Ҫулталӑк пуҫланнӑранпа ӗнерхи кун Чӑваш Енре чи ӑшши пулнӑ. Сывлӑш температури 18,3 градус таран ҫитнӗ. Анчах, синоптиксем пӗлтернӗ тӑрӑх, кӗҫех сивӗтӗ. Эппин, ӑшӑ тумсене халех пуҫтарса хумалла мар.

Ыран 17-2 градус таран ӑшӑ пулӗ. Анчах ҫил вӑйланӗ. Юнкун сивӗ фрончӗ ҫывхарма пуҫлӗ. Хушӑран ҫумӑр ҫӑвӗ. Аслати те авӑтма пултарӗ. Кӗҫнерникун кӑнтӑрла нумайран та 5-10 градус ӑшӑ тӑрӗ. Ҫӗрле шӑнтӗ. Юр ӳкме те пултарӗ.

Ҫу уйӑхӗнчи пӗрремӗш кунсенче сивӗ ҫанталӑк пулӗ. Малтанлӑха пӗлтернӗ тӑрӑх, ӑшӑ ҫанталӑк пирӗн пата пӗрремӗш декада варринче таврӑнӗ. Уявсем хыҫҫӑн сывлӑш температури 15-20 градуса ҫитӗ.

Ака уйӑхӗн варринче тем хулӑнӑш юр ҫуса лартни юлашки хутчен хӑҫан пулнӑ-ши? Ҫанталӑк кӗрхи пекех: сивӗ, йӗпе юр пӗрӗхет…

Юр ирӗлессе вӑрах кӗтме тивмӗ. Ку эрнере ҫумӑр ҫӑвӗ, унтан хӗвел пӑхӗ. Паллах, тин ҫунӑ юртан йӗр те юлмӗ.

Анчах, синоптиксем пӗлтернӗ тӑрӑх, хӗвеллӗ ҫанталӑк шупашкарсене ҫеҫ савӑнтарӗ. Ыран 3-8 градус ӑшӑ пулӗ. Юнкун пӗлӗтсем сирӗлӗҫ. Кӑнтӑр районсенче пӗлӗтсем хупӑрласа илӗҫ. Эрне варринче сывлӑш температури 8-10 градуспа танлашӗ.

Мӑнкуна 15 градус ӑшӑ пуласса шантараҫҫӗ. Ку – республикипех. Анчах синоптиксем каллех сивӗтме, юр ҫума пултарассине те асӑрхаттараҫҫӗ.

Ака уйӑхӗнче те ҫил-тӑман вӗҫтерет. Паян шӑпах ҫакна курса ӗненме тиврӗ. «Чӑваш Енри ҫанталӑк» проект синоптикӗсем пӗлтернӗ тӑрӑх, ака уйӑхӗ татах тӗлӗнтернӗ. Ҫитес вӑхатра юр хулӑнӑшӗ 6 см пысӑкланмалла.

Ыран юр та, ҫумӑр та ҫумӗ, хӗвел пахӗ. Юнкунпа кӗҫнерникун вара каллех ҫанталӑк пӑсӑлӗ: ҫил вӑйланӗ, йӗпе юр е ҫумӑр ҫӑвӗ.

Эрнекун 10 градус таран ӑшӑтӗ. Шӑматкун кӑшт ҫумӑр ҫӑвӗ. Вырсарникунпа тунтикун уяртӗ. Иккӗмӗш декада пуҫламӑшӗнче 15-20 градус таран ӑшӑтӗ. Малтанлӑха пӗлтернӗ тӑрӑх, акан 12-мӗшӗнче ҫӗрле сивӗтӗ. Каярахпа тата сивӗтме, юр ҫума, шӑнтма та пултарӗ.

Хӗлле ниепле те паранасшӑн мар. Синоптиксем пӗлтернӗ тӑрӑх,ҫитес кунсенче ҫанталӑк тӑрук улшӑнса тӑрӗ.

