Чӑваш Енӗн Конкурентлӑ политика тата тариф службинче нумаях пулмасть кадр улшӑнӑвӗ пулса иртнӗ. Асӑннӑ тытӑмӑн ертӳҫин заместителӗ пулма Татьяна Копеевӑна шаннӑ. Ку йышӑнӑва республика Элтеперӗ Олег Николаев пуш уйӑхӗн 4-мӗшӗнче алӑ пуснӑ.
Татьяна Александровна, эпир пӗлнӗ тӑрӑх, унччен те ЧР Конкурентлӑ политика тата тариф службинче ӗҫленӗ. Унта вӑл пай пуҫлӑхӗнче тӑрӑшнӑ. Халӗ ҫав хӗрарӑма яваплӑрах вырӑнта ӗҫлеме шанса панӑ.
Пӗлтӗр Красноармейски тата Ҫӗмӗрле районӗсем муниципалитет округӗсем пулса тӑнӑ. Вӗсем хыҫҫӑн ытти 19 район та ҫулталӑк вӗҫлениччен ҫак статуса илме хатӗррине пӗлтернӗ.
Ҫакна влаҫ органӗсене централизацилес тӗллевпе тӑваҫҫӗ. Ҫак статуса илсен ял тӑрӑхӗсен депутачӗсем пулмӗҫ, муниципалитет шайӗнчисем ҫеҫ юлӗҫ. Тӳре-шара ӗнентернӗ тӑрӑх, халӑхӑн пурнӑҫ шайӗ ӳсӗ. Управлени ӗҫӗсем хӑвӑртланӗҫ, яваплӑх тата финанс ресурсӗсем пӗр алӑра пулӗҫ.
Аса илтерер: республикӑри районсен пуҫлӑхӗсене халӑха суйлаттармалла тӑвасшӑн.
Чӑваш Енри тӳре-шара халӑха район-хула администрацийӗсен пуҫлӑхӗсене суйлама май туса парасшӑн. Кун пирки республика Правительствин пресс-служби пӗлтернӗ.
Анчах тӳре-шаран малтан ку ыйтӑва тӗплӗн сӳтсе явмалла.
"Эпӗ район-хула пуҫлӑхӗсене халӑх суйланине ырлатӑп. Анчах малтан йӑлтах виҫмелле, сӳтсе явмалла", - тенӗ ЧР Элтеперӗ Олег Николаев.
Аса илтерер: республикӑра районсем майӗпен муниципалитет округӗ пулса пыраҫҫӗ.
Чӑваш Ен Элтеперӗ Олег Николаев хӑйӗн шалӑвӗн пӗр пайне Донбасс ҫыннисем валли уйӑрса пама йышӑннӑ. Кун пирки вӑл Патшалӑх Канашӗнче политика партийӗсен ертӳҫисемпе тӗл пулсан каланӑ.
"Пӗрле" фонд Донбасс валли укҫа пухма тытӑннӑ. Олег Алексеевич ӗҫ укҫин пӗр пайне фонда хывӗ.
Олег Николаев хальхи ҫӑмӑл мар лару-тӑрура салтаксене, Луганск тата Донецк облаҫӗсенче пурӑнакансене пулӑшни пӗлтерӗшлӗ пулнине палӑртнӑ.
Чӑваш Енӗн Ҫутҫанталӑк ресурсӗсен тата экологи министрӗн пӗрремӗш ҫумӗ пулса ӗҫленӗ Александр Ефремова ӗҫ вырӑнӗпе усӑ курнӑ тесе ирӗкрен хӑтармасӑр 1,5 ҫуллӑха айӑпланӑ. Унсӑр пуҫне унӑн патшалӑх органӗсенче ҫитес 2 ҫулта ӗҫлеме юрамӗ. Вӑл патшалӑха тӑкак кӳнӗ тесе ӑна 21 миллион тенкӗ тӳлеттерме йышӑннӑ. Приговор хальлӗхе саккунлӑ вӑя кӗмен-ха.
Суд палӑртнӑ тӑрӑх, Александр Ефремов министрӑн пӗрремӗш ҫумӗнче ӗҫленӗ вӑхӑтра 2016 ҫулхи раштав уйӑхӗн 23-мӗшӗнчен тытӑнса 2017 ҫулхи пуш уйӑхӗн 9-мӗшӗччен Шӑмӑршӑ районӗнчи вӑрман хуҫалӑхӗнче 3,6 гектар ҫинче вӑрман касма ирӗк панӑ. Вӑл вӑрман ҫӗр ҫийӗннинчен сыхлаканскер пулнӑ, ҫав лаптӑкри йывӑҫсене калӑпӑшӗпех касма юраман. Сӑр юханшывӗ хӗрринче хӑйӑр кӑларма та вӑлах ирӗк панӑ.
Шупашкар районӗнче администраци пуҫлӑхне суйлӗҫ. Иртнӗ уйӑхӑн юлашки кунӗнче Депутатсен пухӑвӗн 14-мӗш черетсӗр ларӑвӗ иртнӗ. Унта депутатсемпе пӗрлех структура подразделенийӗсен ертӳҫисем хутшӑннӑ. Райадминистраци пуҫлӑхӗ Николай Хорасев та пулнӑ. Пухӑва район пуҫлӑхӗ Виктор Михайлов ертсе пынӑ.
