Нарӑс уйӑхӗн 19-мӗшӗнче Шупашкарта Никита Михайлков режииссёрпа тӗл пулу иртӗ. Унпа курнӑҫас тесен «Атӑл Опера» театра каймалла.
Пултарулӑх каҫӗнче Никита Сергеевич ҫӗршывра тата тӗнчере пулса иртекен пулӑмсем пирки те каласа кӑтартӗ, «БесогонТВ» автор программин уйрӑм пайӗсене кӑтартӗ. Тата, паллах, хӑйӗн пултарулӑх ӗҫӗнчи аса юлнӑ самантсене аса илӗ.
Тӗлпулу 18 сехет те 30 минутра пуҫланӗ. Ыйтса пӗлмелли телефон номерӗ 8 (8352) 58-00-96.
Кӑрлач уйӑхӗн 30-мӗшӗнче Чӑваш патшалӑх академи драма театрӗнче Пётр Осиповӑн астӑвӑм каҫне пуҫтарӑнӗҫ.
Вӑл — Чӑваш АССР искусствӑсен тава тивӗҫлӗ ӗҫченӗ, РСФСР тава тивӗҫлӗ врачӗ, чӑваш халӑх писателӗ, актер, драматург, медицина наукисен кандидачӗ. Пётр Осипов ҫуралнӑранпа кӑҫал 125 ҫул ҫитет.
Литературӑпа вӑл 1916 ҫул хыҫҫӑн хастар ӗҫленӗ. 1927-1930 ҫулсенче Чӑваш драма театрӗн тӗп режиссёрӗ пулнӑ. Хӑй вал 20 ытла пьеса ҫырнӑ. Вӗсем чӑваш драматургийӗн ылтӑн фончӗ пулса тӑнӑ.
Чӑваш патшалах академи драма театрӗнче Валерий Яковлев режиссёра сума суса форум иртӗ. Унта режиссёрӑн пурнӑҫӗпе пултарулӑхне халалланӑ конкурссене хутшӑннӑ ҫамрӑксене йыхравлаҫҫӗ.
Мероприяти чӳк уйӑхӗн 23-мӗшӗнче 10:00 сехетре Чӑваш академи драма театрӗнче пуҫланӗ. Ҫӗнтерӳҫӗсене чыслама Валерий Яковлев хӑй те хутшӑнӗ.
Форумра хутшӑнас шухӑшлӑ ҫамрӑксен ҫакӑнта https://forms.yandex.ru/u/672a0257c417f322ac5c3f31/ регистрациленмелле.
Юхма Мишшин повеҫӗ тӑрӑх Марат Никитин режиссёр ӳкернӗ «Истори деда Азамбая» фильм ҫитес эрнере проката тухӗ. Ӑна юпа уйӑхӗн 31-мӗшӗнче Шупашкарти «Ҫеҫпӗл» кинотеатрта 13 сехет те 30 минутра кӑтартӗҫ. Унсӑр пуҫне фильма ҫавӑнтах чӳк уйӑхӗн 2-мӗшӗнче 14 сехет те 30 минутра кӑтартӗҫ. Билет хакӗ — 200 тенкӗ.
Фильма ӳкерме 1 миллион тенкӗ тухса кайнӑ. «Ҫамрӑксен хаҫатӗнче» пӗлтернӗ тӑрӑх, рольсене Ҫеҫпӗл Мишши ячӗллӗ Чӑваш патшалӑх ҫамрӑксен театрӗн артисчӗсем тӳлевсӗр вылянӑ. Тӗп роле, Азамбая, РФ тава тивӗҫлӗ артисчӗ, Чӑваш халӑх артисчӗ Василий Павлов калӑпланӑ.
К.В. Иванов ячӗллӗ Чӑваш патшалӑх академи драма театрӗн режиссёрӗ, художник-постановщикӗ, актёрӗ президент пулӗ.
Асӑннӑ театрта ҫавӑн пек должноҫа ҫирӗплетесси пирки ӗнер юбилей каҫӗнче пӗлтерчӗҫ. Кун пирки Чӑваш Ен Элтеперӗн Олег Николаевӑн вырӑсла саламне республикӑн вице-премьерӗ — ял хуҫалӑх министрӗ Сергей Артамонов юбиляр патне ҫитернӗ чухне палӑртса хӑварнӑ.
«Чӑваш патшалӑх академи драма театрӗн президенчӗн ҫӗнӗ должноҫне ҫирӗплетме сӗнетӗп», — тесе ҫырнӑ Олег Николаев халӑх тетелӗнчи хӑйӗн страницинче те. Республика ертӳҫи палӑртса хӑварнӑ тӑрӑх, Валерий Яковлев кун пек чыса чӑваш театр ӳнерӗнче нумай ҫул тӑрӑшса ӗҫленипе тивӗҫнӗ.
Ӗнер, юпа уйӑхӗн 24-мӗшӗнче, К.В. Иванов ячӗллӗ Чӑваш патшалӑх академи драма театрӗнче культура учрежденийӗн илемлӗх ертӳҫин Валерий Яковлевӑн 85 ҫулхине халалланӑ юбилей каҫӗ иртрӗ.
