Спорт ӑмӑртӑвӗсене пӑхма юратакансене паянхи кун чӑннипех те савӑнтарчӗ. Италире иртнӗ Тур де Ски ӑмӑртӑвӗнче Раҫҫейри икӗ спортсмен ӑнӑҫлӑ ӑмӑртрӗҫ. Вӗсем – Дарья Непряева тата Савелий Коростелев йӗлтӗрҫӗсем.
Ту тӑррине хӑпармалла ӑмӑртнӑ чухне Савелий тӑваттӑмӗш вырӑн йышӑнчӗ, Даша – улттӑмӗш.
Ҫапла вара Тур де Скин пӗтӗмӗшле зачётӗнче Савелий Коростелев саккӑрмӗш вырӑн йышӑнчӗ, Дарья Непряева – вуннӑмӗш.
Чӑваш Енри биатлонистка, Полина Архипова, Раҫҫей первенствинче бронза медале ҫӗнсе илнӗ.
Пушкӑртстанри Ӗпхӳ хулинче иртнӗ ӑмӑртура пике 17-18 ҫулсенчи хӗрсен хушшинче тупӑшнӑ. Вӑл Тутарстанри спортсменсемпе пӗр командӑра пулнӑ.
Полина Олимп резервӗсен Шупашкарти 2-мӗш спорт шкулӗнче вӗренет. Унӑн тренерӗсем — Вячеслав Акимов тата Михаил Ефимов.
2026 ҫулта Чӑваш Енре Сывлӑхпа спорт кунӗсем хӑҫан пуласси паллӑ. Йӑлана кӗнӗ тӑрӑх, акци кашни уйӑхрах иртӗ.
Ҫав кунсенче республикӑри спорт тата сывлӑха ҫирӗплетмелли учрежденисене, бассейнсене, тренажер залӗсене тӳлевсӗрех кӗме май пур.
Ҫитес ҫул сывлӑхпа спорт кунӗсем ҫак кунсенче иртӗҫ: кӑрлачӑн 24-мӗшӗнче, нарӑсӑн 21-мӗшӗнче, пушӑн 14-мӗшӗнче, акан 18-мӗшӗнче, ҫу уйӑхӗн 23-мӗшӗнче, ҫӗртмен 20-мӗшӗнче, утӑ уйӑхӗн 22-мӗшӗнче, авӑнӑн 19-мӗшӗнче, юпан 17-мӗшӗнче, чӳкӗн 21-мӗшӗнче тата раштавӑн 19-мӗшӗнче.
Чӑваш Енри Наталья Иванова Пӗтӗм Раҫҫейри ҫӑмӑл атлетика федерацийӗн премийӗн лауреачӗн ятне тивӗҫнӗ. Вӑл кӑҫалхи кӑтартусемпе чи лайӑх ача-пӑча тренерӗ пулса тӑнӑ.
Наталья Иванова тренерта 2017 ҫултанпа ӗҫлет. Вӑл – ҫӑмӑл атлетика енӗпе тӗнче класлӑ Раҫҫей спорт мастерӗ.
Палӑртса хӑварар: конкурсра мала тухассишӗн 114 ял-хулари 171 тренер тупӑшнӑ.
Чӑваш Енри спортсменсем Китайра кире спорчӗ енӗпе иртнӗ тӗнче чемпионатӗнче ылтӑн медальсем ҫӗнсе илнӗ.
Алексей Иванов 78 килограмм тайман спортсменсемпе вӑй виҫсе тӗнче чемпионӗ пулса тӑнӑ. Вӑл 32 килограмм таякан кире пуканне 302 хутчен ҫӗкленӗ.
Борис Глинкин вара ветерансен хушшинче виҫӗ хут тӗнче чемпионӗн ятне илнӗ. Малтан вӑл кире пуканне тӗртсе 201 хутчен йӑтнӑ. Тепӗр кунхине те ылтӑн медаль ҫӗнсе илнӗ.
