Элӗк районӗн ЗАГСӗ юпа уйӑхӗнче ҫуралнӑ ачасен йышӗ ӳснӗ тесе пӗлтерет. Пурӗ 31 ача ҫуралнӑ. Пӗлтӗрхи юпа уйӑхӗпе танлаштарсан 16 ача ытларах пулать. ЗАГС пӗлтернӗ тӑрӑх кун пек нумай ача ҫураласси 2000 ҫултанпа пулман, тет. 31 ачаран 20 арҫын ачапа 11 хӗрача. 11 ачи ҫӗмьере пӗрремӗш ача пулнӑ, вуниккӗшӗ иккӗмӗш, ҫиччӗшӗ — виҫҫӗмӗш, пӗри вара — тӑваттӑмӗш. Ачисене ытларах Романпа Карина ятсене хунӑ. Сайра тӗл пулакан ятсем шутне Ноннӑпа Ариадна кӗреҫҫӗ. Шел те Нарсписем ҫуралма пӑрахнӑ иккен Чӑвашра. Ют ҫӗршыв ачисем ытларах ҫуралаҫҫӗ тейӗн.
31 ача ҫуралнӑ пулсан та пӗтӗмшӗшле халӑх йышӗ ӳсмен — 34 ҫын ҫут тӗнчерен уйрӑлса кайнӑ — 14 арҫынпа 20 хӗрарӑм. Пӗлтӗрхи юпа уйӑхӗпе танлаштарсан ку 4 сахалрах ӗнтӗ. Уйӑх хушшинче 11 ҫемье чӑмӑртаннӑ, иккӗшӗ саланнӑ. Пӗлтӗрхи уйӑхра вара 6 чӑмӑртаннӑ пулнӑ та виҫҫӗшӗ арканнӑ.
Шупашкар хулинче ултӑ пин ача валли ача сачӗсенче вырӑн ҫитмест. Кун пирки Шупашкар хула Администрацийӗн вӗрентӳ управленийӗн ертӳҫи Сергей Кудряшов нумай пулмасть пӗлтерчӗ. Хулари ача сачӗсем пурӗ 20 пин ачана йышӑнма пултараҫҫӗ, вӗсене вара халӗ 21 пине яхӑн ача ҫӳрет.
Лару-тӑрӑва лайӑхлатмашкӑн хулари ача-сачӗсене каялла тавӑрма пуҫланӑ. Ҫавӑн пекех пуррисене ҫӗнетсе ача вырӑнӗсене ӳстереҫҫӗ. Хулара ҫавӑн пекех 2009 ҫул валли икӗ ҫӗнӗ ача сачӗ йӗркелеме палӑртнӑ.
+0.3 °C