Юстици ӗҫӗсен патшалӑх служби кӑҫал ашшӗ-амӑшӗ тин ҫуралнӑ ачисене ытларах мӗнле ят панине тишкернӗ: Чӑваш Енре Ева, Михаил ятлӑ ачасем ытларах ҫуралнӑ.
Ҫавӑн пекех хӗрачасен ТОП-5 йышне Анна, Виктория, София, Мария кӗнӗ. Арҫын ачасен ТОП-5 йышӗнче вара — Михаилсӑр пуҫне Матвей, Роман, Александр, Марк.
Палӑртмалла: кӑҫал нумайӑшӗ «Ача ҫурални» суперсервиспа усӑ курнӑ — йыш хушнисен 72 проценчӗ ун урлӑ регистраци тума заявлени панӑ. Питӗ меллӗ: ача ҫуралнине ӗнентерекен свидетельствӑна илес тесен кӑшт кӑна вӑхӑт ирттермелле.
Елчӗк округӗнчи Элпууҫ ялӗнче пурӑнакан Столяровсем «тимӗр туя» паллӑ тунӑ. Вӗсем пӗрлешнӗренпе 65 ҫул ҫитнӗ.
Анатолий Ивановичпа Зоя Ивановна ӗмӗр тӑршшӗпех тӑван тӑрӑхӗнче пурӑнаҫҫӗ, колхозра ӗҫлесе тивӗҫлӗ канӑва тухнӑ. Вӗсем виҫӗ ача ҫуратса ӳстернӗ, халӗ 6 мӑнукпа, 6 кӗҫӗн мӑнукпа савӑнса пурӑнаҫҫӗ.
Шӑмӑршӑ округӗнче пурӑнакан Мироновсем пӗрлешнӗренпе ҫур ӗмӗр ҫитнӗ. Вӗсем ылтӑн туйне паллӑ тунӑ.
Нина Михайловнӑпа Николай Александрович ҫур ӗмӗр каялла паллашнӑ та 1975 ҫулхи чӳк уйӑхӗнче туй тунӑ. Виҫӗ ача ӳстернӗ вӗсем. Халӗ пилӗк мӑнукӗпе савӑнса пурӑнаҫҫӗ.
Николай Александрович – ӗҫ ветеранӗ. Нина Михайловна вырӑнти хӑйтытӑмлӑхра тата почтӑра ӗҫлесе хисепе тивӗҫнӗ.
Вӑрнар округӗнчи Мӑньял Хапӑс ялӗнче пурӑнакан Степановсем «Юратупа шанчӑклӑхшӑн» ордена тивӗҫнӗ. Вӗсем 50 ҫул пӗрле ӗнтӗ.
Каччӑпа хӗр ҫамрӑк чухне паллашнӑ: Людмилӑн ҫемйи Мӑньял Хапӑс ялне куҫса килсен Вячеслав ӑна куҫ хывнӑ. 1975 ҫулта вӗсем пӗрлешнӗ, икӗ ача ҫуратса ӳстернӗ.
Вячеслав Павлович Хусанти университетра вӗреннӗ чухнех судьяра ӗҫлеме тытӑннӑ. Людмила Владимировна малтан медицинӑра ӗҫленӗ, кайран юрист пулнӑ. Вӑл 12 ҫул адвокатра тӑрӑшнӑ, кайран 10 ҫул ытла миравай судья пулнӑ.
Ачисем те ашшӗ-амӑшӗн ҫулӗпе кайнӑ. Татьяна Росреестрӑн республикӑри Управленийӗн ертӳҫин ҫумӗ, вӑл – ЧР тава тивӗҫлӗ юрисчӗ. Евгений юридици компанине ертсе пырать.
Шӑмӑршӑ округӗнче пурӑнакан Мироновсем ылтӑн туйне паллӑ тунӑ. Вӗсем виҫӗ ача ӳстернӗ, халӗ пилӗк мӑнукӗпе савӑнса пурӑнаҫҫӗ.
Нина Михайловнӑпа Николай Александровичӑн историйӗ 1975 ҫулта пуҫланнӑ. Нина водительте ӗҫлекен Николайпа паллашнӑ. Икӗ ҫул туслӑ ҫӳресен ҫамрӑксем пӗрлешнӗ.
Николай Александрович районти пульницӑра 30 ҫул ытла водитель-механикре ӗҫленӗ, вӑл – ӗҫ ветеранӗ. Нина Михайловна ял хуҫалӑх управленийӗнче, ял канашӗнче тата почтӑра вӑй хунӑ.