Валерий Яковлев чӑваш ӳнерӗшӗн, культуришӗн, йӑли-йӗркишӗн чунне парса ӗҫлени пирки сцена ҫине тухнӑ тӗрлӗ хӑна, ҫав шутра тӳре-шара та, палӑртса хӑварчӗ. РФ Патшалӑх Думин депутачӗ Анатолий Акасаков, сӑмахран, сумлӑ режиссёрпа иртнӗ ӗмӗрӗн 90-мӗш ҫулӗсенче паллашнине, самана пӑтраннӑ, ҫӗршыв арканнӑ вӑхӑтра Валерий Николаевич ӳнершӗн чунне ыраттарса калаҫнине аса илчӗ. Юбиляра саламлама Тутарстанри тата Мари Элти ӗҫтешӗсем килнӗ, Савватий митрополит та пулчӗ.
К.В. Иванов ячӗллӗ Чӑваш патшалӑх академи драма театрӗн тӗп режиссерне Валерий Яковлева Чӑваш Республикин Хисеп грамотипе чыслама йышӑннӑ. Ун пек хушӑва республика Элтеперӗ Олег Николаев юпа уйӑхӗн 15-мӗшӗнче ала пуснӑ, документа влаҫ органӗсен официаллӑ порталӗнче ӗнер вырнаҫтарнӑ.
Валерий Яковлев нумаях пулмасть 85 ҫул тултарчӗ. Чӑваш патшалӑх академи драма театрӗнче вӑл Мускаври театр институтӗнчен вӗренсе тухнӑранпах ӗҫлет.
Ӗнер, авӑн уйӑхӗн 25-мӗшӗнче, режиссер, сценограф, тӑлмач, профессор, СССР халӑх артисчӗ, патшалӑх премийӗне лауреачӗ, Шупашкар хулин тата Чӑваш Республикин хисеплӗ ҫынни, Чӑваш патшалӑх академи драма театрӗн илемлӗх ертӳҫи Валерий Яковлев 85 ҫул тултарнӑ.
Сцена ӑсти Шӑмӑршӑ районӗнчи Виҫпӳрт Шӑмӑршӑ ялӗнче ҫуралнӑ. Актер тата режиссер ӑсталӑхне Мускавра, Театр ӳнерӗн А.В. Луначарский ячӗллӗ патшалӑх институтӗнче вӗреннӗ.
Чӑваш патшалӑх академи драма театрӗнче 57 ҫул ытла ӗҫлет.
Авӑ уйӑхӗн 25-мӗшӗнче СССР халӑх артисчӗ, К.В. Иванов ячӗллӗ Чӑваш патшалӑх академи драма театрӗн режиссёрӗ Валерий Яковлев 85 ҫул тултарӗ. Ҫак куна культура учрежденийӗнче сумлӑн уявлама палӑртаҫҫӗ. Анчах — ҫитес уйӑхра.
Юпа уйӑхӗн 24-мӗшӗнче театрта «Чӑваш кӗввипе» ятпа юбилей каҫӗ ирттерӗҫ.
Юпан 19-26-мӗшӗсенче Валерий Яковлев лартнӑ спектакльсен фестивалӗ пулӗ. Ҫав вӑхӑтра «Инкеклӗ телей» драма, «Уйрӑлу каҫӗ» мелодрама, «Хӗрлӗ кӗпеллӗ телей» драма, «Туя туй пек тӑвар-и?» камит, «Пилӗк пӑтлӑ юрату» трагикамит, «Ялта» музыкӑллӑ драма кӑтартӗҫ.
Чӑваш патшалӑх ҫамрӑксен театрӗнче Гримм пӗртӑвансен юмахӗпе «Бременские музыканты» мюзикл лартма хатӗрленеҫҫӗ. Премьерӑна авӑн уйӑхӗн 14-мӗшӗнче кӑтартӗҫ. Трубадурпа унӑн тусӗсен мыскарисем ҫинчен каласа кӑтартакан ӗҫпе театрӑн тӗп режиссёрӗ Дмитрий Михайлов ӗҫлет. Мюзикла театрти пӗтӗм труппа тенӗ пекех хутшӑнӗ.
Мюзиклти юрӑсен авторӗ – Игорь Столяров музыкант тата композитор. Унпа театр унччен те килӗштерсе ӗҫленӗ. Художник-постановщикӗ — Питӗрти Мария Шуплецова. Вӑл маларах Марина Карягина пьеси тӑрӑх «Ҫӗн Кун Ачи», Михаил Лермонтовӑн «Мцыри» ӗҫне лартма хутшӑннӑ.
Пластика режиссёрӗ — Пушкӑртстанӑн искусствӑсен тава тивӗҫлӗ ӗҫченӗ тата тава тивӗҫлӗ артисчӗ Рамиз Мухаметшин. Вӑл чӑваш театрӗнче «Снежная королева» юмах, «Ҫӗн Кун Ачи», «Шурҫамка», «Куккук куҫҫулӗ» спектакльсем лартма хутшӑннӑ.
+6.3 °C
