Муркашри поликлиникӑна тумашкӑн проект хатӗрленӗ. Анчах вӑл Мускавра патшалӑх экспертизи витӗр тухайман. Ҫавна май республика влаҫӗ проектировани тӑвас енӗпе ҫӗнӗ конкурс ирттерессине пӗлтернӗ.
Кун валли 4,7 миллион тенкӗ уйӑрма хатӗр. Конкурса утӑ уйӑхӗн вӗҫӗнче пӗтӗмлетӗҫ. Подрядчике ҫулталӑк вӗҫлениччен срок парӗҫ. Ҫав шута патшалӑх экспертизи витӗр тухас тапхӑр та кӗрет. Ҫапла майпа поликлиникӑна 2025 ҫулсӑр та тума тытӑнмӗҫ.
Палӑртмалла: поликлиника иртнӗ ӗмӗрӗн 80-мӗш ҫулӗсенче ҫӗкленӗ темиҫе ҫуртра вырнаҫнӑ, пӳлӗмсем ҫитмеҫҫӗ.
Шупашкарти медицина центрӗсенчен пӗринче ӗҫленӗ тухтӑра пула ҫын вилнӗ.
2022 ҫулхи пуш уйӑхӗнче Вӑрмар тӑрӑхӗнчи хӗрарӑм тӳлевлӗ эндоскоп тӗрӗслевӗ (ФГДС) витӗр тухас тенӗ. Врач тӗрӗслев ирттермелли техникӑна пӑснине пула хӗрарӑмӑн шалти органне сиенлетнӗ. Ӑна кирлӗ пек пулӑшмасӑрах килне янӑ. Кӑштахран хӗрарӑм темиҫе кунтан пульницӑра куҫне хупнӑ.
Асӑннӑ пӑтӑрмахпа ҫыхӑннӑ ӗҫ суда ҫитнӗ. Тухтӑра тӗрмене хупса хумасӑр 2 ҫуллӑха ирӗкрен хӑтарма йышӑннӑ, сӑнав вӑхӑтне 2 ҫуллӑха палӑртнӑ. Хӗрарӑмӑн тӑванӗсене кӑмӑл-сипет енчен сиен кӳнӗшӗн тухтӑртан тата ҫав врач ӗҫленӗ медцентртан 2 миллион тенкӗ шыраса илмелле тунӑ.
Ӗнер, ҫӗртме уйӑхӗн 20-мӗшӗнче, Елчӗк тӑрӑхӗнчи Таяпа Энтри ялӗнче пӗр мотоциклист арҫын ҫине пырса кӗнӗ. 48 ҫулти арҫын Казахстанран тӑванӗсем патне хӑнана килнӗ пулнӑ.
Инкек ҫурҫӗр ҫитеспе пулса иртнӗ. Суранланнӑ арҫын васкавлӑ пулӑшу машининче куҫне ӗмӗрлӗхе хупнӑ. Мотоцикл хуҫи икӗ урапаллӑ транспортне пӑрахса инкек вырӑнӗнчен тарнӑ.
Мотоцикла кирлӗ пек регистрацилемен пулин те унӑн унчченхи хуҫи урлӑ ҫӗнӗ хуҫана темиҫе сехет хушшинче тупса палӑртма май килнӗ. Мотоцикл рулӗ умӗнче Елчӗк муниципаллӑ округӗнчи 24 ҫулти ҫамрӑк пулнӑ иккен. Вӑл урах пулнӑ.
Ҫӗртме уйӑхӗн 19-мӗшӗнче Хӗрлӗ Чутай округӗнчи Ямаш ялӗнче ҫӗнӗ фельдшерпа акушер пункчӗ уҫӑлнӑ. Ӑна «Сывлӑх сыхлавӗ» наци проекчӗпе килӗшӳллӗн хута янӑ.
Ҫӗнӗ ФАПра ҫынсене медпулӑшу памалли йӑлтах пур. Пӳлӗмсем хӑтлӑ та таса, сӗтел-пукан ҫӗнӗ, медоборудовани ҫӗнӗ.
Сӑмах май, Хӗрлӗ Чутайри тӗп пульницӑна сакӑр ҫӑмӑл машина тата пӗр автобус, куҫса ҫӳрекен ФАП, панӑ. Округра пӗтӗмпе 14 ФАП хута янӑ, 4-шне юсанӑ.
Паян Патӑрьел тӑрӑхӗнчи Вӑрманхӗрри Шӑхаль ялӗнче тӑватӑ ҫын аманнӑ.
Пӑтӑрмах ҫурҫӗр иртни 2 сехетре пулса иртнӗ. «Киа Церато» машина рулӗ умӗнчи 24 ҫулти ҫамрӑк ҫулӑн сылтӑм енне тухса кайса ҫул айккине чӑмнӑ.
Машинӑри 5 ҫамрӑка, ҫав шутра водителе те, пульницӑна илсе кайнӑ. Вӗсем — 20-25 ҫулсенчи ҫамрӑксем. Вӗсенчен пӗрне килне янӑ, ыттисем тухтӑр патӗнче сипленеҫҫӗ.
Чӑваш Енӗн Шалти ӗҫсен министерствинче пӗлтернӗ тӑрӑх, пӑтӑрмаха лекнӗ водителе хӑвӑртлӑха ӳстернӗшӗн административлӑ майпа кӑҫал ҫеҫ 8 хутчен явапа тыттарнӑ.
