Ӗнер, ҫурла уйӑхӗн 30-мӗшӗнче, Шупашкарта кӑнтӑрла ҫӑмӑл машина микроавтобус айне пырса кӗнӗ.
«Паджеро Спорт» хулари Сӗнтӗрвӑрри шосси ҫинче хӑйӗн ҫулӗ ҫинчен тухса кайса хирӗҫ пыракан пассажирсене Ҫӗнӗ Шупашкартан Шупашкара турттаракан 331-мӗш автобуспа пырса ҫапӑннӑ. Инкекре аманнӑ пилӗк ҫынна пульницӑна илсе кайнӑ. Пульницӑна илсе кайнисен шутӗнче: «Мицубиси Паджеро» машинӑн 52 ҫулти водителӗпе унта ларса пынӑ хӗрарӑм тата автобусри виҫӗ пассажир.
Канаш округӗнчи хӗрарӑма тӑрук япӑх пулса кайнӑ. Тухтӑрсем унӑн чӗрипе кӑлтӑксем пулнине тупса палӑртнӑ. Ӑна пӗр тӑхтамасӑр кардиолог пулӑшӑвӗ кирлӗ пулнӑ.
Хӗрарӑм хӑйне япӑхрах та япӑхрах туйса пынӑ. Машинӑпа Шупашкара кайма вара часах мар. Ҫапла санавиаци яма йышӑннӑ.
Вертолет килсе пациента хулана ҫур сехетре илсе ҫитернӗ. Унти тухтӑрсем ӑна тӳрех сиплеме пуҫланӑ.
Ҫӗнӗ Шупашкарти нумай ача ашшӗ С гепатита парӑнтарнӑ. Ӑна ҫак хӑрушӑ чире парӑнтарма «Вӑрӑм та хастар пурнӑҫ» федераци проекчӗ пулӑшнӑ.
Ултӑ ача ашшӗ ҫак чирпе 2017 ҫултанпа шутра тӑнӑ. Юлашки ҫулсенче унӑн пӗвер циррозӗ аталаннӑ. Ку вилӗмпе те вӗҫленме пултарать.
Ҫуркунне арҫыннӑн Ҫӗнӗ Шупашкарти стационарта сипленме май пулнӑ. Унта виҫӗ хутчен выртса тухнӑ хыҫҫӑн вӑл анализ панӑ та – вирус тухман.
Муркаш районӗнчи Ҫӗньял Очӑкасси ялӗнче ӗнер, ҫурла уйӑхӗн 26-мӗшӗнче, 16-ри яш аманнӑ. Вӑл мотоциклпа ҫула тухнӑ, анчах транспорт ҫинчен персе аманнӑ.
Ача мотоцикл ҫинчен ӳкнине курсан пӗр арҫын пулӑшма васканӑ, вӑл ӑна яла илсе ҫитернӗ, унтан васкавлӑ пулӑшу машинипе тухтӑрсем пульницӑна илсе кайнӑ.
Ӗнер, ҫурла уйӑхӗн 21-мӗшӗнче, Улатӑр хулинче пӗри машинӑпа иккӗри ача ҫине пырса кӗнӗ.
Пӑтӑрмах Ҫаран урамӗнчи 72-мӗш ҫурт тӗлӗнче 10 сехет те 45 минутра пулса иртнӗ. «Дэо Матиз» автомобиль водителӗ каялла чакса пынӑ чухне ҫул ҫине ӑнсӑртран чупса тухнӑ иккӗри хӗрача ҫине пырса кӗнӗ.
50-ри водитель йӗрке хуралҫисене ӑнлантарнӑ тӑрӑх, ачана вӑл асӑрхаман. Хӑй урах пулнӑ.
Инкек вӑхӑтӗнче ачапа пӗрле аслисем пулман. Ӑна пульницӑна ӑсатнӑ.
Шупашкарта иртекен Пӗтӗм Раҫҫӗйцри ГТО ӑмӑртӑвне пуҫтарӑннисем йышлӑн чирлесе ӳкнӗ.
Ӗнер, ҫурла уйӑхӗн 18-мӗшӗнче, темиҫе ачапа аслӑ ҫынна тухтӑрсен пулӑшӑве кирлӗ пулса тухнӑ. Ӑмӑртӑва килнисем хулари хӑна ҫурчӗсенчен пӗринче вырнаҫнӑ. Вӗсем пурте унта апатланнӑ.
