Паян ирпе, 8 сехет тӗлӗнче, Шупашкарта троллейбуссем чарӑнса ларнӑ. Вӗсем хулан Ҫӗнӗ Кӑнтӑр районӗнче, унти «Бауман урамӗ» чарӑнуран пуҫласа «56-мӗш шкул» чарӑну таран тӑрса тухнӑ. Ҫавна хулара пурӑнакан ҫынсенчен пӗри сӑн ӳкерсе илсе «PRO-город» хаҫата ярса панӑ.

Асӑннӑ пичет кӑларӑмӗнче ҫырнӑ тӑрӑх, троллейбуссем сивве пула чарӑнса ларнӑ имӗш. Ҫав вӑхӑтрах хыпара вуланисенчен пӗри троллейбуссем сивве пула чарӑнса ларма пултараймаҫҫӗ, вӗсем пӑралук пӑрланса ларсан ҫеҫ каяймаҫҫӗ тесе хирӗҫленӗ.

Инкек вырӑнӗнче ятарлӑ служба ӗҫленӗ. Ирхи 9 сехет тӗлне троллейбуссем ҫӳреме тытӑннӑ.

Паян, кӑрлач уйӑхӗн 12-мӗшӗнче, Ҫӗрпӳ районӗнче ҫул ҫинче инкек пулнӑ. Хальхинче ҫул ҫинче ӗҫлекен рабочисем шар курнӑ.

Пӑтӑрмах ирхи 10 сехет тӗлӗнче пулнӑ. Малтанласа шухӑшланӑ тӑрӑх, «LADA Granta» автомобиль астумасӑр «КамАЗпа» ҫапӑннӑ, унтан ҫул ҫинче ӗҫлекен рабочисем пырса кӗнӗ. Ҫӑмӑл машина рулӗ умӗнче 21 ҫулти каччӑ пулнӑ. Инкекре аманнӑ икӗ рабочие тухтӑрсен пулӑшӑвӗ кирлӗ пулса тухнӑ.

Чӑваш Енӗн Шалти ӗҫсен министерствинче пӗлтернӗ тӑрӑх, ҫул ҫинчи инкек сӑлтавне специалистсем тишкерӗ.

Паян, кӑрлач уйӑхӗн 10-мӗшӗнче, Шупашкар районӗнче икӗ ҫӑмӑл машина ҫапӑннӑ, вӗсенчен пӗринче ача ларса пыни паллӑ.

Инкек кӑнтӑрла, 12 сехет тӗлӗнче, Урай Макаҫ ялӗ тӗлӗнче пулнӑ. Пӑтӑрмаха «Лада Гранта» тата «ВАЗ-2115» машинӑсем ҫакланнӑ.

Машинӑсенчен пӗрин водителӗ тата салонти хӗрача суранланнӑ. Анчах вӗсем, Турра шӗкӗр, ҫӑмӑл суран ҫеҫ илнӗ. Ҫакӑн пирки «Про Город» кӑларӑма ҫул ҫипчи инкеке асӑрханӑ ҫын пӗлтернӗ.

Инкек вырӑнне васкавлӑ пулӑшу машини тата пушар сӳнтерекен машина пырса ҫитнӗ.

Паян, раштав уйӑхӗн 27-мӗшӗнче, ирхи 6 сехет те 35 минутра «М-7» федераци ҫулӗ ҫинче пысӑк инкек пулса иртнӗ. Етӗрне районӗнчи Урпаш ялӗ тӗлӗнче «Ниссан-Тиида» автомобиль «Ман» грузовикпа ҫапӑннӑ. Фура Мускав енне каяканскер пулнӑ.

Малтанласа шухӑшланӑ тӑрӑх, ҫӑмӑл машина ансӑрланса пыракан ҫулпа пынӑ чух кӑштахран хирӗҫ ҫул ҫине тухса кайнӑ. Руль умӗнче хӗрарӑм пулнӑ.

Инкекре «Ниссан» водителӗ тата икӗ пассажир вилнӗ.

1obl.ru сӑнӳкерчӗкӗ

Раштав уйӑхн 24-мӗшӗнче, ирхи 9 сехет тӗлӗнче, Ҫӗнӗ Шупашкарта маршрут автобусӗпе «КамАЗ» автомобиль ҫапӑннӑ. Инкек Промышленность урамӗнче пулса иртнӗ.

Чӑваш Енӗн прокуратуринче малтанласа пӗлтернӗ тӑрӑх, груз турттармалли машина автобуса ҫул паман тесе шухӑшлаҫҫӗ.

Маррутка водителӗ тата автобусри виҫӗ пассажир аманнӑ. Вӗсенчен пӗрне пульницӑна илсе кайнӑ.

Чӑваш Республикин прокуратури хушнипе яваплисем тӗрӗслев ирттерӗҫ. Вӗсен светофор мӗншӗн ӗҫлеменни таранах палӑртмалла.

Паян, раштав уйӑхӗн 26-мӗшӗнче, ирхи 7 сехет те 25 минутра «Шупашкар-Сурски» ҫул ҫинче инкек пулнӑ. Хуларан Шупашкар районӗнчи учхоза кайма тухнӑ автобуспа «Лада Гранта» ҫапӑннӑ.

