Шупашкар район администрацийӗ хӑйӗн паянхи ӗҫченӗсемпе унччен тӑрӑшнисенчен 2,28 миллион тенкӗ ытларах шыраса илесшӗн. Ҫав тӗллевпе суда тавӑҫпа тухнӑ-мӗн.
...2015 ҫулхи авӑн уйӑхӗнче администрацине «Артек» строительство организацийӗ Кӳкеҫӗн ҫӗнӗ микрорайонӗсенчен пӗринче тӑхӑр хутлӑ ҫурт хута янине пӗлтернӗ, ӑна хута яма ирӗк ыйтнӑ. Енсем кӑмӑлпа калаҫса татӑлайман енне строительсен суда тухма тивнӗ. Объекта вӑхӑтра хута ярайман енне пайҫӑсене укҫа тӳлеме тивнӗ.
Эпир пӗлнӗ тӑрӑх, администрацие пула тӑкакланнине «Артек» райадминистрацинчен шыраса илесшӗн пулнӑччӗ.
Халӗ администраци унччен района ертсе пынӑ Георгий Егоровран тата халӗ администраци пуҫлӑхӗн ҫумӗ пулса тӑрӑшакан Зоя Масловӑран тата ытти хӑш-пӗр специалистран ҫав тӑкака шыраса илесшӗн-мӗн.
ЧР прокуратури пӗлтернӗ тӑрӑх, Патӑрьелте пурӑнакан 46 ҫулти арҫын Мускав ҫывӑхӗнчи предприятире ҫӳп-ҫап уйӑрнӑ ҫӗрте ӗҫленӗ чухне АПШн суя 100 долларне 10 штук тупнӑ. Хайхискер ҫак укҫана Патӑрьеле таврӑнсан тенкӗпе улӑштарма хӑланнӑ. Анчах ӗҫӗ ӑнман.
Укҫа улӑштарма вӑл банка кӗнӗ. Анчах кассир доллар суя пулнине асӑрханӑ, ҫавӑнтах полици ӗҫченӗсене чӗннӗ.
Ҫак арҫынна суд тунӑ. Судра вӑл айӑпне йышӑннӑ. Судья приговор вуланӑ: арҫынна тӗрмене хупмасӑр икӗ ҫуллӑха айӑпланӑ. Приговор саккунлӑ вӑя кӗмен-ха.
Паянтан пуҫласа Алексей Шурчанов депутат мар. Депутатсем куншӑн пӗр саслӑн сасӑланӑ.
Ҫакӑ Алексей Шурчанов ҫынна ултланипе ҫыхӑннӑ. Ун тӗлӗшпе пуҫиле ӗҫ пуҫарни пирки пӗлтернӗччӗ. Аса илтерер: 2018 ҫулхи раштавӑн 27-мӗшӗнче Шупашкарти Ленин районӗн сучӗ ӑна айӑплӑ тесе палӑртнӑ, 200 пин тенкӗ штаф тӳлеттерме йышӑннӑ. Шурчанов приговорпа килӗшмесӗр Аслӑ суда та ҫитнӗ, анчах кӑлӑхах.
Следстви тата суд акӑ мӗн палӑртнӑ ун чухне: 2015 ҫулхи кӗркунне Шурчанов кӗҫӗнни «Благодать» фирма директорне Игорь Нарышкина Патшалӑх Канашӗн депутатсен суйлавӗпе тӗп списока кӗртме шантарнӑ, унран 574 пин тенкӗ ыйтнӑ. Анчах хӑй шантарнине пурнӑҫламан.
Палӑртмалла: Алексей Шурчанов РФ Патшалӑх Думин депутачӗн Валентин Шурчановӑн ывӑлӗ.
Пӗр коммерци организацийӗн ертӳҫи влаҫ ҫыннин сывлӑхне сиен кӳнӗшӗн суд сакки ҫине ларӗ. Хайхискер полицейскин сӑмсине хуҫнӑ.
2018 ҫулхи раштав уйӑхӗн 29-мӗшӗнче ҫур ҫӗр иртни 3 сехет ҫурӑра пакунлисем чарӑнура ӳсӗр арҫын тӑнине асӑрханӑ. 36 ҫулти арҫын вӗсене такси чӗнсе пама ыйтнӑ, хӑйӗн телефонӗ сӳнсе ларнӑ-мӗн. Лешсем чӗнсе панӑ.