Паян каҫхинех ӑшӑтма тытӑнӗ, йӗпе юр, ҫумӑр ҫума пултарӗ. Ыран ҫӗрле те ӑшӑ тӑрӗ, вырсарникун вара термометр 11 градус таранах ӑшӑ кӑтартӗ, хушӑран ҫумӑр ҫӑвӗ. Ун чухне аслати те пӗрремӗш хутчен аватма пултарӗ, ҫав вӑхӑтра ҫил вӑйланӗ.

Тунтикун каллех хӗллене таврӑнӑпӑр, юр ҫӑвӗ. Ытларикун ӑшӑтӗ, хӗвел те пӑхӗ. Юнкун каллех ҫил вӑйланӗ. Ҫӗрле йӗпе юр ҫума пуҫлӗ. Гидрометцентр пӗлтернӗ тӑрӑх, пӗр эрнере 30 миллилитр ытла нӳрӗк ӳкме пултарӗ.

Акан 7-мӗшӗнчен республикӑра ҫанталӑк лайӑхланма пуҫлӗ. Ҫитес эрне вӗҫне 15-20 градус таранах ӑшӑтма пултарӗ.

Шупашкартан Краснодар крайне хӑҫан вӗҫме май пулӗ? Росавиаци улттӑмӗш хут ӗнтӗ Раҫҫей тӗп пайне тата кӑнтӑра вӗҫме чарать. Хальхинче ку чарӑва ака уйӑхӗн 7-мӗшӗччен тӑснӑ.

Ака уйӑхӗн 7-мӗшӗччен Анапа, Белгород, Брянск, Воронеж, Геленджик, Краснодар, Курск, Липецк, Дон ҫинчи Ростов, Симферополь, Элиста аэропорчӗсене вӗҫме май пулмӗ.

Авиакомпани пассажирсене урӑх маршрутсемпе – Сочи, Волгоград, Минеральные Воды, Ставрополь, Мускав аэропорчӗсемпе усӑ курса – илсе ҫӳреме сӗннӗ. Аса илтерер: ҫак маршрутсемпе нарӑс уйӑхӗн 24-мӗшӗнче вӗҫме чарнӑ.

artfile.ru сайтри сӑн

Чӑваш Ене каллех хӗл ҫитрӗ. Паян ирхине 7 градус сивӗ пулнӑ. Ҫил те самай кастаратчӗ.

Паян ҫӗрле вара пушшех те юр ҫуса лартӗ. Синоптиксем пӗлтернӗ тӑрӑх, Скандинави енчен килекен циклона пула 6-9 сантиметр хулӑнӑш юр ҫуса лартӗ. Ыран кӑнтӑрла кӑшт уяртӗ, ҫапах хушӑран йӗпе юр ҫӑвӗ. Ҫил ҫеккунтра 20 метр таран хӑвӑртлӑхпа вӗрме пултарӗ.

Акан 2-мӗшӗнче юр тата нумайрах ҫумалла. Анчах хальлӗхе паллӑ мар: тен, ҫумӑр ҫӑвӗ. Украина енчен килекен циклон ҫитсен 10 градус таранх ӑшӑтма пултарӗ. Анчах акан 4-мӗшӗнче каллех юр ҫӑвӗ.

Хӑҫан ӑшӑтӗ тата уяртӗ? Хальлехе синоптиксем калама тӑхтаҫҫӗ.

Юлашки вӑхӑтра питӗ хитре ҫанталӑк тӑчӗ. Пуш уйӑхӗн 20-мӗшӗнчен сывлӑш температури 0 градусран ӑшӑрах пулчӗ. Пӗр эрнере юр хулӑнӑшӗ самай чакрӗ.

Анчах синоптиксем республикӑна хӗллехи ҫанталӑк таврӑнассине систереҫҫӗ. Ыран ҫил вӑйлӑрах пулӗ, 6 градус таран ӑшӑ тӑрӗ. Каҫ енне ҫумӑр та ҫӑвӗ. Вырсарникун вара йӗпе юр ҫума тытӑнӗ.