Пӑтӑрмах тӗлӗшпе РФ Следстви комитечӗн Чӑваш Енри тӗпчевҫисем тӗрӗслев ирттереҫҫӗ. Тӗрӗслеве РФ Пуҫиле кодексӗн 236-мӗш статйин 1-мӗш пайӗпе пуҫарнӑ.
Елчӗк районӗнче пурӑнакан 55 ҫулти арҫын питӗ кӗвӗҫ пулнӑ тата ҫынна хӗнеме юратнӑ.
Тӑнлавӗ пасарнӑ арҫын ҫулӗ кайнине пӑхмасӑрах кӗвӗҫме пӑрахман. Пӗрле пурӑнакан хӗрарӑма вӑл кӳрши ҫумне хушса вӑрҫнӑ. Кӑҫалхи пуш уйӑхӗн 20-мӗшӗнчен пуҫласа ака уйӑхӗн 10-мӗшӗччен хӗрарӑма виҫӗ хутчен хӗненӗ, 5 аяк пӗрчине хуҫнӑ. Ун хыҫҫӑн хӗрарӑм унпа текех пурӑнас темен.
Ҫу уйӑхӗн 6-мӗшӗнче арҫын унччен пӗрле пурӑннӑ хӗрарӑма шыраса 80-ри карчӑк патне кайнӑ. Лешӗ ман патра ҫук тесе калани килӗшмен, ватӑ ҫынна хӗнесе пӗтернӗ, унӑн икӗ карас телефонне, телефона зарядкӑна лартмалли хатӗрсене тата ҫӑра уҫҫине йӑтса тухса кайнӑ.
Кӗҫех арҫынна РФ Пуҫиле кодексӗн виҫӗ статйипе, ҫав шутра ҫын пурлӑхне вӑрланӑшӑн та, суд тӑвӗҫ.
Елчӗкри «Солнышко» (чӑв. Пӗчӗк хӗвел) ача пахчинче пӗр шӑпӑрлан аманнӑ.
Инкек ҫурла уйӑхӗн 8-мӗшӗнче ачасем вылянӑ вӑхӑтра пулса иртнӗ.
Халӗ ку пӑтӑрмах тӗлӗшпе РФ Следстви комитечӗн Чӑваш Енри тӗпчевҫисем тӗрӗслев пуҫарнӑ. Кун пирки асӑннӑ органӑн пресс-служби пӗлтернӗ.
Вӑрнар районӗн больницине ҫамрӑк специалистсем ӗҫлеме килнӗ. Вӗсем хирургра вӑй хурӗҫ.
Ҫак ҫамрӑк специалистсем — Руслан Халековпа Анас Сулейман. Хӑйсем каланӑ тӑрӑх, вӗсем шавлӑ хулара мар, ялта пурӑнасшӑн.
Руслан – И.Н.Ульянов ячӗллӗ Чӑваш патшалӑх университетӗнчен вӗренсе тухнӑ. Анас вара Мари патшалӑх университетӗнче диплом илнӗ. Вӗсем иккӗшӗ те ординатурӑра хирурги енӗпе пӗлӗвне тарӑнлатнӑ.
Ҫамрӑк специалистсем ҫак кунсенче больницӑра хирурги уйрӑмӗнче ӗҫлеме тытӑннӑ.
Алькешра чикансемпе таксист хушшинче тавлашу сиксе тухнӑ. Ку пӑтӑрмахпа ҫыхӑннӑ лару-тӑрӑва епле тӗпченине халӗ РФ Следстви комитечӗн ертӳҫи Александр Бастрыкин сӑнаса тӑрӗ.
Таксире ача кӳми пулманран таксист ачаллӑ пассажирсене лартса кайма килӗшмен-мӗн. Унтан чикансен йышлӑ ушкӑнӗ водительпе вӑрҫӑнма тапранса кайнӑ. Таксист вырӑнтан хускалса кайнӑ чухне ҫын ҫине пырса кӗнӗ, ун урлӑ каҫса кайнӑ. Кайран чикансем машинӑна таптаса пӗтернӗ, водителе хӗненӗ.
+12.3 °C