Чӑваш Ен Элтеперӗ Михаил Игнатьев республикӑри Хӗрарӑмсен пӗрлешӗвӗн ертӳҫӗпе Алевтина Федоровӑпа тата республикӑри Ашшӗсен канашӗн ертӳҫӗпе Алексей Мурыгинпа тӗл пулнӑ.
Курнӑҫура енсем сӳтсе явнӑ ыйтусен шутӗнче демографи лару-тӑрӑвӗ те пулнӑ. Михаил Игнатьев республикӑра юлашки 5 ҫулта нумай ачаллӑ ҫемьесен шучӗ 1,5 хут ӳснине пӗлтернӗ. Уйрӑлнӑ мӑшӑрсен хисепӗ пӗлтӗр чакнӑ.
Алевтина Федорова ҫулсерен Хӗрарӑмсен канашӗн йышне ҫулсерен ҫӗнӗрен те ҫӗнӗ ҫынсем хутшӑнса пынине, вӗсем питӗ активлӑ пулнине палӑртнӑ. «Бизнесра вӑй хуракансем, ҫамрӑк амӑшӗсем хастар. Кӑҫал ака уйӑхӗнче ҫӗнӗ йыш йӗркелерӗмӗр. Муниципалитет пӗрлешӗвӗсенче ӗҫлекен ҫамрӑксем ҫав тери пуҫаруллӑ. Пӗрне-пӗри пулӑшма ялан хатӗр», – тесе хыпарланӑ вӑл. Республикӑри мӗнпур муниципалитетсенчи ЗАГС уйрӑмӗсенче хӗрарӑмсен канашӗсене йӗркеленӗ.
Чӳк уйӑхӗн 21-мӗшӗнче Чӑваш Ен Элтеперӗ Михаил Игнатьев ӗҫлӗ ҫул ҫӳревре Мускавра пулнӑ. Унта вӑл Пӗтӗм тӗнчери «Транспорт эрни–2018» ХII-мӗш форум ӗҫне хутшӑннӑ.
Чӑваш Ен Элтеперӗ Раҫҫейӗн транспорт министрӗ Евгений Дитрих ертсе пынӑ ирхи апатланӑва хутшӑннӑ. Ҫапла ят панӑ анлӑ канашлӑва Михаил Игнатьева та йыхравланӑ. Кун йӗркинчи тӗп ыйту инфраструктурӑна ҫӗнетесси, комплекслӑ плана пурнӑҫа кӗртесси, укҫа-тенкӗ ыйтӑвӗсем пулнӑ.
Мероприятине федерацин, регионсен ӗҫ тӑвакан влаҫ органӗсен ертӳҫисем, транспорт тытӑмӗнче ӗҫлекен пуҫлӑхсем, РФ регионӗсен пуҫлӑхӗсем, тӗрлӗ пысӑк компанисен ертӳҫисем, ӑсчахсем, инвесторсем, обществӑлла организацисен представителӗсем, банк тытӑмӗнче вӑй хуракансем чылайӑн пухӑннӑ.
ЧР Элтеперӗ отпускра-ха. Вӑл ӑҫта канни пирки нумаях пулмасть пӗлтернӗччӗ.
Михаил Игнатьевӑн Инстаграмри страницине сӑнаса тӑракансем вӑл ӑҫта пулнине пӗлеҫҫӗ. Элтепер унта сӑнӳкерчӗксем вырнаҫтарсах тӑрать. Михаил Васильевич Эльбрус тӑвӗ ҫине ҫитнӗ. «3450 метр ҫӳллӗшӗнче сывлӑш тап-таса та сиплӗ!» - ҫырнӑ Михаил Игнатьев.
Эльбрус тӑвӗ ҫинче ӳкернӗ сӑна чӳк уйӑхӗн 19-мӗшӗнче вырнаҫтарнӑ. Эппин, вӑл Кавказра канать. Палӑртмалла: Эльбрус – Раҫҫейри тата Европӑри чи ҫӳллӗ ту.
Чӑваш Енӗн Элтеперӗ Администрацийӗн Ертӳҫи Юрий Васильев чӳк уйӑхӗн 9-мӗшӗнче 50 ҫул тултарнӑ. Чӑваш халӑх сайчӗ ҫак хыпара паян ҫеҫ пӗлчӗ.
