Чӑваш Енре кӑшӑлвируспа чирленӗ икӗ ҫын вилнӗ. Ку инкек пӗр талӑкра пулса иртнӗ.
Официаллӑ кӑтартусене шансан, пандеми пуҫланнӑ хыҫҫӑн кӑшӑлвирус диагнозӗллӗ 64 ҫын пурнӑҫран уйрӑлнӑ. Иртсе кайнӑ талӑкра вилекенсем пулман тесе Чӑваш халӑх сайчӗ ӗнер ҫеҫ пӗлтернӗччӗ. Анчах, куратпӑр ӗнтӗ, савӑнӑҫ нумая пымарӗ.
Иртсе кайнӑ талӑкра кӑшӑлвируспа чирлӗ 32 ҫынна тупса палӑртнӑ. Ҫулталӑк пуҫланнӑранпа 7042 ҫын чирленӗ. Сипленнисен йышӗ – 4312, ҫав шутра 67-ӗн – иртсе кайнӑ талӑкра.
Чӑваш Енре районти пульницӑсенче те ӳлӗмрен кӑшӑлвирусран анализ илме тытӑнӗҫ. Ун валли ятарлӑ кунсем пӑхса хӑварӗҫ. Кун пирки Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев оперштабӑн ларӑвӗнче каланӑ.
Ют ҫӗршывран Раҫҫее килекенсен мӗн тумалли пирки Роспотребнадзорӑн Чӑваш Енри управленийӗн пуҫлӑхӗн тивӗҫӗсене пурнӑҫлакан Елена Прокопьева ҫак чирпе кӗрешекен оперштабӑн ларӑвӗнче ӑнлантарнӑ.
Ют ҫӗршыв ҫыннисен COVID-19 ерменнине ӗнентерекен справка пулмалла. Унӑн вӑйӗ виҫӗ куна пырать.
Хамӑр ҫӗршыв ҫыннисен патшалӑх пулӑшӑвӗсен сайтӗнче анкета ыйтӑвӗсене хуравламалла. Тӑван ҫӗршыва ҫитсен вӗсен виҫӗ кун хушшинче анализ памалла, унӑн кӑтартӑвне патшалӑх пулӑшӑвӗсен порталӗнче вырнаҫтармалла.
Сывлӑх чикӗ урлӑ каҫнӑранпа 14 кун хушшинче хавшасан врача киле чӗнмелле.
Раҫҫее килнӗ ют ҫӗршыв ҫыннисен таҫта тухса ҫӳремесӗр 14 кун пурӑнмалла. Вӗсене халӗ обсерваторта тытмаҫҫӗ.
Ҫурла уйӑхӗн 4-мӗшӗнчепе Мускаври аэропортсенче кӑшӑлвирус анализӗ пама пулать. Унӑн хакӗ – 2700-3000 тенкӗ.
Чикӗ леш енчен килекен самолетсене хальхи вӑхӑтра виҫӗ хулара: Мускавра, Питӗрте тата Дон ҫинчи Ростовра – ҫеҫ йышӑнаҫҫӗ.
Кӑшӑлвируспа чирлекенсен йышӗ, пӗтӗмӗшле илсен, пирӗн республикӑра ӳссех пырать. Ытахальтен мар ӗнтӗ общество транспортӗнче маска тӑхӑннине тӳре-шара тӗрӗслеме рейдсене тухать. Лавккасенче маска тӑхӑнмаллине каллех аса илтерме пуҫларӗҫ. Хӑш-пӗр суту-илӳ точкинче сӑмсапа ҫӑвара хӳтӗлекен хатӗр тӑхӑнмасан тавар сутма юраманни пирки пӗлтереҫҫӗ.
Юлашки талӑкра пирӗн тӑрӑхра COVID-19 диагнозӗллӗ 30 ҫынна тупса палӑртнӑ, 65 ҫын сывалнӑ, вилекенсем пулман.
Ҫулталӑк пуҫланнӑранпа пурӗ 7 010 ҫынна кӑшӑлвирус диагнозӗ лартнӑ. Ҫурла уйӑхӗн 8-мӗшӗ тӗлне 4 245 ҫын сывалнӑ, 2 765 ҫын чирлет.
Тӗнчере, ҫав шутра пирӗн ҫӗршывра та, кӑшӑлвирус пандемийӗ пуҫланнӑранпа Чӑваш Енре 62 ҫын вилнӗ.