Тӑвай округӗнчи Тӑрмӑш ялӗнчи Димитриевсем 70 ҫул пӗрле пурӑннине паллӑ тунӑ. Александр Димитриевичпа Ефросиния Степановна ҫавӑн чухлӗ ҫул пӗр сукмакпа килӗштерсе утаҫҫӗ.
Александр Димитриевич ялти клуб ертӳҫинче нумай ҫул ӗҫленӗ. Ефросиния Семеновна колхозра вӑй хунӑ, почтамт ертӳҫинче тӑрӑшнӑ. Димитриевсем 5 ача ҫуратса ӳстернӗ.
90 ҫултан иртнӗ пулсан та вӗсем халӗ те ӗне усраҫҫӗ, пахчара ӗҫлеме те ӳркенмеҫҫӗ.
Канаш округӗнчи Чӑрӑшкасси ялӗнче пурӑнакан Николаевсем пӗр сукмакпа 55 ҫул утаҫҫӗ. Вӗсем ҫак уява паллӑ тунӑ.
Ҫамрӑксем Шупашкарта паллашнӑ. Фаина ун чухне Культура министерствинче методистра ӗҫленӗ, Анатолий Культура ҫуртӗнче илемлӗх ертӳҫи пулнӑ. Вӗсен хушшинче юрату ҫуралнӑ.
1970 ҫулхи чӳкӗн 8-мӗшӗнче 24-ри каччӑпа 21 ҫулти хӗр пӗрлешнӗ. Анатолий вырӑнти фабрикӑра столярта ӗҫленӗ, райсудра завхоз пулнӑ. Фаина Атнаш шкулӗнче малтан – пионервожатӑй, унтан вырӑс чӗлхипе литературин вӗрентекенӗ пулнӑ, тивӗҫлӗ канӑва тухиччен директор тивӗҫне пурнӑҫланӑ. Вӗсем икӗ ача ӳстернӗ, халӗ 3 мӑнук пур.
Ханна юрӑҫ Шупашкара Мускавран пуйӑспа килнине кӑтартакан сӑнӳкерчӗксене халӑх тетелӗнче вырнаҫтарнӑ.
Ханна Шупашкара ҫемьепе килнӗ. Хӗрарӑм пӗлтернӗ тӑрӑх, вӑл хӑйӗн ачисене ҫул илӗртӳлӗхне кӑтартас тенӗ.
Кунта Ханнӑн ашшӗпе амӑшӗпе тӗл пулнӑ.
Ханна (Анна Иванова) тӗрлӗ илем конкурсӗнче ҫӗнтернӗ, «Ылтӑн граммофон» премие тӑватӑ хутчен тивӗҫнӗ.
Унӑн упӑшки — «Black Star Inc» лейбл ертӳҫи. Вӗсен икӗ хӗр, иккӗшне те ҫынтан уйрӑлса тӑмалла ят панӑ: Адриана тата Камилла.
Чӳк уйӑхӗнче Чӑваш Енре ҫемье ҫавӑракансем нумай пулӗҫ. Ку ҫав уйӑхра хитре янӑракан кунсем пуррипе ҫыхӑннӑ.
Чӳк уйӑхӗнче республикӑра 400 яхӑн ҫемье чӑмӑртанӗ. Ытларахӑшӗ хитре кун суйланӑ: чӳкӗн 25-мӗшӗ (25.11.25) тата чӳкӗн 15-мӗшӗ (15.11.25).
Аса илтерер: юпа уйӑхӗнче республикӑра 400 ытла ҫемье чӑмӑртаннӑ.
Шупашкарта пурӑнакан пӗр ҫемье ҫулталлӑкри ачана татурировка тунине кӑтартакан видео ӳкернӗ, ӑна халӑх тетелӗнче вырнаҫтарнӑ.
Ҫав ҫемьене йӗрке хуралҫисем тупнӑ. Ҫамрӑк ашшӗ ӑнлантарнӑ тӑрӑх, вӗсем тату туман, тату машинин сассине ҫыртарса илнӗ. Вӑл видеопа темле конкурса хутшӑнса ҫамрӑк ҫемье хваттер щыраса илес тенӗ-мӗн.
Халӗ ку ҫемьене учета илӗҫ, йӗрке хуралҫисем вӗсем мӗнле пурӑннине тӗрӗслесе тӑрӗҫ.
+25.3 °C