«Правда ПФО» тӗнче тетелӗнчи хыпарсен служби пӗлтернӗ тӑрӑх, ҫур ӗмӗрхине Юрий Васильев Чӑваш патшалӑх оперӑпа балет театрӗнче уявланӑ. Тата, унта ҫырнӑ тӑрӑх, Михаил Игнатьев Элтепер ӑна уява ытлашши савӑнӑҫлӑ лару-тӑрура ирттерме сӗнмен имӗш. Юлашкинчен каланин чӑнлӑхне ҫирӗплетеймӗпӗр. Вырӑссем калашле, мӗн хакпа илнӗ, ҫав хакпа сутатпӑр.
Юбилея 120-е яхӑн хӑнана чӗннӗ. Ҫав йышра муниципалитетсен ертӳҫисем, правительство пайташӗсем, паллӑ политиксем, усламҫӑсем пулнӑ.
Юрий Васильев ҫар училищинче вӗреннӗ, Тӑвай район администрацине ертсе пынӑ.
ЧР Элтеперӗ Михал Игнатьев икӗ эрнелӗхе отпуска кайни пирки сайтра хыпарланӑччӗ. Михаил Васильевич ӑҫта канни пирки пӗлес килет-и? Кун пирки вӑл «Инстаграмра» пӗлтерсех тӑрать, сӑнӳкерчӗксем вырнаҫтарать.
Аса илтерер: Элтепер отпуска чӳк уйӑхӗн 6-мӗшӗнче кайнӑ. Хальлӗхе ун вырӑнне Иван Моторин юлнӑ.
Михаил Васильевич Железноводск хулинче канать. Вӑл хулари истори вырӑнӗсемпе паллашать, вӗсем патӗнче сӑн ӳкерӗнсе хӑйӗн страницине вырнаҫтарать, комментарисем ҫырать. Вырӑнти пейзаж та Элтепере илӗртет. Михаил Игнатьевӑн страницине пӑхса тӑракансем комментарисем ҫырса хӑвараҫҫӗ.
Чӑваш Ен Элтеперӗ Михаил Игнатьев канма шухӑшланӑ. Ҫулталӑкри черетлӗ канура вӑл чӳк уйӑхӗн 6-мӗшӗнчен тытӑнса чӳк уйӑхӗн 21-мӗшӗ таран пулӗ.
Михаил Игнатьев каннӑ вӑхӑтра республика Ертӳҫин тивӗҫӗсене вӑхӑтлӑха Иван Моторин пурнӑҫлӗ. Кун пирки ЧР Элтеперӗн Администрацийӗн пресс-служби республикӑн влаҫ органӗсен официаллӑ порталӗнче паян пӗлтернӗ. Иван Моторин — Чӑваш Енӗн Министрсен Кабинечӗн Ертӳҫи.
Михаил Игнатьев республикӑри «Хыпар» тата «Советская Чувашия» хаҫат тӗп редакторӗсене Татьяна Вашуркинӑпа Владимир Васильева панӑ пӗр интервьюра ҫулсеренех кӗркунне, ҫуллахи хӗрӳ ӗҫрен кӑшт пушансан, каннине пӗлтернӗччӗ. Тата вӑл хамӑр ҫӗршывра тата ҫемйипе вӑхӑта ирттерме юратнине хыпарланӑччӗ.
Следстви комитечӗ Шупашкарта пурӑнакан 17 ҫулти каччӑ тӗлӗшпе пуҫарнӑ пуҫиле ӗҫе тишкерсе пӗтернӗ. «Регнум» информагентство пӗлтернӗ тӑрӑх, сӑмах Чӑваш Ен сенаторӗн Вадим Николаевӑн ывӑлӗ пирки пырать.
Ку кӑҫал ҫӗртме уйӑхӗн 12-мӗшӗнче ҫӗрле Водопровод урамӗнче пулнӑ. Иван Николаев лайӑхах палламан тантӑшӗпе хирӗҫсе кайса ӑна чӑмӑрӗпе питӗнчен ҫапнӑ. Лешӗн янах шӑмми хуҫӑлнӑ. Ҫакна кӳнтеленсем те курнӑ.
Следовательсем пуҫиле ӗҫе суда ярса панӑ. Сӑмах май, Иван Николаевпа ҫакнашкал пӑтӑрмах унччен те пулнӑ-мӗн. Ҫу уйӑхӗнче вӑл тата Элтепер ывӑлӗ Иван Игнатьев Оперӑпа балет театрӗ умӗнче тӑватӑ ҫамрӑкпа ҫапӑҫнӑ. Ку сас-хура халӑхра хӑвӑрт сарӑлнӑ, ҫавӑнпа Михаил Игнатьев ирттернӗ планеркӑра ШӖМ ҫапла ӑнлантарнӑ: «Иван Игнатьев ҫапӑҫман, ӑна та хӗнемен, вӑл та никама та тытман».