Кун йӗркине кӗртнӗ ыйту Шупашкар район администрацийӗн пуҫлӑхне суйлас енӗпе конкурс комиссийӗ ирттересси пулнӑ.
Район администрацийӗн пуҫлӑхне суйламалли конкурс комиссине ӗнер, пуш уйӑхӗн 1-мӗшӗнче, республика шайӗнче те ҫирӗплетнӗ.
Кӑрлач уйӑхӗн 24-мӗшӗнче Петр Краснова Чӑваш патшалӑх гуманитари ӑслӑлӑхӗсен институчӗн директорӗн должноҫӗнчен кӑларнӑччӗ. Вӑл ӑна 5 ҫул ертсе пынӑ.
Паян институтра кам директор пуканне йышӑнасси паллӑ пулнӑ. Ҫав ҫыннах – Петр Краснов.
Петр Степанович 1956 ҫулта Комсомольски районӗнче Кӗҫӗн Каҫал ялӗнче ҫуралнӑ. 1994-2005 ҫулсенче информаципе пичет министрӗ пулнӑ. 2011 ҫултанпа – ЧР Патшалӑх Канашӗн депутачӗ. 2002 ҫултанпа – «Пӗрлӗхлӗ Раҫҫей» парти пайташӗ.
Пирӗн ҫӗршыв урлӑ 36 ҫӗршыв самолёчӗсене вӗҫсе иртме чарнӑ. Ҫакӑ — Раҫҫейри авиакомпанисен самолёчӗсене хӑйсен территорийӗ урлӑ вӗҫтерме Европӑри тата тӗрлӗ вырӑнти хӑш-пӗр ҫӗршыв чарнӑран тунӑ йышӑну.
Раҫҫей урлӑ вӗҫсе каҫма Австрири, Албанири, Ангильяри, Бельгири, Болгаринчи, Британири Виргинский утравӗсене, Великобританири, Венгрири, Германири, Гибралтарти, Грецири, Данири (ҫав шутра — Гренланди, Фарер утравӗсем, Территори тинӗсӗ), Джерсинчи, Ирландири, Исландири, Испанири, Италири, Канадӑри, Кипрти, Латвирии, Литвари, Люксембургри, Мальтӑри, Нидерландри, Норвегири, Польшӑри, Португалири, Румынири, Словакири, Словенири, Финляндири, Францири, Хорватири, Чехири, Швецири, Эстонири авиакомпанисене чарнӑ.
Чӑваш Республикин Граждан оборони тата чрезвычайлӑ лару-тӑру енӗпе ӗҫлекен патшалӑх комитечӗн председательне Олег Яковлева паян, нарӑс уйӑхӗн 25-мӗшӗнче, ӗҫрен кӑларнӑ.
Республика Элтеперӗн Олег Николаевӑн хушӑвӗнче Олег Яковлева ӗҫрен мӗншӗн кӑларнине те пӗлтернӗ. Олег Николаевич пуҫлӑх тилхепине хӑй пӑрахас тенӗ-мӗн.
Олег Яковлев 1969 ҫулта Канаш районӗнчи Шаккӑлта ҫуралнӑ. И.Я. Яковлев ячӗллӗ Чӑваш патшалӑх пединстиутӗнче вӗреннӗскер ӗмӗрне Шалти ӗҫсен министерствин тытӑмӗнче ӗҫлесе ирттернӗ. Вӑл Чӑваш Енре кӑна мар, Ненецк автономи облаҫӗнче те тӑрӑшнӑ.
Чӑваш Республикин Граждан оборони тата чрезвычайлӑ лару-тӑру енӗпе ӗҫлекен патшалӑх комитечӗн председателӗн тивӗҫне пурнӑҫлама Сергей Павлова шаннӑ.
Чӑваш Енрен РФ Патшалӑх Думине суйланнӑ 4 депутат тӗлӗшпе Евросоюз санкци йышӑннӑ. Асӑннӑ списока Анатолий Аксаков («Тӗрӗслӗхшӗн Раҫҫей»), Алена Аршинова («Пӗрлӗхлӗ Раҫҫей»), Алла Салаева («Пӗрлӗхлӗ Раҫҫей») тата Ирина Филатова (Раҫҫей Федерацийӗн коммунистсен партийӗ) лекнӗ.
Ҫак утӑма Евросоюз РФ Патшалӑх Думин депутачӗсем Донецк Халӑх Республикине тата Луганск Халӑх Республикине уйрӑм патшалӑх тесе йышӑнма ыйтса Президент патне ҫыру янӑшӑн тунӑ. Санкцие РФ Патшалӑх Думин 450 депутатӗнчен 351-шӗ тӗлӗшпе йышӑннӑ. «Ҫӗнӗ ҫынсем» фракци депутачӗсем маларах эпир асӑннӑ икӗ республикӑна ратификацилессине хирӗҫ сасӑланӑ. Тепӗр 50-а яхӑн депутат сасӑлава тӗрлӗ сӑлтав тупса хутшӑнман.
Ятарлӑ списокри депутатсем Евросоюз ҫӗршывӗсене каяймӗҫ, хӑйсен активӗсемпе союз территорийӗнче усӑ кураймӗҫ.
+3.3 °C