Ҫемье тата юратупа шанчӑклӑх кунӗ умӗн республикӑри 50 ҫултан кая мар пӗрле пурӑнакан мӑшӑрсене чысласси йӑлара. Кӑҫал 7 мӑшӑра «Юратупа шанчӑклӑхшӑн» орденне парӗҫ.
Ҫак йышра — Красноармейски округӗнчи Геннадипе Галина Ивановсем тата Владимирпа Галина Филипповсем, Куславкка тӑрӑхӗнчи Евграфипе Людмила Ивановсем, Пӑрачкав округӗнчи Владимирпа Валентина Кулясовсем, Улатӑр округӗнчи Александрпа Лидия Маланьинсем, Елчӗк тӑрӑхӗнчи Петрпа Зоя Поповсем, Хӗрлӗ Чутай округӗнчи Геннадипе Нина Ухлиновсем.
Ҫавӑн пекех 5 ача ҫуратнӑ икӗ хӗрарӑма амӑшӗн мухтавӗн «Анне» паллине чыслӗҫ. Ӑна Хӗрлӗ Чутай округӗнчи Эльвира Платонова тата Куславкка тӑрӑхӗнчи Екатерина Шильгачева тивӗҫнӗ.
Чӑваш Ене паллӑ телеертӳҫӗ Юлия Барановская килни пирки пӗлтернӗччӗ . Вӑл нумай ачаллӑ ҫемьесемпе тӗл пулнӑ. Вӗсенчен пӗри — «Чӑваш Ен» ПТРК режиссерӗн Николай Семеновӑн ҫемйи. Тепри — сӑнӳкерчӗкри.
Кӗҫех вӗсем пирки ӳкернӗ сюжета Пӗрремӗш каналпа пыракан «Большие семьи большой страны» кӑларӑмра курма май пулӗ.
Юлия Барановская телеертӳҫӗ республика Пуҫлӑхӗпе Олег Николаевпа та тӗл пулнӑ, ачаллӑ ҫемьесене мӗнле пулӑшни пирки калаҫнӑ. Ҫавӑн пекех вӑл кӳлмекре уҫӑлса ҫӳренӗ, Раҫҫейӗн тӗрленӗ карттин музейӗпе паллашнӑ.
Телеертӳҫе Чӑваш Ен килӗшнӗ, кунта тепре килес шухӑш пуррине пӗлтернӗ.
Чӑваш Ене Раҫҫейри паллӑ телеертӳҫӗ килсе ҫитнӗ. Вӑл — Юлия Барановская.
Ӑна чылайӑшӗ Пӗрремӗш каналпа кӑтартакан «Мужское/женское» телекӑларӑм тӑрӑх пӗлеҫҫӗ.
Юлия Барановская «Большие семьи большой страны» (чӑв. Пысӑк ҫӗршывӑн пысӑк ҫемйи) проектпа ҫӗршывӑн тӗрлӗ регионӗ тӑрӑх ҫӳрет. Чӑваш Енре те телесюжет валли кӑсӑкли самай тупӑнӗ. Сӑнӳкерчӗк тӑрӑх хакласан, хальлӗхе вӑл Семеновсен ҫемйипе тӗлпулнӑ.
Канаш округӗнче пурӑнакан Павловсем ылтӑн туя паллӑ тунӑ. Округри ЗАГС ӗҫченӗсем юбилярсене округ пуҫлӑхӗн ятӗнчен Валерий Черновран саламланӑ.
Григорий Ильичпа Людмила Варфоломеевна виҫӗ ачана воспитани парса ӳстернӗ. Халӗ мӑнукӗсен ҫитӗнӗвӗсемпе савӑнаҫҫӗ. Ҫемье пуҫӗ тивӗҫлӗ канӑва тухиччен бухгалтерта ӗҫленӗ, кил ӑшшин управҫи вӗрентекен тата шкул директорӗ пулнӑ. Вӗсен пӗрлехи ӗҫ стажӗ – 91 ҫул.
Саламлатпӑр юбилярсене!
Етӗрне округӗнчи Лапракасси ялӗнче пурӑнакан Наталия Садовниковӑна «Анне» хисеп паллипе чысланӑ. Вӑл мӑшӑрӗпе Юрипе икӗ хӗрпе тӑватӑ ывӑла ура ҫине тӑратаҫҫӗ.
