Шупашкар муниципаллӑ округӗнчи «Заволжье» СНТра пурӑнакан 70 ҫулти арҫын ака уйӑхӗн 8-мӗшӗнче ҫухалнӑ. Леонид Георгиевич Иванова ҫав кунах шырама тытӑннӑ.
«Лиза Алерт» шыравпа ҫӑлав отрячӗ пӗлтернӗ тӑрӑх, арҫын ӑҫталла кайни паллӑ мар. Вӑл хӑй 180 сантиметр ҫӳллӗш, ырханкка кӗлеткеллӗ, ҫӳҫӗ хура, куҫӗ хӑмӑр. Ҫав кун Леонил Иванов хӑмӑр куртка, хура шӑлавар, хура ҫӑматӑпа калуш, сӑрӑ калпак тӑхӑннӑ пулнӑ.
Ун пирки кирек мӗнле информаци те хаклӑ халӗ. «Лиза Алерт» хастарӗсем ҫак номерсемпе шӑнкӑравлама ыйтаҫҫӗ: 8-800-700-54-52 е 112.
Паян ирхи 9 сехет ҫурӑра Шупашкарти К.Иванов урамӗнче Пӗрремӗш хула пульници умӗнче 83 ҫулти старике машина ҫапса кайнӑ. Вӑл светофор пулман вырӑнтан, «зебра» патӗнче, ҫул урлӑ каҫма тӑнӑ.
«Лада Ларгус» рулӗ умӗнче ларнӑ 44 ҫулти водитель каланӑ тӑрӑх, ватӑ арҫын малтан чарӑннӑ, унтан тӑрук ҫул ҫине тухнӑ.
Старике, ку инкек пульница умӗнче пулнӑ пулсан та, васкавлӑ медпулӑшупа Шупашкарти васкавлӑ медпулӑшу пульницине илсе кайнӑ.
Чӑваш Енӗн тӗп хулинче патриотизм темипе концертсемпе спекталкьсем кӑтартӗҫ. «Своих не бросаем» (чӑв. Хамӑрӑннисене пӑрахмастпӑр) акци ӗнер Чӑваш паташлӑх филармонийӗнче пуҫланнӑ. Ун чухне сцена ҫине филармони солисчӗсем «Служу России» программӑпа тухнӑ.
Концерта курма ҫамрӑксем те, аслӑраххисем те пуҫтарӑннӑ. «Кун пек концертсем ҫамрӑксене патиотизм воспитани парас ӗҫе питех те паха. Ун пеккисене вӗсене кӑтартмалла», — хавхаланса калаҫнӑ концетра пулса курнӑ Галина Николаева пенсинерка.
Ака уйӑхӗн вӗҫӗччен пыракан акцие республикӑри мӗнпур патшалӑх театрӗпе концерт учреденийӗ хутшӑнӗ. Акцие хутшӑнса кӑтартнӑ ӗҫсем вӑхӑтӗнче пухнӑ укҫана ятарлӑ ҫар операцине хутшӑнакансене пулӑшма куҫарса парӗҫ.
Ӗнер, ака уйӑхӗн 1-мӗшӗнче, тыл ӗҫченӗ, ӗҫ ветеранӗ Алия Феизова 100 ҫул тултарнӑ. Вӑл Патӑрьел тӑрӑхӗнчи Тутар Сӑкӑт ялӗнче пурӑнать.
Унӑн ашшӗ 1945 ҫулта фронтра пуҫ хунӑ. Амӑшӗ Алиян йӑмӑкӗ 13 ҫулта чухне ҫӗрӗ кӗнӗ. Кун хыҫҫӑн Алия виҫӗ йӑмӑкӗпе шӑллӗшӗн амӑшӗ вырӑнӗнче пулнӑ. Вӑрҫӑ вӑхӑтӗнче вӑл Улатӑр районӗнче окоп чавнӑ, кайран ӑна Мускав облаҫне торф кӑларма илсе кайнӑ.
Алия Керимовна пӗртен-пӗр ывӑл ҫуратса ӳстернӗ. Шел те, паянхи кун вӑл пирӗн хушӑра ҫук.
Шупашкарта пурӑнакан Ефросиния Александрова паян 100 ҫул тултарнӑ.
Ефросиния Александровна Ҫӗрпӳ районӗнчи Вӑрманкас Пайкилт ялӗнче ҫуралнӑ. Тӑван ҫӗршывӑн аслӑ вӑрҫин ҫулӗсенче ҫурлапа ыраш вырнӑ, ҫӑматӑ йӑваланӑ. Вӑрҫӑ хыҫҫӑн вӑл Шупашкара килсе ӗҫе вырнаҫнӑ.
Шупашкарти пир-авӑр комбинатӗнче пир тӗртекенте вӑл нумай ҫул ӗҫленӗ. «Ҫавӑнтах куҫ вӑйӗ чакрӗ, унтан ӗҫлеме пӑрахрӑм», — каласа кӑтартнӑ кинемей.
Ефросиния Александровнӑн ачи-пӑчи ҫук. Ӑна паян ҫывӑх тӑванӗсенчен пӗрин хӗрӗ пӑхать.