Ҫав вӑхӑтрах полицейскисем ӳсӗрскерӗн пушмакӗ ҫинчи кантра салтӑнса кайнине курнӑ та ҫыхма сӗннӗ, унсӑрӑн ӳкет вӗт. Лешӗ вара тав тӑвас вырӑнне пӗр полицейские питӗнчен темиҫе хутчен ҫапнӑ, сӑмсине хуҫнӑ. Кун хыҫҫӑн ӳсӗрскере полици уйрӑмне илсе ҫитернӗ.
36 ҫулти арҫын айӑпне йышӑнмасть. Анчах кӳнтеленсем урӑхла ҫирӗплетеҫҫӗ. Ун тӗлӗшпе пуҫарнӑ пуҫиле ӗҫе Ленин районӗн судне ярса панӑ.
Улатӑр хулинче пурӑнакан 16-ри тата 17-ри, ҫавӑн пекех Улатӑр районӗнчи Алтышевӑри 22 ҫулти ниҫта ӗҫлемен каччӑ иртнӗ ҫулхи юпа уйӑхӗн 4-мӗш каҫхине 19-ти ҫамрӑка вӑрмана лартса кайнӑ. Унта ҫитсен вӗсем унӑн алли-урине ҫыхса хурса хӗненӗ. Шар курнинчен вӗсем 300 пин тенкӗ тапӑннӑ, пӗр эрнере тупса пама ыйтнӑ, вӗлерессипе хӑратнӑ. 16-ри каччӑ ҫамрӑкӑн телефонне ҫаратнӑ.
Суд 17-ри тата 22-ри пуҫтахсене хупса хумасӑр 2 ҫуллӑха ирӗкрен хӑтармалла тунӑ. 16-рине 18 тултариччен ятарлӑ хупӑ вӗренӳ заведенине ӑсатнӑ.
Кӗҫӗнни унччен те харсӑрланнӑ. Вӑл уголовлӑ-исполнительнӑй инспекцире учетра тӑнӑ. Унсӑр пуҫне ӑна тата 17-ри тусне шалти ӗҫсен пайӗн ҫул ҫитменнисемпе ӗҫлекен подразделенийӗ шута илнӗ. Асӑннӑ надзор органӗсене тата хайхисем вӗренекен заведенисене профилактика енӗпе ҫителӗклӗ ӗҫлеменнине асӑрхаттарса, тивӗҫлӗ мера йышӑнма сӗнсе тӗпчевҫӗ хутсем ярса панӑ.
Ҫӗрпӳ районӗнчи Сӑнав поселокӗнче пурӑнакан арҫын тӗлӗшпе пуҫарнӑ пуҫиле ӗҫе тишкерсе пӗтернӗ, ӗҫ-пуҫа судра пӑхса тухнӑ. Ют ҫын сарайне ҫивитти урлӑ кӗрсе икӗ хур вӑрласа тухнӑ арҫын айӑплине ҫирӗплетнӗ. Кун пирки «Мой город Чебоксары» портал хыпарлать.
Хайхи ҫӑлкуҫ пӗлтернӗ тӑрӑх, шар курнӑ хуҫи ҫав икӗ хура 1 пин те 400 тенкӗлӗх хакланӑ. Вырӑнти йӗркелӗх хуралҫисем вӑрра кӗске вӑхӑтрах тупса палӑртнӑ, ӑна тытса чарнӑ. Ют ҫын хуҫалӑхне саккунсӑр майпа кӗрсе пурлӑха вӑрттӑн вӑрланӑ тесе унӑн тӗлӗшпе пуҫиле ӗҫ пуҫарнӑ. Халӗ суд пулнӑ. Икӗ хур вӑрласа тухнӑ арҫынна ҫирӗп йӗркеллӗ колоние ултӑ уйӑхлӑха ӑсатма йышӑннӑ. Хурӗсем паянхи кун ӑҫта — кун пирки ҫӳлерех асӑннӑ ҫӑлкуҫра нимӗн те ҫырман.
Шӑмӑршӑ районӗнчи прокуратура патшалӑх символикипе ҫыхӑннӑ саккунсене епле пӑхӑннине тӗрӗсленӗ. Районти пӗр ял тӑрӑхӗн пуҫлӑхне йӗркене пӑхӑнманшӑн пуҫран шӑлман.
Палтиел ял тӑрӑхӗн администрацийӗнче республикӑри патшалӑх символӗсем пирки калакан саккуна пӑснӑ: унта Чӑваш Енӗн патшалӑх ялавне хӑпартман.
Ял тӑрӑхӗн пуҫлӑхӗ тӗлӗшпе административлӑ ӗҫ пуҫарнӑ, ӑна пӑхса тухма суда ярса панӑ. Халӗ, ЧР прокуратурин пресс-служби пӗлтернӗ тӑрӑх, администраци ҫуртӗнче ҫитменлӗхе пӗтернӗ, ҫурт тӑрринче чӑваш ялавӗ вӗлкӗшет.