Раҫҫейре рак чирӗнчен прививка шутласа кӑларнӑ. Ӑсчахсем ӗнентернӗ тӑрӑх, вӑл ракӑн пур тӗсӗнчен те сыхлать.
Вӗсем шӑшисем ҫинче сӑнавсем тунӑ. Тӗпчев акӑ мӗн кӑтартнӑ: меланомӑллӑ чӗрчунсем вакцинаци хыҫҫӑн пурӑннӑ, прививка туманнисем вара 19-22 кунран вилнӗ.
Александр Гинцбург ӑсчах «Газета.ру» хаҫата интервью панӑ, вакцина пирки, ӑна организма мӗнле яни ҫинчен каласа кӑтартнӑ.
Ҫӗнӗ Шупашкарта спорткомплекса юсанӑ чухне рабочи вилнине эпир унччен пӗлтернӗччӗ. Аса илтерер: инкек пӗлтӗрхи пуш уйӑхӗн 4-мӗшӗнче сиксе тухнӑ. Вентиляци шахтинче 15 метр тӑршшӗ тимӗр пӑрӑха вырнаҫтарнӑ вӑхӑтра пӑрӑхӑн аялти пайне каснӑ чухне ҫав татӑк рабочин пуҫӗ ҫине ӳкнӗ. Шар курни инкек вырӑнӗнчех вилсе кайнӑ..
Ҫавӑншӑн Йӗпреҫ муниципалллӑ округӗнчи усламҫӑна явап тыттарнӑ. Тӗпчевҫӗсем тата суд шухӑшланӑ тӑрӑх, пӑтӑрмах усламҫӑ ӗҫ хӑрушсӑрлӑхне пӑхӑнманран пулса иртнӗ. Суд арҫынна тӗрмене хупса ухмасӑр ҫулталӑклӑха ирӗкрен хӑтарма йышӑннӑ.
Ҫӗртме уйӑхӗн 6-мӗшӗнче Етӗрне хулинче аслашшӗпе (вырӑсла пӗлтернӗ хыпарта дед тенӗ. Тен, кукашшӗ-тӗр) мӑнукӗ шар курнӑ.
Вӗсем паян ирпе хулари Герцен урамӗпе машинӑпа пынӑ. Хайхисен «Лада Вести» ҫине «Ниссан» пырса кӗнӗ.
Малтанласа палӑртнӑ тӑрӑх, ют ҫӗршывра туса кӑларнӑ машинӑн рульне тытса пынӑ 19 ҫулти водитель тимсӗртерех пулнӑ. «Ладӑра» 63 ҫулти арҫынпа унӑн 5 ҫулти мӑнукӗ пулнӑ. Ача пӗчӗккисене лартса ҫуремелли ятарлӑ креслӑра ларса пынӑ, ҫавӑнпа вӑл шар курман.
Ют ҫӗршывра туса кӑларнӑ машина рулӗ умӗнчи ҫамрӑк урах пулнӑ.
Шупашкар муниципаллӑ округӗнчи Тренккассинче врач амбулаторийӗ тума тытӑннӑ. Халӗ унӑн кирпӗч стенисене хӑпартса пӗтернӗпе пӗрех. Шыв пӑрӑхне тата канализаци пӑрӑхӗсене хурса тухнӑ. Нумаях пулмасть «СКОМ 21» организаци (ӗҫе подрядчик пулса вӑл пурнӑҫлать) ҫивиттие витӗ.
Объекта епле хӑпартнипе паллашма Шупашкар районӗнчи тӗп пульницӑн тӗп врачӗ Владимир Викторов пырса кайнӑ. «Строительство ӗҫӗсем аван пыраҫҫӗ», – ӗҫ хӑвӑртлӑхӗпе кӑмӑллӑ юлнӑ Владимир Николаевич.
«Ҫӗнӗ здани пӗр хутлӑ пулӗ. Унта ватӑ ҫынсене тата сусӑрсене кӗрсе тухма меллӗ пулӗ», – тенӗ Зоя Ефимова тата Наталия Оливанова медсестрасем.
«Пирӗн ялта врач амбулаторине тунишӗн питӗ савӑнатпӑр. Пирӗн посёлок ҫамрӑк, ачасем ялта нумай», – хавхаланса калаҫнӑ ҫав ялта пурӑнакан Галина Вылегжанина.
Ҫӗртмен 3-мӗшӗнче Улатӑр пульницинчен санавиаципе икӗ пациента Шупашкара илсе килнӗ. Иккӗшӗн те миокард инфаркчӗ пулнӑ.
64-ри арҫын пахчара ӗҫленӗ хыҫҫӑн кӑкӑр тӗлӗнчен ыратнине туйнӑ. 70 ҫулти хӗрарӑм вара хайне япӑх туйсан терапевт патне кайнӑ. Тухтӑр ӑна васкавлӑ медпулӑшу чӗнсе панӑ.
Александр Степанов анестезиолог-реаниматолог тата Дмитрий Воробьев медбрат-анестезист пациентсене санавиаципе Республикӑри клиника пульницине чиперех илсе ҫитернӗ.
-0.7 °C