Наталийӑшӑн пысӑк ҫемье – телей. «Ҫакӑн чухлӗ ача пурри – пысӑк пуянлӑх тата капашсӑр пысӑк телей. Эпир пурте пӗрле чухне телейлӗ. Пысӑк ҫемье – ватӑлма паман вӑй-ха», - тенӗ нумай ача амӑшӗ.
Куславкка районӗнчи пӗр ялта пурӑнакан Лукьяновсем ҫӗр ҫырли туса илме тӗллев лартнӑ. Ҫав ӗмӗтпе хавхаланса Анна Лукьянова патшалӑх контрактне алӑ пусса хыснаран укҫа илнӗ те ӑна хушма хуҫалӑха аталантарма янӑ. Тӗрӗсрех каласан, ҫӗр ҫырлин чаплӑ йышши сортне туяннӑ.
Малтанах вӗсем шикленнине пытарамаҫҫӗ: «Калча вӑй илӗ-и? Туса илме пултарӑпӑр-и?» Анчах пӗрремӗш ана ҫырла пама тытӑнсан хӗрарӑм хавхаланнӑ, халӗ вӑл ҫырла лаптӑкне пысӑклатма ӗмӗтленет.
Аннӑн упӑшки хурт-хӑмӑр ӗрчетет.
Чӑваш Енри мӑшӑр Ефимовсем пӗрлешнӗренпе 70 ҫул ҫитнине паллӑ тунӑ! Илья Никонорович тата Минадора Никитична Канаш округӗнчи Ҫӗнӗ Ахпӳрт ялӗнче пурӑнаҫҫӗ.
Вӗсен икӗ хут пысӑкрах савӑнӑҫ пулнӑ. Ҫав кунах Минадора Никитична 93 ҫул тултарнӑ. Ҫемье пуҫӗ - 95 ҫулта.
Ефимовсем 4 ача ҫуратса ӳстернӗ. Халӗ 7 мӑнукпа, вӗсен 5 ачипе савӑнса пурӑнаҫҫӗ.
Йӗпреҫ округӗнчи 45 ҫул пӗрле пурӑнакан Аркадий Петровичпа Людмила Геннадьевна Денисовсене «Ашшӗ-амӑшӗн мухтавӗ» орден медалӗпе чысланӑ. Наградӑна вӗсене ЧР Элтеперӗ Олег Николаев панӑ.
Вӗсем 6 ача ҫуратса ӳстернӗ, 11 мӑнукпа савӑнса пурӑнаҫҫӗ. Хальхи вӑхӑтра Денисовсен 4 ывӑлӗ ятарлӑ ҫар операцине хутшӑнать. Вӗсене командовани хисеп грамотисемпе чысланӑ.
«Раҫҫей. Чӗресене пӗрлештерсе» туй фестивалӗнче чӑвашсем те хут уйӑрттарӗҫ.
Фестиваль Мускавра утӑ уйӑхӗн 8-10-мӗшӗсенче иртӗ. Унта 20 регионти 200 ытла мӑшӑр хутшӑнӗ, пурте пӗрлешӗҫ.
Ҫав йышра Чӑваш Енрен Алексей Комлевпа Юлия Молчанова пулӗҫ. ЗАГС ӗҫченӗсем вӗсене «Раҫҫей» наци центрӗнче ҫырӑнтарӗҫ.
Йӗпреҫ округӗнчи Хурамал ялӗнче пурӑнакан Николайпа Раиса Кузюковсем пӗрлешнӗрӗнпе 67 ҫул ҫитнӗ. Вӗсем иккӗшӗ те – «вӑрҫӑ ачи».
Мӑшӑр 1955 ҫулта паллашнӑ. Ун чухне Николай Никифорович Хусанти ветеринари институтӗнче вӗреннӗ. Сӗнтӗрвӑрри районӗнчи Хуракасси хӗрӗ Раиса Петровна вара диплом илнӗ хыҫҫӑн направленипе Хурамала вырӑс чӗлхипе литературине вӗрентме килнӗ. Вӗсем 1958 ҫулта ҫемье ҫавӑрнӑ, 4 ывӑл ӳстернӗ. Тӑваттӑшӗ те ашшӗн ҫулӗпе кайнӑ.
-7.7 °C