Чӑваш Енри тӗпчевҫӗ-криминалист 80 ҫулти ҫынна ҫӑлнӑ. Ҫурла уйӑхӗн 5-мӗшӗнче РФ Следстви комитечӗн Чӑваш Енри управленийӗн тӗпчевҫӗ-криминалисчӗ Анатолий Киселев тата Чӑваш Енри Шалти ӗҫсен министерствин ӗҫченӗсем Горьки чукун ҫул хӗрринчи вырӑна, Вӑрнар поселокӗ тӗлӗнче, тӗпченӗ. Унта вӗсем 1951 ҫулхи хӗрарӑм хыпарсӑр ҫухалнӑ тенӗрен йӗр ҫине ӳкес тӗллевпе кайнӑ.
Анатолий Киселев — опытлӑ тӗпчевҫӗ тесе пӗлтереҫҫӗ РФ Следстви комитечӗн Чӑваш Енри управленийӗнче. Вӑл курӑк ҫинчи карас телефонне асӑрханӑ. Ҫав вырӑнтан темиҫе метрта вӑл ватӑ арҫын выртнине курнӑ. Арҫын аран сывланӑ. Тӗпчевҫӗ хӑвӑртрах васкавлӑ пулӑш машинине чӗнсе илнӗ.
Инкеке лекнӗ арҫын кӳршӗ ялтан пулнӑн. Вӑл киле таврӑнма тӑнӑ. Ҫул ҫинче унӑн вӑйӗ пӗтнӗ, тӑн ҫухатнипе ӳкнӗ.
Паян Шупашкар районӗнчи Атӑльял тӗлӗнчи «Три дуба» (чӑв. Виҫӗ юман) дачӑсен юлташлӑхӗ тӗлӗнче чутах пысӑк инкек пулса иртмен. Унта катер путма пуҫланӑ. Усал хыпара Инкеклӗ ӗҫсен министерствин пресс-служби пӗлтернӗ.
«Амур» катер ҫинче аслисем тӑватӑ ҫын тата икӗ ача (ҫичӗ ҫулти арҫын ачапа виҫӗ ҫулти хӗрача) пулнӑ. Катер пӑрӑннӑ чухне чалӑшса кайнӑ.
Путма пуҫланӑ катер ҫинчи ҫынсем патне ҫӑлавҫӑсем васкаса ҫитнӗ.
Катер ҫинче 72 ҫулхи хӗрарӑм та пулнӑ. Пӑлханса ӳкнӗскере тухтӑрсен пулӑшма тивнӗ.
Катер ҫинчи пӗр ҫын та путман. Кашниех таса та сывӑ. Инкеклӗ ӗҫсен министерствин ӗҫченӗсем улттӑшне те ҫыран хӗрне кӑларнӑ.
Чӑваш Енри пульницӑсем унчченхи режим ҫине куҫма тытӑнчӗҫ. Халӗ Федерацин травматологи, ортопеди тата эндопротезировани центрӗ пациентсене йышӑнма пуҫланӑ. Ҫак эрнере унта операцисем ирттернӗ те ӗнтӗ.
Аса илтерер: ҫу уйӑхӗн 14-мӗшӗнчен унта кӑшӑлвирус стационарӗ йӗркеленӗччӗ. Халӗ чир лӑпланать, унпа пурӑнма хӑнӑхса ҫитрӗмӗр курӑнать. Предприяти-организацисем майӗпен унчченхи йӗркепе пурӑнма тытӑнаҫҫӗ.
Утӑ уйӑхӗн 23-мӗшӗнчен Шупашкарти иккӗмӗш хула пульници, ҫурла уйӑхӗн 4-мӗшӗнчен Васкавлӑ медицина пулӑшӑвӗн Шупашкарти Университет урамӗнчи «Ҫурҫӗр» клиника пациентсене йышӑнма тытӑнӗҫ.
Ҫапах та транспортра маска тӑхӑнса ҫӳренине яваплисем тӗрӗслеме пӑрахман-ха.
Чӑваш Енре общество транспортӗнче маска тӑхӑннине тӗрӗслеме пӑрахман ҫеҫ мар, малашне те рейдсем иртӗҫ. Кун пирки кӑшӑлвирус сарӑлнипе кӗрешекен республикӑри оперативлӑ штабӑн ларӑвӗнче каланӑ.
Общество транспортне дезинфекцилессишӗн, ӗҫлекенсене маскӑпа тивӗҫтерессишӗн, вӗсем ҫав йӗркене пӑхӑннине тӗрӗслессишӗн пассажирсене турттаракан организацисен хуҫисемпе уйрӑм усламҫӑсем яваплӑ. Пассажирсем маскӑпа пулнине те вӗсенех тӗрӗслемелле. Маскӑсӑр пассажира транспорта лартмасан та пултараҫҫӗ.
