Раштав уйӑхӗн 30-мӗшӗнче Шупашкарта ретро-троллейбус ҫула тухӗ. Хальхинче ӑна Ҫӗнӗ ҫул уявне халалласа капӑрлатӗҫ.
Троллейбусра Хӗл мучипе Юр пике пулӗҫ. Рейс 9 сехет те 6 минутра ҫула тухӗ те ӗҫе 16 сехет те 57 минутра вӗҫлӗ. Кӑнтӑрлахи апатра тӑхтав пулӗ. Салона гирляндӑсемпе, ытти япалапа капӑрлатӗҫ. «Ӑслӑ транспорт» сарӑмра ӑна «001Р» паллӑпа уйӑрса илме пулать.
Раштавӑн 29-мӗшӗнче вара хулара «Хӗл мучи» операци» акци иртӗ. Ун чухне хула ҫыннисене Ҫӗнӗ ҫулпа саламлӗҫ, парнесем – канфетсем - парӗҫ.
Шупашкарти 184-мӗш ача пахчине ҫӳрекенсем ҫурт тӑрринчен анакан Хӗл мучисене курсан савӑннӑ кӑна мар, тӗлӗннӗ те. ВСКСӑн тата Ресурс центрӗн Чӑваш Енри уйрӑмӗсен хӑй ирӗкҫисем «Хӗл мучисен десанчӗ» акци ирттереҫҫӗ.
Вӗсем хӗллехи асамҫӑ тумне тӑхӑнса, ятарлӑ снаряжени ҫаклатса ҫурт тӑрринчен анса ачасене Ҫӗнӗ ҫулпа саламланӑ. Шӑпӑрлансем Хӗл мучипе Юр пикене сӑвӑсем каласа парса парнеллӗ пулнӑ.
Чӑваш Енре хуҫасӑр йытӑсем валли тата тепӗр приют уҫӑлӗ.
Асӑннӗ чӗр чунсемпе ҫыхӑннӑ ыйтусене Чӑваш Енӗн Регион управленийӗн центрне те ҫӑхавлакансем йышлӑ иккен. Ҫулталӑк пуҫланнӑранпа пурӗ 1000 ытла ҫыру ҫырнӑ. Пуринчен ытла ун пек ҫырусем Канашран, Шупашкартан тата Ҫӗнӗ Шупашкартан ҫитнӗ.
Ҫӗмӗрле уҫма палӑртнӑ приют пирӗн республикӑра шучӗпе виҫҫӗмӗш пулӗ. Унта хуҫасӑр 150-а яхн йытта усрама май килӗ.
Иртнӗ эрнере республикӑра гриппа чирленӗ 411 ҫынна тупса палӑртнӑ. Ун умӗнхи эрнере ку хисеп 2,7 хут пӗчӗкрех пулнӑ, пӗр уйӑх каялла вара - 24 хут пӗчӗкрех.
Роспотребнадзор пӗлтернӗ тӑрӑх, чирлекенсенчен ытларахӑшӗ - 17 ҫула ҫитмен ачасем. Пӗтӗмпе 290 шӑпӑрлан. Аслӑ ӳсӗмрисем вара - 121-ӗн.
Ҫынсем ытларах, Шупашкарта, Канашра, Ҫӗнӗ Шупашкарта, Шупашкар муниципаллӑ округӗнче чирлеҫҫӗ.
Паян Шупашкар хула пухӑвӗн депутачӗсем Шупашкар хулин пуҫлӑхне суйланӑ. Икӗ кандидат пулнӑ: унччен хула администрацийӗн ертӳҫи пулнӑ Денис Спирин тата хула администрацийӗн вӗренӳ управленийӗн ертӳҫи Алексей Лукшин. Депутатсем Спириншӑн 32 сасӑ панӑ, хирӗҫ виҫҫӗн сасӑланӑ. Хирӗҫҫисем - ЛДПР партирен.
Ҫапла Денис Спирин пиллӗк ҫуллӑха Шупашкар хулин пуҫлӑхӗ пулӗ.
Сасӑлава пӗтӗмлетсен вӑл присяга тытса должноҫе йышӑннӑ.
Ҫӗнӗ ҫул каҫхин Шупашкарти троллейбуссемпе автобуссем ахаль чухнехинчен ытларах вӑхӑт ҫӳрӗҫ. Тӗп ҫулсемпе маршрута тухакан общество транспорчӗ ҫур ҫӗр иртсен тин, 1 сехетре, ӗҫлеме чарӑнӗ. Уяв кунӗсенче расписанире кӑштах улшӑнусем пулӗҫ.
Коммуналлӑ службӑсем те вӑйлӑрах режимпа ӗҫлӗҫ. Раштавӑн 30-мӗшӗнчен пуҫласа кӑрлачӑн 8-мӗшӗччен ҫулсемпе тротуарсене юртан тасатакан ятарлӑ техника талӑкӗпех дежурствӑра пулӗ. Авариллӗ бригадӑсем те хатӗр тӑрӗҫ.