Вӑрнар тӑрӑхӗнчи Ярмушка ялӗнче ҫуралса ӳснӗ спортсменка Надежда Лаврентьева Тунисра ветерансен хушшинче иртнӗ ӑмӑртура икӗ медаль ҫӗнсе илнӗ. Вӑл 20 тата 10 ҫухрӑм чупса икӗ «ылтӑн» ҫӗнсе илнӗ. Ӑмӑрту хӗрӳ иртнӗ – унта 25 ҫӗршыври спортсменсем хутшӑннӑ.
Палӑртса хӑварар: 61 ҫулти Надежда Алексеевна – ЧР культурӑн тава тивӗҫлӗ ӗҫченӗ тата ҫӑмӑл атлетика енӗпе спорт мастерӗн кандидачӗ.
Шупашкарти апатлану технологийӗпе коммерци техникумӗн студенчӗ Виталий Марков ҫар искусстви енӗпе иртнӗ тӗнче чемпионатӗнче ылтӑн медаль ҫӗнсе илнӗ. Ӑмӑрту Рим хулинче пулнӑ. Пирӗн ентеш «Solovyov Team» команда чысне хӳтӗленӗ.
Виталий 90 килограмран ытларах таякан спортсменсемпе вӑй виҫнӗ. Вӑл «Учкур» казак ҫапӑҫӑвӗнче 1-мӗш вырӑн йышӑннӑ, «Бокс-лайт» дисциплинӑра вара виҫҫӗмӗш пулнӑ.
Елчӗк округӗнчи спортсмен Раҫҫей шайӗнчи ӑмӑртура палӑрнӑ — вӑл чемпион пулса тӑнӑ. Илья Ишмуратов йывӑр атлетика енӗпе ветерансен хушшинче Орел облаҫӗнче иртнӗ Раҫҫей чемпионатне хутшӑннӑ. Пирӗн ентеш чи вӑйли пулнӑ — пӗрремӗш вырӑн йышӑннӑ.
Ӑмӑрту хӗрӳ иртнӗ. Помост ҫине Раҫҫейри тата Беларуҫри 140 ытла спортсмен тухнӑ. Пирӗн ентеш икӗ енлӗ тупӑшура пӗрремеш вырӑна тухнӑ.
Ҫакна та палӑртмалла: Илья Ишмуратов унччен йывӑр атлетика енӗпе Раҫҫей спорт мастерӗн ятне те илнӗ.
Патӑрьел округӗнчи тренера Эльфис Мтиева «Раҫҫейри корэш аталанӑвне тӳпе хывнӑшӑн» медальпе чысланӑ.
Вӑл «Паттӑр» спорт шкулӗнче ӗҫлет, корэш енӗпе Пӗтӗм Раҫҫейри ӑмӑртусен призерӗ, кӗрешӗвӗн наци тӗсӗсен Пӗтӗм тӗнчери пӗрремӗш вӑййисен призерӗ пулнӑ.
Вӑл тӑрӑшнипе вун-вун яш спорт мастерӗ, спорт мастерӗн кандидачӗ пулса тӑнӑ, Раҫҫей тата тӗнче шайӗнчи ӑмӑртусенче палӑрнӑ.
Шупашкарт ҫамрӑк спортсмен Кирилл Степанов, икӗ алӑсӑр ҫуралнӑскер, ӑмӑртура ылтӑн медаль ҫӗнсе илнӗ кӑна мар, хӑйӗн рекордне те ҫӗнетнӗ.
Вӑл хусканупа тӗрев енчен сусӑр спортсменсен хушшинче иртнӗ Раҫҫей Кубокне хутшӑннӑ. Вӑл браспа 100 метр ишсе пӗрремӗш вырӑн йышӑннӑ. Кирилл финиша хӑйӗн рекордӗнчен 4 ҫеккунт маларах ҫитнӗ.
Кирилл хӑйӗн ӗмӗтне пурнӑҫлама талпӑнать – вӑл 2028 ҫулта Паралимпиадӑна хутшӑнасшӑн.
-10.7 °C