Малтанласа шухӑшланӑ тӑрӑх, ҫӑмӑл машинӑн 32 ҫулти водителӗ хирӗҫ ҫул ҫине тухса кайнӑ. Унта вӑл автобуспа ҫапӑннӑ. Инкекре ҫӑмӑл автомобилӗн водителӗ вилнӗ. Автобусра ларса пынӑ 7 пассажиртан икӗ хӗрарӑм, 22 тата 65 ҫултискерсем, аманнӑ.

Инкекӗн чӑн сӑлтавне специалистсем палӑртӗҫ. Ҫул-йӗр инспекторӗсем асӑрханса ҫӳремеллине тепӗр хутчен аса илтереҫҫӗ.

Раштав уйӑхӗн 12-мӗшӗнче каҫхине, 17 сехет те 45 минутра, «Атӑл» М-7 ҫул ҫинче, Ҫӗрпӳ районӗнче, виҫӗ машина ҫапӑннӑ.

«Рено-Дастер» автомобиль малтан «Ман» фура ҫине пырса кӗнӗ, унтан — «Дэу-Нексиа» машинӑпа тӑрӑннӑ.

Малтанласа шухӑшланӑ тӑрӑх, «Рено» автомобиль тӗп ҫул ҫине тухнӑ чухне грузовика ирттерсе яман. Инкекре ҫӑмӑл машинӑн водителӗн 38 ҫулти арӑмӗ йывӑр суранланнӑ, ӑна пульницӑна илсе кайнӑ. Вӑл водительпе юнашар ларнӑ. Машина хӗрарӑм ларнӑ енчен пырса ҫапӑннӑ.

«Рено» водителӗ, Ҫӗрпӳ районӗнчи 39 ҫулти арҫын, ӳсӗрри палӑрнӑ. Каярах ӑна хӑйне те тухтӑр пулӑшӑвӗ кирлӗ пулса тухнӑ. Ҫул-йӗр правилине пӑснӑшӑн, ҫав шутра хӑвӑртлӑха ӳстернӗшӗн те, пӗлтӗр ҫак водителе административлӑ майпа 5 хутчен явап тыттарнӑ.

Чӑваш Енри ҫӑлавҫӑсем Атӑл тӗпӗнчен арҫын виллине туртса кӑларнӑ. Вӑл раштав уйӑхӗн 7-мӗшӗнче ҫухалнӑ. Ҫавӑнтанпах ӑна шыранӑ. Кун пирки Инкеклӗ ӗҫсен министерствин управленийӗн пресс-службинче пӗлтернӗ.

Куславкка арҫынни пулла раштавӑн 7-мӗшӗнче каҫ енне тухса кайнӑ. 37-рискер пулӑ тытса сутса пурӑннӑ. Ку енӗпе вӑл профессионал пулнӑ.

Малтанласа шухӑшланӑ тӑрӑх инкек хӑрушсӑрлӑх мерисене пӑхӑнмаран сиксе тухнӑ. Пулӑҫ шыв ҫинче шӑнмасӑр юлнӑ вырӑна лекнӗ пуль теҫҫӗ. Пӑр ҫийӗн вӑл мотобуксировщикпа пынӑ.

Арҫын виллине тата унӑн техникине водолазсем раштав уйӑхӗн 11-мӗшӗнче Атӑл тӗпӗнче тупнӑ.

Шупашкарти Кабель тата Машина тӑвакансен проезчӗсем хӗресленнӗ вырӑнта икӗ машина ҫапӑннӑ. Инкекӗ «ВАЗ-21140» автомобильсем лекнӗ.

Иккӗшӗ пӗр-пӗринпе ҫапӑннӑ хыҫҫӑн авари вырӑнне ҫул-йӗр инспекторӗсем пырса ҫитнӗ. Водительсем ҫул-йӗр правилине пӑсманнине, светофорӑн симӗс ҫутипе каҫнине ӗнентерме тапранса кайнӑ. Кашниех хӑй тӗрӗс тунӑ тесе тупӑшнӑ.

Машинӑсенчен пӗрин водителӗ пуҫне суранлантнӑ.

Водительсем иккӗшӗ те — Шупашкарта пурӑнаканскерсем. Иккӗшӗ те машинисене страхламан. Эрех ӗҫнипе ӗҫменнине тӗрӗсленӗ те — иккӗшӗ те урах пулнӑ.

Ӗнер, раштав уйӑхӗн 5-мӗшӗнче, Шупашкарта арҫын ача машина айне лекнӗ. Инкек ирхи 8 сехет ҫитеспе хулари Чернышевский урамӗнче пулса иртнӗ.

14-ри яш ҫине «Рено Сценик» автомобиль пырса кӗнӗ. Ача ҫуран ҫӳрекенсем каҫмалли ҫулпа утнӑ.

«Ача суранланнӑ. Ӑна тухтӑрсем тӗрӗсленӗ, кайран ӑна килне янӑ. Водителе тӗрӗсленӗ те, вӑл урӑ пулни палӑрнӑ», — пӗлтернӗ Ҫул-йӗр хӑрушсӑрлӑхӗн патшалӑх инспекцийӗн Чӑваш Енри управленийӗнче.

Ҫул урлӑ каҫнӑ каҫнӑ чухне питех те асӑрханмалла. Ҫуран ҫӳрекенсем каҫмалли вырӑн е светофор пулсан та тимлӗхе ҫухатмалла мар. Водительсен те, паллах, тимлӗхе ҫухатмалла мар тата ҫуран ҫӳрекенсене хисеплемелле пек те...