшне — ҫу уйӑхӗнче.
Чӑваш Енре виҫҫӗмӗш кун ӗнтӗ 20 ҫын кӑшӑлвирусран вилет. Кун пирки федераци информаци центрӗ пӗлтерет.
Ҫапах лайӑх хыпар пур: чирлекенсен йышӗ куллен чакса пырать. Ку таранччен республикӑра 46250 ҫын кӑшӑлвируспа чирленӗ. Вӗсенчен 40364-шӗ сывалнӑ. Ку 87,3 процентпа танлашать.
Паянхи куна 3811 ҫын чире парӑнтарайман. Юлашки талӑкра 77 ҫын чирленӗ, 59 ҫын сывалнӑ. Хальхи вӑхӑтра республикӑра 2057 пациент кӑшӑлвирусран сипленет.
Раштав уйӑхӗн 20-26-мӗшӗсенче республикӑра 132 ҫын кӑшӑлвируса пула вилнӗ, 628 ҫын инфекциленнӗ. Ун умӗнхи эрнере 129 пациент вилнӗ, 867 ҫын чирленӗ. Ҫапла чирлекенсен йышӗ 38 процент чакнӑ. Вилекенсен йышӗ вара 2,3 процент ӳснӗ.
Ку таранччен 46173 ҫын чирленӗ. Раҫҫейӗпе илес тӗк, Чӑваш Ен танлаштарӑмра 67-мӗш вырӑнта, Атӑлҫи федераци округӗнче вара – 10-мӗшӗнче. Паянхи куна пандеми пуҫланнӑранпа 40305 ҫын сывалнӑ, 3791 ҫын пурнӑҫран уйрӑлнӑ. Юлашки талӑкра 59 ҫын чирленӗ, 20 ҫын чире парӑнтарайман. Хальхи вӑхӑтра республикӑра 2077 ҫын кӑшӑлвирусран сипленет.
+23.3 °C