Паян ЧР Элтеперӗ Михаил Игнатьев ЧР спорт министрӗн тивӗҫӗсене пурнӑҫлакан ҫынна палӑртнӑ. Ку пукана Михаил Богаратов йышӑннӑ.
Михаил Васильевич палӑртнӑ тӑрӑх, Михаил Богаратовӑн респубикӑри спорт сообществинче авторитет пур. Вӑл пурнӑҫӗнчи 39 ҫулне спорт тытӑмне халалланӑ, вӑйлӑ спортсменсене хатӗрленӗ. 2015 ҫулхи нарӑс уйӑхӗнчен вара Чӑваш Енри футбол федерацине ертсе пырать. Элтепер ҫӗнӗ ертӳҫе министерство умӗнче тӑракан тӗллевсем пирки аса илтернӗ.
Михаил Богаратова министра кадр процедурисене вӗҫленсен лартӗҫ.
Йӗпреҫ районӗнчи Березовка ялӗнче пурӑнакансем чӑтайман – Владимир Путин патне петици ҫырнӑ. Халӑха Йӗпреҫрен яла илсе ҫитерекен ҫул ытла та хӑрушӑ пулни пӑшӑрхантарать.
Общество транспорчӗ пӗрре урлӑ кӑна ҫӳрет, васкавлӑ медпулӑшу 40 минутран килет. Ара, хӑлтӑр-халтӑр ҫулпа хӑвӑрт ҫӳреймӗн. Ӑна 10 ҫул ытла юсаман. 20 ҫухрӑм ҫула 40 минутра ҫеҫ парӑнтарма пулать-мӗн. Общество транспорчӗпе те ыйту ҫивӗч. Расписанире – икӗ рейс, анчах вӗсем те пурте ҫӳремеҫҫӗ, мӗншӗн тесен водительсем кунашкал ҫулпа кайма хирӗҫ. Таксистсем вара 1000 тенкӗ ыйтаҫҫӗ. Ял ҫыннишӗн ку пысӑк укҫа.
Петицие Change.org сайтра вырнаҫтарнӑ. Вӑл - Владимир Путин, Михаил Игнатьев Элтепер, Йӗпреҫ район администрацийӗн пуҫлӑхӗ Николай Чугаров валли.
Ҫул япӑх пулсан та Йӗпреҫе тухса кӗмелли тупӑнать. Ялта пульница, аптека, лавкка ҫук. Петицире палӑртнӑ тӑрӑх, ҫак ҫулпа ҫывӑх ялсенче пурӑнакан 1105 ҫын усӑ курать. Анчах вырӑнти тата республика ертӳлӗхӗ сахал ҫыншӑн ҫул сарнинче уссине курмасть-мӗн. Ҫак ялсенче пурӑнакансен ачисем, мӑнукӗсем пуррине шута илеҫҫӗ-и вӗсем? Вӗсем те яла тӑванӗсем патне килсе ҫӳреҫҫӗ-ҫке-ха.
Чӑваш Енӗн строительство, архитектура тата ҫурт-йӗрпе коммуналлӑ хуҫалӑх министрне Владимир Михайлова ӗҫрен кӑларас ыйтӑва сӳтсе явнине Чӑваш халӑх сайчӗ пӗлтерчӗ-ха. Унтан тепӗр сӑмах-юмах та тухнӑччӗ: Владимир Михайловӑн министр портфельне каярах пама тивӗ. Ҫакӑ тӳре-шаран шӑпине Мускаври пуҫлӑхсемпе сӳтсе явма тивнипе ҫыхӑннӑ тесе сӑлтавларӗҫ.
РФ Президенчӗн Атӑлҫи федераци округӗнчи полпречӗ Чӑваш Ене килес умӗн харӑсах икӗ министра пукансӑр хӑварни аван мартан йышӑнӑва каяраха хӑварнӑ текенсем те тупӑнчӗҫ. Чӑваш халӑх сайчӗ чӑн сӑлтавне пӗлмест те, анчах ӗнер, юпа уйӑхӗн 27-мӗшӗнче, Владимир Михайлова Михаил Игнатьев тилхепесӗр хӑварнӑ-хӑварнах. Хушӑва Чӑваш Енӗн влаҫ органӗсен официаллӑ порталӗнче вырнаҫтарнӑ.
+12.5 °C