Шупашкарти экспресс-кинемейсем ятарлӑ ҫар операцине хутшӑнакан ҫемьесене ача пӑхса пулӑшаҫҫӗ. Хӑйсен пепкисемпе вӑхӑтлӑх ларакан кирлине вӗсем Шупашкар хулинчи халӑхӑн комплекслӑ ыйтӑвӗсене тивӗҫтерекен социаллӑ центрти координаци центрне шӑнкӑравласа пӗлтереҫҫӗ. Унтисем вара ҫын ачине вӑхӑтлӑх пӑхма хатӗр кинемейсене вӑл е ку ҫемьене яраҫҫӗ.
Асӑннӑ центрта пӗлтернӗ тӑрӑх, ӳркенмен ватӑсем юлашки вӑхӑтра ытларах пӗр хут пулӑшу кӳреҫҫӗ. Сӑмахран, пӗчӗк ачасен амӑшӗн пульницӑна кайса килмелле, анчах пепкене никампа хӑварма май ҫук. Е тата алӑра кипкери икӗ ача, вӗсемпе больницӑна каймалла. Пӗрле пыракан пулсан амӑшне ҫӑмӑл. Шӑпах ҫавӑн пек тӗслӗхсенче пулӑшнӑ та Шупашкарти Мария Мурзаева тата Ольга Астапова экспресс-кинемейсем.
Етӗрне муниципаллӑ округӗнче 1931 ҫулта ҫуралнӑ кинемее шыраҫҫӗ. Вӑл ҫухални пирки полицие пӗлтернӗ.
Вера Григорьевна Хмелева кӑвак халат, атӑ-дутик, тӑхӑннӑ, тӗрлӗ тӗслӗ тутӑр ҫыхнӑ пулнӑ. Кинемей икӗ патакпа утать.
Ҫак ватӑ хӗрарӑма кам та пулин курнӑ тӑк ҫак номерсемпе шӑнкӑравлама ыйтаҫҫӗ: 8 (83547) 2-22-74, 102 е 112.
Канаш округӗнчи Юмансар ялӗнче пурӑнакан Анна Никитина паян 100 ҫулхи юбилейне паллӑ тунӑ. Ӑна сумлӑ уявпа саламлама вырӑнти артистсем те килнӗ.
Анна Никитична нумай ачаллӑ ҫемьере ҫуралнӑ. Шкул пӗтерсен колхозра ӗҫлеме тытӑннӑ, шкулта техслужащире чылай вӑхӑт тӑрӑшнӑ.
Христофор Максимовичпа ҫемье ҫавӑрсан вӗсем 8 ача ҫуратса ӳстернӗ. Хальхи вӑхӑтра Анна Никитична ывӑлӗн ҫемйипе пурӑнать. Унӑх халӗ 17 мӑнук, 12 кӗҫӗн мӑнук пур.
Паян — социаллӑ ӗҫӗн пӗтӗм тӗнчери кунӗ. Соцаллӑ ӗҫчен пулса пур ҫын та ӗҫлеймест. Хӑшӗсем яваплӑх пирки тӗплӗнрех ыйтса пӗлсенех хӑраса ӳкеҫҫӗ, теприсен чӑтӑмлӑхӗ темиҫе уйӑхран пӗтет. Анчах Шупашкарта пурӑнакан 49 ҫулти Галина Кузьмина пеккисем те пур.
И.Н. Ульянов ячӗллӗ Чӑваш патшалӑх университетӗнче вӗреннӗскер чылай ҫул ача пахчинче тӑрӑшнӑ. «Ӗҫӗм питӗ килӗшетчӗ. Анчах атте чирлесе ӳкнӗ хыҫҫӑн ватӑсене пулӑшмаллине ӑнланса илтӗм», — аса илет Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта тӑрӑшакан Галина Владимировна.
Ҫак ҫула суйласа илнӗшӗн Галина Кузьмина пӗртте ӳкӗнмен. «Ӑна ватӑсем питӗ юратаҫҫӗ. Кашни пымассерен ӑшшӑн кӗтсе илеҫҫӗ. Тем туса та пулӑшать вӑл», — каласа кӑтартаҫҫӗ маларах асӑннӑ социаллӑ центрта.
Этем ӗҫпе кӑна пурӑнаймасть. Галина Владимировнӑн чун киленӗҫӗ — пулла ҫӳресси. Унта вӑл упӑшкипе Борис Валерьевичпа ҫул тытать. Каҫ выртамалла та каяҫҫӗ.
Пушӑн 12-мӗшӗнче республикӑри икӗ кинемей 100 ҫулхи юбилейне паллӑ тунӑ.
Раиса Никифорова Шупашкар округӗнчи Тури Макаҫ ялӗнче пурӑнать. 9 ҫултанпа фермӑра дояркӑра ӗҫлеме пуҫланӑ, вӑрҫӑ вӑхӑтӗнче савутра ӗҫленӗ, фронт валли ҫӑматӑ йӑваланӑ. Кайран колхозра вӑй хунӑ.
Мария Степанова Вӑрмар тӑрӑхӗнчи Анаткас ялӗнче ҫуралнӑ. Вӑл малтан совхозра, кайран сӗтел-пукан хапрӑкӗнче тӑрӑшнӑ. Паянхи кун вӑл пӗчченех пурӑнать. Тӑванӗсемпе ҫывӑх ҫынннисем ун патне килсех ҫӳреҫҫӗ.
+17.3 °C