Патӑрьел районӗнчи Кӗҫӗн Арапуҫ ялӗнче пурӑнакан 49 ҫулти арҫын икӗ ҫынна вӗлернӗшӗн суд сакки ҫине ларнӑ. Судья ӑна ҫирӗп режимлӑ колоние 18 ҫул та 3 уйӑх та 10 кунлӑха ӑсатма йышӑннӑ. Палӑртмалла: ҫак арҫын унччен ҫынна вӗлерессипе хӑратнӑшӑн судра явап тытнӑ.
Ҫак тискер ӗҫ 2018 ҫулхи юпа уйӑхӗн 15-мӗшӗнче ҫӗрле пулнӑ. 49-ти арҫын кӳршисем патне, 51-ти упӑшкипе 47-ри арӑмӗ патне, пирус ыйтма пынӑ. Анчах ӳсӗрскере алӑк уҫса кӗртмен, ку вара парӑнман – хӑйӗх пӳрте кӗнӗ. Хайхискер унта кил хуҫипе хирӗҫсе кайнӑ, ӑна кӑкӑрӗнчен ҫӗҫӗпе чикнӗ. Шӑв-шава илтсе арӑме вӑраннӑ, кӳрши ӑна мӑйӗнчен чикнӗ. Упӑшкипе арӑмӗ ҫавӑнтах вилнӗ, арҫын вара тухса кайнӑ.
Ҫак тискер ӳкерчӗке 9 ҫулти хӗрача, вилнӗ арҫынпа хӗрарӑмӑн хӗрӗ, курнӑ. Вӑл пытанма ӗлкӗрнӗ. Кайран вал урӑх ялта пурӑнакан аппӑшӗ патне шӑнкӑравласа ҫитме тӑрӑшнӑ, анчах укҫи пулман. Ирхине аппӑшӗ хӑй шӑнкӑравланӑ, ҫӗрле мӗн пулса иртни пирки тин пӗлнӗ.
Шупашкарта пурӑнакан 27 ҫулти арҫын айӑплине суд ҫирӗплетнӗ, 13-ри хӗрачана вилмеллех ҫапса хӑварнӑскере поселени колонине 2 ҫул та 1 уйӑхлӑха ӑсатма йышӑннӑ. Унсӑр пуҫне ҫамрӑк арҫыннӑн хӗрне пытарнӑ ашшӗ-амӑшне 1 миллион та 600 пин тенкӗ тӳлемелле. Кун пирки «ПроГород Чебоксары» кӑларӑм хыпарлать.
Хайхи ҫӑлкуҫ пӗлтернӗ тӑрӑх, иртнӗ ҫулхи юпа уйӑхӗн 8-мӗшӗнче каҫ кӳлӗм Ленинла Комсомол урамӗнче 27 ҫулти таксист ҫул урлӑ каҫакан шкул ачине ҫапса хӑварнӑ. Тренировкӑна кайма тухнӑскерӗн чӗри ҫавӑнтах тапма чарӑннӑ. Следстви вӑхӑтӗнче палӑртнӑ тӑрӑх, водитель ҫав вӑхӑтра ҫӑмӑл машинине сехетре 70 ҫухрӑм хӑвӑртлӑхпа хӑваланӑ тата ҫул-йӗр правилине пӑснӑ: светофорсӑр ҫул каҫмӑшӗ умӗн хӑвӑртлӑха чакарман.
Шупашкар районӗнчи Ҫӗньял вӑтам шкулӗн директорне судпа айӑпласшӑн. Вӑл тирпейлӳҫе ӗҫе илнӗ, анчах лешӗ хӑйӗн тивӗҫӗсене пурнӑҫламасӑрах шалу илнӗ. Кун пирки ЧР прокуратурин пресс-служби пӗлтерет.
Следовательсем шутланӑ тӑрӑх, 2016 ҫулхи утӑ уйӑхӗн 1-мӗшӗнче директор тирпейлӳҫе ӗҫе илмелли пирки суя хушу хатӗрленӗ. Анчах вӑл тирпейлӳҫӗ ӗҫлемессине пӗлнӗ, унӑн ӗҫӗсене ыттисем пурнӑҫланӑ. Ҫапла май ҫав ҫын ячӗпе Пенси фондне укҫа куҫарнӑ.
Прокуратура пуҫиле ӗҫе Шупашкар районӗн судне пӑхса тухма ярса панӑ.
+16.3 °C