Чӑваш Енӗн Ял хуҫалӑх министерствинче агромаркет тӑвас ыйтӑва сӳтсе явнӑ. Ун пекки Раҫҫейре хальлӗхе ҫук-ха.
Видеоконференцҫыхӑну мелӗпе йӗркеленӗ канашлӑва республикӑн вице-премьерӗ — ял хуҫалӑх министрӗ Сергей Артамонов ертсе пынӑ.
Хӑйсен сӗнӗвӗсемпе «Земский групп», «Архитектурное бюро А4», «Market concept», «Северконцепт» тулли мар яваплӑ обществӑсем тата ыттисем паллаштарнӑ.
Агромаркета кӑҫал уҫасшӑн. Унта вырӑнти производительсем туса илекен ял хуҫалӑх продукцине сутма палӑртаҫҫӗ.
Паян кӑнтӑрла Ҫӗмӗрле хулинче лавкка ҫуннӑ. Щербаков урамӗнчи "Спектр" лавккан складӗнче ҫулӑм тухни пирки 12 сехет те 35 минутра пӗлтернӗ.
Вырӑнта ҫӑлавҫӑсем, полицейскисем, электриксемпе газовиксем те ӗҫленӗ. Васкавлӑ медпулӑшу та ҫитнӗ.
Юрать, пушарта шар курнисем пулман.
Шупашкар хула администрацийӗн ӗҫченӗсем кашни эрнерех 11 лавккари хаксене тишкерсе тӑраҫҫӗ. Кӑрлач уйӑхӗн 10-17-мӗшӗсенче хаксем мӗнле улшӑннине пӗлтернӗ.
Шурӑ ҫӑнӑх, сахӑр, аш-какай консерви, макарон, тӑвар, чӑх какайӗ, сӗлӗ кӗрпи, шӑнтнӑ пулӑ, сӗт, сысна какайӗ, услам ҫу йӳнелнӗ. Сахӑрӑн, чӑх какайӗн, шурӑ ҫӑнӑхӑн хакӗ ытларах чакнӑ.
Вир тата хура тул кӗрписем, ҫӗрулми, сгущенка, шыв, хура чей, сухан, пан улми, шурӑ ҫӑкӑр хакӗсем кӑшт ӳснӗ, анчах 1 тенкӗрен ытла мар.
Ҫӗнӗ ҫул умӗн, иртнӗ ҫулхи раштав уйӑхӗнче, Шупашкарти лавккасенчен пӗринчен вӑлча вӑрланӑ. Ленинла Комсомол урамӗнче вырнаҫнӑ магазинтан 25 банка хӗрлӗ вӑлча ҫухалнӑ. Укҫа ҫине куҫарса шутласан, тӑкак 10 пин тенке яхӑн ларнӑ.
Пӑтӑрмах пирки сутуҫӑсем йӗрке хуралҫисене пӗлтернӗ хыҫҫӑн пакунлисем пуҫиле ӗҫ пуҫарнӑ. Халь йӗри-тавра камерӑсем лараҫҫӗ те, часах вӑрӑ йӗрӗ ҫине ӳкнӗ. Вӑл 22 ҫулти ҫамрӑк пулнӑ. Каччӑ унччен те пӑтӑрмаха ҫакланнӑ. Пакунлисене хайхискер питӗ ӳкӗннине пӗлтернӗ, тӑкака саплаштарма шантарнӑ.
Йӗрке хуралҫисем ҫынна тӳрех ӗненсе лартма васкамаҫҫӗ те, каччӑ кӑҫалхи кӑрлачӑн 11-мӗшӗнче Кадыков урамӗнчи лавккаран тӗрлӗ тавар 6 пине яхӑн тенкӗлӗх вӑрлани ҫиеле тухнӑ.
Шупашкарти пӗр аслӑ шкулта вӗренекен студентка, Египетран килнӗскер, лавккаран япаласем вӑрласа тухма хӑтланнӑ. Алӑк патӗнче ӑна хуралҫӑсем тытса чарнӑ.
Ун тӗлӗшпе пуҫарнӑ пуҫиле ӗҫе суда ярса панӑ. Следстви версийӗ тӑрӑх, юпан 31-мӗшӗнче вӑл Трактор тӑвакансен проспектӗнче вырнаҫнӑ лавккаран тӗрлӗ япала вӑрласа тухма хӑтланнӑ, вӗсене кутамккана чикнӗ. Урапа ҫинче выртакан таваршӑн кӑна укҫа тӳленӗ вӑл. Анчах алӑк патӗнче ӑна хуралҫӑсем тытса чарнӑ.
Чӳк уйӑхӗн варринче Куславкка районӗнчи Елчӗк ялӗнче лавккана арҫын кӗрсе сутуҫӑран укҫа хӑмсарса ыйтнӑ. Ку каҫхине пулса иртнӗ.
Сутуҫӑ кассӑна питӗрсе айккинелле пӑрӑннӑ. Арҫын вара унта выртакан ҫӗҫҫе ярса тытнӑ та хӑратма пуҫланӑ. Хӗрарӑм урама чупса тухса пулӑшу ыйтса кӑшкӑрнӑ. Кун хыҫҫӑн арҫын тарса ҫухалнӑ.
Ку ӗҫе 46 ҫулти арҫын, унччен те судпа айӑпланнӑскер, тунӑ тесе шутлаҫҫӗ. Ӑна хӑйӗн ялӗнче тытса чарнӑ. Вӑл айӑпне йышӑннӑ, ҫӗҫҫе ӑҫта ывӑтнине те кӑтартнӑ.