Тунтикун термометр 0 градус кӑтартӗ, анчах 10-15 градус сивӗ пек туйӑнӗ. Апла каллех хӗллехи тума туртса кӑларма тивӗ. Ытларикун пире чӑн-чӑн хӗллехи ҫанталӑк кӗтет: юр ҫуса лартӗ, 3-8 градус сивӗ тӑрӗ. Пушӑн 30-31-мӗшӗнче те сивӗ ҫанталӑк тӑрӗ.

Ҫитес эрне вӗҫне вара термометр 5-7 градус ӑшӑ кӑтартӗ.

Календарьте - ҫуркунне. Анчах ҫанталӑк хальлӗхе хӗллехи пекех сивӗ тӑрать. Хӑҫанччен?

Синоптиксем пӗлтернӗ тӑрӑх, кун пек сивӗ ҫанталӑк пуш уйӑхӗн 12-мӗшӗччен тӑрӗ. Ыран та кӑштах юр ҫӑвӗ. Пуш уйӑхӗн 9-мӗшӗнчен каллех уяртӗ. Сывлӑш температури 5-10 градус пулӗ, ҫӗрлесерен - 15-20 градус. Вырӑнӑн-вырӑнӑн 25 градус таранах сивӗтӗ.

Иккӗмӗш декада пуҫламӑшӗнче пирӗн пата ӑша килӗ. Антициклона пула уяр ҫанталӑк тӑрӗ.

Синоптиксем малтанлӑха пӗлтернӗ тӑрӑх, ӑшӑ ҫуркунне 10 кун маларах пуҫланма пултарӗ.

Ыран республикӑра ҫил самай вӑйланать, ҫил-таман тухать. Каҫхине ҫил ҫеккунтра 19-21 метр хӑвӑртлӑхпа вӗрӗ. Атмосфера пусӑмӗ 736 мм ҫитӗ. Ыран каҫ енне уяртӗ те сивӗтме тытӑнӗ.

Вырсарникун ирхине 14 градус сивӗ пулӗ. Ҫил вара лӑпланӗ. Пушӑн 7-8-мӗшӗсенче юр ҫӑвӗ. Анчах ҫапах сивӗ ҫанталӑк тӑрӗ. Каҫсерен 20-25 градус таранах сивӗтме пултарӗ.

Савӑнтараканни вара – хӗвел. Хӗвел пӑхни кама савӑнтармӗ. Иккӗмӗш декада пуҫламӑшӗнче 2-7 градус таран ӑшӑтӗ. Пушӑн 11-12-мӗшӗсенче кӑштах юр ҫӑвӗ.

Ҫуркунне питӗ хитре ҫанталӑкран пуҫланчӗ: ӑшӑ, хӗвел пӑхать. Нарӑс уйӑхӗ те нормӑран 6 градус ӑшӑрах пулчӗ. Нивушлӗ ҫуркунне ҫавӑн пек ир пулӗ?

Синоптиксем савӑнтарма васкамаҫҫӗ. Вӗсем пӗлтернӗ тӑрӑх, хальлӗхе хӗл парӑнман-ха. Вӑл кӗҫех ҫуркуннене ура хурӗ. Ҫитес кунсенче кӑнтӑрла 5-10 градус сивӗ тӑрӗ, ҫӗрле – 15-20 градус.

Иккӗмӗш декадӑра каллех ӑшӑтать, уйӑх варринче термометр «+» кӑтартма пуҫлать.

Пӗтӗмӗшле илсен, пуш уйӑхӗнче юр ытлах ҫумасть. Антициклона пула уйӑх тӑршшӗпех хӗвеллӗ ҫанталӑк тӑрӗ. Пушӑн 7-8-мӗшӗсенче юр ҫӑвӗ. Ҫапах ҫанталӑк сивӗ тӑнине пула юр часах ирӗлмӗ. Унӑн хулӑнӑшӗ 40-50 сантиметр тӑрӗ.