Чӑваш Ен ертӳҫин хушӑвне пурнӑҫлас тӗллевпе республикӑн Транспорт министерствин тата Патшалӑхӑн ҫул-йӗр инспекторӗсем тӑтӑшах рейд ирттернине ӗнентереҫҫӗ. Йӗркене пӑсакансен тӗлӗшпе протоколсем ҫырнине пӗлтереҫҫӗ. Чӑваш Енӗн влаҫ органӗсен официаллӑ порталӗнче штрафсен виҫине аса илтернӗ. Уйрӑм ҫынсене 1 пинрен пуҫласа 30 пин тенкӗ таран явап тыттарма юрать, должноҫри ҫынсене – 10 пинрен пуҫласа 50 пин тенкӗ таран, усламҫӑсене – 30 пинрен 50 пин тенкӗ таран, предприяти-организацисене – 100 пинрен пуҫласа 300 пин тенкӗ таран.
Ҫурла уйӑхӗн 4-мӗшӗнче Шупашкарта йӗрке хуралҫине ҫӗҫӗпе чикнӗ. Ирхи 7 сехет те 5 минутра Чӑваш Енӗн Шалти ӗҫсен министерствин Шупашкарти управленийӗн полицин 2-мӗш пайӗн патрульпе пост службин ӗҫченӗ урама тухма тӑнӑ. Ҫав вӑхӑтра крыльца ҫинче ӑна ҫурӑмран ҫӗҫӗпе чикнӗ.
Пуҫтахланаканни 35 ҫулти хӗрарӑм пулнӑ. Пакунли хӗрарӑма унччен палламан.
Суранланнӑ полицейские пульницӑна ӑсатнӑ. Унӑн сывлӑхне вӑтам сиен кӳнӗ тесе шухӑшлаҫҫӗ. Хӗрарӑма та пуҫтарса кайнӑ. Ӑна та пульницӑна илсе кайнӑ, мӗншӗн тесен вӑл ӑс-тӑн енчен чирлӗ тесе шухӑшлаҫҫӗ. Хӗрарӑм унччен те пӑтӑрмаха пӗрре ҫеҫ мар ҫакланнӑ. Йӗркене пӑснӑшӑн ӑна административлӑ майпа темиҫе хут та явап тыттарнӑ.
Республикӑра пурӑнакансенчен чылайӑшӗ кӑшӑлвирус анализне паҫа хатӗр, анчах ӑҫта каймаллине пӗлмеҫҫӗ.
Кӑшӑлвирус ернине пӗлес текенсен анализӗсене Шупашкарти тӑватӑ лабораторире ирттереҫҫӗ. Республикӑн клиника пульницинче тата Ӳт-тирпе венерологи диспансерӗнче укҫа тӳлесе тӗрӗсленме пулать. Тӳлевсӗр тӗрӗсленме направление поликлиникӑсенчи тата стационарсенчи тухтӑрсем ҫырса параҫҫӗ. Анчах пурне те мар. Ҫын кӑшӑлвируспа чирлине сиссен.
Диагностикӑн хушма меслечӗ шутне организмра антитела пуррине палӑртма юн илнине кӗртмелле. Ку тӗпчеве Ӳт-тирпе венерологи диспансерӗнче, Республикӑн клиника пульницинче, Шупашкарти 1-мӗш клиника пульницинче, Хулари тӗп пульницӑра, Хулари 2-мӗш пульницӑра, Осипов ячӗллӗ пульницӑра ирттереҫҫӗ.
Чӑваш Енре кӑшӑлвируспа чирлекенсен йышӗ чакса пырать. Юлашки талӑкра 35 ҫын инфекциленнине палӑртнӑ. Ку таранччен 6915 ҫын каварлӑ вируса ҫаклатнӑ.
Анчах вилнисен йышӗ нумайланнӑ. Унччен кӑна 2 ҫын инфекцие пула вилнине пӗлтернӗччӗ. Паянхи кун тӗлне вара тепӗр 4 ҫын пурнӑҫран уйрӑлнӑ. Республикӑра харӑсах кун чухлӗ ҫын кӑшӑлвиурса пула уйрӑлнӑ тӗслӗх ку таранччен пулман.
Инфекциленнӗ 4050 ҫын сывалнӑ. Тепӗр 2803 ҫын сипленет. Кӑшӑлвирус сарӑлнин индексӗ халӗ 0,87-пе танлашать. Аса илтерер: Чӑваш Ен кӑшалвируса пула йышӑннӑ чару мерисене пӑрахӑҫламалли иккӗмӗш тапхӑра кӗнӗ.
+0.3 °C