Ун тӗлӗшпе пуҫиле ӗҫ пуҫарнӑ.
Шупашкар хулинче пурӑнакан 73 ҫулти хӗрарӑм иртнӗ эрнере ултавҫӑсен аллине чутах ҫакланман. Капкӑна ҫакланасран хӗрарӑма карас ҫыхӑнӑвӗн лавккинче ӗҫлекенсем вӑхӑтра тытса чарнӑ.
Карчӑк патне ҫав кун ултӑ сехет хушшинче 18 номертан шӑнкӑравланӑ. Паллӑ мар ҫынсем кинемее банкри укҫана ултавҫӑсенчен «сыхласа хӑварма» тупрана урӑх счёт ҫине куҫарма ӳкӗте кӗртме хӑтланнӑ.
Хӗрарӑм ӗненнӗ, банкри 500-е яхӑн пин тенке илнӗ те Калинин урамӗнчи суту-илӳ центрӗнчи карас ҫыхӑнӑвӗн лавккине укҫа куҫарма кайнӑ. Анчах унта ӗҫлекенсем хӗрарӑма ултавран тытса чарнӑ.
Карчӑка улталама хӑтланнӑ тӗслӗхпе йӗрке хуралҫисем пуҫиле ӗҫ пуҫарнӑ.
Юлашки темиҫе уйӑхра пирӗн ҫӗршыв тӗрлӗ санкцие парӑнмасӑр экономикӑна аталантарма ҫине тӑрса тӑрӑшать. Пирӗн патра ӗҫлеме пӑрахнӑ пысӑк усламҫӑсем вырӑнне вырӑнтисем йӑпӑр-япӑр йышӑнаҫҫӗ.
Шупашкарта, ав, «Букет Чувашии» фирма «Кока-Кола» тата «Фанта» евӗр пылак шыв кӑларма тытӑннӑ. Газлӑ ҫав шыва авӑн уйӑхӗн 1-мӗшӗнче кӗленчене пуҫласа тултарнӑ.
«Кока-Кола» тата «Фанта» евӗр тутиллӗ пылак шыва хальлӗхе Шупашкарти лавккасенче, «Дикий Лось» тата «Сахарок» суту-илӳ сечӗсен магазинӗсенче сутаҫҫӗ. Ҫывӑх вӑхӑтра продукцие федерацин Атӑлҫи тӑрӑхӗнчи регионӗсене ӑсатма палӑртаҫҫӗ.
Шупашкарта Раҫсейре халиччен пулман ӑшӑпа тивӗҫтерекен мультимеди центрӗ ӗҫлӗ. Вӑл ҫынсене ҫурла уйӑхӗн 24-мӗшӗнчен пуҫласа авӑн уйӑхӗн 6-мӗшӗччен йышӑнӗ.
Ӑшӑ энергетикин музейӗ — мультимеди комплексӗ. Ӑшӑ электричество станцийӗ епле ӗҫленине, хӑш топливо энергие пуринчен ытла упрани ҫинчен, хӗлле хватерте ытла пӑчӑ е ытла сивӗ пулсн камран пулӑшу ыйтмалли таранах ҫынсем унта пӗлейӗҫ.
Стратеги коммуникацийӗсен регионти центрӗн ертӳҫи Олег Сидоров пӗлтернӗ тӑрӑх, кмоплексра ачасем валли интерактивлӑ вӑйӑсем йӗркеленӗ.
Мультимеди центрне тӳлевсӗр кӗртӗҫ. Унта пулса курас тесен +7 908 840 84 04 телефонпа ирхи 10:00 сехетрен 19:00 сехетчен шӑнкӑравламалла е teplomuseum.ru сайта кӗмелле. Экскурсие ҫырӑнма 3 минутран ытла вӑхӑт иртмӗ.
Интерактивлӑ курав «МегаМолл» суту-илӳ центрӗн аялти парковкинче (Шупашкар хулин, Калинин урамӗ, 105 А ҫурт) вырнаҫнӑ. Музей ҫурла уйӑхӗн 24-мӗшӗнче 12 сехетре уҫӑлӗ.
Шупашкарти ҫамрӑк лавккари телефона укҫа тӳлемесӗр йӑтса тухса кайнӑ. Халӗ каччӑ тӗлӗшпе пуҫиле ӗҫ пуҫарнӑ.
Каччӑ 90 пине яхӑн тенкӗ тӑракан телефона интернет урлӑ саккас парса туянма шухӑш тытнӑ. Хаклӑ гаджет интернет-лавккан тавар паракан пунктне ҫитнӗ. Йӗрке тӑрӑх, ҫын малтан тавар илет, унтан уншӑн укҫа тӳлет. Каччӑ суту-илӳ йӗркин пӗр пайне пӑхӑннӑ, анчах иккӗмӗшне — ҫук. Вӑл телефоншӑн укҫа тӳлемен — тавара илсе тухса кайнӑ.
Телефон ҫухалнӑ тесе йӗрке хуралҫисене пӗлтернӗ хыҫҫӑн пакунлисем каччӑна шырама тытӑннӑ, ӑна тупса палӑртнӑ хыҫҫӑн ун тӗлӗшпе пуҫиле ӗҫ пуҫарнӑ.
+20.3 °C