Куҫӗ курмасан та уншӑн нимӗнле чӑрмав та ҫук. Мария Мамаева нумаях пулмасть Калугӑра ишес енӗпе иртнӗ Раҫҫей чемпионатӗнче тӳрех икӗ пӑхӑр медаль ҫӗнсе илнӗ.
Мария икӗ дистанцире вӑй виҫнӗ. 23 регионтан килнӗ 100 ытла спортсменран вӑл финиша виҫҫӗмӗш ҫитнӗ. Вӑйлӑ спортсменсене те парӑнтарнӑ вӑл.
Маттур спортсменкӑна ЧР спорт министрӗ Василий Петров та саламланӑ, малашне те ҫитӗнӳсем тума суннӑ.
Чӑваш Енри спортсмен Сергей Смолев «Dagestan Wild Trail» сумлӑ ӑмӑртура ҫӗнтернӗ. Вӑл ту ҫинчи 35 ҫухрӑм дистанцие 3 сехет те 18 минут та 11 ҫеккунтра парӑнтарнӑ. Ҫапла ылтӑн медаль ҫӗнсе илнӗ. Иккӗмӗш вырӑна – Свердловск облаҫӗнчи Андрей Солнцев, виҫҫӗмӗш вырӑна Абхазири Денис Поляков йышӑннӑ.
Ӑмӑрту Дагестанра иртнӗ, унта 2 пин ытла спортсмен хутшӑннӑ.
Раҫҫейри биатлонистсен союзӗ тата «Матч ТВ» телеканал Чӑваш Енри йӗлтӗр роллер ҫулне хакланӑ. Асӑннӑ союзӑн хисеплӗ вице-президенчӗ Вадим Мелихов ертсе пыракан ушкӑн ҫул республикӑри тата ҫӗршыври ӑмӑртусене ирттерме юрӑхлине, «Матч ТВ» телеканал эфирӗнче кӑтартма лайӑххине палӑртса хӑварнӑ.
Ҫула искусствӑла майпа юрпа витме пӑхса хӑварнӑ. Ҫутӑ енчен ун пекки ҫӗршыври биатлон стадионӗсенче те ҫуккине палӑртнӑ.
Ҫывӑхра 100 ҫынлӑх хӑна ҫурчӗ пур.
Шупашкарти Олимп резервӗн 2-мӗш спорт шкулӗн воспитанникӗсем 4 медальпе таврӑннӑ. Вӗсем Мурманскра иртнӗ «Праздник севера» (чӑв. Ҫурҫӗр уявӗ) йӗлтӗр марафонне хутшӑннӑ. Старта 360 спортсмен тухнӑ.
Йӗлтӗрпе ирӗклӗ стильпе ярӑнакансенчен 18 ҫулти спорстменсем хушшинче ылтӑн тата кӗмӗл медальсене Антон Петров тата Кирилл Петров ҫӗнсе илнӗ. Вӗсем 25 километр тӑрршӗне ӑмӑртнӑ. 23 ҫулхисем хушшинче Даниил Акимов мала тухнӑ.
Абсолютлӑ ӑмӑртура Антон Петров виҫҫӗмӗш вырӑн йышӑннӑ.
Чӑваш Енри спортсменка Ирина Вразарь тӑватӑ енлӗ кӗрешӳ енӗпе иртнӗ «Шиповка юных» ӑмӑртура икӗ медаль ҫӗнсе илнӗ. Тупӑшу Хусан хулинче иртнӗ.
13 ҫулти Ирина 600 метрлӑ дистанцие 1 минут та 40,52 ҫеккунтра парӑнтарнӑ. Пӗтӗмӗшле зачетра 377 очко пухнӑ.
Ҫапла пирӗн ентеш ылтӑн тата пӑхӑр медальсем ҫӗнсӗ илнӗ.
Чӑваш Енри ирӗклӗ кӗрешӳ шкулӗнче ӑсталӑхне туптакан Мария Александрова Раҫҫей шайӗнчи ӑмӑртура пӑхӑр медаль ҫӗнсе илнӗ. Ӑмӑртӑва 18 ҫул тултарман спортсменсем хутшӑннӑ.
Пирӗн ентеш 40 килограмм тайманнисен виҫе категорийӗнче вӑй виҫсе пьедесталӑн виҫҫӗмӗш картлашки ҫине хӑпарнӑ. Палӑртса хӑварар: Мария Александрова Владимир Григорьев тата Максим Степанов тренерсем патӗнче ӑсталӑхне туптать.
Шупашкарти Олимп резервӗсен 2-мӗш спорт шкулне хальхи йышши ратрак панӑ. Вӑл юра таптаса йӗлтӗр йӗрӗ тӑвать.
Техника Гостехнадзор витӗр тухнӑ. Тӗрӗслеве ирттернӗ Александр Ласкеев ратрак чаплӑ пулнине палӑртнӑ. Вӑл хӑй те йӗлтӗр спорчӗпе кӑсӑкланать, ҫавӑнпа трасса лайӑх пулмаллине аван пӗлет.
Ҫӗнӗ ратрак спортсменсене хатӗрлес пахалӑха ӳстерме пулӑшасса шанаҫҫӗ шкул ӗҫченӗсем.