Ҫӗнӗ ҫул каҫхине урамсене ҫӳп-ҫапран тасатакансем мероприятисем иртекен вырӑнсенче виҫӗ сменӑпа ӗҫлӗҫ.
Паян 16 сехетре 333-мӗш маршрутка ГЭС патӗнче аварие лекнӗ. ШӖМ пӗлтернӗ тӑрӑх, маршрутка Шупашкартан Сосновкӑна кайнӑ чухне ҫул ҫинче ларакан фура ҫине пырса кӗнӗ. Фура маларах тепӗр пысӑк машинӑпа ҫапӑннӑ, вӗсем ҪҪХПИ инспекторӗсене кӗтсе тӑнӑ.
Аварире микроавтобус салонӗнче пулнӑ 8 пассажир, водитель аманнӑ. Инкеклӗ лару-тӑру министерствин ӗҫченӗсем водителе кабинӑран кӑларнӑ, ӑна тухтӑрсен аллине панӑ. Пассажирсене те пульницӑна илсе кайнӑ.
Пушкӑртстанри 18 ҫулти ҫамрӑка тытса чарас тесе Чӑваш Енри полицейскисем унта командировкӑна кайнӑ. Вӗсем ӑна Шупашкара илсе килнӗ.
Чӳк уйӑхӗн 2-мӗшӗнче Шупашкарти Калинин урамӗнчи суту-илӳ центрӗнче 6 пин ытла тӑракан арҫын куртки ҫухалнӑ. Ҫак ӗҫе тунӑ ҫынсен пичӗ видеокамера ҫине лекнӗ.
Ҫав ҫамрӑксем Ленин районӗнче те вӑрланӑ иккен. Пӗрне ҫийӗнчех тытса чарнӑ. Теприне, Ӗпхӳре пурӑнакан 18 ҫулти ҫамрӑка, федераци шыравне панӑ. Вӑл унччен те судпа айӑпланни паллӑ. Ӑна Ӗпхӳре тытса чарнӑ.
Ҫӗнӗ ҫул тата Сурхури умӗн Шупашкарта тӳлевсӗр экскурсисем ирттерӗҫ. Ун вӑхӑтӗнче хулан тӗп тата историлле пайӗсемпе паллашарӗҫ.
Тӳлевсӗр экскурсисем раштавӑн 30-мӗшӗнче 9 тата 13 сехетре, кӑрлачӑн 2 тата 3-мӗшӗсенче 10 сехет те 30 минутра тата 13 сехет те 30 минутра, кӑрлачӑн 4 тата 4-мӗшӗсенче 10 сехет те 30 минутра тата 13 сехетре пуҫланӗҫ.
Экскурси маршучӗ ҫапларах: Арбат (Ефремов купса бульварӗ), Хӗрлӗ лапам, ҫуран ҫӳрекенсене каҫса ҫӳремелли кӗпер, Константин Иванов скверӗ, Мускав ҫыранӗ.
Ушкӑнра 20 ҫынтан ытла пулмӗ. Ҫав йыша лекес тесен 8 (8352) 23-20-34, 23-20-36 телефон номерӗсемпе раштав уйӑхӗн 29-мӗшӗччен ӗҫ кунӗсенче ирхи 8 сехетрен пуҫласа 17 сехетчен шӑнкӑравламалла.
Ӗнер каҫхи 8 сехетре Шупашкар муниципаллӑ округӗнче полицейскисем ҫул ҫинче тӑракан кинемее асӑрханӑ. Вӑл нимӗн те ӑнланманнине, ҫухалса кайнине сиснӗ вӗсем.
Виталий Синельков тата Андрей Кртин инспекторсем чарӑннӑ та ватӑ ҫынна машинӑна лартнӑ. 93 ҫулти кинемей хӑй ӑҫта пурӑннине аран аса илнӗ. Вӑл ӑс-тӑн хавшанипе аптӑрать-мӗн.
Инспекторсем ӑна киле, Шупашкар хулине, илсе ҫитернӗ. Тӑванӗсем пӑшӑрханма та пуҫланӑ иккен, полицие пӗлтерме хатӗрленнӗ. Вӗсем полицейскисене тав тунӑ.
Шупашкарта ҫывӑх вӑхӑтра (06.04.2025 15:00) тӗтреллӗ ҫанталӑк, атмосфера пусӑмӗ 745 - 747 мм, 1 - 3 градус ӑшӑ пулӗ, ҫил 4-6 м/ҫ хӑвӑртлӑхпа ҫурҫӗр-хӗвелтухӑҫ енчен вӗрӗ.
| Строганова Валентина Кирилловна, библиотекарь, ЧР тава тивӗҫлӗ культура ӗҫченӗ ҫуралнӑ. | ||
![]() | Пулӑм хуш... |