Пуш уйӑхӗн 22-мӗшӗнче Чӑнлӑ районӗнчи Кивӗ Улхаш ялӗнче пӗртӑван Майрабеевсен призӗшӗсемшӗн ҫамрӑксем ирӗклӗ майпа кӗрешсе регионсем хушшинчи турнирта ӑмӑртрӗҫ. Ку турнир кашни ҫул иртет, кӑҫал вӑл шучӗпе 15-мӗш хут пулчӗ.
Георгий тата Петр Майрабеевсем ҫак ялтах ҫуралса ӳснӗ, шкулта вӗреннӗ чух Н.А.Узеринов тренер ертсе пыракан секцие кӗрешме ҫӳренӗ. Георгий Васильевич 1972 ҫулхи, шкулта чухнех 1 разряд илнӗ. Кайран Шупашкарти строительство техникумне пӗтернӗ. Чӑваш Республикин тата Ульяновск облаҫӗн чемпионӗ. Раҫҫей шайӗнчи турнирсен призерӗ. Спорт маҫтӑрӗн кандидачӗ. Ульяновскра пурӑнать, строительство фирмин директорӗ. Петр Васильевич 1976 ҫулхи, шкултах ирӗклӗ кӗрешсе спорт маҫтӑрӗн кандидачӗ пулса тӑнӑ. Классика кӗрешӗвӗпе Раҫҫей чемпионачӗн бронза призерӗ (1994), классика кӗрешӗвӗпе спорт маҫтӑрӗ (1996). Ульяновск облаҫӗн чемпионӗ. Раҫҫей шайӗнчи нумай турнирӑн ҫӗнтерӳҫи тата призерӗ. Халӗ строительство фирминче вӑй хурать.
Майрабеевсем ҫак пархатарлӑ ӗҫе 2009 ҫулта пуҫланӑ (пӗр ҫул ковида пула ирттермен). Вӗсем тӑван шкула нихӑҫан та пушӑ алӑпа килмеҫҫӗ. Мӗн кӑна парнелемен пуль халиччен!
Чӑваш Республикин команди патшалӑх сборнӑйӗ йышӗнче сӑрт-ту ҫулӗсенчи спорт туризмӗ енӗпе иртнӗ тӗнче шайӗнчи чемпионатра виҫҫӗмӗш вырӑн йышӑннӑ.
Чӑваш Республикинчен ҫак ӑмӑртӑва Григорий Львов, Максим Шарыпкин, Федор Ильин, Виктор Краснов тата Надежда Краснова хутшӑннӑ. Вӗсем Тянь-Шаньти Кӑрсӑс ту хырҫинче йӗркеленӗ йывӑрлӑх енчен 6-мӗш шайра тӑракан ҫула парӑнтарнӑ.
«Маршрута йӗркелес тата ӑна тивӗҫлӗн парӑнтарас енӗпе нумай ӗҫ тунӑ: тем тесен те кашни спортсмен вӑй-хал, техника тата кӑмӑл-сипет тӗлӗшӗнчен хайӑх аталанмалла. Йывӑрлӑх енчен улттӑмӗш шайра тӑракан маршрутсем – ҫак спортӑн чи йывӑр тӗсӗ, 3 эрне хушши тӑсӑлакан маршрутра спортсменсем хӑйсем ҫине тата юлташсем ҫине кӑна шанма пултараҫҫӗ. Чӑваш Республикин спорт туризмӗ енӗпе йӗркеленӗ наци команди 2018 ҫултанпа спорт туризмӗн «сӑрт-ту маршручӗ» дисциплининче Раҫҫей тата тӗнче шайӗнче иртекен ӑмӑртусенче ӑнӑҫлӑ хутшӑнса лайӑх кӑтартусем кӑтартать. Пирӗн ушкӑнсем 7 ҫул хушши Тӗнче чемпионачӗсенче, Раҫҫейри чемпионатсемпе кубоксенче ҫӗнтерӳҫӗ тата призер пулса тӑраҫҫӗ, сӑрт-ту туризмӗ енӗпе чӑваш шкулӗ ҫӳллӗ шайра пулнине тивӗҫлӗн кӑтартса параҫҫӗ», — палӑртнӑ Чӑваш Республикин Спорт туризмӗн федераци президенчӗ Владимир Атачкин.
Олимп резервӗсен 2-мӗш спорт шкулӗнче ӑсталӑхне туптакан Лана Прусакова кӑҫалхи сезонра пӗрремӗш медале ҫӗнсе илнӗ.
Вӑл фристайл енӗпе иртнӗ Раҫҫей ӑмӑртӑвӗнче кӗмӗл медаль ҫӗнсе илнӗ. Вӑл слоуп-стайл дисциплинӑра иккӗмӗш вырӑн йышӑннӑ.
Пӗрремӗш вырӑна Краснодар крайӗнчи Ксения Орлова тухнӑ. Виҫҫӗмӗш вырӑна Мускав облаҫӗнчи Елизавета Фролова йышӑннӑ.
Сӑмах май, пӗлтӗр пуш уйӑхӗнче те Лана Раҫҫей чемпионатӗнче слоуп-стайл дисциплинӑра кӗмӗл медаль илнӗ.
+17.3 °C